སངས་རྒྱས་ཀྱི་ཐག་ཉེར་བཅར་བའི་མི།

རྫ་ཚེ་རིང་བཀྲ་ཤིས།
 

༼ལོ་ངོ་བཅུ་བདུན་རྗེས་ཀྱི་ཁར་རྩང་།༽

ཁར་རྩང་ཁར་ཉིན་སྤྱིར་བཏང་བཤད་ན། རང་ཉིད་ལུས་སེམས་ངལ་དུབ་ཀྱིས་མནོན་པའི་དུས་ཚོད་ཅིག་ཡིན། རྒྱལ་ས་ལྡི་ལིའི་དྲོད་ཚད་ཏུའུ་བཞི་བཅུ་ཞེ་གཉིས་ལ་སླེབས་པའི་ཚད་གདུགས་ནི་དེ་བས་ཀྱང་ཧ་ཅང་མ་གོམ་པ་ཞིག་རེད། འོན་ཀྱང་། སྐྱོ་གདུང་དང་ངལ་དུབ་ཀྱི་ཁྲོད་དུའམ། ལས་བྲེལ་དང་རྣམ་གཡེངས་ཀྱི་གསེབ་ནས་སམ། ངལ་གསོ་དང་བག་ཡངས་ཀྱི་ཀློང་གང་ནས་ཀྱང་ཕྲིན་ཕྲན་ནི་ང་དང་ཆེས་ཉེ་ས་ཞིག་ན་ཡོད། འདིས་ངའི་འཚོ་བ་དང་ལས་དོན་གྱི་མི་ཚེའི་ཁྲོད་དུ་ཆ་ཤས་ཧ་ཅང་མང་པོ་ལེན་བཞིན་ཡོད། ཅིག་བྱས་ན་འདི་ནི་ཁར་རྩང་དེ་རིང་། འཚམས་གླིང་བརྡ་འཕྲིན་མ་ལག་གི་ཁྱབ་ཁོངས་སུ་གོ་གནས་མཐོ་ཤོས་ཨང་གཉིས་པ་ཙམ་ཟིན་པའི་ཕྲིན་ཕྲན་འཛད་སྤྱོད་པ་སྤྱིའི་ཐུན་མོང་གི་སྣང་ཚུལ་ཙམ་ཡིན་སྲིད།

ཁར་རྩང་ཕྱི་དྲོ་དུས་རྒྱུན་ལྟར་སྐད་འཕྲིན་གྱི་ཚོགས་པ་གསར་པ་ཞིག་གི་ནང་དུ་བཅུག་འདུག ལ་མིང་ལ་རྗེས་དྲན་གླེང་ཞེས་བྲིས་འདུག ནང་དོན་ལ་དོ་སྣང་གང་ཡང་མ་བྱས་པར་ཕྱིར་ཐོན་པ་ཡིན། ཅུང་མ་འགོར་བར་ཡང་བསྐྱར་བསྣན་བྱུང་། རྗེས་ནས་ཚོགས་པ་དེ་ནི་བདག་གི་རྩ་བའི་བླ་མ་སྙིགས་དུས་ཀྱི་མི་ལ་གཉིས་པ་མཁན་ཆེན་པདྨ་ཆོས་དབྱིངས་ཁྱབ་བརྡལ་གྱི་སློབ་མ་དང་སློབ་བརྒྱུད་ཐུན་མོང་གིས་ཆེད་དུ་མཁན་ཆེན་མཆོག་སྐུ་མྱ་ངན་ལས་འདས་པའི་རྗེས་དྲན་དུས་མཆོད་ཀྱི་དངོས་གཞི་བརྩི་སྲུང་གི་བྱེ་བྲག་ཏུ་དམིགསཏེ་བཙུགས་གནང་བའི་ལས་འགུལ་གྱི་ཆ་ཤས་ཤིག་ཡིན་པ་ཧ་གོ་སོང་། དེ་མ་ཐག་ང་ཚོས་བསམ་ཚུལ་གཅིག་མཐུན་བྱུང་བ་ལྟར་གླེང་སྟེགས་ཀྱི་མིང་། ཆོས་དབྱིངས་ཁྱབ་བརྡལ་རྗེས་དྲན་གླིང་དུ་བརྗེ་བསྒྱུར་གྱིས་ཕན་ཚུན་སེམས་ཀྱི་གཏིང་ནས་བཀའ་མོལ་འཆད་རེས་ཞུས། ངས་ཚོགས་ཐོག་ཏུ་ངས། ངའི་མིང་ལ་རྫ་ཆུ་ཁའི་ལག་རིང་ཟེར། ངའི་དགོན་པ་དྲེལ་དཀར་དགོན་པ་ཡིན་སོགས་རང་ཉིད་ངོ་སྤྲོད་སྟབས་བདེ་ཞིག་བྱས།

