མི་གསོན་པོ།
རྒྱལ་ཀུན་འཕྲིན་ལས་ཀྱི་སྙིང་པོ་གཅིག་ཏུ་བསྡུས་པའི་ལྔ་བདོའི་འགྲོ་བ་ཡོངས་ཀྱི་མ་འདྲིས་པའི་མཛའ་བཤེས་ཆེན་པོ། རྒྱ་བོད་ཧོར་གསུམ་གྱི་ཁྱོན་དུ་རྫུ་འཕྲུལ་དང་ནུས་པའི་མངའ་བདག་ཏུ་གྲགས་པའི་མཁས་གྲུབ་ཀུན་གྱི་ཆོས་ཀྱི་རྗེ་བོ། བྱམས་དང་སྙིང་རྗེ་ཆེན་པོའི་བརྟུལ་ཞུགས་དང་དུ་བླངས་ཏེ་སྤྲུལ་པའི་ཟློས་གར་བསྒྱུར་བ་ཡོངས་ཀྱི་གཙུག་གི་ནོར་བུ། སྣོད་བཅུད་རྟེན་འབྲེལ་གྱི་བྱུང་རིམ་ཇི་སྙེད་དུས་རབས་ཀྱི་འགྲོས་དང་མཐུན་པའི་སྒོ་ནས་གཞན་ལ་བླང་དོར་གྱི་ལམ་སྟོན་པའི་སེམས་དཔའ་ཆེན་པོ། ༧དཔལ་རྒྱལ་དབང་ཀརྨ་པ་སྐུ་ཕྲེང་བཅུ་བདུན་པ་ཨོ་རྒྱན་འཕྲིན་ལས་རྡོ་རྗེ་མཆོག་ཨ་རི་ཤར་ཕྱོགས་ཁུལ་གྱི་མཛད་རིམ་རྣམས་ལེགས་གྲུབ་ཀྱིས་སྤྱི་ཚེས་༤ ཉིན་མངའ་སྡེ་ཝི་སི་ཁོ་སི་རུ་ཡོད་པའི་ཝི་སི་ཁོ་སིའི་གཙུག་ལག་སློབ་ཆེན་ནང་དུ་ཆིབས་བསྒྱུར་བསྐྱངས་གནང་སོང་།
གྲོང་ཁྱེར་ཤིས་ཀ་གྷོ་ནས་ཨ་རི་གཞུང་གི་ཆེད་དུ་གྲབ་སྒྲིག་གནང་བའི་ཕེབས་འཁོར་དང་སྐུ་སྲུང་བཅས་ཆེན་པོ་ལ་འོས་པའི་ལས་ཚན་སྐུ་འཁོར་ལྷན་རྒྱས་གཙུག་ལག་སློབ་ཆེན་ནང་དུ་ཆིབས་བསྒྱུར་བསྐྱངས་སྐབས་སློབ་གྲྭའི་གནད་ཡོད་མཁས་དབང་ཁག་དང་གཏེར་སྒར་ཆོས་ཚོགས་ཀྱི་འགན་འཛིན་བཅས་ཀྱིས་ཕེབས་བསུ་དང་བཅས་ཞབས་སོ་འཁོད་གྲུབ་པ་དང་ས་གནས་ཀྱི་བོད་རིགས་སྤྱི་མཐུན་ཚོགས་པས་ཇི་ལྟར་གསོལ་བ་བཏབས་པ་ལྟར་བོད་རིགས་གཙོ་བོར་བྱས་པའི་འདུས་ཚོགས་བརྒྱ་ཕྲག་དུ་མ་ལ་བཀའ་སློབ་ཟབ་རྒྱས་བཀའ་དྲིན་སྩལ་གནང་སོང་།
དེ་ཡང་བཀའ་སློབ་ཀྱི་སྙིང་དོན་ནི་ཛ་དྲག་དང་གཉན་འཕྲང་ཅན་གྱི་དུས་རབས་འདིར་བོད་མི་རྣམས་རྡོག་རྩ་ཆིག་དྲིལ་གྱིས་མཐུན་འབྲེལ་དམ་ཟབ་བྱས་ཏེ། མི་རིགས་རང་གི་ཐུན་མིན་གྱི་ཁྱད་ཆོས་སུ་གྱུར་པའི་སྐད་དང་ཡི་གེ་རྒྱུན་འཛིན་བྱེད་དགོས་ཚུལ་དང་། ཆོལ་ཁ་དང་ཆོས་ལུགས་ཀྱི་འཐེན་ཁྱེར་ཆུང་བའི་གཅིག་གྱུར་གྱི་ལྟ་ཚུལ་མངའ་བའི་གཞིས་སྡོད་བོད་མིའི་སེམས་ཤུགས་དང་ལ་རྒྱ་ལ་བསྔགས་བརྗོད། དེ་བཞིན་གཞིས་བྱེས་གཉིས་ཀྱི་བོད་མི་ཡོངས་ཀྱིས་ཁྱད་འཕགས་ཀྱི་དབུ་ཁྲིད་གོང་ས་མཆོག་གི་བཀའ་དྲིན་རྗེས་སུ་དྲན་དགོས་པ་སོགས་ཀྱི་ལམ་སྟོན་རྒྱ་ཆེར་བཀའ་དྲིན་སྩལ་གནང་སོང་།
