སྲས་མོ།
ཀ་ལི་ཨ་ལིའི་བསྡུས་པའི་ཤེས་རིག་ནོར། །
ཁ་བའི་རྒྱན་གྱུར་མཁས་པའི་ཕྱག་རྗེས་དེར། །
ག་ནས་བལྟས་ཀྱང་འབད་པ་ལྷུར་ལེན་གྱིས། །
ང་ཚོ་འཇུག་པའི་ལུགས་འདི་བཟང་མོད་ཀྱང་། །
ཅ་ཅོའི་གཏམ་ལས་དོན་སྟོང་མང་དྲགས་ན། །
ཆ་ལུགས་ངན་པར་གཞན་གྱིས་འཕྱ་བའི་གནས།།
ཇ་འདི་བོད་ཇ་ཞིམ་པོའི་རོ་མཆོག་ལྟར། །
ཉ་མོའི་འཁྱུག་འགྲོས་ལ་འགྲོགས་བོད་དོན་གླེང་། །
ཏན་ཏན་དཔྱད་གསུམ་དག་པའི་དབུ་མའི་ལམ། །
ཐ་ཚིག་གཡེལ་མེད་འབད་སྒྲུབ་སྙིང་སྟོབས་བཅས། །
ད་ལྟ་ལམ་སྟོན་བཤེས་གཉེན་བཞུགས་སྐབས་འདིར། །
ན་ནིང་ལས་ཀྱང་ད་ལོར་འབད་བཞིན་སྒྲུབ། །
པ་སངས་ལྟ་བུའི་ལྷག་བསམ་རྣམ་དག་གིས། །
ཕ་མེས་རིག་གཞུང་གོམས་གཤིས་སྲུང་སྐྱོབ་སླད། །
བན་བུན་ངང་ནས་ལྷོད་གཡེང་མེད་པའི་ངང་། །
མ་ཕམ་བོད་དོན་གཡུལ་ལས་རྒྱལ་ལ་བརྩོན། །
ཙ་རིའི་གནས་སོགས་བཟང་པོའི་ཁོར་ཡུག་དང་།།
ཚ་ཚ་འུར་འུར་བཙོག་པའི་བསླད་པ་སྟེ། །
ཛ་དྲག་མྱུར་སྐྱོབ་དགོས་པའི་དོན་གནད་དག །
ཝ་ལེར་སེམས་ཤིང་བདག་པོ་རྒྱག་པར་འགྲོ །
ཞང་ཞང་ཨ་ཁུ་རྣམ་པས་ཤུལ་བཞག་ནོར། །
ཟ་འདྲེ་དག་གིས་བཅོམ་པའི་ངང་ཚུལ་འདི། །
འ་ཆད་འུ་ཐུག་དུས་ལ་ལག་གདང་སྦྲེལ། །
ཡ་ཆུང་སེམས་ལ་དམ་ཚིག་ཆིག་སྒྲིལ་སྒོམ། །
ར་བ་གངས་ཀྱིས་བསྐོར་བའི་ཞིང་ཁམས་འདི། །
ལ་རྒྱའི་སྤོབས་པས་འདེགས་པའི་སྙིང་སྟོབས་མེ། །
ཤ་ཁྲག་རུས་པའི་གཏིང་ནས་འབར་བ་ཞིག །
ས་སྟེང་བོད་རིགས་ཚང་མས་སེམས་ལ་དགོས། །
ཧ་ཅང་སྙན་པའི་གཏམ་ཞིག་སྲས་མོར་མེད། །
ཨ་མའི་བསླབ་བྱ་དྲན་ཐོའི་རི་མོ་ཙམ། །
ཧ་ཅང་གོ་དཀའི་ཚིག་གིས་མ་སྦས་པར། །
ཨ་མཚར་ཚིག་གི་ཕྲེང་བ་འདི་ཉིད་སྤེལ། །
༢༠༡༣ལོའི་ཟླ་༩ པའི་ཚེས་༡༤ ལ་བྲིས།
ཧ་ཅང་སྙན་པའི་གཏམ་ཞིག་སྲས་མོས་གསུང་།།
ཨ་རག་རྒུན་འབྲུམ་འཐུང་པའི་སྣང་བ་སྟེར།།
ས་མཐའི་གླུ་དབྱངས་འདི་ལྟར་བླངས་འགྱུར་ན།།
ཤ་ཁྲག་བོད་ནས་རྒྱས་པའི་དོན་གོོ་ཆོད།།