ཨེ་མ་ཧོ།
ན་མོ་གུ་རུ་པདྨ་ཀ་ར་ཡེ། ཕྱི་ཡུལ་གཟུགས་སོགས་སྣང་བ་ཀུན།། འཁྲུལ་བ་ཡིན་པའི་གནད་ཤེས་ནས།། བདེན་མེད་གཟུང་བའི་རང་བཞིན་ལ།། ཡིད་སྟོན་མེད་པ་ཤེས་པར་མཛོད།། ནང་སེམས་ཚོགས་དྲུག་ཤེས་པ་ཀུན།། སྟོང་བ་ཡིན་པའི་གནད་ཤེས་ནས།། བདེན་གྲུབ་འཛིན་པའི་རང་བཞིན་ལ།། བདག་གཉིས་མེད་པ་གོམས་པར་མཛོད།། ཕྱི་ནང་གཟུང་འཛིན་རྣམ་རྟོག་ཀུན།། སྐད་ཅིག་ཡིན་པའི་གནད་ཤེས་ནས།། གློ་བུར་འཇིག་པའི་རང་བཞིན་ལ།། མི་རྟག་ཡིན་པ་ཤེས་པར་མཛོད།། འབྱུང་འདུས་ལུས་ངག་འདུས་བྱས་ཀུན།། སེམས་ཙམ་ཡིན་པའི་གནད་ཤེས་ནས།། སེམས་ཅན་བདེ་སྡུག་རང་བཞིན་ལ།། ལས་འབྲས་བསླུ་མེད་ཤེས་པར་མཛོད།། སྡུག་བསྔལ་གསུམ་གྱི་ཚོར་བ་ཀུན།། ངེས་འབྱུང་བསྐུལ་མའི་གནད་ཤེས་ནས།། སོ་སོར་ཐར་པའི་རང་བཞིན་ལ།། རྒྱུ་རྐྱེན་འཛོམས་པ་ཤེས་པར་མཛོད།། རང་དོན་ཞེན་པའི་ཆགས་སྡང་ཀུན།། མ་རིག་ཡིན་པའི་གནད་ཤེས་ནས།། གཞན་ཕན་དོན་གཉེར་བྱ་བ་ལ།། སྙིང་པོ་ཡོད་པ་ཤེས་པར་མཛོད།། མ་དག་ལོག་ལྟའི་འཛིན་པ་ཀུན།། དག་སྣང་ཞན་པའི་གནད་ཤེས་ནས།། གསང་སྔགས་དག་པ་རབ་འབྱམས་ལ།། དག་རྫོགས་སྨིན་པ་ཤེས་པར་མཛོད།། བདེ་སྐྱིད་འཁོར་བའི་རྩ་བ་ཀུན།། ཞེན་ཆགས་བདུད་འདྲེའི་གནད་ཤེས་ནས།། བདེ་ཆེན་དོན་གྱི་ཡེ་ཤེས་ལ།། ཕྱག་རྒྱའི་སྦྱོར་བ་ཤེས་པར་མཛོད།། འདུ་འཛི་ཆོས་ཀྱི་འགལ་རྐྱེན་ཀུན།། ཀུན་བཟང་ཆོས་སྐུའི་གནད་ཤེས་ནས།། གང་ཤར་ཆོས་ཉིད་རང་གྲོལ་དུ།། མངོན་སངས་རྒྱས་པ་ཤེས་པར་མཛོད།། སྦྱོར་བ་སེམས་བསྐྱེད་དམ་པ་ཀུན།། དངོས་གཞིའི་བསྐྱེད་རྫོགས་གནད་ཤེས་ནས།། བསྟན་འགྲོར་ཕན་བདེའི་ཕྱིར་ཏུ་བསྔོ།། ཚེ་གཅིག་འཇའ་ལུས་ཐོབ་པར་མཛོད།།
ཅེས་པ་འདི་ཡང་རབ་རྒྱན་མེ་ལུག་ཆོ་འཕྲུལ་ཟླ་བའི་དབང་ཕྱོགས་དགེ་བའི་ཆར་འཕགས་ཡུལ་གཏན་བཞུགས་པའི་མཁྱེན་བརྩེ་ཆོས་སྒྲོན་གྱིས་སྐུལ་ངོར་གང་ཤར་དུ་གོ་བདེའི་ཉམས་ལེན་གྱི་གནད་འགག་རྣམས་ཚིགས་སུ་བཅད་པ་འདི་དག་དབྱིན་ཡུལ་ཀུན་བཟང་ཆོས་གླིང་ནས་རིག་འཛིན་ཤྲྰིཿཨེ་མ་ཧོས་བྲིས་པར་དགེའོ།། །། ཕྱི་ལོ་༢༠༡༥/ ༢/ ༡༡/་ལ།
མཁྱེན་བརྩེ་ཆོས་ཀྱི་སྒྲོན་མ་ལ། །
དགྱེས་པ་རྡོ་རྗེས་འདི་ལྟར་གདམས། །
་
འབྱུང་འདུས་ལུས་ངག་འདུས་བྱས་ཀུན།།
སེམས་ཙམ་ཡིན་པའི་གནད་ཤེས་ནས།།
སེམས་ཅན་བདེ་སྡུག་རང་བཞིན་ལ།།
ལས་འབྲས་བསླུ་མེད་ཤེས་པར་མཛོད།།
་
སེམས་ཙམ་ཡིན་ན་གཟུགས་ཤེས་གཉིས། །
ཁྱད་པར་གང་གིས་འབྱེད་ཐུབ་བམ། །
ཨེ་མ་ཧོ་ངོ་མཚར་ཆེ་བྱུང་།
རང་སེམས་གསལ་བའི་མེ་ལོང་དང་།
མཐོང་མཐོང་མང་པོའི་དྲན་པ་གཉིས་།
འདྲ་འདྲ་འདྲ་ལ་ནོར་ཉེན་ཡོད་།
ཆོས་བཤད་ཁ་རྩལ་རིག་པ་དང་།
ལག་ལེན་དོན་ལ་འཇུག་པ་གཉིས་།
འདྲ་འདྲ་འདྲ་ལ་ནོར་ཉེན་ཡོད་།
གནས་ལུགས་ངོ་སྤྲོད་བྱེད་མཁན་དང་།
བྱང་སེམས་གཞན་ལ་ཕན་མཁན་གཉིས་།
འདྲ་འདྲ་འདྲ་ལ་ནོར་ཉན་ཡོད་།