སེམས་ཅན་དམྱལ་བའི་སྲུང་མ་རྣམས་འགྲོ་བ་རང་རྒྱུད་པ་ཡིན་མིན་གྱི་སྐོར།

ཧི་མ་ལ་ཡའི་འཕྲུལ་སྨྱུག

སེམས་ཅན་དམྱལ་བའི་སྲུང་མ་རྣམས་འགྲོ་བ་རང་རྒྱུད་པ་ཡིན་མིན་དང༌། ༼སྤྱོད་འཇུག་ལས།༽ ལྕགས་སྲེག་ས་གཞི་སུ་ཡིས་བྱས། །མོ་ཚོགས་དེ་དག་ཅི་ལས་བྱུང༌། །ཞེས་པའི་དྲི་བ་སྔར་ནས་བཀོད་མྱོང་ཡོད། དེའི་དྲིས་ལན་ནི། དེ་འདྲ་དེ་དག་ཐམས་ཅད་ཀྱང༌། །སྡིག་སེམས་ཡིན་པར་ཐུབ་པས་གསུངས། །ཞེས་པ་འདི་ཡིན་ལ། དེར་འགྲེལ་བཤད་བསྐྱོན་སྟངས་མི་འདྲ་བ་གཉིས་བྱུང་ཡོད།
དང་པོ་ནི། དེ་དག་བྱེད་པོ་གང་ཟག་གཞན་ཞིག་གིས་ཆེད་དུ་བཀོད་སྒྲིག་བྱ་པ་མིན་པར། ཚེ་སྔོན་མར་ལས་ངན་བསགས་པའི་རྣམས་སྨིན་ཙམ་ཡིན་ཞེས་དང༌།
གཉིས་པ་ནི། ཞིང་ཁམས་ཞེས་པའི་ཡུལ་གྲུ་ལྟ་ན་སྡུག་པ་ཞིག་དང༌། དམྱལ་ཡུལ་ཞེས་པའི་གྲོང་ཁྱེར་འཇིགས་སུ་རུང་བ་དེ་འདྲ་ལོགས་སུ་མེད། ལས་དག་ན་སྡོད་ས་འདི་ཉིད་འོག་མིན་སྟུག་པོ་བཀོད་པའི་ཞིང་ཁམས་དང༌། ལས་མ་དག་ན་དམྱལ་བ་རྡོ་རྗེ་གནད་དེ་ཡང་འདི་རང་ཡིན། ཞེས་པ་སྟེ། སྔ་མ་འདི་གཞུང་ལུགས་པ་དང༌། ཕྱི་མ་འདི་གདམས་ངག་པ་ཚོས་བཏབ་པའི་ལན་རེད། ལན་སྔ་མ་དེ་ལས་ངན་བསགས་པ་ཙམ་གྱིས་ལས་འབྲས་ལྕགས་སྲེག་གི་ས་གཞི་དང༌། ཤལ་མ་ལའི་བུད་མེད་དེ་ཚོ་འབད་མེད་དུ་བྱུང་ཆོག་ན། ༼ཞེས་པའི་(འབད་མེད་)ཅེས་པ་དེར་ཅུང་ཟད་དཔྱད་རྒྱུ་ཡོད་དེ། བཟང་ངན་གྱིས་ལས་སྔོན་སོང་ལ་བརྟེན་ནས། འབྲས་བུ་བདེ་སྡུག་བྱུང་ངེས་པའི་དོན་ལ་གོ་ཡི་ཡོད་ན་མི་འགྲིག་པ་ཆེར་མེད་ཀྱང༌། ལས་ལས་བྱུང་བ་ཡིན་ན། འབད་མེད་ཅེས་པའི་ཚིག་སྦྱོར་དེ་དེ་མ་ཐག་ཏུ་ཅུང་མི་བདེ་བར་སེམས་སོ།།

གོང་དུ་བཀོད་པ་རྣམས་ཀྱི་ལན་མདོར་བསྡུས་ནི་འདི་ལྟར་དུ་འདེབས་རིགས་ཏེ། རྒྱལ་ཁབ་གང་ཡང་རུང་བ་ཞིག་གི་ནང་དུ་མི་བསད་པ་ལ་སོགས་པའི་ཁྲིམས་འགལ་གྱིས་ལས་ངན་བསགས་པ་ཙམ་གྱི་ལས་འབྲས་ཡིད་དུ་མི་འོང་བའི་བཙོན་ཁང་དང༌། བཙོན་བསྲུང་བའི་མི་བུ་དེ་དག་ཀྱང་ཐབས་བཀོད་ཀྱིས་ཚོལ་མི་དགོས་པ་བཞིན་ནོ།།༽ ལས་དཀར་ནག་འདྲེས་མ་བསགས་པའི་མི་ཡུལ་འདིར་ཡང༌། ས་ཁང་ཤིང་དང་ལས་གཟུགས་ཀྱི་མི་མོ་གདོང་དམར་མ་ཚོ་༼ལས་སྔོན་སོང་ལ་བརྟེན་ནས་༽རང་ཤུགས་སུ་འབྱུང་མི་ཆོག་པའི་རྒྱུ་མཚན་ཅི་ཡིན་ནམ། ཞེས་མཚུངས་པ་བགྲེ་བའི་ཐལ་འགྱུར་འཕངས་པ་དེ་ལ་ལན་ཐེབས་པའི་རེ་བ་མེད་༼པ་མ་ཡིན་ཏེ། ལས་དབང་དེའི་འབྲས་བུ་མི་ཡུལ་ཕྱི་དངོས་པོའི་གཟུགས་དབྱིབས་སྣ་ཚོགས་རྣམས་ཀྱང། རྒྱུ་དེ་ལས་གྲུབ་པའི་ཕྱིར་རོ།།༽
ཕྱི་མ་དེ་ནི་དངོས་ལན་མ་ཐེབས་པར་ཚིག་ཤིན་ཏུ་འདྲེད་པ་ཞིག་སྨྲས་ནས་གཡོལ་ཐབས་བྱ་པ་ཙམ་དུ་སྟེ། འོག་མིན་གྱི་ཁང་བཟང་ལ་བཞེངས་མཁན་དགོས་མིན་དང༌། དམྱལ་བའི་སྲུང་མ་སེམས་ཅན་ཡིན་མིན་ལ་ལན་ཅུང་ཟད་ཀྱང་བཏབ་མི་འདུག་པས་སོ། །༼ཞེས་པ་དེ་ནི་རང་ཚིག་སྔ་ཕྱི་ཙམ་ལ་ཡང་ཡིད་ཟབ་མ་གནང་བའི་བདེན་རྟགས་ཤིང་ཡིན་ཏེ། གང་ཟག་སྔ་མ་ཞིག་གིས་ལན་བཏབ་ཟིན་པ་དེའི་རྗེས་སུ། ཡིན་གཅིག་མིན་གཅིག་ཕྱི་མ་དེས་ལན་སྐྱར་མ་ཞིག་གམ། དེ་ལས་མི་འདྲ་ཙམ་གསུངས་དགོས་པའི་ངེས་པ་མེད་པའི་ཕྱིར།༽ འདི་འདྲའི་ཉེས་སྐྱོན་སྔ་མ་འདི་རི་བོ་དགེ་ལྡན་པའི་གྲུབ་མཐའ་འཛིན་པའི་དགེ་བཤེས་མགོ་མཁྲེགས་དེ་ཚོས་ཁུར་དགོས་ཤིང༌། ཕྱི་མ་འདི་ས་དྭགས་རྙིང་གསུམ་གྱི་ཁྲོད་དུ་ཡོད་པའི་གྲུབ་ཆེན་ཧམ་པ་ཅན་ཁོ་ཚོས་ཁུར་དགོས་པ་ཡིན། ༼ཞེས་པ་རྣམས་ནི་གཞི་མེད་ཧམ་རྩོད་ཀྱིས་ཚིག་ཕྲེང་དུ་ཟད་དོ།།༽

