ཀོ་ལི་གྷལ་གཞུང་པ་ཚེ་དབང་བསོད་ནམས།
ཀ་དག་ཕྱག་རྒྱ་མཁས་མང་ཞབས་ལ་འདུད།།
ཁོག་ནང་བསམ་པ་མཛུབ་མོའི་རྩེ་ལ་སྦྱར།།
གང་བསམ་ཀ་བཤད་ཤོག་དཀར་སྟེང་དུ་ཐལ།།
ང་ལ་སྐྱེས་སྦྱངས་མེད་པས་ཡིག་ནོར་མང་།།
ཅ་ཅོ་ལས་མེད་དུས་ཚོད་གཏོང་བའི་ཕྱིར།།
ཆ་རྐྱེན་སུམ་རྟགས་སྙན་ངག་སྡེབ་སྦྱོར་སོགས།།
ཇི་མ་ཇི་བཞིན་བློ་ལ་མ་ངེས་ནས།།
ཉ་ཉོག་མང་བའི་ཀ་བཤད་བྲིས་པ་འདིའི།།
ལྟ་སྒྲུབ་མཁས་པའི་ཐུགས་དང་འགལ་བའི་རིགས།།
ཐོག་མཐའ་བར་དུ་དགོང་གསེལ་ནན་དུ་ཞུ།།
དུས་ཚོད་འདི་ནི་སྙིགས་ལྔའི་དུས་རབས་ཤར།།
ན་རག་གནས་ནས་འདྲེན་པའི་ལམ་སྟོན་མཛོད།།
དཔོག་པར་དཀའ་བའི་གཞན་གྱི་ལྟ་སྤྱོད་ལ།།
ཕས་རྒོལ་བྱེད་པ་བསོད་ནམས་ཉམས་པའི་རྟགས།།
བུ་རབས་ཚ་བརྒྱུད་བོད་ཡིག་དག་སྣང་ཆེད།།
མ་བསྐུལ་དཱངས་བླང་ཀ་བཤད་ཁྱར་ཁྱོར་བྲིས།།
རྩོད་གླེང་མེད་པའི་རང་གི་སྐད་ཡིག་ལ།།
ཚིག་རྐང་གཅིག་གི་མཐུན་བསྒྱུར་ཐུབ་ན་བསམ།།
རྫོགས་རྒྱུ་མེད་པའི་གཞན་གནོད་དཀྲོགས་གཏམ་ལ།།
ཝ་སྤྱང་དམར་པོ་ཙམ་ལས་མགོ་མི་འཁོར།།
གཞན་ལ་གནོད་པའི་འཁོན་སེམས་ཚིག་རྩུབ་ལ།།
བཟོད་སྲན་ཐུབ་ན་འཚེ་མེད་ཞི་ལམ་རེད།།
འོ་བརྒྱལ་ཆེ་བའི་དཀྲོགས་གཏམ་སྤེལ་མཁན་ཚོ།།
ཡ་རབས་བཟང་སྤྱོད་མི་དང་མཐུན་ན་དགའ།།
རང་དབང་མང་གཙོའི་སྤྱི་ཚོགས་ཆེན་པོའི་ནང་།།
རང་མིང་བཀོད་ནས་བསམ་ཚུལ་གླེང་ན་དགའ།།
ལ་རྒྱ་སྐམ་པོའི་ཞེན་ཁོག་སྲུང་ཆེས་ན།།
ལོ་རྒྱུས་དཀར་ནག་ངོས་འཛིན་ཐུབ་ལ་དཀའ།།
ཤ་ཚ་ཡོད་ན་དྲངས་བདེན་གནས་ཚུལ་ཤོད།།
ཤ་ཚ་ཡོད་ན་རང་མིང་བཀོད་ནས་གླེང་།།
སེམས་བཟང་གཏམ་གྱིས་ཀ་བཤད་བྲིས་པ་འདི།།
ས་ཐོབ་སེམས་པར་ཕོག་ཐུག་མ་འགྲོ་ཤོག་།
ཧ་ཅང་ཐལ་བའི་ཁུངས་མེད་དཀྲོགས་གཏམ་རིགས།།
ཨེ་མ་དཀར་མིན་ལས་ངན་མིན་ན་ཅི།།
བསྲེག་བཅད་བརྡར་གསུམ་མི་འདོད་མཁན་རྣམས་ནང་པ་མིན།
ར་ལ་ཤ་སའི་དཀའ།
རང་མིང་བཀོད་ནས་བསམ་ཚུལ་གླེང་བར་དཀའ། །
་
ལོ་རྒྱུས་དངོས་རྫུན་ངོས་འཛིན་ཐུབ་ལ་དཀའ། །
་
ཤ་ཚ་མེད་ན་དྲངས་བདེན་ཤོད་པར་དཀའ། །
་
ས་ཐོབ་སེམས་པར་ཕོག་ཐུག་འགྲོ་བར་དཀའ། །