དེ་ལྟར་བྱ་དོན་ནི། ཆོས་གྲོགས་མང་པོ་ཞིག་གིས་འཕྲིན་ཕྲན་གྱི་ཐོག་ཏུ་མིང་ཚབ་དང་ཕྱེད་པར་ཚབ་བེད་སྤྱོད་བྱས་པ་ལས་དངོས་མིང་དང་དངོས་པར་བེད་སྤྱོད་གནང་མེད་པས་དངོས་སུ་ཞལ་ཚོར་དཀའ་བ་དང་། ཞལ་མ་ཚོར་ན་མི་ལོ་ཉི་ཤུའི་ཡར་སྔོན་གྱི་ཐུན་མོང་གི་འཚོ་བ་ལ་ལབ་གླེང་བྱེད་པའི་གཅིག་གྱུར་གྱི་བརྗོད་གཞི་དེ་ཅུང་རྙེད་དཀའ་བར་བསམ་པ་ཡིན། མ་གཞི་བླ་རྗེས་དྲན་བྱེད་པའང་ང་ལྟ་བུ་དབང་པོ་དམན་པ་སྤྱིར་བཏང་བ་རྣམས་ལ་མཚོན་བརྩེ་དུང་དང་དྲན་སྣང་གི་བག་ཆགས་བཟང་པོ་དག་ཕྱིར་དྲན་བྱེད་པ་ཞིག་ཡིན་པ་འདྲ། དེའི་ཕྱིར་ངས་འོག་ཏུ་འདས་སོང་གི་མྱོང་བྱང་འགའ་ཞིག་ཕྱིར་དྲན་བྱས་ན་བསམ། མ་གཞི་ལག་རིང་ནི་སྐབས་དེའི་ངའི་བཏགས་མིང་ཡིན་ཞིང་། དེ་ཡང་བླ་མས་ཞལ་བཀྱལ་གྱི་ཚུལ་དུ་གནང་བའི་བཏགས་མིང་ཡིན། ཁྱི་རྒན་དཔལ་སྤྲུལ་གྱི་གསང་མཚན་དུ་གོ་བ་བླངས་པ་ལྟར་ན་ངའི་གསང་མཚན་ཡང་ཡིན་ཆོག

བླ་མས་ནམ་རྒྱུན་ཆོས་ཁྲིའི་ཁ་ནས། བཀའ་བཀྱོན་དང་བསྟོད་བསྔགས། ཀུ་རེ་དང་ཞལ་རྩེད་གང་གནང་ཡང་གྲྭ་མང་གི་དབུས་ནས་ཀྱང་འདི་རང་གིས་ཕྲན་ལ་འབོད་གནང་བ་ཡིན་སྟབས། ངའི་མིང་མི་ཤེས་པ་མང་པོ་ཞིག་གིས་ཀྱང་། རྫ ཆུ་ཁའི་ལག་རིང་ལབ་ན་ཤེས་ཀྱི་ཡོད། ཕྲིན་ཕྲན་དུ་ཕྲན་གྱིས་སྐད་ཆ་བཤད་ཚར་བ་དང་། བླ་མས་ཨ་རིག་རྫའི་དབུ་མཛད་སྐད་ཆེན་མ་ཞེས་འབོད་གནང་མཛད་མྱོང་བའི་མཁན་པོ་འཇིགས་མེད་རྡོ་རྗེ་དང་། དབང་ལྡན་ཞི་དང་ནོར་དགའི་ཞི་ལི་(ཚེ་བཀྲ)སེམས་མེའི་ཞི་ལི་(དགེ་དཔལ)ཞེས་ང་ཚོའི་ཕན་ཚུན་གཅིག་གིས་གཅིག་ལ་འདོག་མྱོང་བའི་དབང་ལྡན་ཞི་ལུ་གསུམ་གྱི་ནང་གསེས། ད་ལྟ་བླ་མའི་གདན་སར་འཆད་ཁྲིད་ཀྱི་ཐུག་མགན་བཞེས་བཞིན་པའི་ངེས་པ་དོན་གྱི་ཆོས་སྨྲ་བ་མཁན་པོ་ཚུལ་ཁྲིམས་རྣམ་དག་གམ་ཡེ་ཤེས་དོན་རྟོགས་ཀྱི་ཚ་བུ་སྐྱོན་ཐར། དེ་བཞིན་ཧོར་ཤུལ་དཀར་དྲིས་དང་། དགེ་གུང་པདྨ་འགྱུར་མེད། དབལ་ཤུལ་འབྲུག་རྒྱམ། མཁན་པོ་གྲགས་པ་ཡེ་ཤེས་སོགས་གཅིག་རྗེས་གཉིས་མཐུད་དུ་མཉམ་ཞུགས་བྱས་བྱུང་། ཁོང་ཚོའི་དོ་ནུབ་ཀྱི་བཀའ་མོལ་དག་ནི་སྤྱིར་བཏང་གླེང་ཚོམས་དག་གི་ཀུ་ཅོ་དང་མི་འདྲ་བར་ཧ་ཅང་ཚོར་བ་ཡོད་པ་དང་། སྙིང་ཉེ་བ། དམིགས་བསལ་གྱི་དགའ་སྐྱོའི་དུང་སྣང་ལྷང་ངེ་བ་ཞིག་ཏུ་སྣང་ཞིང་། མི་ལོ་ཉི་ཤུའི་རྗེས་ཀྱི་དེ་རིང་སླར་ཡང་། སྐུ་དངོས་སུ་མ་མཇལ་ཡང་། ཤར་ནུབ་ཀྱི་གླིང་ཕྲན་མི་འདྲ་བའི་ཁམས་ནས་དགའ་སྐྱོ་འདྲེས་པའི་གླེང་མོལ་མཉམ་དུ་བྱེད་ཐུབ་པར་ཡ་མཚན་དངོས་བྱུང་ལྟ་བུའི་བརྗོད་དཀའ་བའི་ཚོར་བ་མནོན་དཀའ་བ་ཡང་སེར་བྱུང་།