ཡང་རེ་སེ་དཀོན་མཆོག་རྒྱ་མཚོ་སོགས་ཁ་གཅིག་གིས། ཐེག་ཆེན་པའི་ལུགས་ལ་དམྱལ་བ་སེམས་སྣང་ཙམ་ཡིན། ཞེས་ཟེར་བཞིན་འདུག་སྟེ། དེ་ནི་དོན་དུ་དམྱལ་བ་ཁས་མི་ལེན་ཞེས་ཟེར་འདོད་ཡིན་པས། ཐེག་ཆེན་པ་གཞན་ཚོའི་ཐུགས་ལ་བབ་མིན་ཁོ་བོས་མི་ཤེས་སོ།། ཅིས་ཀྱང་མི་ངན་ལ་ཆད་པ་གཅོད་ས་དམྱལ་བ་དང༌། མི་བཟང་ལ་དཔེ་བཟང་སྤྲད་སའི་ལྷ་ཡུལ་ཞེས་པ་དེ་འདྲ་ཞིག་ཡོད་ན། མི་ཡུལ་རང་དང་འདབས་འབྲེལ་དུ་ཡོད་འོས་པ་ལས། གོ་རིག་དང་མཐོང་ཐོས་ཅུང་ཟད་ཀྱང་མི་ཐུབ་པའི་ཡུལ་ཞིག་ཏུ་ཆགས་དགོས་དོན་ཅི་ཡོད། གཤིན་རྗེ་ཆོས་རྒྱལ་གྱིས་འགོ་ཁྲིད་པའི་ཁྲིམས་ཁང་དྲང་བདེན་ཅན་དེའང༌། མི་ཡུལ་འདི་རང་དུ་བཙུགས་ནས་མིག་སྔོན་པོས་སྔོན་པོར་ཕར་ལྟ་ཚུར་ལྟ་བྱས་ཏེ། གདོང་བཤེར་བརྒྱབ་ཕོད་ན་ཕོ་རབ་ཀྱི་ལས་ཀ་ཡིན་གྱི། ས་འོག་གི་འཇིག་རྟེན་ཞིག་ཏུ་གབ་ནས་ཤི་སྒུག་བྱེད་པ་ནི། ཐབས་རྡུག་པའི་བྱ་བ་མ་ཡིན་ནམ། སངས་རྒྱས་རྣམ་པར་ཐུགས་རྗེ་དང་ནུས་པ་དེ་འདྲ་ཆེ་ན། ལས་འབྲས་མངོན་སུམ་དུ་བསྟན་ནས། མ་འོངས་སྔོན་འགོག་གནང་དགོས་པ་ལ། དེ་ལྟར་མི་གནང་བར་ནམ་མཁའ་ཇི་སྲིད་བར་དུ་སྤྱན་ཆབ་ཁོ་ན་ཕྱུངས་ཏེ་བཞུགས་པ་ནི། ཐབས་ལ་མི་མཁས་པའི་མཛད་པ་རེད། བརྟག་དཔྱད་དེ་ཙམ་ཡང་མི་བཟོད་ན་རིགས་པས་གྲུབ་པའི་ཆོས་ལུགས་ཞེས་པའང་དེ་ཙམ་དུ་ཟད་དོ།།
ལར་རྟེན་སྣོད་ཀྱི་འཇིག་རྟེན་འདིར་འོག་ཏུ་དམྱལ་བའི་ཡུལ་གྲུ་དང༌། བླ་རུ་ལྷ་ཡི་ལུང་པ་དེ་འདྲ་མེད་པར་ཐག་ཆོད་ཚར་ཡོད་པས། བརྟེན་པ་ལྷ་དང་དམྱལ་བ་ཞེས་པ་དེ་ཚོའང་གྱང་མེད་པའི་རི་མོ་ལྟར་ཡར་འགྲོ་བ་ལས་འོས་ཅི་ཞིག་ཡོད། དེ་ལྟར་བསམ་ན་མི་མངོན་པའི་འཇིག་རྟེན་དེ་ཚོ་ནི། དེ་འདྲའི་དཔྱད་མི་བཟོད་པ་ཞིག་དང༌། མེས་པོ་ཚོའི་བསམ་བློ་དེ་དག་ནི། དེ་འདྲའི་དགོད་བྲོ་བ་ཞིག་རེད་བཞག་བསམ་ནས་སྙིང་ཡང་རྗེ་འོང་བར་འདུག སངས་རྒྱས་ཆོས་ལུགས་རང་ཁོ་ནའི་ངོས་ནས་བཤད་ནའང༌། ལྷ་དང་དམྱལ་བ་མེད་པ་ཙམ་གྱིས་མགོ་ཐོག་ཏུ་གནམ་རྡིབ་འོང་བ་མ་ཡིན་ཞིང༌། རྐང་འོག་ཏུ་ས་རྡིབ་འགྲོ་བ་མ་ཡིན་ནོ་སྙམ་དུ་ཁོ་བོས་བསམ་བཞིན་ཡོད།