བདེ་པོ་འཚོས་དབྱིན་ཡིག་ལས་བསྒྱུར།
དེང་སྐབས་འཛམ་གླིང་གང་སར་ཆེས་དར་ཁྱབ་ཆེ་ཞིང་གྲོགས་པོ་ཕན་ཚུན་བར་གང་ཅི་ཐད་ ནས་འབྲེལ་ལམ་འཛིན་བདེ་བའི་མྱུར་ཕྲིན་དྲྭ་རྒྱ་དུ་མ་ཡོད་ཀྱང་དེ་དག་ལས་ཤིན་ཏུ་མཁོ་སྤྱོད་ཆེ་བའི་གར་སྟེགས་གཅིག་ནི་གདོང་དེབ་བམ་ངོ་དེབ་ཅེས་པ་འདི་ཉིད་ཡིན་སྟབས། དེ་རིང་ཕྱི་དྲོའི་ཆར་ངས་ཀྱང་ང་རང་ཉིད་ཀྱི་གདོང་དེབ་དྲྭ་སྒོ་ལན་གཅིག་ཕྱེ་མ་ཐག་དྲ་ངོས་སུ་བྱིས་པ་ཆུང་ཆུང་ཞིག་གི་མིག་འབྲས་གཉིས་ཆེ་ཞིང་གསལ་ལ་རྣམ་པར་བཀྲ་བའི་འདྲེན་བྱེད་ཀྱི་གོང་བུ་གཉིས་ཀེམ་ཀེམ་དུ་གཡོ་ཞིང་མཆི་མའི་ཐིགས་ཕྲེང་འགོག་མེད་དུ་བཞུར་བཞིན་པའི་འདྲ་པར་ཞིག་ཡོད་པ་མཐོང་བ་ཙམ་གྱི་མོད། བྱིས་པ་ཆུང་ཆུང་དེའི་ཡིད་ལ་བཟོད་དཀའ་བའི་སྐྱོ་གདུང་དྲག་པོ་ཞིག་དང་ཆབས་ཅིག དེའི་རྒྱབ་ལྗོངས་ལ་སུས་ཀྱང་མི་ཤེས་པའི་ལྐོག་འགྱུར་གྱི་གསང་བ་ཞིག་ཡོད་པ་ནི་ཅི་ནས་ཀྱང་ཤེས་ཐུབ། དེར་མ་ཟད་པར་དེའི་གཤམ་དུ་དབྱིན་ཡིག་ནང་བྲིས་པའི་བརྗོད་བྱ་དེ་དག་སྣང་བརྙན་དེ་དང་འབྲེལ་བ་གཏིང་ཟབ་ཡོད་ཅིང་བལྟས་པ་ཙམ་གྱིས་གསལ་པོར་རྟོགས་ངེས་པ་ཞིག་རེད།
ཉི་མ་དེའི་ཕྱི་དྲོར་གཞུང་ཞབས་པ་དང་། བཟོ་གྲྭ་སོགས་ཀྱི་ལས་མི་རྣམ་པ། སློབ་གྲྭ་ཁག་གི་སློབ་ཕྲུག་དག་ཕྱོགས་སོ་སོ་ནས་སོ་སོས་ལས་དོན་གང་འཚམ་བསྒྲུབས་ནས་གྲོལ་སྐབས། ལམ་ཟུར་གྱི་ཚོང་ཁང་ཆུང་ཆུང་ཞིག་གི་སྒོ་འགྲམ་ནས་བྱིས་པ་ལོ་ན་དྲུག་ཅན་ཞིག་གིས་ཨ་ལད་པད་ཀོ(doll)སྙིང་རྗེ་མོ་ཞིག་ལག་ཏུ་བཟུང་སྟེ་ངུ་བཞིན་ཡོད། ལམ་དེར་བརྒྱུད་མཁན་གྱི་མི་ཚང་མ་རྒྱུགས་འགྲན་ལ་ཞུགས་པ་ལྟར་གཅིག་ལས་གཅིག་གིས་མགྱོགས། སུས་ཀྱང་བྱིས་པ་ཆིང་ཆུང་དེར་དོ་སྣང་མ་བྱས།
མཚམས་ཤིག་ལ་ཕར་འགྲོ་ཚུར་འོང་བྱེད་མཁན་ཡང་ཉུང་ནས་ཉུང་དུ་ཕྱིན། ད་དུང་བྱིས་པ་དེ་སྔར་བཞིན་དཀར་ལ་འཇམ་པའི་མཁུར་ཚོས་གཉིས་མིག་ཆུས་བརླན་ཏེ་ཨ་ལད་པད་ཀོའི་གདོང་ལ་ཅེར་ནས་ངུ་བཞིན་ཡོད། སྐབས་དེར་ཅ་དངོས་ཙག་ཙིག་ཉོ་རུ་ཡོང་མཁན་གྱི་ཚོང་པ་ཞིག་གིས་ཚུལ་དེ་མཐོང་བ་ན་ཁོ་བོས་སེམས་ཀྱིས་མ་བཟོད་པར་བྱིས་པ་ཆུང་ཆུང་ལ་ཁྱོད་ཅི་ཕྱིར་ངུ་བཞིན་ཡོད་ཅེས་དྲིས།
