ཨ་རིག་འགྱུར་མེད།
ང་ཡི་སྙིང་སྡུག་སྒྲོལ་མ་ཆོས་འཛོམས་ལགས། ཁྱོད་ཀྱི་ཁམས་བཟང་། ངས་ཐེངས་འགར་ལག་ཏུ་ཁ་པར་བླངས་ཏེ་ཁྱོད་ལ་ཁ་པར་ཞིག་གཏོང་བསམ་ཡང་།ད་ལྟ་ཁྱོད་རང་གཉིད་སྟུག་པོ་ཞིག་གི་གཏིང་རིམ་དུ་འཛུལ་ཏེ། གཅིག་བྱས་ན་འུ་གཉིས་མཉམ་འགྲོགས་མཉམ་འདུག་གི་འདས་སོང་གི་གཏམ་རྒྱུད་དང་། དགའ་སྤྲོས་ཁེངས་པའི་ངྷ་སའི་འཚོ་བ་རྨི་ལམ་དུ་གཏོང་གིན་ཡོད་སྲིད་ལ། གཅིག་བྱས་ན་བུ་བུ་མོས་མཐའ་ནས་བསྐོར་ཞིང་དགོད་སྒྲ་དང་བདེ་སྐྱིད་ཀྱིས་ཁེངས་པའི་འཚོ་བ་ཞིག་རྨི་བཞིན་ཡོད་ཀྱང་སྲིད་པས། ངས་ཁྱོད་ཀྱི་གཉིད་དཀྲོག་པར་མི་ནུས། གང་ལྟར་ཁྱོད་ཀྱིས་བཤད་ན་དེང་སྐབས་ཁྱོད་ཀྱི་རྨི་ལམ་དུ་ང་ཡང་ཡང་འཁོར་ཞིང་། འུ་གཉིས་ཀྱི་མ་འོངས་པ་རྟག་ཏུ་རྨིས་ཚུལ་ནི་ཁྱོད་ཀྱི་མཚན་གྱི་རྨི་ལམ་དང་ཉིན་གྱི་རེ་བ་ཡིན་ཟེར་བས། ངས་ཀྱང་དུས་རྟག་ཏུ་འུ་གཉིས་ཀྱི་མི་ཚེའི་བསམ་དོན་འགྲུབ་པའི་སྨོན་ལམ་རྒྱག་གིན་ཡོད།
དེང་སྐབས་འུ་གཉིས་འཛམ་གླིང་གི་ཤར་ནུབ་དང་རྒྱ་མཚོ་ཆེན་མོའི་ཕ་རོལ་ཚུལ་རོལ་དུ་ཡོད་སྟབས། ང་མར་ཉལ་དུས་ཁྱོད་ལངས་ནས་ལས་ཀར་འགྲོ་དགོས་ལ། ང་ཡར་ལངས་དུས་ཁྱོད་ལས་ཀ་ནས་ཕྱིར་ནང་དུ་ལོག་གིན་ཡོད། མི་ཚེའི་སྐྱིད་སྡུག་གཅིག་དང་མཛའ་བརྩེའི་དུང་བ་གཅིག་ཡིན་ནའང་། ད་ལྟའི་འུ་གཉིས་ཀྱི་ཉིན་རེའི་བྱེད་སྒོ་འདི་དག་གིས། རེས་ཀྱིས་འཁོར་བཞིན་པའི་འཁོར་བ་ངོ་མ་ཞིག་བློ་ངོར་བརྐོས་མི་ཡོང་ངམ།
རེད་ཡ། མཛའ་མོ། ད་ལྟ་ང་དེ་སྔོན་འུ་གཉིས་ཡང་ཡང་ཕྱིན་མྱོང་བའི་ངྷ་ས་མེག་གྷན་གྱི་ནོར་གླིང་ཟ་ཁང་དུ་ཡོད་ལ། ངས་ཁྱོད་རང་ཆེས་དགའ་སའི་དམིགས་བསལ་འཐེན་ཐུག་ཅིག་མངགས་ནས་སྒུག་བཞིན། སྒེའུ་ཁུང་ལས་ཕྱི་རོལ་ན་བར་མེད་དུ་རྒྱུ་བཞིན་པའི་མི་ཚོགས་ལ་ཅེར་ཡོད་མོད། སེམས་ནང་དུ་དེ་སྔོན་ཁྱོད་ཀྱིས་གནས་འདི་ནས་ང་དང་མཉམ་དུ་བཤད་མྱོང་བའི་སྙིང་གཏམ་དག་དྲན་གྱིན་འདུག