 

༼ཕྱིར་དྲན་ཁྲོད་ཀྱི་ལུ་མདོ།༽

གླེང་མོལ་གྱི་ཁྲོད་ནས་ང་ལ་ཐོག་མར་སྐབས་དེའི་ལུ་མདོའི་སའི་ཆགས་དབྱིབས་ནས་ལུ་མདོ་ནས་ཧོར་ཤུལ་ཡུལ་ཚོའི་ལྟེ་གནས་བར་གྱི་ཕག་གསོ་ར་བ་དང་། ཡུལ་མིའི་ཁང་པ་ཐར་ཐོར། སྲིད་གཞུང་གི་ལས་ཁུང་དང་སྒེར་གཉེར་གྱི་ཚོང་ཁང་། ད་དུང་གསེར་ཆུའི་ཟམ་པ་ནས་ཧོར་ཤུལ་དགོན་པ། རིའི་རུག་རི་ཁྲོད་ནས་འཇམ་དབྱངས་སྒྲུབ་ཕུག་གི་བར་གྱི་སའི་ཆགས་དབྱིབས་དང་ཡུལ་གྱི་ལྗོངས་བཀོད། ཡུལ་མིའི་འཚོ་བ་ནས་རང་སྒེར་གྱི་མྱོང་བྱང་ཕྲ་རགས་མཐའ་དག་རེ་རེ་ནས་བློ་ངོགས་སུ་འཆར་མགོ་བརྩམས་ཤིང་། ཁྱད་པར་རང་ཉིད་ཧ་ཅང་གྲང་ངལ་ཆེ་ལ་ཁ་བ་ཡང་བབས་ཡོད་པའི་དགུན་ཨ་ཚ་རྡོ་བཀད་ཀྱི་ཉི་མ་ཞིག་ལ། ཁ་ཟས་མེད་རྒྱབ་གོས་མེད། རུམ་གྲོ་མེད། རོགས་ཟླ་མེད་དུ་ལུ་མདོ་ཞེས་པའི་གདན་ས་དེར་སླེབས་པའི་ཉིན་མོ་ནས་ བླ་མ་རིན་པོ་ཆེས་དུས་དང་དུས་སུ་གནང་བའི་རྩམ་ཕྱུར་གྱི་གསོལ་རས་དང་། ད་དུང་། ཡེ་ཤེས་དོན་རྟོགས་ཀྱི་ཟ་ལྷག་དང་། འཇིགས་མེད་རྡོ་རྗེའི་གོས་གོ་ལྷག ཨ་ཁུ་བྱམས་མགོན་གྱི་ཞོ་སྐལ་ཐུད་སྐལ། ད་དུང་ཧྥང་ཞོའི་མེན་ཚང་ལ་ནང་དགོང་ཨ་མཆོད་བྱས་པའི་ཡོང་འབབ། བླ་མ་རིན་པོ་ཆེས་མཐུ་ཆེན་བརྒྱུད་ནས་འཆར་ཅན་གནང་བའི་ཚེས་བཅུ་ཉེར་ལྔའི་ཚོགས་འཁོར་སྐབས་ང་དང་། བཀྲ་ལེགས་ཞུ་སྡེས། ཨ་ཁུ་རིག་ཆོས། སྤྲུལ་སྐུ་སྐྱེ་སྔ། མཁན་པོ་ཤེས་བྱ་སོགས་ཤ་མེད་ཟ་མཁན་ཁག་ཅིག་ལ་ལོགས་སུ་བཙོས་པའི་འབྲས་བཙོས་མ་ཧ་ཡང་གང་པོའི་ལྷག་མ་དང་མར་བཅས་ལ་འཚོ་རྟེན་བྱས་ནས་ མཁན་ཆེན་བླ་མ་རིན་པོ་ཆེ་ཆོས་དབྱིངས་ཁྱབ་བརྡལ་དང་། ཨ་ཁུ་ཤེས་རབ་བཀའ་དྲིན་ཅན། མཁན་པོ་ཟླ་དབང་དང་མཁན་པོ་ཀུན་བཟང་བསྟན་འཛིན་སོགས་བླ་མ་དང་བླའི་ཐུགས་སྲས་བུ་ཆེན་དག་གི་མདུན་ནས་མི་ལོ་དེ་སྙེད་ཅིག་ལ་ཡ་གི་རྫོགས་པ་ཆེན་པོ་ནས་མ་གི་ཐུན་མོང་ཐེག་པའི་བར་གྱི་ཆོས་ཚུལ་གང་མང་ཞིག་ལ་ཐོས་བསམ་གྱི་བག་ཆགས་བཞག་པ། ལུ་ཁོག་ནས་འབུད་ཤིང་འཐུས་པ། ལུ་མདའ་ནས་དབྱར་སྐྱིད་བཏང་བ་སོགས་ཁྲི་གེར་དྲན་ཅིང་སེམས་ངོགས་སུ་ལྷང་ངེ་ལྷན་ནེ་ལྷམ་མེར་ཤར།