བྱིས་པ་ཆུང་ཆུང་དེས་མིག་གཉིས་ལག་པས་ཕྱི་ཙམ་ཕྱི་ཙམ་རེ་བྱས་ཏེ། དེ་རིང་ནི་ངའི་གཅེན་མོའི་སྐྱེས་སྐར་ཡིན། ཁོ་མོ་ཆེས་དགའ་སའི་རྩེད་ཆས་ནི་ཨ་ལད་པད་ཀོ་ཡིན། དེ་རིང་ནི་ངའི་བརྩེ་བའི་ཨ་མ་ལགས་ཀྱང་གཅེན་མོ་ཁོང་ལ་ཐུག་ཕྲད་ཆེད་དུ་འགྲོ་ངེས་པ་ཡིན་པས། ངས་དེ་རིང་གི་ཉི་མ་འདི་ལ་ཨ་ཅག་ལགས་ཀྱི་སྐྱེས་སྐར་ལ་ཆེད་དུ་ལེགས་སྐྱེས་སུ་རྩེད་ཆས་འདི་ཉོས་ཏེ་ཧ་ཅང་བསྐུར་འདོད་ཡོད་ཀྱང་ངའི་གློ་ཁུག་ནང་གི་ཤོག་དངུལ་གྱིས་ཉོ་ཐབས་བྲལ་བས་ང་ངུ་བཞིན་ཡོད་ཅེས་ལན་བཏབ།
ཁོས་སེམས་གཏིང་ནས་སྙིང་རྗེ་སྟེ་བྱིས་པ་ཆུང་ཆུང་དེའི་མི་མཐོང་སར་ག་ལེར་ཤོག་དངུལ་འགའ་ཁོ་བོའི་གློ་ཁུག་ནང་དུ་བླུགས་ཏེ། སེམས་གསོའི་ཚུལ་དུ། ཁྱོད་མ་ངུ་དང་། རྩེད་ཆས་དེ་ཉོ་ཐུབ་པ་མ་ཟད་ཁྱེད་ཀྱིས་ཁོ་མོ་དགའ་རུ་འཇུག་ཁོ་ཐག་ཡིན་ཞེས་བརྗོད། བྱིས་པ་དེས་ཀྱང་ཁོའི་སྐད་ཆ་བདེན་པར་སྣང་སྟེ་མགྱོགས་མྱུར་ངང་གློ་ཁུག་བཏོན་ཏེ་དངུལ་དག་ཕྱི་རུ་བླངས།
བྱིས་པ་ཆུང་ཆུང་དེས་རང་ཉིད་ཀྱི་ཕོན་ཆུང་བའི་དངུལ་ལོ་དེ་དག་སྔར་ལས་ཅུང་མང་དུ་ཕྱིན་པ་ཤེས་མ་ཐག་ཏུ། ཁ་ནས་རང་དབང་མེད་པར་མིག་ཟུང་བཙུམས་ནས་ཐལ་མོ་སྙིང་གར་ཟུམ་སྟེ་དཀོན་མཆོག་ གསུམ་ལ་བཀའ་དྲིན་ཆེ་ཞེས་ལན་གྲངས་གསུམ་བར་དུ་བརྗོད། རྒྱུ་མཚན་ནི་ཁ་སང་དགོང་མོར་བརྩེ་བའི་ཨ་མ་ལགས་ལམ་ལ་མ་ཆེས་པའི་སྔོན་དུ་རྩེད་ཆས་དེ་ཉོ་ཐུབ་པའི་སྨོན་ལམ་དང་དཀོན་མཆོག་རྣམ་གསུམ་ལ་གསོལ་འདེབས་གང་མང་བཏབ་ཡོད་པས་རེད་འདུག
བྱིས་པ་ཆུང་ཆུང་དེ་ཧ་ཅང་དགའ་ནས་ས་མཆོང་གནམ་མཆོང་ཐེངས་མང་བྱེད་བཞིན་ཚོང་པ་དག་གི་གམ་ལ་རྒྱུགས་ནས། ཨ་ལད་པད་ཀོ་འདི་ངས་ཉོ་དགོས་ཞེས་སྤྲོ་སྣང་དང་བཅས་དེ་དངུལ་རྣམས་ཚོང་བདག་ལ་རྩིས་སྤྲད་བྱས། ཚོང་བདག་དེས་འཛུམ་ཤིག་ཤིག་གི་བྱིས་པའི་ཞལ་ངོ་དེ་མཐོང་བ་ན་བྱིས་པ་དེ་རང་ཉིད་ལ་ཅི་ཞིག་ཐོབ་སོང་བ་ལྟར་ཡིད་མགུ་ནས་ཕྱིར་འགྲོ་གྲབས་བྱེད་སྐབས། སླར་ཡང་བྱིས་པ་དེ་ཁོའི་འགྲམ་དུ་སོང་ནས། ཨ་ཁུ་ཚོང་པ་ལགས། ཕ་གི་རྒྱ་སེའི་མེ་ཏོག་དཀར་པོ་དེ་ནི་ཅི་འདྲའི་ལྟ་ན་སྡུག་པ་ལ་ཨང་། དེ་ནི་ངའི་བརྩེ་བའི་ཨ་མ་ལགས་ཆེས་དགའ་སའི་མེ་ཏོག་ཡིན། འདི་ཉོ་ཐུབ་སོང་ན་ཅི་མ་རུང་ཞེས་སླར་ཡང་མིག་གཉིས་མིག་ཆུས་ཁེངས།
ཚོང་བདག་དེས་མགྱོགས་པོར་ཁོ་རང་ཉིད་ཀྱི་དངུལ་ཁུག་ལས་དངུལ་བཏོན་ནས་མེ་ཏོག་དེ་ཉོས་ནས་ཁོ་ལ་སྤྲད། ཉི་མ་དེའི་ཕྱི་ཉིན་ཞོགས་པར་ཉིན་རེའི་ཚགས་ཤོག་གི་མདུན་དངོས་སུ། ར་བཟི་ཞིག་གིས་རླངས་འཁོར་བཏང་སྟེ་རང་ཉིད་ཀྱི་བུ་མོ་རྐྱེན་ལམ་དུ་ཤོར་བ་མ་ཟད། བཟའ་ཟླ་ཡང་རྨས་སྐྱོན་ཚབས་ཆེན་ཕོག་ཡོད་པ་དང་རྗེས་སུ་བཟའ་ཟླ་ཡང་འཇིག་རྟེན་འདི་ནས་ཁ་བྲལ་ཟིན་པ་དང་ཤུལ་དུ་བྱིས་པ་ལོ་དྲུག་ཅན་གཅིག་ལས་ལྷག་མེད་ལུགས་བརྗོད་ཡོད། ཚོང་བདག་དེས་གློ་བུར་དུ་ཁ་སང་གི་བྱིས་པ་ཆུང་ཆུང་དེ་ཡིད་ལ་དྲན་ནས། ཚགས་ཤོག་ཏུ་གསལ་བའི་ཁ་བྱང་དེ་ཡིད་ལ་བཟུང་སྟེ་གླ་འཁོར་ཆུང་ཆུང་ཞིག་གླས་ཏེ་ ཕྱིན། ཁྱིམ་ཚང་དེའི་སྒོ་འགྲམ་དུ་བསླེབས། དེར་ཡོད་ཀྱི་མི་ཚང་མའི་གདོང་ལ་སྐྱོ་སྡུག་གིས་ཁེངས་ཤིང་གོས་ལྭ་ནག་རྐྱང་རེ་གྱོན་ཏེ་ཕར་ཚུར་རྒྱུ་བཞིན་ཡོད།
སྒོ་ནང་མར་འཛུལ་སྐབས་འཕྲལ་དུ་མཐོང་བ་ནི། དྲི་ཞིམ་འཐུལ་བའི་མེ་ཏོག་དང་མིག་དབང་འཕྲོག་པའི་གོས་སྣས་གཡོགས་པའི་ཤིང་སྒམ་གྲུ་བཞི་མ་ཞིག་གི་ནང་ལ་བཞིན་མདངས་དཀར་ལ་སྨིན་མ་གནག་ཅིང་སྣུམ་པའི་བུད་མེད་ཅིག་གི་བེམ་རོ་མཐོང་ཐུབ། དེའི་ལག་ཏུ་ཁ་སང་གི་བྱིས་པ་ཆུང་ཆུང་དེའི་པར་དང་ཁོས་ཉོས་པའི་རྒྱ་སེའི་མེ་ཏོག་གི་ཆུན་པོ་དེ་ཡང་མཐོང་བྱུང་། ཁོ་མོ་ནི་ཁ་སང་གི་བྱིས་པ་ཆུང་ཆུང་དེའི་ཨ་མ་ཡིན་པ་དང་། ཁོ་བོའི་གཅེན་མོ་ནི་ཉིན་འགའི་སྔོན་ནས་གྲོངས་ཟིན་པ་དང་བརྩེ་བའི་ཨ་མ་ལགས་ནི་དེ་རིང་གི་ཆར་འཇིག་རྟེན་འདི་ནས་ཕྱི་མའི་ལྔ་ལམ་དུ་ཕྱིན་སོང་།
