བཀྲ་ཤིས་དོན་འགྲུབ།
བྱང་གི་རླུང་བུ་ལྷོ་ཡི་ལམ་དུ་ཕྱོགས།།
སྤྲིན་པ་ནག་པོས་ཁྲོ་ཞལ་ལན་དུ་སྟོན།།
ཆར་ཐིགས་ཆུ་མོའི་པང་དུ་ལོག་པ་ན།།
མཚོ་མོའི་འཛུམ་གྱིས་སྤྲོ་སྣང་མངར་མོ་བསུ།།
མུན་པས་ཡིད་ཀྱི་སྣང་བ་འཕྲོག་པའི་དུས།།
ཟླ་བའི་ཞལ་རས་འོད་ཀྱི་གསེང་ནས་ཕེབས།།
རྨི་ལམ་ནང་གི་འཇིག་རྟེན་ལྗང་གུ་ཡིས།།
སྔུར་བའི་དབྱངས་རྟ་ཞི་བདེའི་གླིང་ལ་འཕུར།།
བྱབ་ཁྲུས་འཇམ་པོས་ལྗོན་པའི་ར་རི་བདས།།
འགྲུལ་པའི་སེམས་པ་སིམ་པའི་ཀློང་དུ་འབྱམས།།
ཝ་ཆུའི་རོལ་དབྱངས་རྣ་བར་བྱོ་བ་ན།།
ཡིད་ཀྱི་ཆོམ་རྐུན་གང་ནས་ཐོན་ལགས་སམ།།
ཉ་མོའི་སེམས་པ་མཚེའུའི་བྲང་ལ་གཏད།།
ཁྲུང་ཁྲུང་དཀར་མོ་རྒྱང་གི་ཕྱོགས་ལ་བཞུད།།
རླབས་ཀྱི་ཞེན་ཆགས་མཁའ་ལ་ཤོར་བ་ན།།
བྲལ་བའི་གདུང་བ་ཉི་མའི་ཟེར་གྱིས་བསྐྲུན།།
ནགས་ཀྱི་གསེབ་ནས་ཆུ་མོ་དལ་གྱིས་བཞུར།།
ཆུ་མོའི་ངོགས་ན་སྙན་ངག་མེ་ཏོག་ཅིག།
གྲིབ་རིས་འཇམ་པོའི་ཞབས་ལ་ཐོགས་པ་ཡིས།།
རྡོ་བའི་ཚོགས་ཀྱི་ཡིད་སེམས་ལྷོད་ལ་བབས།།
བྱིའུ་སྐད་ཟ་ཟི་རྣ་ཆར་རྒྱན་བྱས་ཏེ།།
རྐང་པའི་གདུ་བུ་གསིག་པའི་གོས་ཁྲུད་མ།།
སྐྲ་ཡི་འདབ་མ་སིལ་སིལ་འཕྱོ་བ་དེས།།
ཉི་འོད་ཞིང་ལ་ལྷིང་འཇགས་སྣང་བ་བཞག།