 

༼བླ་མ་ཐོག་མར་མཇལ་བ།༽

ཁྱད་པར་ང་ལུ་མདོར་སླེབས་པའི་ཉིན་དེར། ཉིན་གུང་ཆུ་ཚོད་བཅུ་གཉིས་མ་ཟིན་ཙམ་ཡིན་ཞིང་། གྲྭ་པ་རྣམས་རེ་རེ་ནས་བླ་མའི་ཉེ་མ་རང་ནས། གཟིམ་ས་ཨེ་བདེ་ཞེས་ཁམས་བདེ་ཞུ་ཞོར་འགའ་རེ་ཆོས་རའི་ནང་དུ་མོས་ལ་མ་མོས་འདྲ་ཞིག་བྱས་ནས་འཛུལ་གྱིན་འདུག་ཅིང་། འགའ་རེར་བླ་མས། བདེ་་་་་་་ལེ་ལོག་་་ཇ་གང་མཐུང་ཞེས་རྣམ་འགྱུར་ཡེ་མེད་པའི་བཀའ་ལན་དེ་ཐོབ་པ་དང་ས་ཁར་ལྷབ་སེར་གོ་རིམ་མེད་པར་བསྡོད་ཅིང་། མདུན་ནས་གྲྭ་པ་ཞིག་གིས་ཕོར་ཆུང་རེ་རེ་བཞིན་འོ་ཇ་ཚ་བོ་གང་རེ་གང་རེ་བྱས་ནས་བླུགས་ཤིང་གཏོད་པ་དང་། སྡེར་མའི་ནང་གི་ཞུན་ལིང་དང་ཤ་ལིང་དུམ་བུ་དེ་དག་ཀྱང་གང་ཟིན་རེ་གནང་གིན་འདུག རྗེས་སོར་ལྟ་དུས་དེ་དུས་ཇ་བླུག་མཁན་དེ་སྟོང་ཆུང་ངམ་གྲུབ་ཐོབ་རེད། ད་ནངས་ཞོགས་པ་སྦོ་མདའ་ནས་ཡོང་སྟེ། ནངས་ཆུ་ཁ་ལ་མ་རེག་པའི་ང་ལ་མཚོན་ན་ཇ་དེ་ནི་འཆི་སོས་ཀྱི་སྨན་རེད་ལ། བླ་མ་དང་ཞལ་ཐོག་མར་མཇལ་སྐབས་ཀྱི་ཇ་སྐལ་དང་ཐུད་སྐལ་དེར་རྟེན་འབྲེལ་གྱི་གནད་བཟང་པོ་ཡོད་པ་དེ་ཡང་སེམས་ལ་འཁོར་བྱུང་བས་གང་གནང་བ་དེ་ཟོས་པ་ཡིན།
ང་དེ་དུས་ནས་ཧོབ་(ཧམ་པ)ཆེ་ཙམ་ཡོད་པས་ཟུར་གྱི་དཔེ་ར་ཁུར་མཁན་ཞིག་གི་དཔེ་ཆར་བལྟ་ཙམ་བྱས་དེ་རིང་གསུང་བཞིན་པའི་གསུང་ཆོས་ཀྱི་མིང་དྲིས་པས་ཐེག་ཆེན་ཚུལ་འཇུག་ཟེར་བ་ཞིག་རེད་འདུག འོན་ཀྱང་དེ་ནི་གོ་ཙམ་ཡང་མ་མྱོང་བའི་གཞུང་ཞིག་རེད། བླ་མར་ཞལ་ཕྱོགས་ནས་རང་ཉིད་བླ་མའི་མདུན་དུ་ཡོང་བའི་རྒྱུ་མཚན་ཞུས་ཤིང་། དེ་རིང་ནས་བཀའ་ཆོས་ཐད་ཀར་ཞུས་ན་འགྲིག་གི་རེད་དམ་དྲིས་པར། ཧ་ཅང་འབེན་ལ་མ་འབེན་པ་ལྟ་བུའི་རྣམ་འགྱུར་ཞིག་གིས། འདུག་ཁུལ་གྱིས། ཞེས་པའི་བཀའ་ལན་འདི་གནང་བྱུང་། ཡང་། མདུན་གྱི་གྲྭ་པ་གཞན་ཞིག་ལ་ཞལ་གཟིགས་ཏེ། རྫ་ཆུ་ཁའི་གྲྭ་པ་འདིས། བསམ་བློ་མ་བཏང་གི་སྐད་ཆ། དམིགས་པ་མ་བཟུང་གི་ཕཊ་ཤད་མིན་ན་ཡག་གི ཞེས་གསུངས་པ་དེ་ད་ལྟའང་དྲན་གི སྐབས་དེར་ཁོང་གི་བཀའ་གནང་ས་དེ་དུས་ཕྱིས་ལྟ་དུས་སྤྲུལ་སྐུ་བདེ་གསལ་རེད་འདུག

