གྲིབ་གཟུགས།
ཉི་ཟླའི་སྣང་བར་འགྲན་པའི་གློག་འཕྲུལ་གྱི་འོད་སྣང་།།
ས་སྟེང་སྐྱེ་རྒུའི་འཚོ་བའི་བརྟེན་གཞི་རུ་གྱུར་ཚེ།།
འདི་ཕྱིའི་དོན་ལ་སེམས་པའི་དུས་མཐའ་ཡི་དགེ་སྦྱོང་།།
འཇིག་རྟེན་གཉིས་ཀྱི་མཚམས་ན་ཐོ་ཡོར་བཞིན་འགྲེང་འདུག།
ཆོས་བརྒྱད་ཆགས་སྡང་གཏམ་གྱི་བཟི་ཁ་དེ་བཙན་ཞིང་།།
འདོད་ཡོན་དོན་གྱི་བུ་མོའི་འཛུམ་བག་ལ་ཆགས་བཞིན།།
ལ་ཁའི་དར་ལྕོག་དང་མཚུངས་ལྡོམ་པོ་ཡི་སེམས་པས།།
ཞི་བའི་ཡོན་ཏན་ཚོན་པོ་ཞེ་གཏིང་ནས་བརྗེད་ཐལ།།
གཞན་གྱི་དགོད་སྒྲར་དགའ་བའི་སེམས་དཔའ་ཡི་ངང་ཚུལ།།
གཞན་གྱི་མིག་ཆུ་འབྱིད་པའི་རྒྱལ་སྲས་ཀྱི་བྱ་བ།།
འདི་དག་སེམས་ན་དྲན་ཚེ་བདེ་སྣང་ཞིག་འདུག་ཀྱང་།།
ལག་ལེན་དངོས་སུ་བགྱི་བའི་ས་ཐག་དེ་འགྱང་འདུག།
ཆོས་གོས་སེར་པོའི་འོད་མདངས་མཚམས་སྤྲིན་ལ་འགྲན་ཅིང་།།
མགོ་སྐྱེས་སྐྲ་ལོ་སྤུ་གྲིའི་ཁ་ཟས་ལ་སྦྱིན་ཀྱང་།།
འདུལ་ཁྲིམས་ཚུལ་བཞིན་བསྲུང་བའི་ངེས་བྱུང་གི་བསམ་བློ།།
གོ་མེད་ཚོར་མེད་ངང་ནས་རང་ཡལ་དུ་བུད་འདུག།
ཁ་ཏིག་མངར་སྐྱུར་ལན་ཚྭའི་དཀོར་ཟས་ལ་སྤྱོད་བཞིན།།
ཡ་ཐོད་གཉེར་རིས་ཐོས་བསམ་ལོ་ཟླའི་ཁྲོད་བརྐོས་ནའང་།།
གནས་ལུགས་ཁོང་དུ་སྦས་པའི་གླེག་བམ་གྱི་གསེང་ན།།
སེམས་པ་བརྟན་པའི་གོམས་གཤིས་སྔ་ས་ནས་བོར་སོང་།།
ཐག་རིང་རྒྱང་ནས་བསྲིངས་པའི་ཕ་མ་ཡི་སྤྱན་ཟུང་།།
བཟང་ས་འཚོལ་ཞིང་སྡུད་པ་བུ་ཆུང་གི་འགུལ་སྐྱོད།།
ཡོད་ཚད་གྲུབ་ཏུ་མེད་ཀྱང་རེ་འབྲས་ལ་དམིགས་ཚུལ།།
བསམས་ན་རང་གིས་རང་ལ་ཡི་ཐང་ཞིག་ཆད་ཀྱི།།
རེ་བ་གོར་མོ་འདི་ཡི་ཕ་མཐའ་རུ་འཁོར་ནས།།
མ་འོང་མདུན་ལམ་ཟེར་བ་སྙིང་དབུས་སུ་བསྒོམས་ནས།།
མི་ཚེའི་ཕུགས་བསམ་བསྙེགས་པའི་གོམ་ཁ་དེ་བརྗིད་ཀྱང་།།
བཤུལ་རིང་ངལ་བ་བཟོད་པའི་སྙིང་སྟོབས་ཀྱིས་ཕོངས་འདུག།
མ་བཅོས་བཅོས་བཟོ་བྲལ་བའི་ཟོལ་མེད་ཀྱི་སེམས་པ།།
དགའ་བ་མངོན་པར་གསལ་བའི་ལྷད་མེད་ཀྱི་འཛུམ་མདངས།།
ན་ཚོད་རྒས་ལ་སྦྱོར་ཚེ་རང་ཤུགས་ཀྱིས་ཡལ་བ།།
མི་ཡི་མི་ཚེའི་གྲུབ་དོན་བཅོས་མ་ཡི་འཇིག་རྟེན།།
མངོན་ལྐོག་མེད་པའི་སྐད་ཆ་འགའ་བཤད་འདུག ཡི་རངས་ཡོད།
འགྲོ་ལ་ཕན་པའི་ཕྱིར་དུ་སངས་རྒྱས་དེ་འགྲུབ་མིན།།
རང་གིས་རང་ལ་བརྟགས་ན་མངོན་སུམ་གྱི་ལོས་ཤེས།། །།