ས་གནས་ཀྱི་བོད་རིགས་སྤྱི་མཐུན་ཚོགས་པའི་ཚོགས་གཙོ་དང་ཆོས་དགེ་ལྷན་ནས་༧དཔལ་རྒྱལ་དབང་ཀརྨ་པས་བསྟན་འགྲོ་སྤྱི་དང་བྱེ་བྲག་ལ་ཕན་བདེ་རྒྱ་ཆེན་བསྒྲུབ་པའི་མཛད་རྗེས་ལ་གུས་འདུད་དང་བཀའ་དྲིན་ཐུགས་རྗེ་ཆེ་ཞུའི་གསུང་བཤད་ཀྱང་མཛད་སོང་། སྤྱི་ཚེས་༥ ཉིན་གྱི་ཞོགས་པ་གཏེར་སྒར་ཆོས་ཚོགས་ཀྱི་སློབ་མ་རྣམས་གཙོ་བོར་བྱས་པའི་ནང་ཆོས་དོན་གཉེར་བ་དྲུག་བརྒྱ་ལྷག་ཙམ་ལ་བན་སྒར་འཇམ་དཔལ་བཟང་པོས་མཛད་པའི་དྭགས་པོ་བཀའ་བརྒྱུད་ཀྱི་གསོལ་འདེབས་རྡོ་རྗེ་འཆང་ཐུང་མའི་ཟབ་ཁྲིད་དང་། གཏེར་སྒར་གྱི་དབུ་ཁྲིད་སྐྱབས་རྗེ་ཡོངས་དགེ་མི་འགྱུར་རིན་པོ་ཆེས་རི་ཁྲོད་ནས་ཉེ་ཆར་སྩལ་བའི་འཕྲིན་ཡིག་གི་ནང་དོན་ལྟར་མགྱོགས་པ་མཇལ་རྒྱུའི་ཡོང་ངེས་པ་དང་། ཁོང་ཉིད་སྐུ་འཚམས་ལ་ཕེབས་པ་ང་ཚོས་སྔོན་ནས་ཤེས་ཀྱང་གློ་བུར་དུ་བྱ་བྲལ་ལ་ཕེབས་ཏེ་དུས་ཡུན་རིང་པོ་ལོ་ངོ་བཞི་ལ་ཉེ་བར་འདི་ལྟར་ཕེབས་རྒྱུར་སྔོན་མ་བློ་ཡུལ་ལ་མེད་ཀྱང་། འདི་ལྟར་བྱ་བྲལ་དུ་ཕེབས་པ་ནི་ཆེས་ངོ་མཚར་དང་ཡི་རངས་སྐྱེ་དགོས་པ་ཞིག་ཡིན་པ་དང་། ཁོང་ཉིད་བྱ་བྲལ་དུ་ཕེབས་ཤུལ་འཛམ་གླིང་གང་སར་ཡོད་པའི་གཏེར་སྒར་གྱི་སློབ་ཚོགས་དང་འགན་འཛིན་རྣམས་ཀྱིས་ཕྱོགས་གང་ཐད་ནས་འཐུས་ཤོར་མེད་པར་ལས་དོན་བྱ་གཞག་ལེགས་བསྒྲུབས་བྱས་འདུག་པས་ངས་མི་འགྱུར་རིན་པོ་ཆེའི་ཚབ་བྱས་ཏེ་ཐུགས་རྗེ་ཆེ་ཞེས་ཞུ་རྒྱུ་ཡིན་ཞེས་བསྔགས་བརྗོད་དང་གཟེངས་བསྟོད་ཀྱི་བཀའ་སློབ་སྤྱི་བོའི་རྒྱན་དུ་བཀའ་དྲིན་སྩལ་གནང་།
