རྔ་བ་ཀུན་བཟང་།
ཉིན་ཞིག་གི་ཕྱི་དྲོར། ང་རྫི་བོ་ལ་སོང་ནས་ཕྱིར་ནང་ལ་ཐོན་དུས། ཕ་མ་གཉིས་ཀས་འཛུམ་མུལ་མུལ་ངང་འདི་ལྟར་བཤད། “ཞི་མོ་རྒྱ་གར་ལ་འགྲོ་ཨི་འདོད་གི ས་ཆ་སྐྱིད། ཟ་མ་ཞིམ།”ཞེས་བརྗོད། སྐབས་དེ་ལ་ངའི་དགའ་བ་སྟོང་གི་འཛུམས་མདངས་དང་ལྷན་ཏུ་“ཨ་མ་ང་ད་སོ་མ་འགྲོ་ན་འདོད་གི”ཞེས་བཤད། འོན་ཀྱང་བྱིས་པ་ནི་བྱིས་པ་རང་རེད། དེ་ནས་བརྩིས་ཏེ་མི་ལོ་ཉེར་དགུ་སོང་བའི་ད་ལྟའི་དུས་སུའང་ཕ་མ་གཉིས་ལ་ཐུག་རྒྱུ་མེད་པ་དང་། འབྲོག་ས་དང་རྟ་ནོར་ལུག་ཡོད་ཚད་རྨི་ལམ་ནང་གི་མཛའ་བོ་བཞིན་མཐོང་མེད་རེག་མེད་ཏུ་གྱུར་བ་སུ་ཡིས་སུ་ལ་འཁང་ར་བྱེད། ལྷག་པར་དུ་བྱིས་པའི་དུས་ཀྱི་འབྲོག་ཁྱིམ་དང་། གྲོགས་རྣམས་ནི་རང་ཉིད་ཀྱི་ཤ་རུས་ཁྲག་གསུམ་ན་ཟུག་པའི་རྣམ་ཤེས་ཤིག་ཡིན་པ་དེ་རིང་ངའི་གཉོམ་ལ་ཕྲ་བའི་སེམས་པས་བཤད་གིས། དུས་ནམ་ཞིག་ལ་བདག་གིས་རྩྭ་ཐང་དང་རི་འགོ་བརྒྱུད་ནས་རྫི་གླུ་དང་ལ་གཞས་བླངས་བ། དུས་སྐབས་དེའི་རྫི་བོ་རྣམས་མ་གཏོགས་དྲན་མཁན་མེད། རེད་དེ། དེང་སང་ཁོང་ཚོས་ཡང་བྱིས་པ་འགའི་ཕ་མར་གྱུར་བས། ལྷིང་འཇགས་ཀྱི་རྩྭ་ཐང་དང་རྟ་ནོར་འཚོས་ནས་བརྩེ་གླུ་ལེན་ཁོམ་ཞིག་ག་ལ་ཡོད། འདི་ནི་འཚོ་བ་རོལ་གནས་
ལ་འགྱུར་ལྡོག་བྱུང་བ་དང་བསྟུན་ནས་སྐྱས་ལམ་མག་མོག་གི་ཟིན་ཐོ་ཡིན་ཟེར་ན་ཆོག ང་ཡང་ཁྱེད་ཚོ་ལྟར་སློབ་ཆུང་དུ་སོང་ནས་དབྱངས་གསལ་གཉིས་དང་ཐོག་མ་ངོ་ཤེས་ཆག སློབ་འབྲིང་ནང་ནས་བརྩེ་དུང་གི་ཞགས་ཐག་བར་ལ་བཅིངས་ནས། ལུས་སེམས་གཉིས་ཀ་དུམ་བུར་བཏུབ། མཐོ་སློབ་ནང་ནས་བོད་ཀྱི་སྲོལ་རྒྱུན་རིག་གནས་དང་རྩོམ་རིག་སྒྱུ་རྩལ་ལ་སློབ་སྦྱོང་བྱས། དེ་ནས་བཟུང་གཞུང་ལུགས་གཉིས་ཀྱི་རྩོད་གཞིའི་ཁྲོད་ན་ལྷུང་ཐལ། ལྷུང་སའི་དོང་ཧ་ཅང་ཆེ་བས། རང་ཉིད་ཀྱི་རྟོག་འཆར་དང་གནས་ལུགས་ཟུང་འབྲེལ་མ་བྱེད་ཐབས་མེད་བྱུང་ལ། གཞུང་ལུགས་དང་ལག་ལེན་གཉིས་ཀ་གོ་རིམ་ཡོད་པའི་སྒོ་ནས་ཟུང་འབྲེལ་ལེགས་པོ་ཞིག་ཡོང་བའི་རེ་བ་དང་རྨི་ལམ་ཡོད། གང་ལྟར་བདག་གི་མྱོང་རྟོགས་ལྟར་ན། ས་མཐའ་ཟེར་ནོ་རིག་གནས་སྦྱོང་ས་མ་གཏོགས། ཟ་མ་ཞིམ་པོ་དང་ས་ཆ་སྐྱིད་པོ་ཞིག་ནམ་ཡང་ཡིན་མི་འདོད།
2021/10/9གུང་ཚིགས་སྐབས་ཟ་ཁང་ནས་བྲིས།