དོལ་སྨྱོན།
བརྩེ་ཞིང་དུང་བའི་སེམས་ཀྱི་ལྷ་མོ། །ཡིད་ཀྱི་སྐོམ་པ་སེལ་བའི་མ་མ། །
སེམས་པ་དམར་པོའི་གོས་ཀྱི་འཇམ་ཤ །སྙིང་གི་དགའ་མ་སེམས་ནས་དྲན་བྱུང་།།
དྭངས་པའི་བརྩེ་བ་གངས་རིའི་སྤོ་ལ། །སྙིང་གཏམ་དྲོན་མོའི་ཞབས་རྗེས་སྤར་དུས།།
དམར་རྗེན་སེམས་ཀྱི་སྦུབས་ནས་བཞུར་བའི། །ལྷད་མེད་བརྩེ་བའི་བཟི་ཁ་དྲན་བྱུང་།།
ཁེར་རྐྱང་རྨི་ལམ་སྟོང་གི་རོལ་རྩེད། །དམར་ཆུང་སེམས་ཀྱི་འཚོ་བཅུད་དྲོན་མོ།།
ཡུན་ཐུང་མི་ཚེའི་སྐྱ་ཡ་མངར་མོ། །སེམས་ཀྱི་ལྷ་མོ་སྙིང་ནས་དྲན་བྱུང་།།
གཏན་བདེའི་ཤུལ་ལམ་རིང་མོའི་ངོས་སུ། །དུང་བའི་མིག་ཟུང་ཅེར་རེར་བལྟས་པས།།
འཚོ་བའི་ལྡུམ་ར་ཡངས་མོའི་ངོས་སུ། །མཛའ་བརྩེའི་མེ་ཏོག་སེར་ཆེན་བཞད་འདུག །
སེམས་པ་དམར་པོ་དུམ་བུར་འཐོར་ཞིང་། །ཁྲག་དང་ཆུ་སེར་ས་གཞི་བརླན་རུང་།།
ཡིད་འོང་དགའ་མའི་གྲིབ་བསིལ་འོག་ན། །འཚོ་བའི་དམ་བཅའ་རྡོ་ལ་བྲིས་ཡོད།།
ཕྱི་ཡི་རྣམ་པའི་མེ་ཏོག་མཛེས་པོ། །ནང་གི་བསམ་པའི་དཔལ་ཡོན་འཇམ་པོ།།
གསང་བ་སེམས་ཀྱི་བརྩེ་དུང་དྲོན་མོ། །སེམས་དང་བསམ་པའི་གཏིང་ན་ཟུག་འདུག །
ཉིན་མོའི་སྣང་བ་ཁྱོད་ཀྱི་ཞལ་རས། །མཚན་མོའི་རྨི་ལམ་ཁྱོད་ཀྱི་འཇིག་རྟེན།།
མདོར་ན་ང་ཡི་ཁོར་ཡུག་ཡོད་ཚད། །ཁྱོད་ཀྱི་ཕྱི་ནང་གསང་བས་ཁྱབ་འདུག །
ཀརྨ་ཧ་ས།
ཧ་ཅིང་ཡག་པོ་ཞིག་རྩོམ་འདུག། ཐུགས་རྗེ་ཆེ།
དོལ་སྨྱོན་སོར་མོ་ལྔ་པ་ཁོང་ལ་དགའ་རོགས་ཡག་མོ་ཞིག་བརྙེད་ཡོད་ས་རེད། ད་སོར་མོ་ལྔ་པོ་མཚམས་བཞག་ན་ཡག་ཡོང་ཨན་བདེ། །
http://www.youtube.com/watch?v=BYOlhkIThFk
བྱུང་ན་ཁ་བརྡ་ཚང་གིས་འདི་མདུན་དུ་འཇོག་རོགས། །