བྱིས་པ་ཆུང་ཆུང་ནི་བྱིས་པ་རང་ཡིན་པས། རང་གི་བརྩེ་བའི་ཨ་མ་ལགས་གཅེན་མོའི་སར་ཕྱིན་པ་ལས་ནམ་ཡང་ཕྱིར་འོང་མེད་པ་ག་ལ་ཤེས། དེར་བརྟེན་ཁོས་ཉོས་ཏེ་བསྐུར་བའི་ལེགས་སྐྱེས་ཨ་ལད་པད་ཀོ་དེ་བརྩེ་བའི་ཨ་མ་ལགས་ནས་ཨ་ཅག་ལགས་ལ་དངོས་སུ་སྤྲོད་ཐུབ་རྒྱུའི་རེ་བ་དང་ཡིད་ཆེས་གཏིང་ཚུགས་པ་ཞིག་བྱས་ཏེ་བསྡད་ཡོད་དོ།།
༢༠༡༤/༨/༣
ཨ་ལད་པད་ཀོག་ཅེས་པ་འདི་གོ་རྒྱུ་ཅི་ཡང་མི་འདུག སྤྱིར་ན་ཐ་སྐད་འདི་བོད་སྐད་ཅིག་ཡིན་ནམ།
འདིར་
ཐ་སྙད་
དིང་སང་ཡང་། བོད་ཀྱི་ལུང་ཁུག་ཏུ། ཕྲུ་གུས་རྩེད་མོ་རྩེས་པ་ལ། ཨ་ལག་རྩེད་ཟེར་སྲོལ་འདུག ཨིན་སྐད་ཌོལ་ doll ལ། ཨ་ལག་པད་ཀོག་དང་། ཨ་ལད་པད་ཀོག་ཞེས་ཚིག་མཛོད་དུ་གཉིས་ཀར་བྲིས་འདུག་ཀྱང་། སྔ་མ་ཨ་ལག་པད་ཀོག འདི་དག་ག་ཡོད་ཚོད་འདུག
ཨ་ལད་པད་ཀོག་ཅེས་པ་ནི་བོད་དབུས་གཙང་གི་ཡུལ་སྐད་རེད།
ཡག་པོ་འདུག འགྱུར་ཚིག་འགའ་ཤས་ལ་འགལ་བ་ཡོད་སྣང་ཞིག་འདུག
ཀླུ་སྨྱོན་ལེགས།
ང་ཚོ་བོད་པར་འདོད་རྒྱལ་གྱི་མིང་ཆེས་ཉུང་བ་ལས་མང་བ་མེད། ཉི་མ་དང་ཟླ་བ། དེ་བཞིན་ཀླུ་ལྟ་བུ་ཡོང་ཆོག་སར་ཨ་ལད་པད་ཀོག་ཟེར་ན་ཅི་མིའགྲིགས། མིང་བསམ་བློ་གཏོང་དུས་རྗེས་གྲུབ་ཁོ་ནར་ཕྱོགས་པ་དེས་བོད་སྐད་ཀྱི་གཟུངས་ཤོར་བར་བྱེད། དེ་མིན་ཚང་མ་རྒྱ་དང་དབྱིན་སྐད་ནས་དོན་སྒྱུར་བྱས་ནས་ཡིད་ངག་གཉིས་ལ་སྡུག་སྦྱོང་སྤྲོད་པ་དེ་ད་ལྟའི་བོད་སྐད་ཡ་མ་ཟུང་གི་སྣང་ཚུལ་དེ་རེད།
སྔོན་མའི་བོད་པ་ཚོའི་འདོད་རྒྱལ་གྱི་མིང་སྙན་མོ་དེ་དག་ལ་བསམ་བློ་གཏོང་དུས་ད་ཆའི་ཤེས་ཡོན་པ་ཚོ་ནི་ལད་མོ་ཅན་གྱི་སྤྲེའུ་ཅིག་ལས་གཞན་ཆ་མི་འཚལ།
ཁྱོད་ལྟོས་དང་། འཛམ་གླིང་གི་སྐད་ཡིག་ཕྱུག་ཤོས་དབྱིན་ཡིག་ལ་རྗེས་གྲུབ་མང་བ་འདུག་འདོད་རྒྱལ་མང་བ་འདུག