རིན་ཆེན། ཨོ་གླིང་།
འཛམ་གླིང་ཁྱོན་ཡོངས་སུ་ཏོག་དབྱིབས་ནད་དུག་ཁྱབ་གདལ་དུ་སོང་ནས་སྤྱི་ཚོགས་རྒྱང་བཀྱེད་བྱེད་དགོས་འཁེལ་བའི་དུས་སྐབས་འདིར་ས་ཕྱོགས་གང་སར་འཐོར་བའི་བོད་མི་བཙན་བྱོལ་བ་མང་ཆེ་བའང་རང་ཁྱིམ་དུ་བསྡད་ཡོད་ལ། རང་ཁྱིམ་ནས་རང་གི་ནུས་ཚོད་དང་དགའ་ཕྱོགས་ལྟར་གྱིས་དུས་ཚོད་འཁྱོལ་ཐབས་བྱེད་ཀྱི་ཡོད། དེ་བཞིན་མི་སྒེར་གྱི་དྲྭ་ལམ་སོ་སོས་ནས་བོད་མི་མང་པོ་ཞིག་གིས་རྒྱལ་སྤྱིའི་དཀའ་རྙོག་ཆེ་བའི་ཆབ་སྲིད་ཀྱི་འཐབ་འཁྲུག་ནང་དུ་རྒྱ་བོད་གཉིས་ཀྱི་དཀའ་རྙོག་སེལ་ཐབས་ཀྱི་གོ་སྐབས་མང་པོ་ཡོད་པས། གོ་སྐབས་དེ་དག་འཆོར་མི་ཉན་པའི་འབོད་སྐུལ་ཡིག་ངག་གང་རུང་ནས་བྱས་སོང་ལ། རྒྱལ་སྤྱིའི་ནང་རྒྱལ་ཁབ་ཕན་ཚུན་གྱི་སྲིད་དོན་དང་། དཔལ་འབྱོར། མི་མང་གི་འཚོ་ཐབས་དང་འཕྲོད་བརྟེན། བདེ་འཇགས་སོགས་ཀྱི་གནས་བབས་ཉག་ཕྲ་བའི་དུས་སུ་ལྷུང་སྐབས། སྲིད་དོན་པ་ཚོས་རྒྱལ་ཁབ་ཕན་ཚུན་གོང་བུ་གཅིག་ཏུ་སྒྲིལ་ནས་དཀའ་རྙོག་སེལ་ཐབས་བཞག་སྟེ། བློ་རྩེ་གཅིག་ཏུ་བསྒྲིམས་ནས་ཕན་ཚུན་ལ་སྐྱོན་འདོག་རེས་དང་རང་འཁྲིས་གཞན་ལ་གཡོགས་བཞིན་པ་དེ་རེད། ལྐོག་ཇུས་ངན་པའི་སྲིད་དོན་གྱིས་མི་མང་དང་རྒྱལ་ཁབ་ཁ་ལ་ཁྱེར་ནས། དོན་དངོས་ཀྱི་ཁེ་ཕན་སྲིད་དོན་ཚོགས་པ་སོ་སོས་ལེན་གྱི་ཡོད་པའི་ཁྲམ་གཤིས་ཡང་ཡང་མངོན་སོང་།
དཀའ་རྙོག་དང་འཐབ་འཛིང་དེ་དག་གི་ཁྲོད་ནས་བོད་མི་མང་དག་ཅིག་དང་བོད་དོན་འཐབ་རྩོད་པ་ཡིན་ཟེར་མཁན་མང་པོས་མི་སྒེར་གྱི་དྲྭ་ངོས་སོ་སོ་ནས། བོད་དོན་ཁ་ལ་ཁྱེར་ནས་སྐུལ་སློང་སྣ་ཚོགས་བྱས་སོང་ལ། བྱ་འགུལ་ཡང་འདྲ་མིན་སྤེལ་སོང་། སྐུལ་སློང་དེ་དག་གི་ནང་ནས་གཅིག་ནི་རྒྱ་ནག་ནས་བཟོས་པའི་སྤྱི་ཚོགས་དྲྭ་བ་སྐད་འཕྲིན་བེད་སྤྱོད་མ་གཏོང་། ཞེས་པ་དེ་རེད། བྱ་འགུལ་སྤེལ་མཁན་དེའི་ནང་དུ་བོད་དོན་འཐབ་རྩོད་པ་ཡིན། ཞེས་རྒྱལ་སྤྱིའི་ནང་བོད་དོན་དྲིལ་བསྒྲགས་སྤེལ་མཁན་དང་། བོད་ནང་གི་བོད་མིའི་སྐུ་ཚབ་ཡིན། ཟེར་ནས་བོད་ཀྱི་སྐད་ཡིག་དང་རིག་གཞུང་། ཁོར་ཡུག