ཡེ་ཤེས་དོན་རྟོགས་ཀྱིས་ལོ་སྔོན་མར་རྫ་ཆུ་ཁའི་རྟ་རྒྱུག་ཚར་རྗེས་རླངས་འཁོར་གཅིག་གི་ཁ་ཤིང་ཐོག་བསྡད་ནས་ཆུ་ཚོད་ཁ་ཤས་རིང་མཉམ་དུ་ཡོང་མྱོང་འདུག་པ་དེ་དྲན་པ་སོས་སོང་། བླ་མའི་མདུན་དེ་ཀ་ནས་ལམ་སེང་ངོ་ཤེས་པའི་མི་ཞིག་དང་འཕྲད་པ་ནི་ཧ་ཅང་ཡ་མཚན་ཞིག་རེད། བླ་མས་ཀྱང་དེ་ཀ་རང་ནས། ཡེ་ཤེས་དོན་རྟོགས་ཀྱིས་ང་ལ་རོགས་པ་གང་ཐུབ་བྱེད་དགོས་པའི་བཀའ་གནང་སོང་། བླ་མས་ཆོས་ཁྲིད་དབུ་བཙུགས་ཤིང་། ང་ཡང་ཚོགས་གྲལ་དུ་བསྡད། ཆོས་ཁྲིད་ཆུ་ཚོད་གསུམ་རིང་ལ་མུ་མཐུད་དེ་གསུངས་ཤིང་། ཉིན་དེའི་ཆོས་ཆོས་མཚམས་ནི་ཤེས་བཞིན་ཆེན་པོའི་སྣོད་ཀྱིས་བཟུང་ནས་བཏང་ཆེན་ཆེན་པོའི་ངང་ལ་འཇོག་པ་ཞེས་པའི་སྐབས་སུ་ཁེལ་འདུག འཇམ་དཔལ་མ་ཡིན་རྡུལ་ཙམ་གཡོ་བ་དེ་ཉིད་དེར་ཡིན་དེར་མི་གནས། སོགས་ཁྱུང་ཆེན་ལྡིང་བ་དང་། ནམ་མཁའ་ཆེ་སོགས་ཀྱི་ལུང་མང་པོ་ཞིག་དྲངས་ཡོད་ས་ཞིག་ཡིན་པ་དྲན། བླ་མ་རིན་པོ་ཆེས་ཁོང་གིས་ནམ་མཁའ་ལྟ་བུའི་དགོངས་སྤྱོད་དེ་དག་རེ་རེ་བཞིན་རྒྱས་འགྲེལ་དང་ཟབ་འགྲེལ་གནང་ཞིང་།

བར་སྐབས་ཤིག་ལ་སྤྱན་ནམ་མཁའ་ལ་གཟིགས་བཞིན། ཁྱེད་ཀྱིས་ཡིག་ཐོག་ན་འདི་འདྲའི་ཡག་པོ་ཞིག་བཤད་ནས་འདུག་སྟེ། དེང་སང་འདི་ན་དེ་བཞིན་ཉམས་སུ་ལེན་མཁན་ནི་སུ་གཅིག་ཀྱང་མི་འདུག་ཅེས་སྐད་ཤུགས་ཆེན་པོས་ ཨའེ་་་རོང་ཟོམ་་་ཞེས་ལན་གཉིས་གསུམ་ཞིག་བོས་གནང་སོང་། ཡུད་ཙམ་རིང་ཚོགས་ཁང་ཧྲིལ་པོ་དལ་ཅག་གེར་གྱུར་ཅིང་། ཅུང་ཙམ་རྗེས་བླ་མས་ཞལ་འཛུམ་ཙམ་གྱིས། ལན་སྟེར་མཁན་འདྲ་སུ་མི་འདུག་གམ། ཞེས་གསུངས་རྗེས་མུ་མཐུད་བཀའ་ཆོས་གནང་། སྐབས་རེར་ཞལ་རྩེད་དང་ཀུ་རེ་གནང་བས་ཚོགས་ཁང་ཧྲིལ་པོ་འུར་ཆི་ལེར་བཏང་ཞིང་། བླ་མ་རིན་པོ་ཆེ་ཉིད་ཀྱང་གཅིག་མཚུངས་སུ་བཞད། སྐབས་རེར་ཞལ་ངོ་མནག་སྟེ། བཀའ་བཀྱོན་དང་སྦྲགས་བསླབ་བྱ་གནང་བ་དང་། ཡང་སྐབས་འགར་ཚིག་དོན་མཐའ་དག་ལ་བཟབ་པ་ལྷུར་ལེན་པས་འབྲི་རེ་རེ་ནས་ཁ་གསལ་དོན་གསལ་དུ་གཏན་ཚིགས་དང་བཅས་པའི་སྒོ་ནས་འགྲེལ་བ་སོགས་མདོར་ན་གཞན་དང་ཡེ་མི་འདྲ་བའི་འཆད་ཁྲིད་གནང་སྟངས་ཤིག་འདུག

