བསོད་ནམས་ནོར་བུ།
_T. C. ལ
ཡན་ལག་གཏུན་ལ་རྡུང་འདྲའི་ལུས་གོག་དང་།།
མཚོན་རྩེའི་དཀྱིལ་དུ་ལྷུང་འདྲའི་ཡ་ཆུང་འདི།།
སྐབས་རེར་བརྒྱལ་ཞིང་ལན་རེ་སོས་ན་ཡང་།།
ལྕི་མོའི་གོམ་ལྷག་ད་དུང་འདྲུད་བཞིན་ཡོང་།།
སེམས་པ་གཙང་མ་དར་དཀར་འདྲ་བ་ཞིག།
གཡོ་ཧམ་མི་ཡིས་ལག་ཏུ་མཉེད་མཉེད་ནས།།
ཡོད་ཚད་ཞེ་མེར་ལངས་པའི་ཚོར་འདུ་ཡིས།།
དམར་ནག་ཁྲག་གི་མིག་ཆུས་ཁོག་པ་གཤེར།།
སེམས་སོང་བུ་མོར་བྱམས་པ་བོས་ན་ཡང་།།
སྐད་ཆའི་ཚིག་གི་སྣེ་མོ་རེ་འཁྲུགས་དུས།།
སྙིང་ལ་སོས་མེད་སྦར་ཤད་བརྒྱབ་པའི་མཐར།།
མུན་ནག་ཐང་སྟོང་རེ་ལ་རྡོག་ཐོས་དེད།།
ས་སྒང་སྨག་གིས་བཏུམ་པའི་མཚན་མོ་དེར།།
ཤག་རོགས་སྔུར་པ་ལྷེམ་ལྷེམ་གཉིད་ཡུར་ཀྱང་།།
ཁོ་བོ་ཁྱེད་དང་འཁྲུག་པའི་རྨི་སྣང་དེས།།
ཧར་རེ་གཉིད་ལས་སད་པ་གཅིག་གཉིས་མིན།།
ཁེར་རྐྱང་རྐང་རྗེས་སྤར་བའི་སྐྱོ་སྣང་ཁྲོད།།
ནང་གི་འཛུམ་དཀར་ངོམ་ལ་ལོས་དགའ་སྟེ།།
སེམས་ཀྱི་མངར་ཁ་མ་ལུས་གཞིབ་པའི་རྗེས།།
གྱེས་བྲལ་ལག་བརྡ་གནང་བའི་གདུང་བ་ལྕི།།
མི་འདོད་ཁྲག་རླུང་སྟོད་ལ་རབ་འཚང་ཞིང་།།
ད་ནི་འུ་གཉིས་ནམ་ཡང་མི་འགྲོགས་ཞེས།།
སྒྲ་འཛིན་བུ་ག་གཤག་པའི་ཐ་ཚིག་དེས།།
གློ་མཆིན་བཏུབ་པའི་ན་ཟུག་བཟོད་གླགས་མེད།།
ལུས་པོ་རྨས་ན་ཧང་སང་མི་དགོས་ཏེ།།
ལུས་ཀྱི་སྨན་པ་ག་ས་གང་ན་འདུག།
སེམས་པ་ཤི་ན་ངོ་མ་ལོས་དཀའ་སྟེ།།
སེམས་ཀྱི་ཨེམ་ཆི་ཁྱེད་ལས་གཞན་མེད་དོ།།
སེམས་པ་སེམས་ལ་ཐིམ་པའི་གོ་རིམ་ནང་།།
སྙིང་ལ་དྲོད་ཐིག་སྦྱིན་པའི་ཞལ་རས་དེ།།
ད་དུང་དྲན་པའི་སྦུག་ན་འཛུམ་གྱིན་འདུག།
ཀྱེ་མ་གཏན་དུ་ནག་བསུབ་གཏོང་ཕོད་དམ།།
ལྷན་སྐྱེས་ཚོར་བས་སྦྲིད་པའི་ཉིན་ཞག་ཀློང་།།
ཁོག་ལ་མི་བཟོད་སྐྱུར་ཁ་གཏད་བྱུང་ན།།
ད་ནི་བརྩེ་སེམས་སྒོ་མོ་གཏོར་ཚར་བས།།
དཀར་ཁུང་ཡོད་ཚད་ཁྱེད་ཀྱི་འབྲོ་ལམ་ཡིན།།
ཕྱི་རོལ་ལྗོན་འདབ་རླུང་བུས་དྲག་ཏུ་གཡོ།།
རྒྱང་རིང་ཁྱི་སྤྱང་ངུ་སྒྲ་རྣ་ལ་གཟན།།
བྱང་ཁོག་སྟོང་པ་རྨ་ཁའི་ཟུག་རྔུས་མནར།།
དོ་ནུབ་མཚན་མོའི་དུས་ཡུན་ལོ་ལས་རིང་།།
སེམས་ཀྱི་རྨ་ཁ་ལུས་ཀྱི་རྨ་ལས་ཚ། །
ལུས་ཀྱི་རྨ་རྣམས་སྨན་པས་གསོས་འགྱུར་ན། །
སེམས་ཀྱི་རྨ་ཁ་སྙིང་སྡུག་ཁྱོད་མིན་པས། །
སུས་ཀྱང་གསོ་བར་མི་ནུས་ཐུགས་འཇགས་འཚལ། །
མ་བཅོས་རང་གཤིས་རང་གིས་ངོམ་པ་ན།།
གཡོ་ཅན་སྐྱེ་བོའི་སྣ་ལ་ཕོག་ཀྱང་ཕོག།
ལྷན་སྐྱེས་སེམས་ལ་གྲུབ་པའི་ཚོར་བ་འདི།།
ཤི་ཡང་དམྱལ་བའི་ཁམས་ནས་བརྗོད་ངེས་ཡིན།།
ན་མོ་མ་ཧཱ་གུ་རུ་པདྨཱ་ཀ་རཱ་ཡ
་
སེམས་ཀྱི་རྨ་ཁ་ལུས་ཀྱི་རྨ་ལས་ཚ།
ལུས་ཀྱི་རྨ་རྣམས་སྨན་པས་གསོས་འགྱུར་ན།
སེམས་ཀྱི་རྨ་ཁ་མི་སྡུག་སྒོམ་པ་དང་།
སྟོང་ཉིད་སྒོམ་པས་གསོས་པ་ལགས་པར་གསུངས།།