ཆང་སྐྱེས།
ཉིན་བྱེད་གཞོན་ནུ་ཕྱིར་མིག་སྟོང་གིས་ནུབ་མཐའི་རི་བོའི་ཕག་ལ་བཞུད།།
ཁོར་ཡུག་མེ་ཏོག་མཛེས་སྡུག་སྣུམ་པོ་ས་སྲོད་ཀློང་ན་ཡུན་གྱིས་རྒུད།།
འདབ་ཆགས་མ་བུའི་གཤོག་འགྱུར་བདེ་མོ་རི་བོའི་ཁུགས་ན་རྒྱང་དུ་ཡལ།།
ས་མཐའི་མི་བུའི་སེམས་ཀྱི་རི་ལུང་དྲན་གདུང་ཆར་ཆུས་ཡོངས་སུ་བརླན།།
ཟླ་བ་ཁེར་འགྲོ་སུན་སྣང་སྟོང་གིས་སྤྲིན་པ་ཐ་ཐོར་གསེབ་ན་འདུར།།
ཁྱི་ཚོགས་ཟུག་སྐད་སྐྱོ་བ་འབུམ་གྱིས་ཕྱི་རོལ་ཁྲོམ་ན་ཕྱོགས་སུ་འཕུར།།
ཟུར་གསུམ་སྙིང་གི་ཁྱིམ་ན་འཛུམ་པའི་གང་གི་ཞལ་རས་ཡིད་ལ་འཁོར།།
དྲན་པའི་གདུང་བ་སྙིང་གིས་མ་ཐེག་རྒུན་ཆང་དམར་བོ་ཧབ་ཀྱིས་འཇིབ།།
འབའ་འབའ་ལུག་གི་རྩེད་འཇོ་ཁྲོད་ན་མེ་ཏོག་དཀར་དམར་མཉམ་དུ་འཐུས།།
ཐང་སྨུག་སྦྲ་ཡི་ཁ་འཚུབ་བར་ན་སྙིང་གཏམ་འོ་མའི་མར་ལོ་འཁྲུངས།།
སུ་དང་གང་གིས་བཙན་གྱིས་མ་བསྒྲིགས་དམར་ཆུང་སེམས་གཉིས་གཅིག་ཏུ་མཐུན།།
ཁྲི་ཤོར་རྒྱལ་མོའི་རླབས་སྒྲའི་ཁུགས་ན་ང་དང་ཁོ་མོའི་གཏམ་རྒྱུད་འཁྱིལ།།
ཁ་བའི་འདབ་མ་ཤུགས་ཀྱིས་ཐོར་ཏེ་རྩ་ཐང་ཡདས་བོ་འཁྱག་གིས་བསྡམས།།
ཅེ་སྤྱང་ཝ་མོའི་དགོད་སྒྲ་གཟེར་མོས་གཡང་དཀར་ལུག་ཁྱུའི་ལྷིང་འཇགས་དཀྲོགས།།
མི་དབང་བཙན་པོའི་བཀའ་ལུང་ཞིག་གིས་ཆུང་འདྲེས་ངེད་གཉིས་ཁ་ཁར་བཏང་།།
དྲིན་ཆེན་ཕ་མ་སྒོར་གྱིས་བསླུས་ཏེ་སྙིང་གི་ཕྱེད་ཀ་རྒྱང་དུ་ཁྱེར།།
ཉིན་དང་མཚན་མོའི་འཁོར་བསྐྱོད་མ་ཤེས་ལོ་དང་ཟླ་བ་གཅིག་འདས་གཉིས།།
སྡུག་གི་མཚོ་མོས་སེམས་པ་བསྣུབས་ཏེ་གློ་དང་མཆིན་པའི་སྟེང་འོག་བརྗེས།།
སྙིང་གི་འཕུར་ལྡིང་ལག་པས་སྐྱོར་བཞིན་གོ་ཁ་ལྗིད་མོ་རི་ལ་བསྒྱུར།།
ཐོབ་ཐང་མེད་པའི་གྲུ་ཟུར་ཞིག་ནས་དྲོད་ཁོལ་དབེན་པའི་ཚང་ཞིག་གཡེར།།