སེམས་དཔའ་ཆེན་པོའི་འོད་མདངས་ནུབ་ཕྱོགས་སུ་མཆེད་པ། ༼མུ་འགོད་༡༡ པ།༽

མི་གསོན་པོ།

ལོ་ངོ་སུམ་བརྒྱ་བརྒྱད་ཅུ་ཙམ་གྱི་ལོ་རྒྱུས་ཀྱི་བྱུང་རིམ་ཡོད་པའི་ཧར་ཝར་ཌི་གཙུག་ལག་སློབ་གྲྭ་ནི་འཛམ་གླིང་ཐོག་ཏུ་ཆེས་སྙན་གྲགས་ལྡན་པའི་སློབ་ཆེན་ཞིག་སྟེ། ཨ་རི་རྒྱལ་ཁབ་ཀྱི་སྲིད་འཛིན་དྲུག་གིས་མཚོན་པའི་འཛམ་གླིང་གི་ཆབ་སྲིད་པ་གྲགས་ཅན་དུ་མ་དང་། ཁྲིམས་ཞིབ་པ་དང་ཁྲིད་རྩོད་པ། འཆར་འགོད་པ་དང་ཚོང་པ་སོགས་འཛམ་གླིང་ཐོག་ཏུ་སྙན་གྲགས་ཅན་གྱི་མི་སྣ་མང་པོའི་འབྱུང་ཁུངས་སུ་གྱུར་ཡོད།
ཧར་ཝར་ཌི་སློབ་ཆེན་གྱི་ངོས་ནས་རླབས་ཆེན་གྱི་མི་སྣ་དང་སྤྱི་ཚོགས་ཀྱི་སྣེ་ཁྲིད་པ་གང་མང་གདན་འདྲེན་ཞུ་རྒྱུ་དང་། དེ་དག་ལས་ལམ་སྟོན་དང་སློབ་ཁྲིད་ཞུ་གནང་བའི་ལུགས་སྲོལ་ལྟར་འདས་པའི་ལོ་རྒྱུས་ནང་དུ་༧གོང་ས་མཆོག་དང་༧རྒྱལ་དབང་ཀརྨ་པ་སྐུ་གོང་མ་རིག་པའི་རྡོ་རྗེ་སོགས་གདན་དྲངས་ཏེ་བཀའ་ཆོས་ཞུས་ཡོད།

ད་ལན་ཧར་ཝར་ཌི་གཙུག་ལག་སློབ་གྲྭས་ཇི་ལྟར་གསོལ་བ་བཏབས་པ་ལྟར་༧དཔལ་རྒྱལ་དབང་ཀརྨ་པ་བཅུ་བདུན་པ་ཨོ་རྒྱན་འཕྲིན་ལས་རྡོ་རྗེ་མཆོག་ཆིབས་བསྒྱུར་བསྐྱངས་ཏེ་དུས་རབས་ཉེར་གཅིག་པར་ས་ཆེན་གོ་ལའི་ཁྱོན་དུ་སྐྱེ་འགྲོའི་ཚེ་སྲོག་ལ་ཇི་ལྟར་གཅེས་སྤྲས་བྱེད་ཚུལ་གྱིས་ལམ་སྟོན་གྱི་བཀའ་སློབ་ཡོངས་ཁྱབ་ཏུ་སྩལ་ཟིན་པའི་ཉིན་གཉིས་པའི་ཞོགས་པར་མཁས་དབང་ཁག་དང་། ཞིབ་འཇུག་པ། དེ་བཞིན་ཆེད་ལས་སློབ་གཉེར་བ་སོགས་དང་ལྷན་བཀའ་སློབ་གནང་བ་དང་བགྲོ་གླེང་ཞུས་པའི་ཚུལ་མུ་འགོད་གོང་མའི་ནང་དུ་ཞུས་ཟིན་པ་དང་། ཕྱི་དྲོའི་ཆར་སློབ་གྲྭས་དམིགས་བསལ་གྱི་སློབ་ཕྲུག་འདྲི་བ་ལ་མཁས་པ་ཁག་ཆེད་དམིགས་ཀྱིས་གོ་སྒྲིག་ཞུས་ཏེ་བགྲོ་གླེང་དང་བཅར་འདྲི་ཞུས་པའི་བཀའ་ལན་སྩལ་གནང་བ་དག་ཆེད་འགོད་ཞུ་རྒྱུར། ཐོག་མར་གོ་སྒྲིག་པས་ངོ་སྤྲོད་དང་བཀའ་འདྲི་ཞུ་ཚུལ་མཚམས་སྦྱོར་བྱས་ཟིན་པའི་རྗེས་སུ་སློབ་ཕྲུག་ཅིག་གིས་ནང་ཆོས་ཀྱི་གོ་དོན་དང་སྙིང་པོ་དེ་གང་འདྲ་ཞིག་ལ་ངོས་འཛིན་བྱེད་དགོས་པ་དང་དེས་སྤྱི་ཚོགས་ལ་ཤུགས་རྐྱེན་གང་འདྲ་སྤྲོད་མིན་གྱི་སྐོར་བཀའ་འདྲི་ཞུས་པའི་ལན་དུ་བཀའ་སྩལ་པ།

