སུན་སྣང་ཁྲོད་ཀྱི་ང་། ༼སྙན་ཚོམ་ཁག་བཞི།༽

བྱ་མདོ་སྐལ་རྒྱམ།

 
སང་ཉིན་སང་ཉིན་ཟེར་བཞིན
མི་ལོ་མང་བོ་ཞིག་འདས་ནའང
མིག་ཟུང་བཙུམ་ཐེངས་རེ་ལ
ད་དུང་ཉི་མ་དམར་བོ་ལྟ་བུའི་བཞུད་ལམ་དེ་དྲན་འོང
ལོ་ཚོད་ལ་མི་རན་པའི་རྒས་རྟགས་འདིས
ངས་རང་གིས་བྱེད་སྟངས་ཡོད་ཚད
རང་དང་མི་འཚམ་པ་ཤ་སྟག་ཏུ་མཐོང
མུན་པ་འཐིབ་སྔ་བའི་རྐྱེན་གྱིས
ད་ལྟ་ཅི་ཡང་མི་མཐོང་ནའང
ང་རང་གི་ཚོར་བ་ལ་ཡིད་ཆེ་བརྟན་པོ་ཡོད
སང་ཉིན་གྱི་ནམ་གཤིས་དྲོད་འཇམ་ཡོང་ངེས

2015-11-27 རྡ་སར།

 
འཁོར་བ།

 
གློག་ཞུན་ཁྲ་ཁྲ་མི་མཐོང་བའི་བྲོ་ར་འདིར
དབྱངས་འགྲོས་གཅིག་ཁོ་ནའི་གདངས་ཀྱིས
མི་ཚོགས་ནི་རྒྱུགས་ཆུ་བཞིན
ཕར་ནས་ཕར་ལ་བཞུར་ཞིང
ཡུན་ཙམ་གྱི་རྗེས་སུ
སླར་ཡང་རླུང་བུ་བཞིན
ཚུར་ནས་ཚུར་ལ་འཁོར་བྱུང

བར་སྐབས་དེར
རང་ལ་མཁོ་མཁོ་འདྲ་བ་གང་མང་ཉེར་ཚགས་བྱས་རྗེས
དུས་བཞིའི་འཁོར་བསྐྱོད་འདི་ལ
ཧ་ཅང་དལ་བགྲོད་ཀྱིས་སུན་སྣང་སྐྱེས་ཀྱང
ཞིབ་འདང་རེ་རྒྱག་དུས
རང་གི་ལྷན་སྐྱེས་ཀྱི་སེམས་པའང
བོར་ནས་ཡུན་རིང་འདས་འདུག

2015-12-25 བཀྲས་ལྷུན་གསུང་ཆོས་རྭ་བ་ནས།

 
རེ་སྨོན།

 
མི་ཚེ་འདི དུས་ཚིགས་ཤིག་ཡིན་པའི་དབང་དུ་བཏང་ན
ད་ནི་སྟོན་གཞུག་ལ་སླེབས་འདུག
འགྱུར་ལྡོག་མང་བོ་ཞིག་གི་བརྒྱུད་རིམ་ཁྲོད
ངས རང་ཉིད་ལའང་ཐུགས་རྗེ་ཆེ་ཞུ་ན་འགྲིག

གྲོགས་པོ་ཚོས
ཁ་གཡང་དང་རེ་སྨོན་གྱིས
དྲ་ངོས་ཁེབ་པའི་ཉིན་འདིར
ངས་ཅི་ཡང་མ་བརྗོད་ཀྱང
གནམ་རྒན་མས་
ཡུལ་གྱར་བ་ཞིག་གི་སེམས་འདུན་རྟོགས་ངེས

2015-12-31

 
འབྲས་སྤུངས་དང་གྱེས་པ།

 
དེ་རིང་ཁྱོད་དང་གྱེས་པ་ན
ང་ནམ་ཞིག་ལ་ཕྱིར་ལོག་ཐུབ་མིན་རང་གིས་ཀྱང་མི་ཤེས
མི་ཚེ་ནི་འདི་འདྲའི་རང་ལའང་གསལ་ཁ་མེད་པའི་འགྲུལ་བཞུད་ཅིག་རེད
འགྲུལ་བཞུད་ཀྱི་འཚོ་བའི་ཁུགས་པ་རེ་ན
བྱེད་འོས་པའི་ཕྱིར་དྲན་རེ་ཡོད་ལ
ཕྱིར་དྲན་རེའི་སྣེ་མོ་ན
རང་སེམས་ཁོ་ནར་གསལ་བའི་གཏམ་རྒྱུད་རེ་ཡོད
བཀའ་དྲིན་ཆེ
ཁྱོད་ཀྱི་འཛད་མཐའ་མེད་པའི་བྱམས་བརྩེ་དང་བཟོད་སྒོམ
བཀའ་དྲིན་ཆེ
ཁྱེད་ཀྱི་བསླུ་བ་མེད་པའི་ལམ་སྟོན་དང་གུ་ཡངས
ནམ་ཞིག ང་སླར་ཡང་ཁྱེད་ཀྱི་པང་དུ་ལོག་ངེས

2016-1-8