འུ་གཉིས་མེག་གྷན་དུ་བསྡད་རིང་ཟ་ཁང་འདིར་ཡང་ཡང་ཡོང་སྟབས། ཟ་ཁང་འདིའི་མཁའ་དབྱིངས་དང་ཕྱོགས་བཞི་མཚམས་བརྒྱད་ན། འུ་གཉིས་ཀྱི་ལྷད་མེད་པའི་མཛའ་བརྩེ་དང་ཡིད་དུ་འོང་བའི་སྙིང་གཏམ་མང་བོ་མང་བོ་ཞིག་ལྷག་ཡོད་ཨང་།
———-ཨོ་རེད། ངས་མངགས་པའི་དམིགས་བསལ་འཐེན་ཐུག་ཁྱེར་བསླེབས་སོང་། ངས་འཐུང་གི་ཡིན།སྐབས་འདིར་འུ་གཉིས་ཀྱིས་ཁ་པར་ལས་ཁ་བརྡ་གློད་ཀྱིན་ཡོད་ཚེ་ཁྱོད་ཀྱིས་ནམ་རྒྱུན་ལྟར། ང་ལ་ཁ་པར་གྱི་སྐུད་ལམ་བརྒྱུད་ནས་ཐུག་སྐལ་ཞིག་བསྐུར་ཤོག་ལབ་ཀི་རེད། ངས་ཀྱང་ཐུག་སྐལ་བསྐུར་བཞིན་པའི་ཚུལ་གྱིས་ལག་ཁྱེར་ཁ་པར་སྟེང་འོ་དྲི་འཐིལ་བའི་ཁ་ཞིག་བསྐྱལ་ངེས། དེ་ལྟར་བྱས་རྗེས་ཁྱེད་ཀྱིས་ཡིད་ཚིམས་པའི་ཚུལ་གྱིས་༼ཐུག་པ་ཞིམ་པོ་འདུག༽ཅེས་བརྗོད་སྲིད། གཞོན་ནུའི་ལང་ཚོ་རབ་ཏུ་འབར་བའི་འུ་གཉིས་ལ་མཚོན་ན་མཆུ་དང་མཆུ་གླན་ཏེ་ཕན་ཚུལ་ལ་ཁ་སྐྱེལ་རྒྱུའི་བསྐལ་བ་ཕྲ་ཡང་། ཁ་པར་ལས་ཕན་ཚུན་ལ་ཁ་བསྐྱལ་བའི་སྒྲ་དེ་ཡང་ཅི་འདྲའི་སྙན་ཞིང་ཡང་ཡང་གོ་འདོད་པ་ཞིག་རེད་ཨང་།
གང་ལྟར་ཟ་ཁང་འདི་སྔོན་ཆད་དང་བསྡུར་ན་དེང་སྐབས་འདིའི་ནང་གི་མདུན་ཅོག་དང་འདུག་སྟེགས། ད་དུང་རྩིག་གྱང་སོགས་ཡོད་ཚད་རྙིང་བར་གྱུར་ཏེ་མདོག་ཤོར་འདུག་ཀྱང་། དེ་རིང་ངས་འཐུང་བའི་དམིགས་བསལ་འཐེན་ཐུག་གི་བྲོ་བ་སྔར་བཞིན་ཧ་ཅང་ཞིམ་པོ་འདུགའཐེན་ཐུག་ནང་དུ་ལུག་ཤ་དང་བྱ་ཤ། སྒོ་ང་བརྔོས་མ་དང་སྔོ་ཚལ། ཙོང་དང་སྲན་ཕྱུར་སོགས་ཟས་རིགས་སྣ་ཚོགས་དང་རོ་བཅུད་ཕུན་སུམ་ཚོགས་པ་ལྡན་པས་ངའི་དེ་རིང་གི་གུང་ཟས་དངོས་གནས་ཞིམ་པོ་བྱུང་། ཡིན་ནའང་། ཁྱོད་ཀྱིས་ཤེས་སམ། དེ་སྔོན་འུ་གཉིས་ཀྱིས་འདི་ནས་ཡང་ཡང་འཐུང་བའི་དམིགས་བསལ་འཐེན་ལ་ཧིན་སྒོར་ ༤༥ ཡིན་ཡང་། དེ་རིང་ཧིན་སྒོར་ ༨༠ རེད། འདི་ནི་ཁྱོད་རང་ཕར་ཕྱིན་ཏེ་ལོ་གསུམ་ལ་ཉེ་བའི་རིང་གི་ངྷ་སའི་དཔལ་འབྱོར་གནས་སྟངས་ཀྱི་འགྱུར་ལྡོག་རེད། ཁྱེད་རང་ངྷ་ས་དང་ཁ་བྲལ་ཏེ་དུས་ཡུན་ལོ་གསུམ་ལས་ཕྱིན་མེད་ཀྱང་། དུས་ཡུན་འདིའི་རིང་ངྷ་སའི་དཔལ་འབྱོར་དང་འཚོ་བའི་གནས་བབ་དངོས་གནས་ཉི་མ་རེ་རེ་དང་། དུས་ཚོད་སྐར་ཆ་རེ་རེ་བྱས་ཏེ་འགྱུར་ལྡོག་འབྱུང་བཞིན་འདུག དེང་སྐབས་ངྷ་སའི་གྲོང་ཁྱེར་གྱི་རྣམ་པ་ཡང་སྔར་དང་བསྡུར་ན་ཡར་རྒྱས་སུ་འགྲོ་བཞིན་འདུག་སྟེ། ནང་དུ་ཇ་ཁང་དང་གློག་ཀླད་ཁང་མཉམ་དུ་ཡོད་པའི་དེང་རབས་ཀྱི་ཟ་ཁང་དང་འཚིག་ཇ་ཁང་། ཕྱི་ལ་བོད་ཀྱི་ཁང་པའི་བཟོ་བཀོད་ལྡན་ཞིང་ནང་དུ་ཕྱི་གླིང་བའི་ཁྱད་ཆོས་ལྡན་པའི་ཅ་དངོས་སྣ་ཚོགས་ཀྱིས་ཁེངས་པའི་ཟ་ཁང་དང་ཚོང་ཁང་སོགས་ཀྱང་མང་བོ་འདུག ངས་ཁ་པར་ལས་ཡང་ཡང་བརྗོད་མྱོང་བ་ལྟར་ད་ལྟ་ཁྱོད་རང་ཕྱིར་ངྷ་སར་ཐེངས་ཤིག་ཡོང་ན། དོན་དག་མང་བོ་མང་བོ་ཞིག་ཁྱོད་ལ་མཚོན་ན་གསར་བ་དང་འགྱུར་ལྡོག་བྱུང་འདུག་པ་ཚོར་ཐུབ།
མཛའ་མོ། དེ་རིང་ང་གཅིག་པུ་འདིར་ཡོང་ནས་གུང་ཟས་ཟ་དོན་འུ་གཉིས་ཀྱི་སྐྱིད་ལ་སྡུག་གི་འདས་དོན་མང་བོ་ཞིག་ལ་ཕྱིར་དྲན་བྱེད་པའི་ཕྱིར་དུ་ཡིན་ལ། ཁྱོད་ང་དང་ཁ་བྲལ་ཏེ་ལོ་ཟླ་འདི་འདྲའི་མང་བོ་ཞིག་ཕྱིན་ཡང་། ལས་བྲེལ་གྱི་རྐྱེན་གྱིས་ང་ད་བར་ཟ་ཁང་འདིར་ཡོང་མ་ཐུབ་པ་རེད། དེ་ནི་ང་གསར་འགོད་པ་ཞིག་ཡིན་སྟབས་ནམ་རྒྱུན་རི་གསུམ་གྱི་རྩེ་དང་ལུང་གསུམ་གྱི་མདོ། ཡ་གའི་སྐུ་ངོ་དང་ཕ་གའི་བླ་ཆེན་དཔོན་ཆེན་ནས་མ་གའི་མང་ཚོགས་དཀྱུས་མའི་བར་དུ་བརྒྱུགས་ཏེ། ཉིན་རེ་བཞིན་བྱུང་དང་འབྱུང་བཞིན་པའི་གསར་འགྱུར་འཚོལ་བཞིན། བོད་ཀྱི་སྲིད་འབྱོར་རིག་གསུམ་ཐོག་ལོ་རྒྱུས་ཀྱི་རྐང་རྗེས་ཆུང་ཆུང་རེ་འཕབ་ཀྱིན་ཡོད་པས་དངོས་གནས་ལས་བྲེལ་ཆེན་པོ་འདུག དེང་སྐབས་ད་དུང་དྲ་རྒྱ་ཤུགས་ཆེར་དར་བའི་དབང་གིས་གསར་འགོད་པ་ཚོ་ཡང་། སྔར་ཁྱོད་འདི་རུ་ཡོད་དུས་དང་བསྡུར་ན་ལས་ཀ་ལྡབ་གཅིག་གིས་ཇེ་ལྕི་དང་ཇེ་དཀའ་རུ་གྱུར་ཏེ། ཞོགས་སྔ་ལངས་དང་དགོང་འཕྱི་ཉལ་གྱིས་ལས་ཀར་ཞུགས་དགོས་མོད། དྲ་རྒྱའི་འཇིག་རྟེན་བྱུང་བ་ནས་གསར་འགོད་པ་རྣམས་ཀྱིས་ཀློག་མཁན་ཁྲི་སྟོང་མང་བོར་བསྐྱལ་ཡོང་བའི་གསར་འགྱུར་ཡང་དེའི་ཚོད་ཀྱིས་མང་དུ་ཕྱིན་པ་དང་དུས་ཚོད་ཀྱང་ཇེ་མགྱོགས་སུ་ཕྱིན་ཏེ། དེང་སྐབས་གསར་འགོད་པ་རྣམས་དང་འཛམ་གླིང་གི་ས་ཕྱོགས་སོ་སོ་ན་ཡོད་པའི་ཀློག་མཁན་དག་གི་བར་ན་རྒྱུ་བཞིན་པ་ནི། བར་ཐག་མིན་ལ་ཡིད་ཆད་ཀྱང་མིན་པར་ཡིད་ཆེས་དང་དུང་ཞེན་ཡིན་པས། ང་སྔར་བས་ཀྱང་ལས་རིགས་འདིར་དགའ་སྣང་འཕེལ་གྱིན་པའི་སྒང་ཡིན། དེ་ནི་ཞོར་འཕྲོས་ཙམ་ཡིན།
དེ་རིང་ངས་དྲན་བཞིན་པ་འུ་གཉིས་ལྷན་དུ་ཡོད་སྐབས་ཀྱི་དགོད་སྒྲ་སྙན་མོ་དང་འོ་ཆུ་འདྲེས་པ་ལྟ་བུའི་དུང་བ་ཟབ་མོ་དེ་རེད། འུ་གཉིས་མཉམ་དུ་བསྡད་པའི་དུས་ཡུན་དེ་འདྲའི་ཐུང་ནའང་དུས་ཡུན་དེའི་ནང་ཅི་འདྲའི་སྐྱིད་སྣང་དང་བདེ་སྐྱིད་ཐུང་ཐུང་ཞིག་བྱུང་བ་མ་ཡིན་ནམ། ལྷག་པར་དུ་འུ་གཉིས་ཀྱིས་ཟ་ཁང་འདིའི་ནང་ནས་ཡང་ཡང་གླེང་མྱོང་བ་ལྟར། ཁྱོད་ང་དང་ཐོག་མར་འགྲོག་སྐབས་ཁྱོད་ཀྱི་ཡུལ་མི་གཉེན་འབྲེལ་གྱིས་ང་ལྟ་བུའི་ཨམ་ཕྲུག་ཅང་མེད་དབུལ་བོ་ཞིག་ལ་དགའ་རོགས་བསྒྲིགས་པར་བཀག་འགོག་དང་། ཨམ་མདོ་བས་རང་གི་ཆུང་མར་ཉེས་རྡུང་གཏོང་བ་དང་བྱིས་པ་བཙས་རྗེས་གཡུག་གི་རེད་ཟེར་ནས་ཁ་ལ་སློབ་གསོ་བཏང་སྟེ། ཁྱོད་རང་འུ་ཐུག་ཐབས་ཟད་ཀྱི་གནས་སུ་གྱར་ནའང་ཁྱོད་ད་དུང་ཐེ་ཚོམ་དང་འཇིགས་སྣང་སྤུ་ཙམ་ཡང་མེད་པར། ང་དང་མི་ཚེའི་དུང་བ་གཅིག་ཏུ་བརྒྱུས་ཤིང་རང་གི་ལང་ཚོ་ང་ལ་ཕུལ་ཏེ།ངའི་ཚེ་འདིའི་ཆུང་མ་བྱ་རྒྱུའི་སེམས་ཐག་བཅད་པས། ཁྱོད་ཀྱི་ཆོད་སེམས་དེ་ནི་ཅི་འདྲའི་རླབས་ཆེ་བ་ཞིག་རེད་ཨང་།ངས་དེ་དག་ལ་ཕྱིར་འདང་རེ་བརྒྱབ་ན་ང་ངོ་མ་སེམས་བསམ་པའི་སྟེང་ནས་ཁྱེད་ལ་སྤོབས་པས་ཁེངས་ཡོང་བར་མ་ཟད། ཁྱོད་ཕར་ཕྱིན་ཏེ་ལོ་ངོ་གསུམ་འདས་རིང་ཁྱོད་གནས་ལ་སློང་མཁན་གསར་བུ་གཅིག་ལས་གཅིག་རྫིག་དང་། གཅིག་ལས་གཅིག་རྒྱུ་དང་འབྱོར་བ་རྒྱས་ཤིང་ཐོབ་དང་གོ་ས་ཡོད་མཁན་རྐྱང་ཡོང་ནའང་། ཁྱོད་ཀྱིས་དང་ལེན་མ་བྱས་པར་མ་ཟད། ལོ་ངོ་གསུམ་གྱི་རིང་འདིར་ཁྱོད་ཀྱི་རྒས་ཤིང་འཁོགས་པའི་ཕ་མ་གཉིས་དང་ཡུལ་མི་གཉེན་ཚན་དག་གི་སྡིག་དམོད་དང་། མི་ཁ་གྲངས་མེད་ལ་གདོང་གཏད་དེ་རང་གི་མི་ཚེ་འདིར་རང་ཉིད་ཆེས་དགའ་སའི་མི་ནི། ད་གཟོད་རང་ཉིད་ལ་བདེ་སྐྱིད་སྟེར་མཁན་དང་། རང་ཉིད་ཀྱིས་ཆེས་བློས་འགེལ་ཐུབ་པའི་མི་ནི། ནམ་ཡིན་རུང་རང་ཉིད་མི་བསླུ་མཁན་ཡིན་པར་འདོད་པའི་འགྱུར་མེད་རྟག་བརྟན་གྱི་མཛའ་བརྩེ་ཟབ་མོ་དེ་ནི་འུ་གཉིས་ཀྱི་ལྷད་མེད་པའི་བརྩེ་དུང་གི་རྩ་བ་ཇེ་བརྟན་དང་། མི་ཚེ་གཅིག་མཉམ་སྐྱིད་མཉམ་སྡུག་གིས་སྐྱེལ་རྒྱུའི་རྨང་གཞི་ཁོ་ན་རུ་འགྱུར་གྱིན་པ་མིན་ནམ།
