སངས་རྒྱས་དཀོན་མཆོག
མི་རབས་ཤིག་འདི་ལྟར་འདས་སོང་
རྩིག་རྡེབ་ངོས་ཀྱི་བཀྲག་རྩི་ལ་བལྟས་པས
ངས་མི་ལོ་མང་པོའི་སྔོན་གྱི་སྐྱེས་ཆེན་ཞིག་ཡིད་ལ་དྲན་བྱུང་
ཀི་རིང་ཞིག་བཏབ་ན་འདོད་མོད
གཡས་གཡོན་ན་བྱིས་པ་ཚོ་གཉིད་ལ་ཡུར་འདུག་པས
ཁོ་ཚོས་རྨི་ལམ་ན་ཨ་མྱེ་ཡི་ཤོག་པང་ཡོད་པར་འདོད་ན
ངས་ཀ་ཁ་ཡི་ཤི་གསོན་བྲང་ལ་རླན་བཞིན
ཅིས་ཀྱང་དྲན་པ་འདི་ཁོག་ལ་མིད་དགོས་བྱུང་
རྒྱབ་རི་མེད་པའི་ནམ་མཁའ་འདི་
དུས་ནམ་ཞིག་ལ་བདག་གི་ཁ་ཕོད་བཤད་མྱོང་སའི་སྙིང་ཉེ་དེ་ཡིན་ཆོག་གམ
རྐང་རྗེས་མེད་པའི་མི་རབས་ཤིག
མཁའ་མཐའི་སྤྲིན་གསེབ་ན་བཤར་ཡོང་གིན་འདུག
ཁོ་ཚོས་མ་ཡུམ་གྱི་ངོ་གདུང་ན་ཆགས་པའི་ཚི་དྲེག་བརྗེད་འདུག
ལོ་མའི་བསིལ་ཆུས་ཁུར་བའི་ལོ་ཟླ་དག
དུས་ནམ་ཞིག་ན་ང་ཚོའི་ལག་མཐིལ་དུ་འབབ་ཆོག་གམ
དུས་ཚོད་དེར་ང་ཚོས་རང་ཉིང་ཚོར་གཙང་ཕྱིས་ཡང་དག་ཅིག་བརྒྱབ་ཆོག
བདག་གི་མི་རབས་ཡ ཨ་མྱེ་ཡི་ཤོག་པང་མ་བརྗེད་པར་བྱོས
ངའི་སྐེ་ལ་མུ་ཏིག་སུམ་བཅུའི་མགུལ་རྒྱན་དེ་བཏགས་ནས།
སྨུག་ལོང་འཐུབ་པའི་རི་ངོགས་དེ་ནས་སྐད་ཤུགས་ཆེན་པོས་ངུ་འབོད་བྱེད་འདོད།
ཡིན་ན་ཡང་། འདབ་ཆགས་མང་པོ་འཁོར་སའི་ཁྱུང་ཆེན་དེའི་གཤོག་ཟུང་གི
སྒྲོ་གཅིག་ཐང་ལ་ལྷུང་བར་དོགས་པས།
ངག་གི་ངུ་སྐད་སེམས་ངོར་རི་མོ་བྲིས་ཏེ་མིད་པ་ནས་ཕྱིར་མྱུད།
མི་རིགས་ཀྱི་ཚེ་སྲོག་མི་ཤེས་བའི་མི་རབས་ཡ།
ཡབ་མེས་ཀྱི་ཕྱག་རྗེས་གཡོ་སྒྱུས་རྐང་པས་བསུབས་པའི་མི་རབས།
ཁྱེད་ལ་ནམ་མཁའི་མཐོངས་དབྱིངས་སུ་ཤར་བའི།
ཉི་འོད་དང་མཉམ་དུ་ཤར་བའི་སྐར་ཆུང་དེ་མཐོང་འདོད་མེད་དོན་ཅི།