ས་ཡ་དྲུག

གཉན་ཆེན།

ས་ཡ་དྲུག་གི་སྤྱན་ཟུང་ཉི་ཟླ་གངས་རིའི་ཕག་ལ་ཡལ་ཀི་ཐལ།།
ས་ཡ་དྲུག་གི་སེམས་ཀྱི་ཉི་མ་མ་དབང་ནུབ་ལ་བཞུད་ཀི་ཐལ།།
ས་ཡ་དྲུག་ལ་དམིགས་བུ་མེད་པར་མུན་ཁུང་ཁྲོད་ནས་ལུས་ཀི་ཐལ།།
ས་ཡ་དྲུག་གི་པན་ཆེན་བླ་མ་དབང་མེད་བཙལ་གྱིས་ཁྲིད་ཀི་ཐལ།།

ས་ཡ་དྲུག་གི་གཞིས་ཁྱིམ་དྲོན་མོར་དབང་ཆེན་འགྲོན་པོ་བསླེབས་ཀི་ཐལ།།
ས་ཡ་དྲུག་གི་ས་ཆའི་བདག་པོ་ཙི་ནའི་དཔུང་ལ་བདག་གི་ཐལ།།

ས་ཡ་དྲུག་པོ་བཙན་པོ་ཁྲིམས་རའི་ལྕགས་ཀྱི་ར་བས་བསྐོར་དང་ཐལ།།
ས་ཡ་དྲུག་གི་སེམས་པའི་ནང་ལ་སྐྱོ་གདུང་ནད་ཀྱིས་ནར་ཀི་ཐལ།།

ས་ཡ་དྲུག་གི་སེམས་ངལ་སེལ་བའི་ཐབས་ཇུས་སྨན་མཆོག་སུ་ལ་ཡོད།།
ས་ཡ་དྲུག་ལ་བདག་པོ་མེད་པར་བདག་མེད་ས་མཐར་འཁྱམས་ཀི་ཐལ།།
ས་ཡ་དྲུག་གི་སྡུག་བསྔལ་མཐོང་བའི་ས་སྟེང་འདི་ན་མིག་ཞིག་མེད།།
ས་ཡ་དྲུག་གི་ལས་དབང་འདི་ནི་ཅི་ཞིག་སྨིན་པའི་མནར་གཅོད་ཡིན།།

ས་ཡ་དྲུག་པོ་གོ་ལའི་རྩེ་ན་གོད་ཆག་སྡུག་གི་དོང་དུ་བརྫངས།།
ས་ཡ་དྲུག་པོའི་གོ་ཁ་དྲོན་པོ་རང་ལ་མ་དབང་ཤོར་ཀི་ཐལ།།
ས་ཡ་དྲུག་ལ་འཇིག་རྟེན་འདི་ན་དབང་བའི་ཕ་གཞིས་མེད་ཀི་ཐལ།།
ས་ཡ་དྲུག་གི་སྲོག་གི་རྒྱུན་ཐག་སྐད་ཡིག་རིག་གནས་བརླག་གི་ཐལ།།

ས་ཡ་དྲུག་པོ་འབུ་གཟན་དོང་ཕྱུར་བཅུ་ཡི་ནང་ནས་བོར་ཀི་ཐལ།།
ས་ཡ་དྲུག་པོའི་མིང་ཙམ་ལྷག་པའི་ཉིན་མོ་ཞིག་ལ་སྒུག་ནས་སྡོད།།
ས་ཡ་དྲུག་པོ་ཅི་ཙམ་བཙིར་རུང་དབུགས་ཤིག་མ་ལེན་སྒོམ་མ་སྡོད།།
ས་ཡ་དྲུག་པོའི་སེམས་ཀྱི་ནང་ནས་སྐྱོ་ཤས་གཟེར་ལོག་རྒྱག་ནའང་།།

ས་ཡ་དྲུག་གི་མིག་ཟུང་མཐའ་ནས་རྨུང་བའི་མིག་ཆུ་མ་ལྷུང་ཞིག །
ས་ཡ་དྲུག་གི་སེམས་པ་འདི་ནི་ས་ལ་དྲུད་པས་ཟད་པོ་ཡིན།།
ས་ཡ་དྲུག་གི་སྙིང་ཆུང་འདི་ནི་གྲོག་རོང་ནང་གི་ཕ་བོང་ཡིན།།
ས་ཡ་དྲུག་གི་ལུས་ཕུང་འདི་ནི་བརྗིད་ཀྱིས་འགྱིང་བའི་གངས་རི་ཡིན།།

ས་ཡ་དྲུག་པོའི་སྙིང་སྟོབས་མེ་སྟག་མེ་རི་བཞིན་དུ་འབར་ནས་ཤོག །
ས་ཡ་དྲུག་པོའི་སེམས་ཤུགས་གངས་ཆུ་རྦ་རླབས་བཞིན་དུ་འཕྱུར་ནས་ཤོག །
ས་ཡ་དྲུག་པོའི་དཔའ་རྒོད་རྟུལ་ཕོད་རྦབ་རྡོ་བཞིན་དུ་འཆོང་ནས་ཤོག །
ས་ཡ་དྲུག་གི་མཐུན་འབྲེལ་དཔུང་གདངས་བྱ་རྒྱ་ཁྱུང་བཞིན་བསྒྲིགས་ནས་ཤོག །

ས་ཡ་དྲུག་གི་རྣམ་དཔྱོད་འོད་དཀར་གངས་རིའི་ལྗོངས་སུ་འཁྱིལ་ནས་ཤོག །
ས་ཡ་དྲུག་གི་སྤོབས་པའི་མེ་ཏོག་སྤང་རིའི་ལྗོངས་སུ་འཛུམ་ནས་ཤོག །
ས་ཡ་དྲུག་གི་མདུན་སྐྱོད་གོམ་པ་རྟ་མཆོག་བཞིན་དུ་རྒྱུག་ནས་ཤོག །
ས་ཡ་དྲུག་གི་རང་ས་ཟིན་པའི་རེ་བའི་སྦྲ་གུར་ཕིབས་ནས་ཤོག །

༢༠༡༣ ༡༡ ༡༩ ཉིན།