ཨ་རིག་དགེ་མཐོང་།
དེང་སང་གི་དུས་རབས་གསར་བའམ་བདུན་གསུམ་ཉེར་གཅིག་གི་ནང་དུ་བརྡ་འཕྲིན་དང་ཚན་རིག་དར་རྒྱས་ཕྱིན་ཏེ་སའི་གོ་ལ་ཟླུམ་པོ་འདི་ཇེ་ཆུང་དུ་འགྲོ་བཞིན་པ་དང་། ལག་འཕྲིན་ཁ་པར་དང་གློག་ཀླད་དམ་བརྩིས་འཁོར་དམངས་ཁྲོད་ཀྱི་མི་རྣམས་ཀྱིས་བཀོལ་སྤྱོད་བཏང་བ་ལ་བརྟེན། ཤར་ནུབ་ཀྱི་རྒྱལ་ཁབ་གང་ཞིག་གི་མི་དང་ཐད་ཀར་འབྲེལ་འདྲིས་དང་ཁོར་ཡུག་གི་གནས་སྟངས་བཅས་རྒྱུས་ཡོད་དུ་གྱུར། ལྷག་པར་སྟོང་ལོ་བཅུ་གཉིས་ནས་བཟུང་ཡི་གེ་འབྲི་མི་དགོས་པ་སྐད་ཆ་བཀོལ་སྤྱོད་ཀྱིས་ཕན་ཚུན་ལ་འབྲེལ་བ་ཁ་རུ་ཁ་ཐུག་བྱེད་ཐུབ་པའི་༼ Wechat ༽སྐད་འཕྲིན་འདི་རྒྱལ་སྤྱི་དང་ལྷག་པར་བོད་ཀྱི་སྤྱི་ཚོགས་སུ་ཡང་དར་ཁྱབ་ཕྱིན། དེ་ལ་བརྟེན་ནས་གནས་ཚུལ་འདྲ་མིན་དང་དོན་རྐྱེན་གང་མང་བྱུང་། མདོར་ན། འདི་ལ་ལེགས་པའི་ཆ་དང་ཉེས་པའི་ཆ་ཟུང་འབྲེལ་ཡིན་པ་བཤད་མི་དགོས་པ་ཞིག་རེད། གཙོ་བོ་རང་ཉིད་ཀྱིས་བཀོལ་སྤྱོད་བྱེད་སྟངས་དང་དུས་ཚོད་དམ་འཛིན་བྱེད་ཐུབ་མིན་ལ་རག་ལས་ཡོད། དེ་ནི་བརྡ་འཕྲིན་ཀུན་ལ་མཚུངས། དེས་ན་གཤམ་དུ་ལེགས་ཉེས་ཀྱི་ཆ་གཉིས་ལས་འདིར་བདག་གིས་ལེགས་པའི་ཕྱོགས་མི་གླེང་བར་ཉེས་པའི་ཐད་ནས་ཏོག་ཙམ་ཞུ།
མི་རིགས་སྤྱི་ལ་འཕྲད་པའི་དཀའ་ངལ།
བོད་མི་རིགས་ལ་མཚོན་ན་ཡིག་རྨོངས་པའི་གྲངས་ཚད་མང་བའི་སྟེང་དུ་སྐད་འཕྲིན་དར་ཁྱབ་ཕྱིན་པ་ལ་བརྟེན་ཡི་གེ་ལ་དོ་སྣང་བྱེད་མཁན་ཇེ་ཉུང་དུ་སོང་། མ་ཟད་ནང་བསྟན་གཞུང་ལུགས་ལ་ཉིན་མཚན་སློབ་སྦྱོང་གནང་གིན་ཡོད་པའི་མགོ་དགེ་བཤེས་ནས་མཇུག་བསྡུས་གྲྭའི་གྲྭ་ཕྲུག་ཚུན་ཆད་ཀྱིས་སྐད་འཕྲིན་བེད་སྤྱད་པས་སྦྱོང་གཉེར་གྱི་དུས་ཚོད་འཕྲོ་བརླག་ཏུ་ཉིན་དང་ཟླ་རེར་འགྲོ་བཞིན་ཡོད། ད་དུང་སློབ་མའི་སྡེ་ནས་ཉིན་རེའི་སློབ་ཚན་དག་འབྲི་མ་ཐུབ་པར་ལྷག་པ་དང་། ནང་སྦྱོང་འཐུས་ཤོར་སོང་བ། ལས་བྱེད་དག་གིས་ཀྱང་རང་གི་འགན་འཁྲི་དུས་ལྟར་བསྒྲུབ་མ་ཐུབ་པའི་དཀའ་ངལ་ཅིག་དང་། ཆུང་བྱིས་པ་ནས་བཟུང་རྒན་མགོ་དཀར་དབར་གྱི་གསལ་ཞིང་དྭངས་པའི་མིག་ཟུང་དང་ལུས་ཕུང་ལ་གནོད་འཚེ་ཐེབས་པ། ནང་མི་དང་གྲོགས་ཀྱི་ཚོགས་དང་ལྷན་འཛོམས་བྱུང་ཡང་ཚོར་སྣང་མེད་པར་རང་རང་ས་ནས་ཟ་འཐུང་ཙམ་གྱི་རྗེས་ཁ་བརྡ་མེད་པ། མཛའ་ཞིང་སྙིང་ནས་བརྩེ་བའི་རང་གི་དགའ་རོགས་དབར་དུ་འགལ་ཟླ་ཤོར་བ། ཕན་ཚུན་ལ་འགན་འཁུར་མེད་པའི་སྒོ་ནས་བསླུ་བྲིད་ཀྱི་སྐད་ཆ་གང་མང་བཤད་པ་ལ་བརྟེན་གནས་སྐབས་ཀྱིས་ཚོར་འདུ་ཙམ་གྱིས་ཚེ་གཅིག་གི་མཛའ་གྲོགས་ལ་ཕོག་ཐུག་བཏང་སྟེ་ཁ་ཁར་འགྲོ་དགོས་པའི་གནས་ཚུལ་སོགས་འབྱུང་དང་བྱུང་ཟིན་ཡོད། ད་དུང་གྲྭ་བ་ཚོར་མཚོན་ན་ལུས་ངག་ཡིད་གསུམ་གྱི་སྒོ་ནས་ཉེས་བྱས་ཆར་ལྟར་འབྱུང་བའི་རྒྱུ་རྐྱེན་ཅིག་དང་། མིང་རྫུན་གྱི་ཕག་ཏུ་ཡིབ་སྟེ་འཁྲིག་ཚིག་སོགས་ཀྱི་མཚོན་ཚིག་ངན་གང་མང་བཤད་པ་དང་། མི་གཞན་གྱི་མི་གཞི་དང་བཅས་པར་དོན་མེད་སྐྱོན་བརྗོད་དང་ཤེས་ཡོན་པ་ཚོ་ལ་བསམ་བཞིན་སྙད་རྐོ་བ་དང་གསེག་འདྲུ་བ། སྐད་འཕྲིན་གྱི་མགོའི་པར་རིས་ལ་བུ་མོའི་འདྲ་པར་བཞག་སྟེ་འཕྲིན་ཡིག་འདྲ་མིན་གཏོང་བ་སོགས་ཆོས་འཇིག་རྟེན་གཉིས་ཀྱི་ཁྲིམས་ལུགས་དང་མི་མཐུན་པའི་རིགས་གང་མང་མང་ཞིག་ཡོད། དཔེར་ན། གང་ཟག་སྒེར་གྱི་གནད་དོན་ཆུང་ཚེག་རིགས་བྱུང་ཚེ་དེ་རྒྱུ་མཚན་དུ་བྱས་ཏེ་མི་དེའི་མིང་དང་ཕ་ཡུལ་བཅས་བཀོད་དེ་སྐད་འཕྲིན་བརྒྱུད་མ་ཉེས་ཁག་གཡོག་གང་མང་མང་བྱེད་ཀྱིན་པའི་གནས་ཚུལ་ཁོ་བོས་དངོས་སུ་མཐོང་། ད་དུང་བཟའ་ཚང་ཁ་ཁར་སོང་བ་དང་། དགེ་རྒན་གྱིས་དགེ་ཕྲུག་ལ་དེ་བཀོལ་སྤྱོད་གཏོང་མ་བཅུག་པས་དགེ་ཕྲུག་དགེ་རྒན་ཤག་ནས་བྲོས་པ་སོགས་ཀྱི་གནད་དོན་ཡང་བྱུང་ཡོད། ཕ་ཡུལ་གཅིག་པ་རེ་ལ་ཚོགས་པ་རེ་བཟོས་ཡོད་ལ།ཐོག་མར་འཚམས་འདྲི་བཀྲ་ཤིས་བདེ་ལེགས་དང་མཇུག་ཏུ་ཁྱེད་ངན་ང་བཟང་རབས་ཀྱི་ཁ་འཛང་བྱུང་བ་དངོས་སུ་མཐོང་། དེ་བཞིན་འཛིན་གྲོགས་དང་སློབ་གྲོགས་ཚང་མས་ཚོགས་སྡེ་བཙུགས་པ་ལ་གོང་བཞིན་གྱི་གནས་ཚུལ་དེ་རིགས་རྒྱུན་ལྡན་དུ་གྱུར། མ་ཟད་ཁྱིམ་མིའི་གསང་བ་ནས་མི་སྒེར་གྱི་གསང་བ། སྡེ་བའི་གསང་བ་བཅས་ཕྱོགས་གང་སར་ཁྱབ་བརྡལ་དུ་འགྲོ་བྱེད་ཀྱི་རྒྱུ་རུ་གྱུར་ཡོད། དཔེར་ན། མདོ་སྨད་རྨ་ཆུའི་ས་ཁུལ་གྱི་བྱིས་པ་ཡོད་པའི་འབྲོག་མོ་ཞིག་དང་ཕོ་གསར་གཉིས་ཀྱིས་ཁ་བརྡ་བྱས་ཏེ་ཕན་ཚུན་ལ་སྙིང་གཏམ་བཤད་པ་དག་ཕོ་གསར་དེས་གང་སར་བསྒྲགས་པས་ད་ལྟ་སྟོད་རྒྱ་གར་དང་སྨད་རྒྱ་ནག་གཉིས་ཀྱི་མི་སྒེར་གྱི་སྐད་འཕྲིན་དུ་ཁྱབ་འདུག་པ་དེའོ། ། མ་ཟད་ཕ་ཡུལ་གསེར་རྟ་ནས་ཡིན་པ་ཞིག་ལ་གོང་བཞིན་གྱི་གནས་ཚུལ་དེ་འདྲ་ཞིག་བྱུང་འདུག་པ་སོགས་མང་། མཐའ་ན་སྐད་འཕྲིན་ལ་དབྱིངས་འཕར་ཏེ་ཉིན་མཚན་མེད་པར་ཁ་བརྡ་བྱེད་པ་དང་། དེ་ནས་ལམ་ཁ་སོགས་ནས་ཉན་ཏེ་རླངས་འཁོར་བརྡབས་སྐྱོན་གྱིས་ཚེ་སྲོག་ཤོར་བ་སོགས་བདག་གིས་དངོས་སུ་མཐོང་བ་དང་ཐོས་པ་གང་མང་མང་ཞིག་ཡོད་ཀྱང་ཡིག་ཚོགས་ལ་དོགས་ཏེ་འདིར་སྨོས་མེད།
གང་ཟག་སྒེར་ལ་འཕྲད་པའི་དཀའ་ངལ།
ང་རང་གཙོས་གང་ཟག་སྒེར་བ་དག་ལ་ཡང་དཀའ་ངལ་མི་དགོས་ས་ནས་མང་བོ་ཞིག་འཕྲད་ཡོད་དེ། དཔེར་ན།དོན་མེད་དུ་ལས་ཀ་གང་མང་ཞིག་མགོ་ལ་བཞག་ཡོང་བ་དང་། ལྷག་པར་དུས་ལྟར་ལན་འབུལ་མ་ཐུབ་པས་ཁག་ཅིག་སྐུ་རླུང་བཞེངས་ཏེ་ངའི་མི་གཞི་དང་བཅས་པར་དམའ་འབེབས་བྱེད་ཀྱིན་འདུག་ལ། དུས་ཚོད་ཡོད་མེད་དང་སྟབས་བདེ་མིན་སོགས་ལ་བསམ་བློ་ཡེ་ནས་མི་གཏོང་བར་ཁོ་རང་ལ་དུས་ལྟར་ལན་སྟེར་མ་ཐུབ་པ་རྒྱུ་མཚན་དུ་བགྲང་སྟེ་སྐད་འཕྲིན་ནས་ཕྱིར་འབུད་མཁན་ཡང་འདུག སྤྱིར་བཏང་ཁོ་རང་སྒེར་བ་ཞིག་ཕྱིར་བུད་པ་ཙམ་གྱིས་ང་ལ་དམིགས་བསལ་གྱི་ཁེ་གྱོང་ཞིག་མི་འདུག་མོད། དོན་མེད་དུ་མི་སེམས་ལ་སྡུག་འཇོག་དགོས་དོན་མི་འདུག་ག དེ་བས་ཀྱང་སུན་པོ་བཟོ་མཁན་ཁག་ཅིག་གིས། མཐོང་ན་ཉོབ་སྣང་སྟེར་མཁན་གྱི་པར་རིས་གྲངས་མེད་དོན་མེད་དུ་བཏང་ཡོང་གིན་འདུག