དགའ་ཉག་འཁྱམ་པོ།
སྐྱིད་མ་སྡུག་གི་རྟ་ཡི་ལོ་དེ་བུད་ནས་སོང་།།
རེ་བའི་ཁྲོད་ཀྱི་ལུག་གི་ལོ་དེ་འཛུམ་ནས་བྱུང་།།
འཆར་སྣང་མང་བའི་འཆར་གཞི་དེ་ཚོ་ཚེས་ནས་ཐལ།།
བཀྲ་ཤིས་བདེ་ལེགས་ཤིས་ཚིག་དེ་ཡང་ངག་ནས་ཤོར།།
བསམ་བློ་མི་གཅིག་ལས་རིགས་མི་འདྲ་ཞིང་།
ཁམས་དང་མོས་པ་ཁ་ཕྱོགས་མི་མཚུངས་པའི།།
འཛམ་གླིང་ཤར་ནུབ་ངོ་གདོང་མི་འདྲ་བའི།།
སྐྱེ་བོ་ཀུན་ལ་ཞི་བདེ་འབྱོར་པར་ཤོག།
སྐྱ་སེར་མི་གཅིག་མདུན་ལམ་མི་འདྲ་ཞིང་།།
དད་མོས་འདུ་ཤེས་དམིགས་ཡུལ་མི་མཚུངས་པའི།།
གཞིས་བྱེས་གཉིས་ཀྱི་འཚོ་བ་མི་འདྲ་བའི།།
གངས་ཅན་བོད་མིར་བདེ་སྐྱིད་ལྡན་པར་ཤོག །
གྲུབ་མཐའ་མི་གཅིག་ལྟ་བ་མི་འདྲ་ཞིང་།།
ཕྱག་སྲོལ་ཆོ་ག་བརྒྱུད་པ་མི་མཚུངས་པའི།།
གཡུང་དྲུང་བོན་སོགས་ཆོས་ལུགས་མི་འདྲ་བའི།།
ཆོས་སྡེ་འཆམ་མཐུན་བོད་ལ་གནས་པར་ཤོག །
དགེ་རྒན་མི་གཅིག་ལམ་སྟོན་མི་འདྲ་ཞིང་།།
སློབ་ཁྲིད་ཉམས་མྱོང་འཆར་གཞི་མི་མཚུངས་པའི།།
རྣམ་རིག་སྤེལ་ལ་ཐབས་བཀོད་མི་འདྲ་བའི།།
སློབ་གྲྭ་བཟང་པོས་བོད་ཡུལ་གང་བར་སྨོན།།
བརྩེ་བ་མི་གཅིག་འདུན་པ་མི་འདྲ་ཞིང་།།
དུང་བ་དྲན་པ་སེམས་འཁུར་མི་མཚུངས་པའི།།
ཕ་མའི་དྲིན་ལན་གསབ་སྟངས་མི་འདྲ་བའི།།
བུ་ཕྲུག་ཡ་རབ་བོད་དུ་གནས་གྱུར་ཅིག །
ལག་རྩལ་མི་གཅིག་ལས་ཀ་མི་འདྲ་ཞིང་།།
བཟོ་རྩལ་འཆར་འགོད་མཛེས་ཆོས་མི་མཚུངས་པའི།།
དུས་རབས་གསར་པའི་ཁྱད་ཆོས་མི་འདྲ་བའི།།
བཟོ་གྲྭ་ཚད་ལྡན་བོད་ལ་འབྱུང་བར་ཤོག །
བཟོ་གྲྭ་མི་གཅིག་བེད་སྤྱོད་མི་འདྲ་ཞིང་།།
སྤུས་ཚད་ཡག་བཙོག་རིན་གོང་མི་མཚུངས་པའི།།
ཉེར་མཁོ་དངོས་པོ་བྱེད་ནུས་མི་འདྲ་བའི།།
ཅ་ལག་སྤུས་ལེགས་བོད་ལ་ཐོན་པར་ཤོག །
གདུག་རྩུབ་མི་གཅིག་སྡིགས་པ་མི་འདྲ་ཞིང་།།
དབང་བསྒྱུར་གཉའ་གནོན་རྣམ་པ་མི་མཚུངས་པའི།།
མ་རུང་བྱ་སྤྱོད་མིང་ཙམ་མི་འདྲ་བའི།།
ཉེར་འཚེ་མ་ལུས་བོད་ནས་ཞི་གྱུར་ཅིག །
ཕ་ཡུལ་མི་གཅིག་འཚོ་ཐབས་མི་འདྲ་ཞིང་།།
དགའ་སྐྱོ་ཚོར་བ་དྲན་གདུང་མི་མཚུངས་པའི།།
གནས་ཡུལ་གནས་སྟངས་ཤར་ནུབ་མི་འདྲ་བའི།།
བྱེས་ཀྱི་སྤུན་ཟླ་བོད་ལ་བསླེབ་པར་ཤོག །
2142/2/1 一 2015/2/19