དེད་དཔོན།
ཤོག་སྦག་སྦར་བའི་ལུགས་སྲོལ་འདི་གཡམ་རྒྱུག་དང་ཅལ་འདྲོགས་ལ་དགའ་བའི་བྱབ་ཆུང་འགས་གཞན་གྱི་ལད་ཟློས་བྱས་པ་ཙམ་ལས། རང་རེའི་ཡུལ་དུ་སྔར་ནས་དར་བའི་ལུགས་སྲོལ་ཞིག་མིན། ཕྱི་ལུགས་ནང་འདྲེན་བྱེད་པ་ལ་ལེགས་པའི་ཆ་ཡོད་ན་བྱ་འོས་ཀྱི་ལེགས་ཆ་མེད་ན་དེ་ཉིད་ལད་མོ་ནམ་ཡང་བྱ་མི་རུང་བ་ནི་བཟང་སྤྱོད་ལ་གུས་བརྩི་དང་། ངན་སྤྱོད་སུན་འབྱིན་བྱ་མཁན་གྱི་མི་རབས་གསར་པའི་འོས་འགན་ཉག་གཅིག་ཡིན། དེས་ན་འཛམ་གླིང་གང་སར་དར་ཁྱབ་ཆེ་བའི་དུས་སྟོན་འདྲ་མིན་སྐབས་སུ་ཚོན་མེ་སྦར་བའི་ལུགས་སྲོལ་འདིར་ཞིབ་འཇུག་དང་དཔྱད་པ་རེ་གྱིས་དང་། འདི་ཉིད་ཚབས་ཆེ་བའི་ནོར་འཁྲུལ་དང་བཟང་སྤྱོད་དང་འགལ་བ་ཞིག་ཡིན་པ་ལས་ལེགས་པའི་ཆ་སྤུ་ཙམ་ཡང་མེད་པར་ཤེས་ངེས།
དེའང་ཚོན་མེ་སྦར་བ་དེས་ལྟོ་གོས་གཏམ་གསུམ་གང་ལའང་ཕན་ཐོགས་གང་ཡང་མེད་བཞིན་རྒྱུ་དངུལ་ཕོན་ཆེན་ཞིག་ཆུད་ཟོས་སུ་བཏང་བ་དང་། དེ་སྦར་བའི་རྐྱེན་གྱིས་རྫས་རྡུལ་སྙིགས་མས་མཁའ་དབུགས་ལ་འབག་བཙོག་བཟོ་བ། འགོ་ནད་འདྲ་མིན་ཁྱབ་གདལ་དུ་ཡོང་རྐྱེན་བྱེད་པ། ཤོག་སྦག་སྦར་བའི་སྒྲ་དང་དུ་རླངས་ཀྱིས་མི་རྣམས་ཁམས་མི་དྭངས་པ་སོགས་གནོད་པ་ཚབས་ཆེན་བྱུང་བ་མ་ཟད། ཤོག་སྦག་འགད་ནས་རི་ལུང་དང་ནགས་ཚལ་མེར་ཤོར་ཏེ། དེར་གནས་འཆའ་བའི་སྲོག་ཆགས་ཆེ་ཕྲ་དུ་མའི་ཚེ་སྲོག་ལ་གནོད་སྐྱོན་ཐེབས་པ་དང་། མི་ལ་རྨས་སྐྱོན་བྱུང་སྟེ་ལུས་ཀྱི་ཡན་ལག་སྐྱོན་ཅན་དུ་གྱུར་པ། དེ་བཞིན་ཁང་པ་མེར་ཤོར་ནས་མིའི་ཚེ་སྲོག་ལའང་གནོད་པ་བྱེད་པ་སོགས་ཀྱི་གནས་ཚུལ་ཐོན་བཞིན་ཡོད། ལྷག་པར་དུ་མཁའ་ལ་རང་དབང་དུ་རྒྱུ་བའི་འབུ་རིགས་ཁྲག་ཁྲིག་མང་པོའི་སྲོག་ལ་དངོས་སུ་གནོད་པ་བྱེད་པའི་སྡིག་ལས་ཚབ་ཆེན་འདི་སེམས་ལྡན་ཡོད་དོ་ཅོག་གི་ཚེ་སྲོག་ལ་བརྩི་བཀུར་མཛད་མཁན་རང་རིགས་ཀྱི་སྤྲོ་སྐྱིད་ལ་མི་རན་པ་དང་མི་འཁོ་བས་ཅིས་ཀྱང་མཚམས་འཇོག་བྱ་རན་ཡོད།