སྤྱིར་ནང་ཆོས་ལ་ཐེག་པ་གསུམ་སོགས་ཡོད་པ་ལས་ལྟ་བ་དང་སྤྱོད་པ་སོགས་ཀྱི་ཆ་ནས་གཙོ་འདོན་བྱེད་ཚུལ་མི་འདྲ་བ་ཅུང་ཡོད་པ་འདྲ། འོན་ཏེ་གཞི་རྩ་ཆ་ནས་ལྟ་བ་རྟེན་ཅིང་འབྲེལ་འབྱུང་དང་སྤྱོད་པ་འཚེ་བ་མེད་པ་དེ་ནང་ཆོས་ཀྱི་སྙིང་པོ་འདྲ་བོ་རེད། ལྟ་བ་རྟེན་ཅིང་འབྲེལ་འབྱུང་དེ་ཡུལ་རང་ངོས་ནས་རང་ཚུགས་སུ་གྲུབ་པ་ཞིག་མ་ཡིན་པར་ཕན་ཚུན་ལྟོས་ནས་གྲུབ་པའི་གནས་སྟངས་ཅན་ཞིག་བཤད་ཀྱི་ཡོད་སྟབས་རང་གཅེས་འཛིན་ཤུགས་ཆུང་དུ་བཏང་བ་དང་གཞན་གལ་ཆེན་དུ་འཛིན་དགོས་པའི་གནས་ལུགས་ཤིག་ཤོད་ཀྱིན་ཡོད་རེད། སྤྱོད་པའི་ཐོག་ནས་སྙིང་རྗེ་གཞི་རྩ་བཞག་སྟེ་འཚེ་བ་མེད་པ་བཤད་ཡོད།
དེ་ཡང་ཕྱི་ལུས་ངག་འཚེ་བ་མེད་པ་གཅིག་པུ་ཙམ་དུ་མ་ཡིན་པར་ནང་སེམས་ཀྱི་ཐོག་ཏུ་འཚེ་བ་མེད་པ་དགོས་སྟབས་རང་རྒྱུད་ལ་ཉོན་མོང་གིས་གནོད་པ་མེད་པ་ཞིག་སྟེ་རང་གི་སེམས་རྒྱུད་འགྱུར་བཅོས་བཏང་ཐུབ་པ་ཞིག་ནི་ནང་ཆོས་ཀྱི་སྙིང་པོ་རེད། དེ་ལྟར་ནང་ཆོས་ཀྱི་ལྟ་སྤྱོད་གཉིས་དེས་སྤྱི་ཚོགས་ནང་དུ་རང་གཞན་གྱི་འབྲེལ་བ་ཟབ་ཏུ་བཏང་བ་དང་གཞན་དང་སྤྱི་ཚོགས་ལ་འགན་ཁུར་བྱེད་པའི་ཤུགས་རྐྱེན་བཟང་པོ་སྤྲོད་ཀྱི་ཡོད་རེད་དྲན་གྱི་འདུག ཅེས་བཀའ་སྩལ།

