གསར་འགྱུར་མཁོ་གཏོང་བ། གོམ་བགྲོད་པ་རྣམས།
ཕྱི་ཟླ་བརྒྱད་པའི་ཚེས་༣༡་ནས་ཉིན་བཞིའི་རིང་འདི་ག་སུད་སི་ཨར་གྷོ་ས་གནས་ཚོགས་ཆུང་གིས་གོ་སྒྲིག་འོག་སུད་སི་གྲོང་ཁྱེར་ཨ་རོའོ་ནས་རྒྱལ་ས་སྦེརན་བར་ཀེ་ལོ་མི་ཊར་༨༠ལྷག་ནང་ཞི་བའི་གོམ་བགྲོད་གནང་དང་གནང་བཞིན་པ་ཡིན་ལ། ད་ལྟ་གོམ་བགྲོད་པ་མི་གྲངས་༣༧་ཡོད་འདུག ཐེངས་འདིའི་གོམ་བགྲོད་ཀྱི་དམིགས་ཡུལ་གཙོ་བོ་ཡང་ད་ལྟའི་བོད་ནང་གི་ཛ་དྲག་གནས་སྟངས་དེ་མཉམ་འབྲེལ་རྒྱལ་ཚོགས་གཙོས་འཛམ་གླིང་མི་མང་ལ་ཁྱབ་བསྒྲག་བྱ་ཆེད་ཡིན་ལ། བོད་གྱི་ད་ལྟའི་གནས་བབ་ཕྱི་རྒྱལ་ཡུལ་མི་རྣམས་ལ་ངོ་སྤྲོད་ཆེད་བོད་ནང་གི་སྐུ་ལུས་མེར་བསྲེགས་གནང་མཁན་རྣམས་ཀྱི་དགོས་འདུན་དང་རྒྱ་གཞུང་གི་དམ་དྲག་སྲིད་བྱུས་འོག་བོད་མི་ཚོས་སྡུག་བསྔལ་ཅི་ཙམ་མྱོང་གི་ཡོད་པའི་གནས་ཚུལ་འཇར་མན་སྐད་ཡིག་ནང་བསྒྱུར་ཏེ་ཡུལ་མི་ཚོར་སྤྲོད་པ་དང་། ཁྱིམ་མི་རེ་རེའི་འཕྲིན་ཡིག་བླུག་སྣོད་ནང་འཇུག་པ་སོགས་གནང་གི་འདུག་ལ། དམིགས་བསལ་བཙན་བྱོལ་དུ་གནས་པའི་བོད་མི་ཡོངས་ཀྱིས་ད་ལྟའི་ཛ་དྲག་གི་སྐབས་འདིར་རང་ཉིད་མི་རེ་ངོ་རེ་ནས་གཞིས་སྡོད་བོད་རིགས་རྣམས་ཀྱི་བླ་ན་མེད་པའི་བློས་གཏོང་ཆེན་པོ་དེ་ཉིད་དང་། ལྷག་པར་རང་མི་རིགས་རིག་གཞུང་དང་བཅས་པ་རྩ་བརླག་ཏུ་འགྲོ་བའི་གཉན་འཕྲེང་ཅན་གྱི་གནས་བབ་བཅས་ངོས་ཟིན་པའི་ཐོག བོད་རིགས་སྤྱིའི་ལས་དོན་ལ་མཐུན་སྒྲིལ་ཕྱར་གྲུ་མཉམ་འདེགས་ཡོང་པའི་འབོད་སྐུལ་ཞུ་རྒྱུ་བཅས་ཀྱི་ཆེད་དུ་ཡིན་ཟེར། ཕྱི་ཚེས་གཅིག་ཉིན་གྱི་ཞོགས་པ་ཆུ་ཚོད་ལྔ་དང་ཕྱེད་ཀའི་ཐོག་ཉིན་གཉིས་པའི་གོམ་བགྲོད་དབུ་འཛུགས་གནང་ཡོད་པ་རེད། ཉིན་དེར་གོམ་བགྲོད་པ་སྔར་ཡོད་ཀྱི་ཁར་གསར་དུ་མི་གྲངས་བཅུ་མཉམ་ཞུགས་ཀྱིས་ཁྱོན་མི་སོ་བརྒྱད་ཀྱིས་སྤྱི་ལེ་སུམ་ཅུ་སོ་གཉིས་སའི་ས་གནས་ཁོ་ཕེས་གྷན་བར་དུ་གོམ་བགྲོད་གནང་ཡོད་པ་རེད། ཉིན་ཧྲིལ་བོར་ཆར་པ་བབ་པ་དང་། གོམ་བགྲོད་དུས་ཡུན་བཅས་ཀྱི་རྐྱེན་པས་གོམ་བགྲོད་པའི་ཁྲོད་རྐང་པར་རྨ་བཟོས་པ་དང་། ཆུ་བུར་ཐོན་པ་སོགས་ཀྱི་གནས་ཚུལ་འོག་དཀའ་ངལ་སྣོན་མ་ཞིག་སྤྲོད་ཀྱིན་ཡོད་འདུག་མོད། དེ་རིང་སྤྱི་ཚེས་༢ཉིན་ནས་གནམ་གཤིས་ཅུང་ཡག་ཏུ་འགྱུར་བས། གོམ་བགྲོད་པ་རྣམས་གནམ་གཤིས་ཀྱི་དཀའ་ངལ་སྣོན་མ་སྤྲོད་ཀྱིན་མེད་ཀྱང་། གོམ་བགྲོད་པ་རྣམས་ཉིན་གསུམ་རིང་གོམ་པ་བརྒྱབ་པར་བརྟེན་རྐང་པར་ཆུ་བུར་གྱི་རྨ་དང་སྐྲང་བ། ན་ཟུག་རྒྱག་པ་སོགས་ཀྱི་དཀའ་ངལ་འོག་མུ་མཐུད་གོམ་བགྲོད་གནང་བཞིན་འདུག ཐེངས་འདིའི་གོམ་བགྲོད་པ་རྣམས་གྱི་ཁྲོད་བུད་མེད་མང་ཙམ་འཛུལ་ཞུགས་བྱས་ཡོད་པ་འདིས། སུད་སིའི་ནང་བུད་མེད་རྣམས་གོམ་བགྲོད་ལས་འགུལ་ལ་འཛུལ་ཞུགས་གནང་བའི་གྲངས་མང་ ཙམ་ཟིན་ཡོད་ལ། ད་ལྟའི་སྐབས་སུད་སིའི་བོད་རིགས་མི་མང་ཁྲོད་བོད་དོན་ཆེད་དཀའ་ལས་རྒྱག་མཁན་དང་སེམས་ཤུགས་བསྐྱེད་མཁན་མང་དུ་འགྲོ་གི་ཡོད་པའི་མཚོན་རྟགས་ཤིག་ཀྱང་ཆགས་ཡོད་པ་ཡིན།
ཤིན་ཏུ་ལེགས། འདི་ལྟར་གནང་དགོས་པ་ནི་ང་ཚོའི་འོས་བབ་ཡིན་པས་གནས་སྟངས་དང་དུས་ཚོད་ཀྱིས་ལྕོགས་པར་བསྔགས་བརྗོད་ཡོད་དོ།།
བོད་ཀྱི་བདེན་པ་རྒྱལ་ལོ།།
མེ་མཆོད་དཔའ་བོའི་རེ་འདུན་གྲུབ་གྱུར་ཅིག
འཚེ་མེད་རྒྱལ་གྱུར་ཅིག