ཤིང་ལེབ་བཞི་སྐོར་ལྕག་འཛེར་རྒྱབ་པའི་ཁྲི་ཆུང་ཆུང་ཞིག་གི་སྟེང་དུ་བཞུགས་པའི་ཁོང་ལ་མ་ཚོན་ན་རིས་ལིང་པ་གཅིག་གི་ཅོག་ཁེབ་ཙམ་ཡང་མེད་ཅིང་། ཆོས་ཁང་ཡང་པང་གཅར་སོགས་ཤིང་ལེབ་དང་ཤིང་ལེབ་ཀྱི་བར་དུ་འཛུབ་མོ་ཐར་ཙམ་དེ་འདྲ་དང་། ཚོགས་ཁང་གི་ངོས་གཉིས་གསུམ་ཞིག་ནི་རས་ཡོལ་ཁོ་ནས་རཁྭ་ཏ་འགོག་ཐབས་བྱས་པ་ཙམ། ནང་གི་ཀ་གདུང་ཡང་ཟམ་འཛེར་ཞེས་པའི་ལྕགས་འཛེར་རིང་པོ་དེ་འདྲས་འཛེར་བརྒྱབ་བཞག་པ་་ཙམ་ལས་རྒྱས་སྤྲོས་ཞེས་བྱ་བའི་མིང་ཡང་མི་གྲགས་བཙལ་ཀྱང་མི་རྙེད་པ་དེ་འདྲ་རེད། རྒྱབ་ཀྱི་མིའི་དཔེ་ཆ་སྔུན་གྱི་མེའི་རྒྱབ་ལོག་གི་གཟན་གྱི་སྒང་ལ་འཛེར་ནས་ལྟ་བ་ལས་པང་ཁ་སྟོང་བ་ཙམ་གྱི་ས་ཁྱོན་ཀྱང་མེད། འོན་ཀྱང་། ནང་གི་ཆོས་ཀྱི་དགའ་བ་མཉམ་སུ་མྱོང་བའི་བདེ་སྐྱིད་ནི་ལྷའི་གཞལ་མེད་ཁང་དུ་གྲགས་པས་ཀྱང་འགྲན་དུ་མེད། འདི་སློབ་མ་རྡོ་རྗེའི་མཆེད་པོ་དག་ལ་མཐུན་སྣང་དུ་བྱུང་བའི་ཉམས་མྱོང་ཞིག་ཡིན།

ཉིན་དེའི་ནུབ་མོ་ང་བླ་མས་བཅོལ་མ་གནང་བ་བཞིན་ཡེ་ཤེས་དོན་རྟོགས་ཀྱི་རྩར་བསྡད་ཅིང་། ཁོང་གི་ཁང་པ་ནི་བླ་སློབ་སྤྱི་དང་འདྲ་བར་ཤང་ལེབ་ཀྱི་རྒྱབ་ལྤགས་འཛེར་ནས་ནང་ངོས་ལ་ཚགས་ཤོག་སྦྱར་བ་དབྱར་ཆར་པ་དང་དགུན་ལྷག་པ་གཉིས་ཀར་གདོང་ལེན་ཆེར་བྱེད་མི་ཐུབ་པ་དེ་འདྲ་ཞིག་རེད། དེ་དུས་ནས་ང་ལ་དཔེ་ཆའི་གོ་བ་གཏིང་ཟབ་མེད་ཀྱང་རྒྱལ་རབས་ལོ་རྒྱུས་ཀྱི་བཤད་ཡམ་ཅུང་ཟད་ཡོད། ཡིན་མོ་དེ་ནས་ད་ལྟའི་བར་དུ་ང་གཉིས་ཕན་ཚུན་མི་ཡུལ་གྱི་འདུན་པ་དང་ལྷ་ཡུལ་གྱི་དམ་ཚིག་བཟང་པོ་རྒྱུན་འཁྱོངས་བྱས་པ་རེད།
དེ་ནས་མུ་མཐུད་དཔེ་ཁྲིད་ཞུས་ཤིང་། བླ་མ་སྐུ་མ་གཤེགས་བར་དུ་ཆོས་ཁྲིད་བཅད་ནས་ཉིན་གཅིག་གི་ལམ་ལ་ཡང་མི་འགྲོ་རྒྱུའི་དམ་བཅའ་ཞིག་བཞག་པ་དེ་མཐའ་འཁྱོར་བ་ཞིག་བྱུང་ཡོད། དེ་ནི་ངའི་མི་ཚེའི་ནང་གི་མཐའ་འཁྱོངས་ཐུབ་པ་བྱུང་བའི་དམ་བཅའ་དགའ་རིན་ཡོད་པ་གཅིག་གཅིག་པུ་དེ་ཡིན་ས་རེད།

 