ཤོག་སྦག་སྦར་བའི་ལུགས་སྲོལ་ངན་པ་འདི་བཀག་སྡོམ་གྱི་ཆེད་དུ། སྐྱེས་འགྲོ་སྤྱིའི་ཚེ་སྲོག་ལ་བརྩི་བཀུར་དང་སྲུང་སྐྱོབ་ཀྱི་འགན་ཁུར་པའི་བརྩེ་ཤེས་ལྡན་པའི་མི་བུ་དག་གིས་ཐབས་བརྒྱ་ཇུས་སྟོང་གིས་ལས་འགུལ་སྣ་མང་སྤེལ་ཏེ། སྐྱེ་ཁམས་ལ་གནོད་པ་ཆེ་བའི་རྫས་ངན་ཤོག་སྦག་སྒྲོན་མཁན་འཇིག་རྟེན་སྤྱི་ཡོངས་ལ་འགོག་རྒོལ་ཐེངས་གཅིག་གཏོང་བའི་དུས་སུ་བབ་ཡོད། འཚེ་མེད་ཞི་བདེའི་ཆོས་ལུགས་ཉམས་ལེན་མཛད་མཁན་ནང་པའི་དགོན་སྡེ་ཁག་ནས་འདི་ཉིད་སྔོན་འགོག་ཡོང་ཐབས་ལ་འབུར་དུ་ཐོན་པའི་ལས་བྱ་ཞིག་གཉེར་དགོས་ནའང་། དེ་ལས་ལྡོག་སྟེ་དེང་སང་དགོན་པ་ཁ་ཤས་ནང་ལོ་སར་སྐབས་སུ་རྒྱུ་དངུལ་ཕོན་ཆེན་བཏང་སྟེ་ཤོག་སྦག་སྦར་པའི་གནས་ཚུལ་མཐོང་ཐོས་ཡོད་པ་ནི་ཆེས་ཡིད་སྐྱོ་དགོས་པ་ཞིག་རེད། བདེ་སྡུག་གི་ཚོར་བ་གཅིག་པ་ཡིན་པའི་སྐྱེ་འགྲོ་སྤྱིའི་ཚེ་སྲོག་ལ་གཅེས་སྤྲས་མི་མཛད་པར་བྱ་སྤྱོད་འདི་འདྲ་སྤེལ་བ་ནི་འཚེ་མེད་ཞི་བདེའི་བསྟི་གནས་སུ་གྲགས་པའང་མིང་ཙམ་དུ་གྱུར་པ་མ་ཡིན་ནམ།
དེས་ན་དགོན་པ་ཆེ་ཕྲ་གང་ཡིན་ཡང་དེར་བཞུགས་པའི་བརྩེ་ཤེས་ལྡན་པའི་སེར་མོ་བ་དག་ནི་དད་ལྡན་མང་ཚོགས་ཚོའི་བསམ་བློའི་སྣེ་ཁྲིད་པ་ཡིན་སྟབས་རང་རང་སོ་སོའི་འཁོར་འབངས་དག་གིས་ཅི་གསུང་གི་བཀའ་སྒྲུབ་ངེས་པས། ཕྱི་སྣོད་རང་བྱུང་ཁོར་ཡུག་དང་། ནང་བཅུད་ཀྱི་སེམས་ཅན་དུ་མ་ཞིག་ལ་འཕྲལ་ཡུན་གཉིས་ལ་གནོད་པ་ཆེ་བའི་རིགས་འདི་དག་ད་ནས་བཟུང་མཚམས་འཇོག་ཡོང་ཐབས་ལ་སློབ་གསོའི་བྱ་འགུལ་མཐོ་འདེགས་སུ་གཏོང་དགོས། སློབ་གསོའི་བྱ་འགུལ་དེ་ཉིད་མཐོ་སྒང་གངས་རིའི་ལ་ཐོད་ནས་ཆུ་ཕྲན་གྱི་རླབས་རིས་མཆེད་པ་ལྟ་བུ་བར་མེད་དུ་སྤེལ་ཏེ། གླིང་ཆེན་བཞི་པོ་ཡོངས་ཁྱབ་ཏུ་འདིའི་དགེ་སྐྱོན་ཤེས་རྟོགས་བྱུང་བ་ཞིག་བྱ་རན་ཡོད། དེ་དང་དེ་འདྲ་བོ་བསམ་བློའི་སྒྲོམ་གཞི་རྩ་ཆེ་ཤོས་བྱམས་བརྩེ་དང་འགལ་བའི་བྱ་སྤྱོད་མཐའ་དག་འཇིག་རྟེན་འདིར་མིང་གི་ལྷག་མ་ཙམ་དུ་འགྱུར་པའི་ཕྱིར་དུ་བྱ་འགུལ་སྣ་ཚོགས་སྤེལ་རོགས་ཞེས་མཉམ་མེད་ཤཱཀྱ་སེང་གེའི་བྱིན་རླབས་ཚན་ཁ་ཡིད་ཁམས་སུ་བརྟས་པའི་ལུས་ཅན་ཀུན་ལ་ལག་ཟུང་སྙིམ་པར་སྦྱར་ཏེ་གསོལ་བ་ལན་བརྒྱར་འདེབས་པ་ཡིན་ནོ།
དང་པོ་༼དེད་དཔོན༽རང་ནག་ཁུངས་ནས་ཕྱི་ལ་ཐོན་ཏེ་དངོས་མིང་དང་ལས་བྱ་བཞུགས་གནས་གང་ཡིན་ཁ་གསལ་དང་དེ་ནས་དགོན་པ་ཁ་ཤས་ནས་ཤོ་སྤག་སྤར་ཚུལ་ཟེར་སྤོམ་བཤད་འདི་འདྲ་མ་བྱས་པ་དགོན་པ་གང་ཡིན་མིང་ཁ་གསལ་སྟོན་ནས་བྲིས་དང་ལེགས་ཉེས་བླང་དོར་ལ་ཕན་རླབས་དང་དགེ་མཚན་ཆེ་བར་མངོན།