དགོང་མོའི་ཆུ་ཚོད་བདུན་པའི་དུས་སུ་༧དཔལ་རྒྱལ་དབང་ཀརྨ་པ་མཆོག་ནུབ་ཕྱོགས་ཀྱི་ཚན་རིག་པའི་ཁྲོད་དུ་སྐད་གྲགས་ཤིན་ཏུ་ཆེ་བའི་དབང་རྩ་རིག་པ་དང་སེམས་ཁམས་རིག་པའི་མཁས་དབང་རི་ཆི་ཌི་ཝི་སི་དང་། བུད་མེད་ཀྱི་སེམས་ཁམས་དང་བསྟུན་པའི་སྒོམ་རིམ་ལ་ཆེད་མཁས་སུ་གྲགས་པའི་སེམས་ཁམས་རིག་པའི་མཁས་དབང་མ་སོ་ན་ཌི་མེ་ཌིན་རྗི། དེ་བཞིན་གྲགས་ཅན་གྱི་གསར་འགྱུར་དང་དུས་དེབ་ནིའུ་ཡོག་དུས་བབ་ཀྱི་ཚན་རིག་གི་རྩོམ་སྒྲིག་པ་དང་། སེམས་ནད་བཅོས་ཐབས་ཀྱི་ཕུལ་བྱུང་གི་དེབ་མང་པོའི་རྩོམ་པ་པོ་མཁས་དབང་ཌན་གྷོ་མན་བཅས་དང་ལྷན་བཞུགས་ཀྱིས་ཐབས་ལམ་དང་རྒྱུ་རྐྱེན་གང་གི་མི་ཚེ་བདེ་སྐྱིད་གང་འདྲ་བྱས་ཏེ་ཐོབ་མིན་གྱི་སྐོར་ལ། ཚན་རིག་པ་དང་ནང་ཆོས་ཀྱི་ངོས་ནས་སེམས་ཁམས་དང་ཀླད་པ་ངོས་འཛིན་བྱེད་ཕྱོགས་དང་དངོས་ཡོད་འཚོ་བའི་ཁྲོད་དུ་མི་ཚེ་བདེ་སྐྱིད་ཇི་ལྟར་སྤེལ་ཕྱོགས་ཀྱི་བཀའ་སློབ་དང་བགྲོ་གླེང་ངོ་མཚར་དང་གཟི་བརྗིད་ལྡན་པ་ཞིག་བཀའ་དྲིན་སྩལ་གནང་།
དེ་ཡང་ཐོག་མར་མཁས་དབང་རི་ཆེ་ཌི་ཝི་སི་ནས་ནང་ཆོས་སྒོམ་རིམ་ལ་འབད་བརྩོན་བྱས་མྱོང་བའི་སྒོམ་སྒྲུབ་པ་རྣམས་ཀྱི་ཀླད་ཁམས་ལ་བརྟག་དཔྱད་བྱས་པའི་བརྒྱུད་རིམ་ཁྲོད་དུ་རྙེད་སོན་བྱུང་བའི་མི་ཚེའི་བདེ་སྐྱིད་ཀྱི་འཚོ་ཐབས་བརྒྱུད་རིམ་བཞི་ཡི་སྒོ་ནས་སྙན་སེང་དང་བཀའ་འདྲི་ཞུས་པར། ༧དཔལ་རྒྱལ་དབང་ཀརྨ་པ་མཆོག་གིས་སྦྱིན་པ་དང་དྲན་ཤེས་གཉིས་ནི་མི་ཚེའི་ནང་དུ་སེམས་ཁམས་ཞི་བདེ་ལ་བསྒྱུར་བའི་ཐབས་ལམ་གལ་ཆེན་ཞིག་ཡིན་པའི་སྐོར་རྗེ་ཉིད་ཀྱི་ཉམས་མྱོང་དང་འབྲེལ་བའི་སྒོ་ནས་གསུངས་པ། ད་ལྟར་ཁོང་གིས་སེམས་ཁམས་དང་འབྲེལ་བའི་བདེ་སྐྱིད་ཀྱི་འཚོ་ཐབས་སམ་གནས་སྟངས་བཞི་གསུངས་པའི་ནང་ནས་རང་གི་ཉམས་མྱོང་དང་འབྲེལ་བ་ཅུང་ཡོད་པ་དེ་སྦྱིན་པ་དང་དྲན་ཤེས་གཉིས་ཡིན་སྟབས་དེ་གཉིས་ཀྱི་སྒོ་ནས་ཅུང་ཟད་ཞུ་རྒྱུ་ཡིན། ང་རང་གི་མི་ཚེ་ནང་དུ་འགྱུར་བ་མང་པོ་ཞིག་ཕྱིན་ཏེ་དཀའ་ངལ་ཡང་མང་པོ་ཞིག་འཕྲད་ཡོད་སྟབས་ལོ་ཚོད་ཀྱི་ཐོག་ནས་ཆུང་ཆུང་ཡིན་ནའང་ཉམས་མྱོང་གི་ཐོག་ནས་སྐབས་རེ་རྒན་པོ་ཞིག་ཡིན་པའི་ཚོར་སྣང་ཡོང་གི་འདུག