༼འཕྱུར་བ་ལྟ་བུའི་སེམས་ཚོར།༽

དེ་རིང་ཞོགས་པ་ཡང་བསྐྱར་འཕྲིན་ཕྲན་གྱི་ཚོམས་སུ། གདན་སའི་བསྐྱར་དར་གྱི་རྣམ་པ་དང་། ཁྱད་པར་དེ་རིང་མཁན་ཆེན་བླ་མ་རིན་པོ་ཆེའི་འདས་མཆོད་དངོས་གཞིའི་ཉིན་མོ་སྟེ། བླ་མ་བཀའ་དྲིན་ཅན་ཞིང་འདིའི་གདུལ་བྱ་རྫོགས་པའི་ཉིན་གྱི་དུས་དྲན་མཚོན་པའི་མཛད་སྒོའི་རྣམ་པ། དགེ་འདུ་པ་དག་གི་སེར་སྦྲེངས་ཀྱི་བསྟར་པའི་སྣ་ལ་མཁན་ཆེན་ཟླ་དབང་དང་། སྤྲུལ་རིན་པོ་ཆེ་སེང་ཐར། ཨ་ཁུ་ཆོས་ཕུན་སོགས་མཆེད་གྲོགས་གོང་མ་དག་བླ་མའི་སྐུ་གདུང་རིན་པོ་ཆེའི་མདུན་དུ་རྒྱ་གླིང་སྤོས་སྣ་བྱས་ཏེ་དུལ་བ་ཉེ་བར་ཞི་བའི་སྤྱོད་ལམ་དང་བཅས་ཕེབས་བཞིན་པའི་སྣང་བརྙན་དག་གིས་བདག་ལ་སླར་ཡང་རྫོགས་ལྡན་གྱི་དུས་བཟང་པོ་དེ་དག་དྲན་དུ་བཅུག ཡིད་ཀྱི་མཚོ་མ་དབང་མེད་དུ་འཁྱོམས་སུ་བཅུག བླ་མ་དང་རྡོ་རྗེའི་མཆེད་གྲོགས་བཟང་པོ་དག་དྲན་དུ་བཅུག

བར་སྐབས་བླ་མའི་གདན་སར་ཕྱི་ནང་གི་ཉེར་འཚེ་ཕྲན་བུས་བར་ཆད་ཅི་རིགས་བྱུང་མྱོང་ན་ཡང་། ད་ཆ་ཚུལ་ཁྲིམས་དང་ཤེས་རབ་ཀྱི་དཔལ་ཕུན་སུམ་ཚོགས་པ་ལྡན་པའི་ཅིང་ཤེས་བཟང་པོ་དང་བུམ་པ་བཟང་པོ་ལྟ་བུའི་སྐྱེས་བུ་དག་གིས་གདན་ས་འདིར་ལུང་རྟོགས་ཀྱི་རྒྱལ་མཚན་བཟང་པོ་སྦྲེངས་བཞིན་པར་སྤྲོ་བ་ཆེན་པོའང་བསྟས། ཁོང་རྣམ་པ་ནི་བླ་མའི་ཐུགས་ཟིན་ཀྱི་སྐྱེས་བུ་མཆོག་ཏུ་གྱུར་པ་དག་རེད། སྔོན་བླ་མ་སྐུ་གཤེགས་པའི་ཐ་མའི་དགོངས་རྫོགས་ལ་ཆོས་རྗེ་ཡིད་བཞིན་ནོར་བུ་དངོས་སུ་ཕེབས་ཏེ། རྗེས་འཇུག་རྣམས་ལ་ཞལ་ཏ་ལམ་སྟོན་དང་། ཁྱད་པར་འབྲོམ་སྟོན་པའི་ལོ་རྒྱུས་དང་སྦྱར་ནས་བླ་མའི་གདན་ས་ལ་ཞབས་ཏོག་བགྱིད་པའི་གལ་ཆེའི་རང་བཞིན་གསུངས་པ་དང་འབྲེལ། གང་མངགས་བཅོལ་གནང་བ་དག་ད་ཆ་ཁོང་རྣམ་པས་དངོས་སུ་མངོན་གྱུར་བྱུང་དུ་བཅུག་ཡོད་པ་རེད། འདི་ནི་ཧ་ཅང་རླབས་ཆེན་རེད།

 

