ཨེ་ཝྃ་རིག་པ།
སེམས་ཀྱི་རྟོག་འགྱུ།
བཞུར་མི་ཚར་བའི་དལ་འབབ་ཀྱི་ཆུ་བོ་བཞིན།
སེམས་ཀྱི་རྟོག་ཚོགས།
བརྗོད་མི་ཚར་བའི་སྲིད་པའི་མགུར་གླུ་ཇི་བཞིན།
ཚེ་རབས་ཀྱི་ལོ་རྒྱུས།
ངའི་སེམས་ནང་ན་རེ་བའི་རྨི་ལམ་སྟེ།
ཞི་བསིལ་གྱི་དྭངས་པའི་མཚོ་ཆེན་ཞིག །
ཡོད་ཚད་ནས་ཡོད་ཚད་ཐོབ་ཏུ་རེ་ཡང་།
འོན་ཀྱང་བརྩོན་འགྲུས་ན་ཕྲ།
ཤེས་རབ་བག་ལ་ཉལ།
རྣམ་གཡེང་དབང་བཙན།
བསླུ་བའི་ནོར་མང་།
མྱུར་མགྱོགས་ཅན་ཀྱི་རྣམ་ཤེས་ཕྲ་མོ་འདི་ལ།
ཚོད་འཛིན་བྱེད་མཁན།
ནང་པའི་རིག་གཞུང་འདི་མེད་ན།
ང་ཚོ་སྐྱབས་མེད་ཀྱི་ལོང་བ་ཁྲི་མ་འབུམ།