དེས་ན་ངས་ཤེས་ཚོད་ལ་རང་ཉིད་ཁོ་ནའི་ཆེད་དུ་བསམ་བློ་བཏང་བ་མ་ཡིན་པར་གཞན་ལ་སེམས་ཁུར་དང་བསམ་ཤེས་བྱེད་སྐབས་སེམས་ཚོར་རང་བཞིན་གྱིས་ཞི་ལྷོད་དང་སྤྲོ་སྣང་ཅན་དུ་འགྱུར་ཐུབ་ཀྱི་འདུག མི་མང་པོས་ང་ལ་ལྷག་བསམ་གྱིས་ངའི་མི་ཚེའི་བདེ་འཇགས་ཆེད་དུ་གཟབ་དགོས་པའི་དྲན་བསྐུལ་གནང་བ་ལྟར་གཞན་ལ་དོགས་པ་དང་རྣམ་རྟོག་བྱེད་སྐབས་རང་ཉིད་ཁེར་རྐྱང་ཡིན་པའི་སེམས་ཚོར་དེ་ཆེ་རུ་འགྲོ་བགྱི་འདུག དེ་ལས་མི་གཞན་གྱི་ཡོན་ཏན་དང་བཟང་ཕྱོགས་ལ་བསམ་བློ་བཏང་སྐབས་མི་དེ་བཟང་པོ་དང་ཡག་པོ་ཆགས་མིན་ལ་མ་བལྟོས་པ་རང་གི་སེམས་ཁམས་དེ་ཞི་བདེ་ཅན་དུ་འགྱུར་ཐུབ་ཀྱི་འདུག དེས་ན་མི་གཞན་ལ་སེམས་ཁུར་དང་ལྡན་པའིཐོག་ནས་རང་སེམས་ལ་དྲན་ཤེས་བསྟེན་རྒྱུ་དེ་སེམས་ཁམས་ཞི་བདེ་ལ་བསྒྱུར་བའི་ཐབས་ལམ་གལ་ཆེན་ཞིག་རེད།
ང་རང་ལ་མཚོན་ན་ལས་ཀ་མང་པོ་དང་། བྲེལ་བ་ཆེན་པོས་ཉིན་ལྟར་མི་ཚེ་བྲེལ་འཚབ་ཀྱིས་སྐྱེལ་གྱི་ཡོད་སྟབས་བསམ་གཞིག་གིས་བརྟག་དཔྱད་བྱེད་སྐབས་རང་གི་བྱས་པའི་ལས་ཀ་རྣམས་ཕན་ཐོགས་ཅན་ཞིག་དང་གཟི་བརྗིད་ཅན་ཞིག་ཏུ་མཐོང་གི་མི་འདུག དེ་དག་དྲན་ཤེས་མེད་པའི་རྒྱུ་རྐྱེན་གྱིས་ཡིན་རྒྱུ་རེད་དྲན་གྱི་ཡོད། སྤྱིར་ང་ཚོའི་མི་ཚེ་བྲེལ་འཚབ་ཅན་དུ་འགྱུར་བ་འདི་ཉིད་ཆོག་ཤེས་དང་དྲན་ཤེས་ཀྱིས་མ་འདངས་བས་ཡིན་སྟབས་དྲན་ཤེས་ཀྱིས་སེམས་ལ་བཏང་འཛིན་བྱེད་ཐུབ་ཚེ་སེམས་ཁམས་རང་བཞིན་ཞི་ལྷོད་ཅན་དུ་ཆགས་ཐུབ
དེས་ན་ངས་རང་གི་ཉམས་མྱོང་དང་འབྲེལ་བའི་དཔེར་མཚོན་ཞིག་ཞུ་འདོད་བྱུང་། སྤྱིར་བཏང་ང་རང་ཕྱི་ལོག་ཏུ་འགྲོ་རྒྱུའི་གོ་སྐབས་ཞི་དྲག་ཐོབ་ཀྱི་མེད་ལ། སྐབས་རེ་ཕྱི་ལོག་ཏུ་འགྲོ་སྐབས་མི་མང་པོས་རྗེས་དེད་བྱེད་ནས་རང་བཞིན་གྱི་བག་ཕེབས་དང་ལྷིང་འཇགས་ཀྱི་རྣམ་པ་དེ་མཐོང་ཐོབ་ཀྱི་མེད། འོན་ཏེ་ཉིན་ཞིག་ཕྱི་ལོག་ཏུ་འཆམ་བསྐྱོད་བྱེད་སྐབས་མཁའ་རླུང་གཙང་བ་དང་ཁོར་ཡུག་དབེན་པས་སེམས་ཁམས་རང་བཞིན་དྲན་ཤེས་ཀྱིས་ཟིན་ཏེ་དབུགས་བཏང་བཞིན་ཡོད་པའི་ཚོར་སྣང་བྱུང་སོང་། དྲན་ཤེས་ཀྱིས་ཟིན་པའི་ཚོར་སྣང་དེས་སེམས་ཁམས་ལྷོད་པོ་དང་ཞི་བའི་རྣམ་པ་ཅན་ཞིག་ཏུ་ཆགས་སོང་བའི་ཚོར་སྣང་ཆེན་པོ་བྱུང་། སྤྱིར་ཉིན་ལྟར་དབུགས་སྟོང་ཕྲག་མང་པོ་གཏོང་བཞིན་ཡོད་ལ་དབུགས་རེ་རེ་ལའང་རྒྱུ་རྐྱེན་སྟོང་ཕྲག་མང་པོའི་བརྒྱུད་རིམ་དང་ལྡན་པའི་རྙོག་འཚབ་ཅན་ཞིག་ཡིན་མོད་དེ་ཉིད་ངོས་ཟིན་པའི་དྲན་ཤེས་དང་ལྡན་ཚེ་ངོ་མཚར་སྐྱེ་དགོས་པའི་གནད་དོན་ཞིག་ཏུ་ཆགས་པ་དང་དེའི་རྒྱབ་སྐྱོར་གྱིས་རང་གི་མི་ཚེ་ངོ་མ་དེ་རྙེད་ཀྱི་ཡོད། དེས་ན་ཉམས་མྱོང་གི་ཐོག་ནས་ཞུས་པ་ཡིན་ན་རྒྱུ་དངོས་འཚོལ་བསྒྲུབ་དང་ཕྱིའི་ཆ་རྐྱེན་གྱིས་མིའི་སེམས་ཁམས་ཞི་ལྷོད་དུ་གཏོང་གི་མེད་ལ་དྲན་ཤེས་དང་ལྡན་པའི་སེམས་ཁམས་ཀྱིས་རང་གི་མི་ཚེ་ཞི་བདེའི་རྣམ་པ་ཅན་དུ་བསྒྱུར་ཐུབ་པར་ངེས།
དེ་བཞིན་སྦྱིན་པ་ནི་ངའི་མི་ཚེ་ནང་གི་བདེ་སྐྱིད་ཐོབ་པའི་ཉམས་མྱོང་གལ་ཆེ་ཤོས་དེ་ཡིན་ཞེས་བཤད་ནའང་མི་ཆོག་རྒྱུ་མེད། ང་རང་ལོ་བདུན་ལ་སླེབས་སྐབས་ཀརྨ་པའི་ཡང་སྲིད་དུ་ངོས་འཛིན་བྱས་ཏེ་ལས་དོན་དང་འགན་ཁུར་ལས་སླ་བོ་ཞིག་མིན་པའི་ཐོག་དཀའ་ངལ་དང་རྙོག་འཛིང་མང་པོ་ཞིག་ལ་གདོང་ལེན་བྱེད་དགོས་སྟབས་མི་མང་པོས་ཁྱོད་ལ་དེ་ལྟའི་སེམས་ཤུགས་ཤིག་གང་འདྲ་བྱས་ནས་བྱུང་བ་དང་དེའི་རྒྱུ་རྐྱེན་གཙོ་བོ་དེ་གང་ཡིན་ཟེར་ནས་ང་ལ་འདྲི་མཁན་འདུག དེའི་ཐད་དུ་ང་ལ་དམིགས་བསལ་ཅན་གྱི་ལན་འདེབས་བྱེད་རྒྱུ་གཞན་མེད་ལ་ལན་འདེབས་བྱེད་རྒྱུ་གཅིག་རང་ཡོད་པ་ནི། གཞན་གྱིས་ང་ལ་བྱིན་པའི་བརྩེ་བ་དང་བྱམས་སྐྱོང་ལ་བརྟེན་ནས་ངས་སེམས་ཤུགས་རྙེད་ཀྱི་འདུག དེས་ན་གོང་དུ་ངས་སྦྱིན་པས་ང་ལ་སེམས་ཁམས་ཞི་ལྷོད་ཅན་གྱི་ཉམས་མྱོང་སྟེར་བ་བཤད་པ་དེ་ནི་ངས་གཞན་ལ་སྦྱིན་པ་བཏང་བས་མ་ཡིན་པར་གཞན་གྱིས་ང་ལ་སྦྱིན་པ་བཏང་བས་ཡིན། ཞེས་བཞད་མོ་དང་བཅས་བཀའ་སྩལ།