གང་ལྟར་ཁྱོད་ཁོ་ནུའི་འགྱུར་མེད་རྟག་བརྟན་གྱི་བརྩེ་དུང་དང་། འདས་པའི་ལོ་ངོ་འདི་འགར་དཀའ་སྡུག་གྲངས་མེད་ལ་གདོང་གཏད་པའི་འབྲས་བུར། ད་ལྟ་འུ་གཉིས་ལ་དྲིན་ཕ་མ་གཉིས་དང་གཉེན་ཉེ་ཚན་གྱིས་རྒྱབ་སྐྱོར་ཐོབ་པའི་དེ་རིང་གི་ཉི་མ་འདི་བྱུང་ཐོག ཁྱོད་ཀྱི་ཕ་མ་གཉིས་ཀྱིས་ཡང་ནས་ཡང་དུ་འུ་གཉིས་གང་མགྱོགས་སྒོས་ཁྱིམ་གཅིག་ཏུ་བསྡད་དེ། བུ་བུ་མོ་འགའ་སྐྱེས་སོང་ན་ཁོང་བགྲེས་སོང་གཉིས་ཀྱི་ཚེ་མཇུག་གི་རེ་བ་དེ་ཡིན་སྐོར་གསུངས་དུས། ངའི་ཤ་གསེང་རུས་རྐང་ལ་བྲེལ་བ་ལངས་ཡོང་བར་མ་ཟད། ཁོང་བགྲེས་སོང་གཉིས་ཀྱི་ཚེ་མཇུག་གི་རེ་འདུན་བསྒྲུབ་རྒྱུར་འཚུབ་ཆ་ལངས་ཡོང་།
འོན་ཀྱང་དེང་སྐབས་ཁྱོད་བོད་སྐད་མི་ཤེས་ཤིང་བོད་དྲི་མི་བྲོ་བའི་ཕྱི་གླིང་བའི་མི་རིགས་རྐྱང་དང་མཉམ་དུ་གནས་པ་དང་། འུ་གཉིས་ཀྱི་སང་ཉིན་དང་མ་འོངས་པའི་ཆེད་དུ་ཉིན་གྱི་ཟས་དང་མཚན་གྱི་གཉིད་བཅགས་ཏེ་དཀའ་ལས་རྒྱག་བཞིན་པར་བསམ་དུས་ངའི་སྙིང་ཡང་ཁ་རུ་འཚང་ཡོང་ལ། གལ་སྲིད་ཐོག་མར་ཨ་རིར་འགྲོ་མཁན་དེ་ཁྱོད་མིན་པར་ང་ཡིན་པ་དང་། འུ་གཉིས་ཀྱི་ཆེད་དུ་དཀའ་སྡུག་གྲངས་མེད་མྱོང་མཁན་དེ་ཁྱོད་མིན་པར་ང་ཡིན་ན་ཅི་མ་རུང་སྙམ་མོད། ཐོད་པའི་ཁ་ཡིག་གི་རི་མོ་མི་གཅིག་པའི་དབང་གིས་ཚེ་སྟོད་འདིར་ངའི་ཆེད་དུ་དཀའ་སྡུག་མྱོང་མཁན་ཁྱོད་རེད་ལ། འུ་གཉིས་ཀྱི་མ་འོངས་པའི་བདེ་སྐྱིད་ཀྱི་ཆེད་དུ་གཞོན་དུས་ཀྱི་ལང་ཚོ་དཀའ་སྡུག་གི་ལོ་ཟླའི་ཁྲོད་བསྟིམ་མཁན་ཡང་ཁྱོད་ཆགས་སོང་བས་འཁང་ར་སྐྱེས་ཀྱང་ཅི་བྱ། ཡང་གཅིག་བཤད་ན་འདི་ནི་ཁྱོད་དང་ང་ཁོ་ནའི་སྐྱོ་གར་མིན་པར་དུས་རབས་གཉེར་གཅིག་པའི་མགོ་ནག་བོད་པ་ཡོངས་ཀྱི་སྐྱོ་གར་ཡིན་པས། འུ་གཉིས་གཅིག་པུས་སྡུག་འདི་མི་འཁུར་རང་འཁུར་མ་ཡིན་ནམ།