མ་གཞི་རྩེད་མོ་རྩེ་གི་ཡོད་པ་དང་ཕན་ཚུན་ལ་གྲོགས་པོ་འདྲིས་པོ་ཡོད་པའི་རྟགས་སྟོན་པའི་ཚུགས་ཀ་རེད་མོད། ཕར་ཕྱོགས་ཀྱི་ཁམས་དང་མོས་པ་ལ་ཏོག་ཙམ་བསམ་གཞིག་རེ་བཏང་ན་བསམ་པའི་ཀུན་སློང་སྐྱེས། མདོར་ན་ཐོག་མར་འཚམས་འདྲི་བཀྲ་ཤིས་ལེགས་ཞུ། བར་དུ་གླུ་ལེན་སྙན་ངག་གྱེར་སོགས་བྱེད། ཐ་མར་ཁྱེད་ངན་ང་ངར་གྱི་རྩོད་གླེང་བྱེད། མཇུག་མཐར་བཀྲ་ཤིས་པའི་ཚོགས་པ་དེ་དོན་མི་འགྲུབ་པའི་ངོ་བོར་འགྱུར་བ་སོགས་སོ།། ཡང་ཕ་ཡུལ་གྱི་གནས་ཚུལ་སོགས་དུས་ལྟར་གོ་ཐུབ་པའི་ཁྱད་ཆོས་སོགས་ཡོད་ཀྱང་གཙོ་བོ་འཐུས་ཤོར་གྱི་ཆ་མང་བས་འདི་ཙམ་བྲིས་པ་ཡིན།
ཁོ་བའི་བསམ་འཆར་རྩོམ་སྒྲིག་པས་དཀའ་ངལ་ལ་མ་འཛེམ་པར་འདིར་བཀོད་པར་བཀའ་དྲིན་ཆེ་ཞུ།
སྐད་འཕྲིན་ནི་ཁྱོས་བཤད་པ་ནང་བཞིན་གྱི་ཁྱབ་རྒྱ་ཧ་ཅང་ཆེ་ཞིང་ཀུན་ནུས་དེ་འདྲ་མ་རེད་ལ་ཁྱོས་དམོད་པ་ཇི་བཞིན་གྱི་ཕོངས་དཀྲིགས་དེ་འདྲའང་ཁྱོན་ནས་མིན་པས་ཁྱོའི་སྐད་ཆ་དེའི་ཕག་ན་ང་ཚོའི་མཐུན་བསྒྲིལ་ལ་ཆེད་དུ་གནོད་པའི་འགད་རྫ་ཅི་རིགས་སྦས་ཡོད་པར་ཡང་ཐེ་ཚོམ་སྐྱེས་བས་རེ་ཞིག་མི་གླེང་།
ཡིན་ནའང་༼སྐད་འཕྲིན༽ནི་ཏ་ལྟ་རྒྱ་གཞུང་གིས་ང་ཚོར་ཆེད་བཙུགས་ཀྱི་རྒྱ་རྙི་ནང་བཞིན་ང་ཚོའི་ཕྱི་ནང་གི་གྲོཊ་པོའི་བར་གྱི་སྐད་ཆ་དང་གསང་བ་ཡོད་ཚད་རིན་པ་མི་དགོས་པར་རྒྱ་གཞུང་ལ་ཉིན་མཚན་དུས་དྲུག་དུ་ཕུལ་གྱིན་ཡོད་པར་འདོད་ན་འདི་ནི་ང་ཚོའི་ལོ་རྒྱུས་སྟེང་གི་ཆེས་འཇིགས་སུ་རུང་པའི་ཕམ་ཁ་དང་ལམ་ལོག་དེ་ཁོ་ནར་སྤྱོད་པ་ཡིན་པས་རང་ཉིད་དང་མི་རིགས་ཀྱི་བདེ་འཇགས་བསམ་ན་སྐད་འཕྲིན་ཟེར་བའི་རྒྱ་ནག་གི་ཁྱིམ་ཕྱགས་མ་ལག་འདི་ཀུན་གྱིས་མར་གད་སྙིགས་སུ་འཕངས་ན་དེ་ནི་ཆེས་རྨད་དུ་བྱུང་བའི་ཐབས་མཆོག་རེད་ལ་འདི་མ་ཡིན་པའི་KAKAO དང LINE