མཁས་དབང་མ་སོ་ན་ཌི་མེ་ཌིན་རྗིས་མོ་རང་ཉིད་ཀྱིས་བུད་མེད་སྦྲུམ་མ་གཙོས་པའི་སེམས་ཁམས་དངངས་འཚབ་ཀྱིས་ཟིན་པ་དག་ལ་སྒོམ་རིམ་གྱི་བློ་སྦྱོང་བསླབ་ནས་སེམས་ཁམས་ལྷོད་ལ་བབ་ཐུབ་པའི་ལས་དོན་བསྒྲུབས་ཕྱོགས་སྙན་སེང་དང་། ཉོན་མོང་དང་ཚོར་སེམས་ལ་སྒོམ་ཉམས་ལེན་ཇི་ལྟར་བྱེད་དགོས་པའི་ལན་དུ། ༧དཔལ་རྒྱལ་དབང་ཀརྨ་པ་མཆོག་གིས་བཀའ་སྩལ་པ།
ཐོག་མར་ཁྱེད་རང་གི་གཞན་ཕན་ཅན་གྱི་ལས་དོན་མང་པོ་བསྒྲུབས་པ་ལ་བསྔགས་བརྗོད་དང་ལས་དོན་ལེགས་གྲུབ་བྱུང་བར་དགའ་བསུ་ཡོད། དེ་བཞིན་ནམ་རྒྱུན་སྒོམ་མཉམ་གཞག་གི་ཉམས་ལེན་བྱེད་སྐབས་རང་གི་སེམས་ཀྱི་ངོ་བོ་དང་ཚོར་སེམས་ཉོན་མོང་དེ་དག་ལས་དབྱེ་འབྱེད་ལྟ་བུར་ཞིག་བྱེད་དགོས་རྒྱུ་གལ་ཆེན་ལྟ་བུར་མཐོང་གི་འདུག མི་མང་པོའི་ཚོར་སྣང་དུ་ཆགས་སོགས་ཚོར་སེམས་ཀྱིས་ཟིན་དུས་རང་ཉིད་ཡོངས་རྫོགས་ཆགས་སོགས་ཚོར་སྣང་དེའི་ནང་དུ་ཡོད་པ་ལྟ་བུར་ཞིག་དང་། ཡང་ན་སེམས་ཁོ་རང་ཆགས་སོགས་ཀྱི་སེམས་ཚོར་དྲག་པོ་ཡིན་པ་ལྟ་བུར་ཞིག་ལ་ངོས་འཛིན་བྱེད་ཀྱི་འདུག
དེས་ན་ཉོན་མོངས་དང་ཚོར་སེམས་སོགས་ནི་གློ་བུར་བ་དང་སེམས་ཀྱི་རང་བཞིན་ནི་དེ་ལྟར་མིན་པའི་ཚུལ་གྱི་དབྱེ་བ་དེ་ཕྱེ་ཤེས་དགོས། དེ་བཞིན་ཉོན་མོངས་བྱུང་སྐབས་སོ་སོའི་སྟངས་འཛིན་བྱེད་པའི་གོ་སྐབས་དང་ཐབས་ལམ་སྤྱད་དེ་སྟངས་འཛིན་བྱས་ཏེ་སྒོམ་གྱི་ཉམས་ལེན་ནང་དུ་འགྲོ་བར་བྱེད་དགོས། ཡང་ན་ཉོན་མོངས་དང་ཚོར་སེམས་དྲག་པོས་ཟིན་ལ་ཉེ་སྐབས་དྲན་ཤེས་དང་ལྡན་པའི་སྒོ་ནས་སེམས་ཀྱི་དམིགས་གཏད་གཞན་ལ་བྱེད་ཆོག་པ་ཞིག་གལ་ཆེ། ནམ་རྒྱུན་སྒོམ་རྒྱབ་སྐབས་ཉོན་མོང་དང་ཚོར་སེམས་སོགས་དྲན་ཤེས་དང་ལྡན་པའི་རང་སེམས་ཀྱི་ཡུལ་དུ་འཇོག་པ་དང་། དེ་ལ་དྲན་ཤེས་ཀྱི་སྒོ་ནས་རྒྱུ་རྐྱེན་འབྱུང་ཁུངས་སོགས་བརྟག་དཔྱད་བྱེད་པའི་དཔྱད་སྒོམ་བྱས་ན་ཆོག་ཀྱང་དེང་དུས་མི་མང་པོས་བརྟག་ཞིབ་བྱེད་རྒྱུ་དེ་དཀའ་ལས་འདུག་ཟེར། དེ་ལྟར་ཡིན་ན་སེམས་རང་བབས་སུ་འཇོག་ཆོག་པའི་སྒོམ་རིམ་གཞན་གྱི་ཐབས་ལམ་བསྟེན་རྒྱུ་དེ་གལ་ཆེན་རེད། ཅེས་གསུངས།
