ཐུབ་བསྟན་ཀུན་གྲོལ།
ཀ་དག་སྤྲོས་པ་བྲལ་བའི་ཆོས་དབྱིངས་ལས།།
བྱམས་བརྩེའི་སྣང་བས་འགྲོ་ལ་རྟག་འཁྱུད་ཅིང་།།
གཞན་དོན་སྐུ་བཞི་མངའ་བའི་གཟི་བྱིན་ཅན།།
འདྲེན་མཆོག་ཤཱཀྱའི་སྲས་པོར་གུས་པས་འདུད།།
གང་གི་གསང་གསུམ་ཉིན་བྱེད་རླབས་པོ་ཆེ།།
མི་མཐུན་ཆུ་འཛིན་ཕྱོགས་ཀྱིས་མ་སྒྲིབ་པར།།
ཇི་བཞིན་ཤར་ནས་ཞི་བའི་པད་མོ་ཡིས།།
འགྲོ་ཁམས་དགེ་ལེགས་ཕྱེ་བའི་གངས་ཀྱི་ཡུལ།།
ཇི་ལྟར་ཆགས་ཤིང་ཆགས་ནས་དར་བའི་ཚུལ།།
མེས་པོའི་གླེགས་བམ་གསེབ་ཏུ་གསལ་བ་ན།།
འདི་རུ་མི་བཤད་བཤད་ཀྱང་བཟློས་པའི་ཕྱིར།།
སྐབས་སུ་གླེང་བ་བྱ་བའི་ཆོས་དེ་མིན།།
རྐང་གཉིས་མི་ཡུལ་ཞིང་འདིར་སྤོས་པ་ནས།།
མིག་གཉིས་ཁ་བའི་ཡུལ་ན་བལྟས་པ་ནས།།
བརྩེ་སེམས་གསེར་གྱི་མེ་ཏོག་ཆུན་པོ་གང་།།
ཁ་བའི་ཡུལ་ལ་ང་དང་ཁྱོད་ཀྱིས་ཕུལ།།
ཁྱད་པར་དབྲ་ཡི་རུས་སུ་གཏོགས་པ་ཡི།།
ལོ་རྒྱུས་སྒོ་མོ་ཕྱེ་བའི་ལེགས་བཤད་ལ།།
དགའ་སྤྲོའི་རླུང་གིས་སེམས་པ་རབ་གཡོས་ཏེ།།
རླབས་ཀྱི་ཕྲེང་བ་མགྲིན་པའི་ཁབ་ནས་འཕོས།།
རིགས་ཀྱི་ལོ་རྒྱུས་བདེན་པ་མ་ཤེས་ན།།
ནགས་ཁྲོད་སྤྲེལ་དང་འདྲ་ཞེས་མཁས་པས་བཤད།།
དེ་ཕྱིར་ལོ་རྒྱུས་རིག་པའི་གཞུང་བཟང་ལ།།
ང་དང་ཁྱོད་ཀྱིས་བསླབ་དགོས་འགན་འཁྲི་ཡིན།།
ཤེས་ཀྱང་ལྷག་བསམ་གསེར་གྱི་རྒྱུན་ཐག་ལ།།
རིགས་དང་རིག་གཞུང་བརྒྱུས་པ་མེད་གྱུར་ན།།
ནེ་ཙོས་མ་ཎི་བགྲང་བའི་ངང་ཚུལ་ལས།།
དེ་ལ་ཕན་འབྲས་ཆུང་བར་དམ་པས་གསུངས།།
དེ་ཕྱིར་རིགས་གཅིག་ཁ་བའི་མིང་སྲིང་དང་།།
ཁྱད་པར་སྦྲ་ཚང་རུས་སུ་གཏོགས་པ་ལ།།
མཐུན་ལམ་གསེར་གྱི་སྐེ་རགས་དམ་དགོས་ཞེས།།
བཅོས་མིན་སེམས་ཀྱི་ཀློང་ནས་སྐད་འདི་ཕུལ།།
མུ་ཁྱུད་ཁ་བ་དཀར་པོས་བསྐོར་བའི་ཞིང་།།
ལས་ཀྱི་འཕོངས་པའི་ང་དང་ཁྱོད་ཀྱི་འགན།།
འདི་ལྟར་ཡིན་ཞེས་སྟག་དགོན་ཡུལ་ཕྱོགས་ནས།།
ཕན་དང་བརྩེ་བའི་སེམས་པས་སྐད་འདི་ཐལ།།
རྒྱལ་བསྟན་ཉི་མའི་འོད་སྣང་འཕྲོས་པ་ལས།།
འགྲོ་ཁམས་བདེ་བའི་པད་མོ་རྟག་བཞད་ཅིང་།།
དགའ་སྤྲོའི་ཆོས་ཀྱི་ཟེའུ་འབྲུ་ལ་སྤྱད་ནས།།
མི་མཐུན་རྒུད་པའི་སྒྲ་ཙམ་མེད་པར་ཤོག།
མདོར་ན་སངས་རྒྱས་བསྟན་པ་དར་བར་ཤོག།
དེ་འཛིན་བྱེད་པོའི་སྐུ་ཚེ་བརྟན་པར་ཤོག།
རྒྱལ་ཁམས་ནད་མུག་འཁྲུག་རྩོད་ཞི་བར་ཤོག།
ཁྱད་པར་ཡུལ་འདི་བདེ་ཞིང་སྐྱིད་པར་ཤོག།
2016/12/4/ཉིན།