མཆོང་།
ཉིན་དེར། ཁྱེད་ཉིད་ངའི་འཁྲིས་སུ་སླེབས། ཡ་མཚར་གྱི་རྐྱེན་ནམ། ཡང་ན་གློ་བུར་ཀྱི་སེམས་འགུལ་གྱིས་བགྱིས་པ་ཡིན་ནམ། དམིགས་བྱ་ཅི་ཡིན་མ་ངེས་ཏེ། ཁྱེད་ཉིད་ཀྱིས་འཛུམ་མུལ་མུལ་ངང་རྡེའུ་ཞིག་བླངས་ཏེ། པྲ་ཚགས་ཀྱི་ཚུལ་ཏུ་ངའི་ལྷིང་འཇགས་ཀྱི་ཡིད་མཚོའི་ཀློང་དུ་འཕངས།
བྱ་སྤྱོད་འདིས། ངའི་སེམས་ཁུང་དུ་བཅོས་མིན་ར་རི་བྲལ་བའི་ལྗང་མཉེན་མཉེན་གྱི་མྱུ་གུ་སྐྱེ་སའི་ཞིང་ཁ་བསྐྲུན།
མ་གཞི་ངས། ཁྱེད་ཀྱིས་ང་དང་འབྲེལ་འདྲིས་བྱས། འཇམ་ཞིང་མཉེན་པའི་བྱེད་ལས་བསྒྲུབས་རྗེས། ང་དང་འགྲོགས་ནས་ཁུ་སིམ་པའི་གནས་ཞིག་ནས་ངའི་སྙིང་རྩའི་འཕར་ལྡང་ཇི་ལྟར་ཇེ་མགྱོགས་འགྲོ་བར་ཉན་བཞིན། ལྷད་མེད་པའི་བརྩེ་བ་དེ་ཁྱེད་ལ་ཅི་ལྟར་སྤྲོད་པར་ངང་བསྒུག་བྱས་འདུག་སྙམ། དེ་ནི་དགའ་ཞིང་སྤྲོས་བའི་དུས་ཅིག་རེད་འདུག།ཡིན་ཡང་ཁྱེད་ཀྱི་འཕངས་བའི་རྡེའུ་དེས་ངའི་སེམས་མཚོ་ལས་འོད་མདངས་བཀྲ་བའི་རླབས་ཕྲིང་འཕྱོ་རྗེས། འཁྱུག་ཙམ་བསྡད་དེ་ཕྱི་མིག་ཀྱང་མེད་པར་རྒྱང་དུ་བཞུད་སོང་།
ཁྱེད་ཀྱིས་ཤེས་ཡོད་དམ། ཁྱེད་སོང་ནས་བཟུང་། ངའི་སེམས་སུ་འཕྱོ་བའི་རླབས་ཕྲན་འཇགས་མ་མྱོང་། ངས་ནམ་ཡང་མཚོ་འགྲམ་གྱི་སྡོང་ལོ་མཉེན་པོའི་གྲིབ་གཟིགས་ཁྱེད་ཉིད་དུ་སྒོམ། ངའི་འཇམ་མཉེན་གྱི་རླབས་ཕྲན་དེས་བྱིལ་བྱིལ་བྱེད་ཞོར། དྲོད་ཁོལ་ལྡན་པའི་འོ་ཡང་ཡང་བྱས།
ཁྱེད་རང་དྲན་ནས་ང་རྒྱུན་དུ་བག་མ་ཕབ་པའི་ངང་དུ་གནས། བགྲང་བྱ་ངེས་མེད་ཀྱི་མཚན་མོ་གང་མང་ལ་འབའ་འབུ་གྱི་གླུ་དབྱངས་ཉན་བཞིན་ཁྱེད་ཀྱི་རྡོག་སྒྲར་རེ་སྒུག་བྱས་པ་དེར་སྐར་མ་དག་གིས་ཀྱང་གྲངས་སུ་མི་ཟིན།
གཅིག་བྱས་ན། ཁྱེད་ཉིད་ངའི་འཁྲིས་སུ་ནམ་ཡང་ལོག་མི་དཔེ་ནའང་། ཁྱེད་ཀྱི་གཟི་བརྗིད་ལྡན་པའི་འཛུམ་མདངས་དེས་ངའི་ཁེར་རྐྱང་གི་འཇིག་རྟེན་དུ་དྲོད་ཁོལ་དང་འོད་ཟེར་ཡང་གནང་མི་སྲིད།
འོན་ཀྱང་། ཁྱེད་ཀྱི་ལུས་དྲོད་འདྲེས་པའི་རྡེའུ་དེ་ངས་ཉར་ཚགས་བྱས་དང་བྱེད་བཞིན་པ་མ་ཟད། ལོ་ཟླའི་འགྲོས་དང་བསྟུན་དེས་དྲན་གདུང་ལྷག་ནས་ལྷག་དུ་ཁ་སྣོན་བྱེད་ཀྱིན་འདུག
ཉིན་ཞིག། བྱམས་སྙིང་རྗེ་མེད་པའི་ལོ་ཟླས་ངའི་འཚོ་རྟེན་གྱི་ཁྲག་བསྐོལ་ནས་ཡོངས་སུ་རླངས་པར་འགྱུར་དུས། ངས་གླུ་ལེན་མྱོང་བ་དང་ངུས་མྱོང་བའི་ཡུལ་དེར་རྡེའུ་ཉར་ཚགས་བྱས་ཡོད། མི་རྣམས་ཀྱིས་ཡ་མཚན་པའི་ངང་ཤ་བལ་སྟུག་པོས་བཏུམས་པའི་དྭངས་གཙང་རྡེའུ་དེ་རྙེད་སྲིད།
ཤ་བལ་ནི། ངའི་ཟུངས་ཁྲག་ལ་བངས་བའི་ཁྱེད་ལ་སྤྲད་པའི་བརྩེ་བ། འཇམ་ཞིང་མཉེན་པའམ་སྲ་ཞིང་མཁྲེགས་ལྗང་མདོག་ལྡན་པ་དེའི་སྟེང་དུ་འོད་ཆེམ་ཆེམ་འཕྲོས་བའི་ཟིལ་ཆུའི་ཕྲ་ཚོམས་བཏབ་ཡོད།