༼ཆེས་ཐ་མའི་སྐྱིད་སྐྱིད༽

ལོ་ཧ་ཅང་མང་པོ་ཞིག་དེ་ལྟར་ཐལ། ལོ་ཁེར་རྩི་གཉིས་རྩི་བྱས་ནའང་ལོ་ངོ་བཅུ་བདུན་འགྲོ་གིན་འདུག བླ་མས་མདོ་སྡེ་རྒྱན་གྱི་འགྲེལ་བ་ཐེག་མཆོག་བདུད་རྩིའི་དགའ་སྟོན་གྱི་མོས་པའི་ལེའུའི་དཀྱིལ་ནས་ཆོས་མཚམས་བཞག་ནས་སྐུ་གཤེགས་པ་རེད། ཁོང་གི་སྐུ་ཚེ་ཧྲིལ་པོ་དེ་ལྟར་སངས་རྒྱས་ཀྱི་བསྟན་པ་འབའ་ཞིག་གི་ཆེད་དུ་བཏང་བ་རེད། འགྲོ་དོན་འབའ་ཞིག་གི་ངང་ནས་རྫོགས་པ་རེད། སྐུ་གཤེགས་སྟངས་འདི་ནི་བླ་ན་མེད་པའི་གྲུབ་རྟགས་དང་འདས་རྗེས་ཀྱི་མཐར་ཐུག་ཡིན་པར་ཆོས་རྗེ་ཡིད་བཞིན་ནོར་བུས་ཀྱང་ཡང་དང་བསྐྱར་དུ་གསུངས་མྱོང་། ལོ་དེའི་དཔྱིད་ཐ་མའི་ཚེས་གསུམ་གྱི་ཉིན་དེར་སྙུན་ཟུག་གང་ཡང་མེད་པར་དྲན་པ་མངོན་དུ་བཞག་སྟེ་ང་ཚོ་དང་ཞལ་གྱེས་ནས་ཕེབས་པ་རེད།
སྐབས་དེར་སློབ་མ་བུ་ཆེན་ཚོས་བླ་མའི་ཞབས་རིམ་ཆེད་ཚོགས་འཁོར་ཞིག་འབུལ་ཆོག་པའི་གསོལ་འདེབས་ནན་ཏན་བྱས་པར། བཀའ་ལན་དུ། འདི་ནི་ང་ཚོའི་སྐྱིད་སྐྱིད་(ཐུག་སྤྲོ)ཅིག་ཡིན་གསུངས་ནས་ཐ་མའི་གྱེས་བྲལ་གྱི་ཕེབས་སྐྱེལ་གསོལ་སྟོན་ཙམ་ཞིག་ཏུ་ངོས་འཛིན་ཞལ་བཞེས་གནང་བའི་ཐོག་ནས་ཉིན་གསུམ་བསྟུད་མར་སྙིང་ཐིག་རྩ་གསུམ་གྱི་ཚོགས་མཆོད་ཕུལ་བའི་ཉིན་གསུམ་པ་ཡུམ་ཀའི་ལས་གཞུང་ཀྱི་ཚོགས་མཆོད་ཚར་ནས་ལྷག་མ་ལ་མ་ཐུག་པའི་མཚམས་སྟེ། ཉིན་གུང་ཡོལ་རྗེས་ཀྱི་ཆ་ཚོད་གསུམ་པ་ཙམ་སྟེ། ངའི་རྩོམ་ཡིག་འདི་མཇུག་དྲིལ་བཞིན་པའི་ད་ལྟའི་དུས་ཚོད་འདི་ཀ་རང་ཙམ་ནས་གཟུགས་སྐུའི་བཀོད་པ་དབྱིངས་སུ་བསྡུས་པ་རེད། ཁོང་གིས་ལུང་རྟོགས་གཉིས་ཀྱིས་བསྟན་པ་འཛིན་དགོས་པ་དང་། བསྟན་པའི་རྩ་བ་འདུལ་བ་གཙིགས་སུ་འཛིན་པ་བཅས་ཐ་མའི་ཞལ་ཆེམས་སུ་བཞག་པ་རེད། ཁོང་དེ་ལྟར་བཞུད་པ་རེད། འོན་ཀྱང་། དེ་རིང་ང་ཚོས་ཁོང་གཤེགས་ཟིན་པའི་རྗེས་ཤུལ་དེ་ནས་མུ་མཐུད་ཁོང་གི་ཐུགས་རྗེ་དང་བྱིན་རླབས་ཀྱི་འོད་སྣང་འཚོལ་གྱིན་ཡོད་པ་རེད།

 

༼སངས་རྒྱས་ཀྱི་ཐག་ཉེར་བཅར་བའི་མི།༽

ཚང་མ་ས་ཆ་གང་དུ་ཡོད་ཀྱང་། གནས་བབ་ཅི་ལྟར་གྱུར་ཀྱང་། བླ་མའི་བཀའ་དྲིན་དང་ཐུགས་རྗེའི་འོད་སྣང་གི་འོག་ཏུ་མུ་མཐུད་འཚོ་བཞིན་ཡོད་པ་རེད། ང་ཚོ་ནི་སངས་རྒྱས་དང་འཕྲད་པའི་སྐྱེས་བུ་ལས་ཅན་དག་རེད། ང་ཚོ་ནི་སངས་རྒྱས་དང་ཐག་ཉེ་ཤོས་སུ་བཅར་མྱོང་མཁན་གྱི་མི་རེད། ང་ཚོས་ང་ཚོའི་མི་ཚེ་གཞན་དང་མཚུངས་པར་བལྟས་ན་གཏན་ནས་མི་རུང་། ང་ཚོས་ང་ཚོའི་ཁྱད་པར་ངོ་ཤེས་པར་བྱས་ཏེ་བླ་མ་རྗེས་སུ་མུ་མཐུད་སྙོགས་པར་བྱེད་དགོས་སོ།། བླ་མ་མཁྱེན།

ཞེས་པ་འདི་ཡང་། སྤྱི་ལོ་014/5/2དཔྱིད་ཟླ་ཐ་ཆུང་གི་ཚེས་གསུམ་གྱི་ཉིན་གུང་རྒྱ་གར་ཆུ་ཚོད་དང་པོ་སྟེ། བོད་ནང་གི་ཆུ་ཚོད་གསུམ་པ་ཡས་མས་ལ་ཆུ་བོ་ཡ་མུ་ན་དལ་གྱིས་འབེབས་པ་དང་ལྡན་པའི་འགྲམ། བོད་སྒར་ཟམ་ཡས་གླིང་གཞིས་ཆགས་ཀྱི་རྒྱ་གར་བའི་དྲ་ཁང་ཞིག་ནས་ཤར་མར་འབྲི་བ་པོ་ནི་རྫ་ཚེ་རིང་བཀྲ་ཤིས་སོ།།(བྲེལ་སྟབས་སུ་བྲིས་པས་ཡིག་ནོར་ཡོད་ངེས)