སློབ་ཕྲུག་ཅིག་གིས་༧རྒྱལ་བ་རིན་པོ་ཆེའི་སྐུ་ཁམས་འཕྲོད་རྟེན་དང་ཐུགས་སེམས་སྙིང་སྟོབས་སྐོར་ལ་བཀའ་འདྲི་ཞུས་པའི་ལན་དུ་བཀའ་སྩལ་པ། ༧གོང་ས་མཆོག་གི་སྐུ་ཚེའི་ནང་དུ་སྐུ་ངལ་ཧ་ཅང་མང་པོ་འཕྲད་ཡོད་ཀྱང་ཁོང་གི་ཐུགས་སྟོབས་ནམ་ཡང་ཞུམ་པ་མེད་པའི་སེམས་ཤུགས་ལ་བརྟེན་སྐུ་གཟུགས་ཧ་ཅང་ཐང་པོ་འདུག། སྐབས་རེ་ངས་དྲན་གྱི་ཡོད་གལ་སྲིད་ང་རང་༧རྒྱལ་བ་རིན་པོ་ཆེའི་དགུང་ལོའི་ཚད་དུ་སླེབས་སོང་ན་ལུས་པོ་སྒུར་ནས་གོམ་པ་སྤོ་རྒྱུ་ཡང་དཀའ་ལས་ཁག་པོ་རེད་བསམ་གྱི་འདུག གང་ལྟར་ཁོང་གི་སྐུ་གཟུགས་ཧ་ཅང་ཐང་པོ་ཡིན་པ་དང་ཐུགས་སེམས་དང་ཐུགས་སྟོབས་ནི་འཛམ་གླིང་ནང་གི་མིག་དཔེ་ལྟ་འོས་པ་འདྲ་བོ་ཞིག་ཏུ་ཆགས་ཡོད་སྟབས་ང་ཚོས་མིག་དཔེ་ལྟ་ཡུལ་ཞིག་ཏུ་ངོས་འཛིན་བྱེད་ཀྱི་ཡོད། ཅེས་བཀའ་སྩལ།

ཡང་སློབ་ཕྲུག་ཅིག་གིས་ཁྱེད་ཉིད་བོད་ནས་བཙན་བྱོལ་དུ་ཕེབས་ཁར་ཕྱག་བྲིས་ཤིག་བཞག་གནང་བའི་ནང་དུ་བོད་དུ་ལོག་གནང་རྒྱུའི་སྐོར་གསུངས་ཡོད་སྐད་འདུག་དེས་ན་ཁྱེད་བོད་དུ་ལོག་ཐུབ་པའི་རེ་བ་འདྲ་ཡོད་དམ་ཞེས་བཀའ་འདྲི་ཞུས་ལན་དུ་བཀའ་སྩལ་པ། ངས་ཡི་གེ་ནང་དུ་བྲིས་པ་ལྟར་གཙོ་བོར་སོ་སོར་ལ་རང་དབང་གི་འཚོ་བ་ཞིག་ཐོབ་ན་དྲན་པ་དང་། དེ་བཞིན་ཕྱི་རྒྱལ་དུ་ཡོད་པའི་རང་དང་འབྲེལ་ཡོད་ཀྱི་བླ་སློབ་ཁག་དང་མཇལ་འཕྲད་ཀྱི་གོ་སྐབས་ཡག་པོ་ཞིག་ཡོང་རེ་ལྟར་བྲོས་བྱོལ་དུ་ཡོང་བ་ཞིག་རེད། ཡིན་ནའང་སོ་སོའི་བསམ་པ་ལྟར་གྱི་རེ་འདུན་ལ་དཀའ་ངལ་མང་པོ་འཕྲད་བསྡད་པ་ཞིག་རེད།
གང་ལྟར་མི་སུ་ཡིན་ཀྱང་སོ་སོའི་ལུང་པ་དང་། ཕ་མ་སྤུན་མཆེད་རྣམས་ལ་རང་བཞིན་གྱིས་བརྩེ་བ་དང་དགའ་ཞེན་ཡོད་པའི་གནས་སྟངས་ཤིག་ཡིན་པར་བརྟེན་ང་ཡང་ཐོག་མར་རྒྱ་གར་དུ་འབྱོར་བ་ནས་བོད་ནང་དུ་ལོག་པའི་རྨི་ལམ་རྟག་ཏུ་བཏང་གི་འདུག་ལ་ཕ་མ་གཉིས་དང་ཐུག་འཕྲད་བྱུང་བའི་རྨི་ལམ་ཡང་ཡང་བཏང་གི་ཡོད།

