ཨ་འབྲུག་དཀོན་མཆོག
ཀ༽
ཁ་ཕྱིར་འཁོར་ནས་རྒྱང་རིང་རྒྱང་རིང་དུ་བལྟས་ན། ས་གཞི་འདི་ང་ལ་རང་བྱུང་གིས་བདག་པའི་སྐྱེས་ཐོབ་ཀྱི་གནས་མལ་ཞིག་ཡིན་ལ། ས་གཞི་འདི་ང་དང་ང་ཚོའི་ཆེད་དུ་མེས་པོ་ཁྲི་སྟོང་གི་ཟུངས་ཁྲག་དང་རུས་པར་བརྟེན་ནས་རྩོད་ལེན་དང་བཞེངས་བསྐྲུན་བྱས་པའི་ཕ་གཞིས་ཡིན་པས། ས་གཞི་འདི་ཁོ་ན་ངའི་ཚེ་སྲོག་གི་མྱུ་གུ་འབུས་ས་ཙམ་མ་ཟད་ཚེ་སྲོག་གི་འབྲས་བུ་གཏོར་སའི་གཞིས་ཁྱིམ་གཅིག་བུ་སྟེ། ངའི་མཐའ་མཇུག་གི་རུས་ཀོང་སྐམ་པོ་དེ་སླར་ཡང་ས་གཞི་འདིའི་སྟེང་དུ་ཅིས་ཀྱང་གཏོར་དགོས་པ་ནི་གདམ་ཀ་བྱེད་རྒྱུ་ཞིག་གཏན་ནས་མིན་ཏེ། འདི་ནི་ས་གཞི་འདིས་བསྐྱེད་པའི་འབྲས་ལྡོག་ཅིག་ས་གཞི་འདིའི་སྟེང་དུ་ཕྱིར་འཐོར་བའི་ས་གཞི་རང་ཉིད་ཀྱི་མུ་རྒྱུད་སྦྲེལ་སྟངས་ཀྱི་རྒྱུ་འབྲས་ཀྱི་གོ་རིམ་ཞིག་ཡིན་པས། ཆོས་ཉིད་འདི་ལས་ང་གཏན་ནས་འདའ་མི་འོས།
ཁ༽
ས་ཁམས་ཆགས་ཚུལ་གྱི་རང་བབ་ཀྱིས་ས་གཞི་འདི་འཛམ་གླིང་གི་རྩེ་ཐོག་ཏུ་གྱུར་ཞིང༌། ས་རྒྱུས་ཞིབ་འཇུག་པའི་གྲུབ་དོན་དུ་ས་གཞི་འདི་འཛམ་གླིང་གི་ཆུ་མཛོད་དུ་ངོས་འཛིན་བྱས། འོན་ཏེ་གནའ་ནས་ད་བར་ས་གཞི་འདི་རང་ཉིད་ལས་ལྷག་པར་གཅེས་སྐྱོང་བྱེད་མཁན་ནི་ངེད་ཅག་གི་མེས་པོ་ཁོ་ན་ཡིན་ཏེ། ཁོང་ཚོས་ས་གཞི་འདི་སྲུང་སྐྱོབས་ཀྱི་ཆེད་དུ་རང་ཉིད་ཀྱི་མི་ཚེ་མཐའ་མཚམས་ནས་བསྐྱལ་ཞིང༌། ས་གཞི་འདི་ཐིག་ཚད་ལ་བླངས་ཤིང་ས་རྟགས་སུ་རྡོ་རིང་བསླངས་ཏེ་ས་གཞི་འདི་་ཉིད་ང་ཚོའི་ཡིན་པ་འཇིག་རྟེན་ཐུན་མོང་ལ་སྤྱི་སྙོམས་ཀྱིས་གཟིགས་པའི་ཉི་ཟླ་སྐར་གསུམ་དཔང་བོར་བསྐོས་ཏེ་ཚེ་ཚེ་རབས་རབས་ཀུན་ཏུ་ཆོད་གན་དེ་ཕྱིར་མི་ལྡོག་པའི་དམ་འབུལ་བྱས། དམ་བཅའ་འདིའི་ནང་རོལ་ན་ཚེ་སྲོག་དང་ཟུངས་ཁྲག་ཡོད་ལ། དཔའ་ངར་དང་ཆོད་སེམས་ཡོད། འདི་དག་ཤོག་ལེ་སྐྱ་་བོའི་སྟེང་གི་ཡིག་འབྲུ་ཙམ་མིན་ལ་རྐུབ་སྟེགས་མཐོན་པོའི་སྟེང་གི་སྟོང་གཏམ་ཡང་མིན་པས་ཚེ་སྲོག་ལ་གཅེས་སྤྲས་བྱེད་ཤེས་བའི་མི་ཚོས་ནམ་ཡང་ས་གཞི་འདི་བློས་གཏོང་བྱེད་ཐབས་གང་ན་ཡོད།
་ ག༽
ངའི་མེས་པོ་ཚོས་ས་གཞི་འདིའི་སྟེང་གི་རི་བོ་རྣམས་གནམ་གྱི་ཀ་བ་ཡིན་པ་དང༌། གནམ་གྱི་ཀ་བ་ལྟ་བུའི་རི་བོ་དག་གི་མུ་རྒྱུད་ལས་གྲུབ་པའི་རང་བྱུང་གི་ལྕགས་རི་འདིས་ས་གཞི་འདིའི་བདག་པོ་སྟེ་ང་ཚོའི་དཔའ་ངར་དང་སྙིང་སྟོབས་ལ་མངོན་པར་གསལ་བའི་རྒྱབ་རྟེན་བྱས་ཡོད་པས། རི་བོ་འདི་དག་ངེད་ཅག་གི་དབང་ཐང་དང་ལས་རླུང་གི་མཚོན་རྟགས་སུ་ངོས་འཛིན་དང་ཡིད་ཆེས་བྱས། ལྷག་པར་དུ་གངས་ཀྱི་མུ་རྒྱུད་ཀྱིས་སྦྲེལ་བའི་ས་གཞི་འདི་དང༌། ས་གཞི་འདིའི་སྟེང་གི་ཡོད་པ་ཐམས་ཅད་ངེད་ཅག་ཐུན་མོང་གི་ཚེ་སྲོག་གི་མུ་རྒྱུད་སྦྲེལ་བྱེད་ཀྱི་འཚོ་གཞིས་ཡིན་པ་ངོས་འཛིན་གྱིས་དུས་ནམ་ཡང་གཅོད་གཏུབ་དང་བགོ་འགྲེམས་བྱེད་མྱོང་ཡེ་ནས་མེད། དེའི་ཕྱིར་མེས་པོའི་རུས་པ་ལས་གྲུབ་པའི་ལོ་རྒྱུས་ཀྱི་དཔང་རྟགས་དང༌། མེས་པོའི་ཟུངས་ཁྲག་གིས་བྲིས་པའི་ཞལ་ཆེམས་ཀྱི་གླེགས་བམ་ཁུར་བའི་ང་ཚོས་དུས་ནམ་ཡང་ས་གཞི་འདི་དུམ་བུར་གཏོང་མི་སྲིད་ལ། ས་གཞི་འདིའི་བདག་པོར་གྱུར་བའི་ངེད་ཅག་ལ་བར་མཚམས་གཅོད་བྱེད་ཀྱི་ལྕགས་རི་དང་དབྱེ་མཚམས་ཕྱེ་བའི་ས་རྟགས་གང་ཡང་མི་དགོས། འདི་ནི་ལོ་རྒྱུས་ཀྱིས་ངེད་ཅག་ལ་བཤད་པའི་གདམས་ངག་སྟེ། དོན་དངོས་ཀྱི་གནས་ལུགས་དེ་དག་ས་གཞི་འདིའི་སྟེང་དུ་མ་སྨིན་བར་དུ་ངེད་ཅག་ལ་མེས་པོ་ཚོས་དུར་ཁང་ནས་དམོད་པ་གཏོང་ངེས། དེའི་ཕྱིར་དུས་ནམ་ཡང་ངཚོ་རང་གི་མེས་པོའི་སེམས་བསྐྱེད་ཀྱིས་ནང་རོལ་ནས་ཕྱི་རུ་སོང་ན་མི་འོས།