སོཊ་སྐད་འཕྲིན་དང་བསྡུར་ན་ལྡབས་འགྱུར་གྱིས་བདེ་འཇགས་ཡིན་པའི་གླེང་མོལ་མ་ལག་ཀྱང་མི་ཉུང་པ་ཡོད་པས་བསམ་གཟས་ནས་ཨུ་ཚུགས་ཀྱིས་རྒྱ་གཞུང་གི་གསང་འཕྲིན་མ་ལག་དེ་བཀོད་སྤྱོད་བྱོས་ན་ནམ་ཉི་མ་ཞིག་ལ་རྒྱ་གཞུག་གིས་ཁྱོའི་དོན་ལྔ་སྣོད་དྲུག་པོ་བཙན་བཀོག་མི་བྱེད་པའི་ངེས་བ་དེ་གཏན་ནས་མེད་པས་ཁྱོད་ཀླད་པར་སྐྱོན་ཅན་ཞིག་མིན་ན་དགྲ་བོའི་བསྐུར་བའི་ལེགས་སྐྱེས་དེ་འགད་རྫས་ལས་ཅི་ཡང་མིན་ནོ།།
(སྙད་རྐོ་བ་དང་གསེག་འདྲུ་བ།)
གསེག་འདྲི་བ་ཟེད་ན་ཚིག་འགྲེལ་ཞིག་རྒྱག་མི་ཐུབ་པས། ཚིག་དོན་ཁ་གསལ་གོ་བདེ་ཞིག་ཡོད་ན་ཕན་པ་ལྡན། ཟག་འདྲུ་བ་ཟེར་བ་དེ་དང་དོན་གཅིག་པ་ཨེ་ཡིན་ནམ།
དེ་མིན་ཁྱོད་སྒེར་ལ་འདྲ་མིན་ཅོ་བརྒྱད་ཀྱི་ལམ་ནས་བསུན་པོ་བཟོ་ནི་ཚོ་ལ་དེ་ཆོའི་ངོ་མྱིག་གིས་ཅིག་མི་རིག་གི་ཆུགས་ཟེར་འདོད་བྱུང་།
བཀོལ་ཤེས་ན་ཀུན་ལ་ལྟ་ཐུབ་ཀི།
དུས་འདི་ལ་མི་བཀོལ་རང་བཀོལ་རེད།
བཀོལ་མ་ཤེས་ཀུན་པོ་དཀྲུག་ཐུབ་ཀི།
དུས་འདི་ལ་འདྲེ་འི་ལག་ཆ་རེད།
གནམ་ལགས་ཕེབས་པར་དགའ་བསུ་ཞུ། གསེག་འབྲུ་ལབ་ན་དག་ཡིག་ལ་ལྟོས།
ཁྱབ་འཇུག་འདིས་ཆོ་མེད་ཅིག་བཤད་ཀྱིན་འདུག ཡིན་ནའང་གཡུགས་ཤོག
ང་ཚོ་གླེང་མོལ།
ཨ་རིའི་གླན་པའི་སྐད་ཆར་རྒྱབ་སྐྱོར་ཡོད། རྒྱུན་མཚན་ནི་ངའི་ལས་ཀ་ལས་རོགས་མགོ་སེར་ཞིག་ཉེ་ཆེར་ལས་ཀ་ནས་རྒྱངས་འཕུལ་བཏང་སོང་་་་བཏང་དོན་ནི་ཁོས་ལས་ཀའི་བར་ནས་ཁ་པར་ནང་མགོ་བོ་འཁོར་རྒྱུ་མང་དྲགས་པས་རེད་་་་ད་དུང་གང་ས་གང་ན་བོད་པ་ལས་གཡོག་པ་ཁག་ཅིག་ལ་དཀའ་ངལ་འདི་འདྲ་ཡོད་ཚོད་གོ་རྒྱུ་དང་ངོས་སུ་མཐོང་རྒྱུ་ཡོད་པས་་་དེ་རིང་ཁྱེད་ཀྱི་སྐད་ཆ་བདེན་པ་རེད་ལབ་ཀྱི་ཡིན།
ཁ་པར་སོགས་བེད་སྤྱོད་བཏང་སྟངས་ལ་ཁྱད་པར་ཆེན་བོ་ཡོད་དེ་ལ་སོ་སོས་སྟངས་འཛིན་མ་བྱེད་པ་ཡིན་ན་ཁོ་རང་གིས་དུས་ནམ་ཡང་འཚམ་འཇོག་གི་མ་རེད་དེ་ཡིན་ཙང་མི་བུ་རང་ཉིད་ལ་ལྟོས་ཡོད་པ་གསལ་པོ་ཡིན་
མི་སྒེར་ལ་རག་ལས་པ་རེད་ཟེར་བ་དེ་ཉིད་བདེན་དུ་འདུག
དམའ་རིམ་སློབ་ཕྲུག་དང་སློབ་གཉེར་ལ་དེ་ཉིད་མེད་ན་བཟང་སྙམ།