སྐབས་རེར་རང་གི་བསམ་བློ་བཏང་རྒྱུ་ཤུགས་ཆེ་དྲག་པ་མིན་ནམ་སྙམ་ནས་བསམ་བློ་བཏང་རྒྱུ་འཚམས་བཞག་ཡིན། གང་ལྟར་བོད་གངས་ཅན་ལྗོངས་དང་ཐུན་མོང་མ་ཡིན་པའི་ལས་སྨོན་གྱི་འབྲེལ་བ་ཡོད་པ་ཞིག་ཡིན་དུས་བོད་ནང་དང་བོད་མི་ལ་ཕན་ཅུང་ཟད་ཐོགས་པའི་རེ་བ་དང་སྨོན་ལམ་འདྲ་ཆེན་པོ་བྱེད་ཀྱི་ཡོད་པས་བོད་དུ་ལོག་རྒྱུའི་སྐོར་ཡི་གེ་ནང་དུའང་སྐབས་དེར་བྲིས་པ་ཡིན། སྤྱིར་རྒྱ་ནག་མི་མང་ནི་ཆོས་དང་རིག་གཞུང་ལ་དོ་སྣང་ཆེན་པོ་ཡོད་པ་མ་ཟད་ཀརྨ་པ་དང་ལོ་ངོ་དྲུག་བརྒྱ་བདུན་བརྒྱའི་ལོ་རྒྱུས་ཐོག་ནས་འབྲེལ་བ་ཡོད་པ་ཞིག་ཡིན་པ་སོགས་གནས་སྟངས་མང་པོ་ཞིག་གིས་སྒོ་ནས་བོད་དུ་ལོག་ཐུབ་པའི་ཡིད་ཆེས་བྱེད་ཀྱི་ཡོད། ཅེས་བཀའ་སྩལ།

ཡང་སློབ་ཕྲུག་ཅིག་གིས་ངས་གསར་འགྱུར་མང་པོ་ཞིག་ལས་གོ་མྱོང་བར་༧གོང་ས་མཆོག་གི་རྗེས་སུ་བོད་ཀྱི་དབུ་ཁྲིད་དེ༧རྒྱལ་བ་ཀརྨ་པ་ཁྱེད་རེད་ཅེས་གོ་སོང་བས་དེའི་ཐོག་ཏུ་ཁྱེད་ཀྱི་དགོངས་ཚུལ་གང་ཡོད་ཅེས་བཀའ་འདྲི་ཞུས་ལན་དུ་བཀའ་སྩལ་པ། ང་ཚོ་ཚང་མས་རེ་བ་དེ་༧གོང་ས་མཆོག་སྐུ་འཚོ་བཞུགས་སྐབས་སུ་བོད་ཀྱི་གནས་སྟངས་ཐག་ཆོད་པ་ཞིག་ལ་རེ་བ་བྱེད་ཀྱི་ཡོད། ༧གོང་ས་མཆོག་སྐུ་འཚོ་བཞུགས་སྐབས་སུ་བོད་ཀྱི་གནད་དོན་ཐག་ཆོད་པ་ཞིག་མ་བྱུང་ན་བོད་ཀྱི་གནད་དོན་དེ་ཕྱོགས་གང་ཐད་ནས་དཀའ་རྙོག་ཆེ་རུ་འགྲོ་རྒྱུ་རེད་དྲན་གྱི་ཡོད། གསར་འགྱུར་བརྒྱུད་ལམ་མང་པོའི་ནང་དུ་ངའི་སྐོར་སྐད་ཆ་དེ་འདྲ་བཤད་ཡོད་ཚོད་འདུག
སྤྱིར་བཏང་ང་རང་ལོ་ན་གཞོན་པའི་ཆོས་ཀྱི་དབུ་ཁྲིད་ཅིག་ཡིན་པའི་ངོས་ནས་འགན་ཆེན་པོ་ཞིག་ཡོད་པར་ངོས་འཛིན་བྱེད་ཀྱི་ཡོད། དེ་བཞིན་ཀརྨ་པའི་མཚན་གསོལ་ཟིན་པའི་རྒྱུ་མཚན་གྱིས་ཀྱང་འགན་ཁུར་ཆེན་པོ་ཞིག་ཡོད་བསྡད་པ་རེད། དེ་ལས་ལྷག་པའི་འགན་ཞིག་ཁུར་རྒྱུའི་བསམ་བློ་དང་འཆར་གཞི་མེད། བོད་ཀྱི་ཆབ་སྲིད་ཀྱི་དབུ་ཁྲིད་ནི་མི་མང་གིས་དམངས་གཙོ་དང་མཐུན་པའི་ཐོག་ནས་འདེམས་ཀྱི་ཡོད་རེད། དེ་བཞིན་ཆོས་བརྒྱུད་ཁག་ལའང་དབུ་འཛིན་རེ་རེ་ཡོད་རེད། ང་རང་བཀའ་བརྒྱུད་པ་དང་དེའི་ནང་ནས་ཀམ་ཚང་གི་མགོ་འཛིན་ལྟ་བུར་རེད། དེ་ཡིན་དུས་དེ་དང་མཐུན་པའི་འགན་ཁུར་ཞིག་བྱེད་དགོས་རྒྱུ་རེད་དྲན་གྱི་ཡོད།
གང་ལྟར་༧རྒྱལ་བ་རིན་པོ་ཆེ་ནི་རྩོད་མེད་ཡོངས་གྲགས་ཀྱི་གཅིག་གྱུར་གྱིས་ཁས་ལེན་པའི་དབུ་ཁྲིད་ཅིག་རེད། ཁོང་ལྟ་བུར་རྩོད་མེད་ཡོངས་གྲགས་ཀྱི་དབུ་ཁྲིད་ཅིག་ཕྱིས་སུ་ཡོང་རྒྱུར་ཧ་ཅང་དཀའ་ལས་ཁག་པོ་རེད། དེས་ན་༧རྒྱལ་བ་རིན་པོ་ཆེ་དང་ཁོང་གི་ཐུགས་རྗེ་བཀའ་དྲིན་ནི་ནམ་ཡང་བོད་དང་ཁ་བྲལ་ཐབས་མེད་པ་ཞིག་ཡིན་དུས་ཁོང་གི་སྐུ་ཚེ་ཞབས་པད་བརྟན་དགོས་རྒྱུ་དེ་ཧ་ཅང་གི་གལ་ཆེན་དུ་མཐོང་གི་འདུག ཅེས་བཀའ་སྩལ།

