མི་ཉག་དུང་བརྡ།
ཉིན་འདི་ཚོར།
གློ་བུར་དུ་ངའི་སེམས་པ་ཆུང་ཆུང་འདི།
ཙག་རླུང་གིས་དེད་པའི་ཤོག་བུ་ཞིག་དང་མཚུངས་པ།
རི་བྲག་དང་ས་གཤིས་བཙན་པའི།
འཇིག་རྟེན་གྱི་མིག་གིས་མཐོང་དཀའ་བའི།
འགྲོ་མིའི་སྤྱི་ཚོགས་ཀྱི་གྲུ་ཟུར་ཞིག་ན།
ཉུལ་ཉུལ་གྱིས་ཚུལ་དུ།
རླུང་གིས་འཁྱེར་བཞིན་པར་ཁྱེད་ཀྱིས་མཐོང་ཨེ་བྱུང་།
ཀེང་རུས་ཀྱི་གྲོང་ཁྱེར།
ཁྲག་རྣག་གི་རྒྱ་མཚོ།
རྐང་གླིང་གི་སུན་སྒྲ
ད་དུང་པགས་པ་མི་གཅིག་པ་མང་པོ་མང་པོ་ཞིག་གིས།
ས་ཆེན་ཀོ་བཏུམ་རྒྱག་པའི།
དེ་རིང་གི་རྨི་ལམ་དམར་པོ་འདིར།
ང་རང་ལྷག་ཏུ་འཚབ་ཀྱིན་ཡོད་པ་འདྲ།
ཉིན་འདི་ཚོར།
ང་རང་ཚེར་མའི་གྲོང་ཁྱེར་ཀྱི་གདུག་རྩུབ་ཁྲོད།
ལྷག་ཏུ་འཚབ་ཀྱིན་ཡོད་པ་འདྲ།