ང༽
ངས་ངེད་ཅག་གི་གསོན་སྟོབས་མ་ཤོར་བའི་སྙིང་གི་འཕར་འགྲོས་དེ་ཡང་ས་གཞི་འདིའི་གཞི་རྟེན་གྱི་སྟེང་ནས་འཕར་བཞིན་པ་རྟོགས་རྗེས་ས་གཞི་འདི་ཁོ་ན་ངེད་ཅག་གི་ཚེ་སྲོག་གི་མྱུ་གུ་འབུས་སའི་འཇིག་རྟེན་ཡིན་པ་རྟོགས་ཤིང༌། ས་གཞི་འདིའི་ཕང་ནས་ཡལ་བའི་ཚེ་སྲོག་ཁྲི་འབུམ་གྱི་མཐའ་མཇུག་གི་སྨོན་འདུན་ཡོད་ཚད་སླར་ཡང་ས་གཞི་འདིའི་སྟེང་དུ་བཞག་པའི་བྱུང་བ་དྲན་ཚེ། ངེད་ཅག་གི་སྐྱེ་བ་ནས་སྐྱེ་བའི་བར་དུ་ས་གཞི་འདིའི་སྟེང་ནས་འདི་ལྟ་བུའི་དམ་བཅའ་དང་ཕྱི་ཐག་གི་འཁོར་བསྐྱོད་བྱེད་འོས་ལ། དེ་ལས་ཀྱང་ང་ཚོས་དུས་དང་རྣམ་པ་ཐམས་ཅད་དུ་ས་གཞི་འདིའི་ཡོད་ཚད་ལ་གཅེས་ཤིང་ཕངས་པའི་བདག་ཉར་བྱེད་དགོས་པ་སྟེ། རང་ཉིད་ཀྱི་ཚེ་སྲོག་གི་མྱུ་གུ་ཆུང་ཆུང་འདི་ཡང་ས་གཞི་འདིའི་སྟེང་གི་རྩི་ཤིང་དང་ཆུ་བོ་སོགས་མདོར་ན་ས་གཞི་འདི་སྐྱེ་ཞིང་སྨིན་པའི་གཞི་རྩར་ཆུ་ཐིག་གི་ཟོལ་གྱིས་འཐོར་ཅིང༌། རྡུལ་ཕྲན་གྱི་རྣམ་པས་འབབ་དགོས། འདི་ནི་ས་གཞི་འདིའི་ཐ་གྲུ་ཀུན་ཏུ་རུས་རྐང་གིས་ར་བ་བསྐོར་བའི་མེས་པོ་ཚོའི་ལུགས་སྲོལ་དེ། ཁོང་ཚོའི་རང་ཉིད་ཀྱི་རུས་པ་དང༌། རང་ཉིད་ཀྱི་རུས་པ་ལས་གྲུབ་པའི་ངེད་ཅག་གི་རུས་པ་གཉིས་འདི་ལྟར་དཔའ་ངར་གྱིས་མཐུད་ཅིང༌། ཡིད་ཆེས་ཀྱིས་སྦྲེལ་ཡོད་པས་ད་གཟོད་ས་གཞི་འདི་དང་ངེད་ཅག་གི་གཟུགས་གཞི་འགྲེང་བྱེད་ཀྱི་རུས་པ་གཉིས་འདི་ལྟར་འབྲེལ་ཡོད། དེའི་ཕྱིར་ཅི་སྲིད་ངའི་རུས་པ་འདི་འཐོར་ཞིག་ལ་མ་སོང་བར་དུ་ས་གཞི་འདི་ཆེད་དུ་གོམ་ཁ་སྒྱུར་དགོས། འདི་ནི་ང་ལ་རུས་པ་ཞིག་ཡོད་པའི་དོན་སྒོ་དང་མེས་པོ་ཞིག་ཡོད་པའི་དཔང་རྟགས་ཡིན།
ཅ༽
ངའི་མེས་པོ་རྣམས་ཐོག་དང་པོ་ནམ་མཁའ་ནས་ས་གཞི་འདིར་བབ་ཅིང༌། ས་གཞི་འདི་ནས་མཁར་རྫོང་དང་འཐབ་ར་སྡོད་ཁྱིམ་སྣ་ཚོགས་བསྐྲུན་ཏེ་ཁོང་ཚོའི་ཕྱི་རབས་པ་སྟེ། དུས་རབས་ནས་དུས་རབས་བརྒྱུད་ཅིང༌། མི་རབས་ནས་མི་རབས་མཐུད་ནས་ངེད་ཅག་གི་བར་དུ་ཁྲག་དང་རུས་པའི་མུ་རྒྱུད་གཅིག་ཏུ་བརྒྱུས་པའི་མི་བུ་གདོང་དྲུག་གི་རིགསཀྱི་ཕྲེང་བ་སྒང་དྲུག་རི་བོའི་གཞུང་དུ་བསྟར་ནས་ཆེས་མཇུག་མཐའི་ཁ་དན་ཞིག་ཐུན་མོང་གིས་བཞག་པ་ནི། མདོ་དབུས་མཐོ་སྒ་གི་འཇིག་རྟེན་འདིའི་ཤར་ཕྱོགས་མཐའ་དག་ཆེན་པོ་རྒྱའི་ཡུལ་དང༌། ནུབ་ཕྱོགས་ཐམས་ཅད་ནི་ཡང་དག་པ་བོད་ཀྱི་ཡུལ་ཡིན་པ་ནམ་མཁའ་དང་ས་གཞི་དཔང་བཙུགས་ཀྱིས་གསལ་འདོན་གྱིས་ཁྱབ་བསྒྲགས་བྱས་པ་དེ་རེད། བྱུང་བ་འདི་ལོ་རྒྱུས་རྙིང་བའི་གནའ་གཏམ་ཞིག་ཡིན་དུ་ཆུག་ཀྱང༌། བྱུང་བ་འདིའི་ནང་དོན་དུ་གྱུར་པའི་བདེན་པ་དང་སྙིང་སྟོབས། མཐོང་རྒྱ་དང་ཆོད་སེམས་བཅས་དེ་རིང་གི་ང་ཚོའི་ལས་དབང་དང་གཞི་གཅིག་ཏུ་འབྲེལ་ཡོད་དེ། ང་འཇིག་རྟེན་འདིར་འགྲེངས་ནས་འབོད་སྒྲ་ཞིག་སྒྲོག་དགོས་ན་དང་ཐོག་རྐང་པ་འཛུགས་སའི་ས་གཞི་འདི་ཅིས་ཀྱང་མཁོ་བས། དེའི་ཕྱིར་ས་གཞི་འདིའི་ཆེད་དུ་ངའི་ཡོད་ཚད་འབུལ་དགོས་ཨང༌།
ཆ༽ ངས་ས་གཞི་འདིའི་ཆེད་དུ་འདི་ལྟར་དྲོད་རླབས་འཕྱུར་བའི་བསམ་གཞིགས་བྱེད་སྐབས་ངང་ངམ་ཤུགས་ཀྱིས་དྲན་འོང་བ་ནི། ད་ནི་ས་གཞི་ལ་གཅེས་སྤྲས་བྱེད་སྟངས་དང་ས་གཞིའི་འདིའི་ཆེད་དུ་བསམ་གཞིགས་བྱེད་སྟངས་ཀྱང་སྔར་བཞིན་བརྒྱུད་པ་དང་ཐིག་མཚམས་ཆུང་ཆུང་གི་ར་སྐོར་ནས་འཁོར་ན་མི་འགྲིག་པར། ཅིས་ཀྱང་མིག་གིས་རྒྱང་རིང་ལ་ལྟ་དགོས་པ་དང༌། གོམས་ཁ་དང་དམིགས་འབེན་མ་འོངས་པར་ཕྱོགས་དགོས་པ་དེ་རེད། འདི་ལྟ་བུའི་བསམ་གཞིགས་ཀྱིས་ངའི་ཀུན་གཞིའི་འོག་རོལ་ནས་འདེགས་ཤིང༌། འདི་ལྟ་བུའི་རེ་བས་ངའི་དམིགས་བྱ་རྒྱང་རིང་དུ་ཁྲིད། ངོ་མ་འདི་ནི་མཛེས་སྡུག་གི་བསླུ་བྲིད་ཅིག་སྟེ། བསླུ་བྲིད་ཀྱི་འགུགས་ཤུགས་དེས་ང་རང་ཚམ་ཚོམ་མེད་པར་ལམ་བུ་གཞན་ཞིག་ཏུ་ཆས་པའི་སྐུལ་འདེད་བྱས།
ཇ༽ ངོ་མ་བཤད་ན་ངོས་འཛིན་དང་གདམ་ག་འདི་དག་གི་རྒྱབ་ལྗོངས་ན་ངུ་བྲོ་ལ་དགོད་ཤོར་བའི་གཏམ་བརྒྱུད་མང་པོ་ཡོད་ཀྱང༌། ང་ནི་མ་གཞི་ནས་མི་དང་མི་ཡུལ་ལ་ཡིད་ཆེས་དེ་ཙམ་མེད་དེ་ང་ཚོ་དག་པ་རབ་འབྱམས་ཀྱི་ཞིང་ཁམས་ན་མེད་པར་མ་དག་འཇིག་རྟེན་གྱི་འཁོར་བ་ཡོད་པས་སོ། ལྷག་དོན་དུ་གནད་དོན་གང་ལ་ཡང་རང་ཚུགས་ཀྱིས་ངོས་འཛིན་བྱེད་འདོད་པའི་མི་ཞིག་གིས་གནད་ཅི་ལ་ཡང་ཧང་སངས་པའི་སྤྱོད་ཚུལ་འཛིན་མི་འོས་ཏེ། ང་ཚོ་རྒྱུ་འབྲས་ཀྱི་འཇིག་རྟེན་ན་ཡོད་པས་རྒྱུ་འབྲས་ཀྱི་གོ་རིམ་འདི་སུས་ཀྱང་ཁས་ལེན་དགོས་པ་མ་ཡིན་ནམ། མི་ཚེ་ནི་རེ་བས་ཁེངས་པ་ཞིག་ཡིན་རུང་འཚོ་བ་དེ་གདོང་ཐུག་མ་ས་ཞིག་ཡིན་པས་ལམ་ཁ་ཡོད་ཚད་བདེ་ཐང་མིན་རུང་ས་གཞི་ལ་དགའ་ཞེན་གཞན་ལས་ཆེ་བའི་མི་བུ་དག་ནམ་ཡང་རྒྱུན་ལྡན་གྱི་འཚོ་བ་ལས་གཡུལ་ས་བདམས་པའི་ལོ་རྒྱུས་ཀྱིས་ང་ཚོ་ལ་གནད་དོན་མང་པོ་གསལ་བཤད་བྱས་ཡོད། དེའི་ཕྱིར་ང་ཚོའི་སྙིང་ཁུང་རུས་པའི་གཏིང་ནས་ས་གཞི་འདི་རྒྱལ་ལོ། ས་གཞི་འདིའི་ཆེད་དུ་དམིགས་པའི་ཕུགས་བསམ་རྒྱལ་ལོ་ཞེས་འབོད་ཚིག་ཐུན་མོང་བ་ཞིག་བསྒྲགས་ཐུབ་ན་དགའ་བ་ལ།