ཡང་སློབ་ཕྲུག་ཅིག་གིས་དེང་སྐབས་མཚན་མཐུན་གྱི་གཉེན་སྒྲིག་བྱེད་རྒྱུ་དར་སྲོལ་ཆེ་རུ་འགྲོ་བཞིན་ཡོད་སྟབས་དེའི་ཐད་དུ་ནང་ཆོས་ཀྱི་ཐོག་ནས་གཟིགས་ཚུལ་གང་ཡོད་བཀའ་འདྲི་ཞུས་ལན་དུ་བཀའ་སྩལ་པ། སྤྱིར་ལུང་པ་དང་རྒྱལ་ཁབ་སོ་སོ་ལ་ཁོར་ཡུག་དང་ལུགས་སྲོལ་གོམས་གཤིས་མི་འདྲ་བ་མང་པོ་ཡོད་སྟབས་ལུང་པ་སོ་སོའི་གནས་སྟངས་ཀྱི་ཐོག་ནས་འགྲེལ་བཤད་བྱེད་རྒྱུ་ལས་འདི་འགྲིག་དང་མི་འགྲིག་ཞེས་ལུང་པ་བྱེ་བྲག་པ་ཞིག་གིས་ལྟ་ཚུལ་རྒྱུ་མཚན་དུ་བྱས་ནས་སྐད་ཆ་ཤོད་རྒྱུ་དཀའ་ལས་ཁག་པོ་རེད། དམ་ཆོས་འདུལ་བའི་ནང་དུ་གནས་སྟངས་ཁ་ཤས་ཡུལ་ལུང་དང་བསྟུན་དགོས་པའི་ཚུལ་བཤད་ཡོད་རེད། གང་ལྟར་ང་རང་ངོས་ནས་བསམ་ཚུལ་ངོ་མ་འདྲ་བོ་དེ་ཕན་ཚུན་གཅིག་གིས་གཅིག་ལ་ལྷད་མེད་པའི་བརྩེ་བ་ཞིག་ཡོད་ཚེ་མཉམ་འབྲེལ་གྱི་འཚོ་བ་སྐྱེལ་རྒྱུ་དེ་མ་འགྲིག་པ་ཞིག་རེད་ཅེས་བཤད་རྒྱུ་མེད།
གལ་ཆེ་ཤོས་དེ་རང་འདོད་དང་ཆགས་སེམས་ཙམ་གྱི་དབང་དུ་མ་ཤོར་བ་བརྩེ་བ་དངོས་མ་ཞིག་ཡོད་དགོས་རྒྱུ་དེ་གལ་ཆེན་པོ་རེད་དྲན་གྱི་འདུག ཅེས་གསུངས།