རེད་ཡ། ངའི་དམར་ཆུང་སེམས་པ་ལྟ་བུའི་མཛའ་མོ། སྐབས་འདིར་བསླེབས་སྐབས་འུ་གཉིས་ཀྱིས་མུ་མཐུད་དེ་དོན་དག་སྡུག་ས་རུ་བསམ་བློ་མི་གཏོང་བར། དོན་དག་ལེགས་པོ་ཞིག་ལ་འདང་རྒྱག དཔེར་ན། ངས་སེམས་བསམ་པའི་སྟེང་ནས་ཁྱོད་དྲན་སྟངས་ཤིག་ཨ་མདོའི་ལ་གཞས་ཤིག་ཏུ་དབྱངས་ལ་བཀུག་ན་འདི་ལྟ་སྟེ།
རོགས་དྲན་གི་ལོ་རབས་མི་བཤད། །
རོགས་དྲན་གི་ལོ་རབས་བཤད་ན། །
རོགས་རིག་འདྲ་རིག་ན་དྲན་གི །
ཚིག་རིག་འདྲ་གོ་ན་རྨོངས་ཀི །
ཞེས་པ་དང་ཨ་ན་མ་ན་རེད། གང་ལྟར་ངས་ཁྱོད་ལ་བརྗོད་འདོད་པའི་དོན་དག་མོད་པོ་ཞིག་གིས་ཡ་ཆུང་ཁར་བཙང་ཡོང་ནའང་། ཤོག་སྨུག་ཟད་པའི་རྒྱུ་ཙམ་ལས་ངས་དྲན་པའི་སྡུག་བསྔལ་ལ་བསང་མཐའ་མེད་པས་ན། འཕྲིན་ཡིག་འདི་འབྲི་མཚམས་འདི་ནས་བཞག་སྟེ། འུ་གཉིས་མཉམ་འཛོམས་ཀྱི་ཉི་མ་མྱུར་ཏུ་འཆར་བའི་སྨོན་ལམ་འདེབས། མཇུག་མཐར་ངས་ཁྱོད་ལ་བཤད་འདོད་པ་ནི། ད་ལྟ་ས་དེ་རུ་ཁྱོད་གཅིག་པུ་ཡིན་པས་དུས་རྒྱུན་ཕྱི་ལ་འགྲོ་དུས་གྱོན་པ་མཐུག་ཙམ་གྱོན་རྒྱུ་མ་བརྗེད་ལ། ཟ་མ་དུས་ལྟར་ཟ་བ་དང་གཉིད་དུས་ལྟར་ཁུག་པ།
རང་གི་ལུས་ཕུང་ལ་གཅེས་སྤྲས་བྱེད་རྒྱུ་བཅས་མ་བརྗེད་རོགས། ད་ལྟའི་དུས་འདིར་ཅིས་ཀྱང་ཁྱོད་ཀྱི་ལུས་ཕུང་བདེ་ཐང་ངང་གནས་རྒྱུ་གལ་ཆེ། ཨེ་གོ
ཁྱེད་ཀྱིས་དགའ་བོ་ཨ་རིག་འགྱུར་མེད་ཀྱིས་བྱང་ཕྱོགས་ངྷ་ས་ནས་ ༢༠༡༡ ལོའི་ཟླ་ ༢ ཚེས་ ༤ ཉིན་བྲིས་ཏེ་ཕུལ་ལོ། །
༼ སེམས་འཕྲིན་དངོས་བྲིས་མ་ ༽ ནི་སྙིང་གི་ཚི་ལུའི་མཛའ་འཕྲིན་འགྲན་བསྡུར་ཆེད་བྲིས་པ་ཡིན་མོད། ངའི་རྩོམ་ཡིག་འདི་རྟ་མཆོག་ཅིག་ན་རྟ་ཕོའི་བང་རྩལ་འགྲན་ས་ནས་ཕམ་སྟེ་སྟོད་ཀྱི་བྱང་ལམ་མ་ཆོད་མོད། རྩོམ་ཡིག་འདི་བྲིས་ཏེ་ཉིན་བཅུ་ཕྱིན་པའི་དེ་རིང་ནི་དགའ་བོའི་དུས་ཆེན་གྱི་ཉིན་མོ་ཡིན་པས་ཁོ་མོར་སྤྲིངས་པའི་འཕྲིན་དང་། དགའ་བོའི་དུས་ཆེན་ལ་རྟེན་འབྲེལ་ཞུ་ཆེད་དུ་ཕུལ་ན་འགྲིག་སྙམ། །)