ཡང་རྟེན་འབྲེལ་དང་ལྟོས་གྲུབ་ཀྱི་སྒོ་ནས་རང་བྱུང་ཁོར་ཡུག་གི་གནད་དོན་དང་སྲུང་སྐྱོབ་ཐད་དུ་བཀའ་འདྲི་ཞུས་པ་ལ་འདི་ལྟར་གསུངས་གནང་སོང་། རང་བྱུང་ཁོར་ཡུག་གི་གནད་དོན་འདི་ནི་རང་ཉིད་ཀྱི་ངོས་ནས་ཧ་ཅང་གལ་ཆེན་དུ་བརྩི་བཞིན་ཡོད། ང་རང་ཆུང་དུས་ཏེ་ལོ་བདུན་དུ་ལོན་སྐབས་ཕ་ཡུལ་དང་ཁ་བྲལ་ནས་ཕ་ཡུལ་ལ་ལོག་ཐུབ་མེད་ཀྱང་། ད་ལྟའང་ངའི་ཕ་ཡུལ་གྱི་དྭངས་ཤིང་གཙང་བའིརང་བྱུང་ཁམས་ཀྱི་པར་རིས་རྣམས་མཐོང་བ་ཙམ་གྱིས་སེམས་ལ་དགའ་སྤྲོ་སྟེར་གྱི་འདུག དེ་བཞིན་གྲོང་དང་གྲོང་ཁྱེར་སོགས་གང་དུ་བསྐྱོད་ཀྱང་བཀོད་པ་ལེགས་པོ་དང་། དྭངས་ཤིང་གཙང་བའི་ཁོར་ཡུག་གིས་མི་རྣམས་ཀྱི་སེམས་ལ་སྤྲོ་སྣང་སྟེར་གྱི་ཡོད་སྟབས་ལྟོས་གྲུབ་གྱི་ཆ་ནས་ཁོར་ཡུག་ནི་མི་རྣམས་ལ་ཧ་ཅང་གལ་ཆེན་རེད་དྲན་གྱི་ཡོད། དེ་ལྟར་རྟེན་འབྲེལ་དང་ལྟོས་གྲུབ་གྱི་སྒོ་ནས་གཞུང་ལུགས་ལས་འབྲེལ་བཤད་མང་པོ་བྱེད་ཀྱི་ཡོད་པ་རྣམས་དེ་རིང་འདིར་དམིགས་བསལ་ཞུ་དགོས་མ་མཐོང་། ཞེས་བཀའ་སྩལ།
དེ་བཞིན་སྒོམ་རིམ་དང་འབྲེལ་བའི་ཚོར་སེམས་ཉོན་མོང་སྟངས་འཛིན་བྱེད་ཚུལ་སོགས་དང་དེང་རབས་ཚན་རིག་གིས་གསར་རྙེད་བྱུང་བའི་སེམས་ཁམས་སྒོམ་རྒྱབ་པ་ལས་རྙེད་པའི་བདེ་སྐྱིད་ཀྱི་མཚོན་རྟགས་སོགས་ཀྱི་ཐད་དུ་སྤྲོ་སྣང་འཕེལ་བའི་བགྲོ་གླེང་ཟབ་རྒྱས་སྩལ་བ་ལས་འདིར་རང་ཉིད་ཀྱི་བློ་འདོད་ལྟར་༧རྒྱལ་དབང་མཆོག་གི་གསུང་ཁག་ཅིག་ལས་མཁས་དབང་གཞན་གྱི་གསུང་རྣམས་བཀོད་ཐུབ་མ་སོང་། བགྲོ་གླེང་གྲུབ་རྗེས་མཁས་དབང་རི་ཆེ་ཌི་ཝི་སི་ལ་ཉིན་དེའི་བགྲོ་གླེང་གི་ཚོར་སྣང་ཇི་ལྟར་བྱུང་བའི་ཐད་དུ་བཅར་འདྲི་ཞུས་པས། ཁོང་གིས་བགྲོ་གླེང་དེ་ནི་ཆེས་མཛེས་སྡུག་ལྡན་ལ་ངོ་མཚར་ཆེ་བ་ཞིག་སྟེ་ང་ཚོ་འདི་ལྟ་བུར་གྱི་ལམ་སྟོན་པ་དང་ཆོས་ལུགས་ཀྱི་དབུ་ཁྲིད་ཅིག་ཡོད་པ་ནི་ཆེས་བསོད་ནམས་དང་སྐལ་བ་བཟང་པོ་རེད་ཅེས་བརྗོད་སོང་། མཁས་དབང་ཁོང་ནི་ནང་བསྟན་ཆོས་ལུགས་ཀྱི་ཉམས་ལེན་པ་ཞིག་དང་། ཚེ་སྲོག་ཚན་རིག་ཁང་གི་འགན་འཛིན། ༧གོང་ས་སྐྱབས་མགོན་ཆེན་པོ་ཨ་རི་ལ་གདན་དྲངས་ཏེ་ཚན་རིག་དང་ནང་ཆོས་ཀྱི་བགྲོ་གླེང་གི་བཀོད་སྒྲིག་བྱེད་པོ། ཡོངས་དགེ་མི་འགྱུར་རིན་པོ་ཆེ་གཙོས་པའི་བོད་ཀྱི་བླ་སྤྲུལ་ཉམས་ལེན་པ་རྣམས་ཀྱི་དབང་རྩ་ལ་བརྟག་དཔྱད་བྱས་ཏེ་སྒོམ་ཉམས་ལེན་གྱིས་སེམས་ཁམས་ཞི་བདེ་བསྐྲུན་པའི་དཔང་རྟགས་སྟོན་མཁན་ཞིག་དང་། ད་ལྟར་མི་འགྱུར་རིན་པོ་ཆེས་མཛད་གནང་བའི་སྒོམ་རིམ་དགའ་བའི་འཚོ་བའི་སློབ་ཁྲིད་གནང་མཁན་གྱི་མཁས་དབང་ཤེས་ཡོན་ཆེ་ལ་ང་རྒྱལ་ཆུང་བ་ཞིག་རེད།
མི་གསོན་པོས་ཟིན་བྲིས་བཏབས།
ཉོན་མོངས་་་ཅེས་པ་འདི་ལྟར་བྲིས་ན་མི་ལེགས་སམ།
གསུང་བཤད་ངོ་མ་སྤྲོ་བོ་གནང་སོང་། སྐུ་ཚེ་ཞབས་པད་བརྟན་དུ་གསོལ།།
་་་་་་་་་་་་་་་་ མཁས་དབང་ཤེས་ཡོན་ཆེ་ལ་ང་རྒྱལ་ཆུང་བ་ཞིག་རེད། ་་་་་་་་་་་་་་
མཁྱེན་ནོ་
ཀརྨ་པ་ལ་ན་མོ། ཀརྨ་པ་ཞེས་པའི་ཀརྨ་ཞེས་པའི་འབྱུང་ཁུང་དང་གོ་དོན་དང། ཀརྨ་ཀམ་ཚང་ཞེས་པའི་ཀམ་གི་གོ་དོན་དང་། ཀརྨ་ཞེས་པ་རྒྱ་གར་སྐད་ལ་ལས་ཞེས་ཡིན་ནམ། དེ་དོན་སློབ་སྐྱེད་ཅིག་གནང་སྐྱོང་བ་ཞུ།
སྤྱིར་གཏང་བོད་པའི་སྤྱི་ཚོགས་བླ་མའི་བཀའ་འོག་ལ་འཚོ་དགོས་པ་དེ་བོད་པའི་ཆོས་དང་རིགས་གཞུང་གཉིས་ཀའི་བག་གམ་ཞིག་རེད་ཟེར་འགྲོས་དང། ༡༩༥༩ ལོ རྒྱ་རོས་བོད་ཡོངས་རྫོགས་་བཙན་དབང་གིས་འོག་ལ་གནོན་པའི་སྐབས། འོ་ཅག་བོད་པ་ལ་ holiness ཅིག་མ་ཏོག་གཞི་གྲུབ་ལས་འདས་པ་དེ་ལྟར་ཡང། ད་ལྟ་བླ་མ་རེ་ལ་མིང་ holiness རེ་རང་ཉིད་ཀྱིས་རང་ལ་བཏག་པ་དང། སྐུ་འཁོར་ཚོ་འདོད་རྒྱལ་མཁན་པོ་གནང་བ་མང་པོ་འདི་། ཡག་རྟགས་ཞིག་དང། ཡང་ན་དེ་ལས་གོ་ལྡོག་ཚུལ་དུ་ཡོད་པ་སོམ་ཉེའི་དྲ་བའི་ནང་དུ་ཚོད་དོ།