དེ་བཞིན་རྒྱ་གར་དུ་ཡོད་པའི་བོད་ཀྱི་ཆོས་དང་རིག་གཞུང་སྐོར་དང་། ཁོར་ཡུག་གི་སྐོར། དྲག་སྤྱོད་པ་ལ་སྙིང་རྗེ་བྱེད་ཚུལ་སོགས་ཀྱི་སྐོར་འདྲི་ཞུས་པ་རྣམས་ལའང་་བཀའ་ལན་སྩལ་གནང་སོང་། བགྲོ་གླེང་ལེགས་པར་གྲུབ་རྗེས་ཧར་ཝར་ཌི་གཙུག་ལག་ཁང་གི་དབུ་འཛིན་ལས་ཁང་དུ་གདན་འདྲེན་ཞུས་ཏེ་ཨ་རི་སྲིད་འཛིན་དང་པོ་རྗོ་རྗི་ཝ་ཤིན་ཏྲོན་གྱི་གཟིམས་ཆུང་ནང་དུ་དབུ་འཛིན་ལས་བྱེད་རྣམས་དང་མཇལ་འཕྲད་གསུང་གླེང་ལྷུག་པོ་གནང་བ་དང་། ཕྱི་དྲོའི་ཆུ་ཚོད་བཞི་པར་བྷོ་སི་ཏྲོན་གྱི་ས་གནས་ཀྱི་བོད་མི་རྣམས་ལ་བཀའ་སློབ་སྩལ་གནང་།

བོད་མི་འདུས་ཚོགས་མང་དྲགས་པས་ཚོགས་ཁང་དུ་མ་ཤོང་ནས་བཀའ་སློབ་ཐེངས་གཉིས་སྩལ་དགོས་བྱུང་བ་ལྟར་བཀའ་སློབ་རྣམས་ཨ་རི་གློག་འཕྲིན་གྱི་སྒྲ་ཐག་ཏུ་བཞག་འདུག་པ་དང་ནང་དོན་ཕལ་ཆེར་སན་ཧྥི་རན་སི་སི་ཁོ་རུ་ས་གནས་བོད་རིགས་རྣམས་ལ་གསུངས་པ་དང་གཅིག་གྱུར་ཡིན་སྟབས་ཡིག་ཐོག་ཏུ་ཕབ་མེད། དེ་ལྟར་རླབས་ཆེན་གྱི་མཛད་རིམ་ཁག་ལེགས་གྲུབ་རྗེས་སུ་གྲོང་ཁྱེར་ནེའུ་ཡོག་ཏུ་ཆིབས་བསྒྱུར་གྱི་ཀུན་ཕན་ཐེབས་རྩ་ཚོགས་པའི་ལ་རྩེ་དཔེ་མཛོད་ཁང་དུ་ཉེ་འཁོར་གྱི་བོད་རིགས་མཁས་དབང་ལོ་ཙཱ་བ་དང་རྩོམ་པ་པོ་བཅས་ལྷན་འཛོམས་ཀྱིས་བོད་ཀྱི་ཡིག་བསྒྱུར་དང་འབྲེལ་བའི་བཀའ་སློབ་ལམ་སྟོན་དང་དགོངས་ཚུལ་བརྗེ་རེས་གནང་མཛད། སང་ཉིན་སྤྱི་ཚེས་༣༡ཉིན་པེ་རིན་སི་ཏྲོན་གཙུག་ལག་སློབ་ཆེན་དུ་ཕེབས་གནང་རྒྱུ་བཅས།
མི་གསོན་པོས་ཟིན་བྲིས་བཏབས།