དྲྭ་གྲོགས་འགྱུར་མེད་ལེགས། བརྩེ་འཕྲིན་ཡིད་དབང་འཕྲོག་པ་ཞིག་བྲིས་འདུག བཅོས་སྒྲུང་ངམ་རྟོག་བཏགས་ལས་བརྒལ་བའི་འཕྲིན་པ་དམར་པོ་འདིས། རེ་སྒུག་གིས་མནན་པའི་ངའི་ལས་དབང་ལའང་གདོང་ཐུག་རྒྱབ། རྒྱུ་མཚན་ནིན། ལོ་ཟླའི་འཕྲེང་ཚོགས་ཀྱི་འགྱུ་བ་རིང་མོས་ང་དང་ངའི་མཛའ་མོའི་རྒྱང་ཐག་བཅད་དེ་ཟླ་གཅིག་དང་ཉིན་གསུམ་མ་གཏོགས་ལོ་ངོ་གསུམ་ཏག་ཏག་ཕྱིན་སོང་། ང་ཡང་འདི་ལྟར་བརྩེ་དུང་དང་རེ་སྒུག་གིས་བཟི་བའི་རྨི་ལམ་ནང་དུ་་ཡོད།
བརྩེ་གདུང་མཐའ་ཁྱོལ་བ་བྱ་དགོས་ཨ་གསར་ཅན་ལ་བུ་མོས་མིག་ལོག་ལྟ།
ཚེ་རིང་ནད་མེད་བདེ་སྐྱིད་ཤོག
བཟང་གི དེང་སང་བོད་པ་ཚོས་མི་རིགས་གཞན་དང་གཉེན་སྒྲིག་བྱེད་པ་མང་གི་ཡོད། དེས་ན་ཧ་ཅང་ལེགས་པོ་རེད།
ད་ལྟ་དེ་འདྲ་ཟེར་བ་མང་པོ་ཡོད་རེད།
ལོ་ཆུང་བ་དང་ཉམས་མྱོང་པེད་པ་རེད
ཉི་མ་གཅིག་ངོ་མ་ལོ་ཤས་ལ་མཉམ་དུ་འདུག་དང་སྐད་ཆ་དེ་ཚོ་དྲན་པ་བརྗེད་འགྲོ་གི་ཡུམ་མ་རེད་ན་ཨེ་གོ།
་ཧ་་ཧ་ཧ་ཧ
གོང་གི་འབྲི་མཁན་འདིས་ཁ་སྔོན་ཞིག་ལ་ཆགས་པ་སྤྱོད་སྟངས་ཀྱི་དེབ་བྲིས་བ་རེད་ཟེར། ད་འདི་འདྲ་ཞིག་ཡིན་ན། འདིས་བུ་མོར་ཞེ་དྲག་རྒྱུས་མེད་པའམ། བུ་མོར་དགའ་མ་ཤེས་པའམ། བུ་མོའི་འཇིག་རྟེན་ནི་ཁོང་གི་ཆུང་ཆུང་སྐབས་ནས་ཡོད་པའི་རྟོག་བཟོ་དེ་འདྲ་ཞིག་ན་ད་དུང་ཡང་སྡོད་ཀྱི་ཡོད་པར་སེམས་ལ། དེབ་དེའི་ནང་གི་མཐོང་ཐོས་དེ་ཚོ་ཕལ་ཆེར་བརྙན་འཕྲིན་ལ་ལྟོས་ཏེ་བྲིས་བ་མིན་འགྲོ་བསམ་པ་ཞིག་ཡོད་རེད། གང་ལྟར་བརྩེ་དུང་ཟེར་བ་དང་བརྩེ་འཕྲིན་ཟེར་བ་དེ་ཁ་ལག་གཉིས་ནས་ཕྱིར་བཏོན་ས་འགྲོ་བའམ། ཕྱོགས་ཙམ་རེར་བཏོན་ཐུབ་པ་ཡིན་ན། འདི་འདྲ་ཞིག་ནམ་ཡང་ཡིན་ཚོད་མིན་པར་འདོད།