…… ལ་དྭགས་ཀྱི་བུ་མོ་ཞིག་ལ་བྲིས་པ།
གངསཿདུར་ཁྲོད།
སྐོར་བ་ལན་གསུམ་རྒྱག་རྒྱུའི།།
དམ་བཅའ་སེམས་ནས་བཞག་ཀྱང་།།
སྐོར་ལ་ལན་གཉིས་བསྐོར་དུས།།
བར་ཆད་རླུང་གིས་ཁྱེར་སོང་།།
ཁྱོད་ཀྱི་འཛུམ་མདངས་དྭངས་མོ།།
གསེར་ཆེན་མེ་ཏོག་ཇི་བཞིན།།
བདག་ཡིད་ན་སྤང་ཡངས་པོར།།
མཛེས་སྡུག་སྟོང་གིས་བཞད་སོང་།།
ཁྱོད་ཀྱི་སྐད་ངག་སྙན་མོ།།
ལྷོ་རོང་མོན་གྱི་ཁུ་བྱུག།
ཁྱོད་ཀྱི་རང་གཤིས་གསོན་པོ།།
གཡང་དཀར་ལུག་གི་བལ་ལོ།།
ཁ་སང་བྲིས་པའི་སྙན་ངག།
མདང་ནུབ་མིག་ཆུས་འཇིག་སོང་།།
བརྩེ་དུང་དྲོད་ཤའི་སེམས་པ།།
དྲན་གདུང་ལྷགས་པས་བཅོམ་སོང་།།
ལ་དྭགས་ལ་ཡིས་བསྐོར་བས།།
ང་རང་འགྲོ་འདོད་མ་བྱུང་།།
ཨ་མདོ་ཁ་ཐག་རིང་བས།།
འགྲོ་བློ་ཁྱོད་ལ་མེད་འདུག།
སྙིང་གཏམ་གླེང་བའི་ཁོམ་པ།།
ནམ་མཁའི་ལྷ་ཡིས་མ་སྤྲད།།
ཕན་ཚུན་འཁྲེང་བའི་མིག་བརྡ།།
མི་ཡུལ་མི་ཡིས་བཀག་སོང་།།
རིགས་རྒྱུད་གཅིག་ལ་སྐྱེས་པ།།
སྐྱེ་བ་སྔོན་གྱི་ལས་དབང་།།
འཁྲུངས་ཡུལ་སོ་སོར་བཅད་པ།།
བདུད་རྒན་སུ་ཡི་ཆོ་འཕྲུལ།།
མིག་ཆུའི་སྒྲུང་གི་གཏམ་རྒྱུད།།
འདི་ལྟར་ཡི་གེར་འབྲི་དུས།།
དམར་ཆུང་ཤ་ཡི་སེམས་པ།།
དྲན་པ་ལན་མང་འགྱེལ་སོང་།།