སྲོལ་རྒྱུན་གྱིི་འཚོ་བ་སྐྱེལ་སྟངས་ལ་སོགས་པའི་གནས་སྟངས་ཛ་དྲག་པོ་རྣམས་སྲུང་སྐྱོབ་སླད། རྒྱལ་སྤྱིའི་ཚོགས་སྡེ་འདྲ་མིན་བརྒྱུད། རྒྱལ་སྤྱིའི་ནང་ཤུགས་རྐྱེན་ཆེ་བའི་རྒྱལ་ཚོགས་ཁག་གི་རྒྱབ་སྐྱོར་འཚོལ་ནས་བོད་སྐྱོབས་ཀྱི་ཡིན། རྒྱ་ནག་གི་མཇིན་པ་ནས་བཙུར་གྱི་ཡིན། ཞེས་རྨི་ལམ་སྐྱིད་པོ་གཏོང་མཁན་དག་རེད། དོན་དངོས་བཤད་ན། ཁོ་ཚོའི་གྲས་ཀྱི་མི་མང་པོ་ཞིག་གིས་བོད་དོན་ཤེས་ཀྱི་མེད་ལ། བོད་ནང་གི་གནས་བབ་དེ་ལས་ཀྱང་ག་ལ་ཤེས། ཁོང་ཚོས་འཚམས་རེར་བོད་ནི་བལ་ཡུལ་དང་འབྲུག་ཡུལ་ལྟ་བུ་ལ་ཡོད་སྣང་འཆར་ལ། ལན་རེར་བོད་ནི་བྱང་ཀོ་རི་ཡ་ལྟ་བུ་རུ་ཡོད་པར་སྣང་། ཁོང་ཚོ་མང་པོ་ཞིག་གི་སེམས་ནང་དུ་བོད་ནི་ཀླ་ཀློའུ་ཡུལ་ལྟ་བུ་རིག་གནས་དང་དཔལ་འབྱོར་སོགས་མ་དར་བའི་རྒྱལ་ཁབ་ཅིག་ཏུ་བརྩི་ལ། བོད་ནས་སླེབས་པའི་བོད་མི་གསར་འབྱོར་བ་ཚོ་ལ་ལྷག་ཏུ་མི་དགའ། དོན་དངོས་སྟེང་ཁོ་ཚོ་ལ་བོད་ཟེར་བ་དེ་དགོས་ཀྱི་མེད་ལ། བོད་ལ་ལོག་རྒྱུའི་བསམ་བློ་ཡང་ཡོད་མ་རེད། ཁོ་ཚོའི་ལས་ཀ་ནི་རང་དབང་ལུང་པའི་ནང་ནས་གང་འདོད་དུ་རང་གི་མི་རིགས་ཀྱི་མིང་ཁུར་ནས་སོ་སོའི་མདུན་ལམ་འཚོལ་རྒྱུ་དང་རང་ལྟོ་འགྲེང་ཆེད་གང་སར་སྐད་ཅོར་རྒྱག་པ་ལས། ཁོང་ཚོའི་ལས་སྟེང་དུ་རང་གི་མི་རིགས་ལ་བློ་དཀར་ཞིང་ལ་རྒྱ་ཡོད་པའི་རྟགས་མཚན་ཅི་ཡང་མེད། ཐ་ན་རང་གི་མིང་ཙམ་ཡང་བོད་ཡིག་ནང་འབྲི་མི་ཤེས། དེ་བས་ཀྱང་ཁོང་ཚོས་བོད་ནང་གི་དངོས་ཡོད་གནས་ཚུལ་ཤེས་རྟོག་མེད་པ་གསལ་གསལ་ཐིང་ཐིང་ཡིན། དཔེར་ན། བོད་ནང་ནས་སྐད་འཕྲིན་གྱི་ཚབ་དུ་(WhatsApp) དང་ (Instagram) བདེ་སྤྱོད་གཏང་དགོས་པའི་རྨོངས་འཆར་ལ་ལྟོས་དང་ཤེས།
བདེན་པ་བཤད་ན། སྐད་འཕྲིན་དར་བ་ནས་བཟུང་བོད་སྤྱི་ནང་གི་འབྲེལ་ལམ་ཇེ་ཡག་དང་སྟབས་ཇེ་བདེ། བོད་ཕྱི་ནང་གཉིས་ལ་གྱོང་ལས་ཁེ་ལྡབ་འགྱུར་མང་པོ་རག་ཡོད། བོད་ནང་གི་རང་ལུས་མེར་བསྲེག་གི་ལུས་འགུལ་ལས་མཚོན། གནས་ཚུལ་མང་པོ་ཞིག་འབྲེལ་ཡོད་ཀྱི་སྐད་འཕྲིན་བརྒྱུད་ནས་ཤེས་རྟོགས་བྱུང་གི་ཡོད་ལ། དེ་བཞིན་བཙན་བྱོལ་ནང་གི་གཞུང་སྒེར་གྱི་གསར་ཁང་ཁག་གིས་བོད་ནང་གི་གནས་ཚུལ་ཡོང་ཁུངས་མང་ཆེ་བ་སྐད་འཕྲིན་ཡིན། ཉེ་ཆར་རང་རྒྱ་གཞུང་གིས་རྔ་བ་བོད་རིགས་རང་སྐྱོང་ཁུལ་གྱི་བོད་ཡིག་བསླབ་གཞི་གཙོ་བོ་བྱ་སའི་སློབ་གྲྭ་ཁག་གི་ནང་དུ། རྒྱ་ཡིག་བསླབ་གཞི་བྱས་ཏེ་རྩིས་དངོས་རྫས་གསུམ་གྱི་སློབ་ཚན་ཚང་མ་རྒྱ་ཡིག་ནས་སློབ་ཁྲིད་བྱེད་དགོས་པའི་སྲིད་ཇུས་ཤིག་བསྒྲགས་ཡོད་པར། ས་གནས་མི་མང་དང་དགེ་རྒན། ཤེས་ཡོན་པ། སློམ་མ། གྲྭ་བ་སོགས་མང་པོ་ཞིག་གིས་སྲིད་ཇུས་དེར་སེམས་ཕམ་དང་ངོ་རྒོལ་ཀྱིས། སོ་སོའི་བདེ་འཇག་དང་ཁེ་ཕན་དོར་ནས་བསམ་ཚུལ་སྣ་ཚོགས་ཤིག་སྤེལ་ཡོད་ལ། ད་ལྟ་ཡང་སྤེལ་དང་སྤེལ་མུས་རེད། དེ་དག་ང་ཚོའི་ལག་ཏུ་སོན་ཐུབ་པ་དང་ཤེས་རྟོག་བྱུང་ཐུབ་པ་ནི་སྐད་འཕྲིན་གྱི་བཀའ་དྲིན་ཉག་གཅིག་རེད།
གནད་དོན་གཞན་གཅིག་ནི། རྒྱ་ནག་གཞུང་གིས་ནམ་རྒྱུན་དུ་བོད་ནང་གི་བོད་མི་ཚོར་ཕྱི་ལོག་དང་འབྲེལ་བ་བྱེད་མི་ཆོག་པ་དང་། ༧རྒྱལ་བ་རིན་པོ་ཆེའི་བཀའ་སློབ་དང་པར་རས་ཀྱི་མཚོན། བོད་མའི་སྒྲིགས་འཛུགས་ཀྱི་བྱེད་སྒོ་ཁག་དང་ཕྱི་ལོག་གི་བླ་ཆེན་རྣམ་དང་ཤེས་ཡོན་པ་སོགས་ཀྱི་སློབ་གསོ་དང་། ལས་འགུལ་སོགས་དྲ་ཐོག་ནས་བརྒྱུད་སྐུར་དང་འབྲེལ་བ་བྱེད་མི་ཆོག་པའི་བཙན་བཀའ་ཡང་ཡང་གཏོང་གི་ཡོད། ཡིན་ནའང་བོད་ནང་གི་ཞིང་འབྲོག་མང་ཚོགས་ཀྱིས་ང་ཚོ་ལ་ཉན་འདོད་དང་ལྟ་འདོད་ཀྱི་བློ་དེ་རྐོམ་པས་ཆུ་འདོད་ལྟར་ཡིན་པས། བཙོན་བྱོལ་ནང་དུ་བོད་དོན་ལས་འགུལ་ཆེ་མ་ཆུང་གསུམ་ཅི་ཞིག་སྤེལ་ནའང་ཉེ་བའི་ལོ་འགའི་རིང་དུ་བོད་ནང་དུ་སྔར་ལས་ལྷག་པའི་གནས་ཚུལ་གང་ཙམ་འཕྲོད་ཡོད། དེ་ཡིས་བོད་ནང་གི་བོད་མི་ཚོའི་སེམས་ཤུགས་སྔར་ལས་ལྷག་བསྐྱེད་ཀྱི་ཡོད། བོད་མི་མང་པོ་ཞིག་ལ་གལ་སྲིད་༧རྒྱལ་བ་རིན་པོ་ཆེའི་ཞལ་མཇལ་ཞིང་གསུང་ཐོས་པའི་སྐལ་བ་ཞིག་ལྡན་ནས་ཤི་སོང་ན་ཡང་འགྱོད་པ་མེད་བསམ་པའི་རྣམ་དག་གི་དད་པ་དང་སེམས་ཤུགས་ཡོད་པ་རེད། ཁོང་ཚོས་དད་དམ་གཙང་མས་ག་དུས་ཡིན་ནའང་༧རྒྱལ་བ་རིན་པོ་ཆེའི་ཞལ་མཇལ་གསུང་ཐོས་ཀྱི་རེ་ལྟོས་ཡང་ཡང་འཆའ་ཡི་ཡོད་པ། བོད་ནས་སྐྱེས་ཤིང་བོད་དུ་མཚར་ལོངས་བྱུང་བ་ཞིག་ཡིན་ན་གསལ་པོ་ཤེས། དེའི་ཐད་ཕྱི་ལོག་ཏུ་ཡོད་པའི་བོད་མི་ཚོས་རྒྱུ་དངོས་རྫས་གསུམ་གང་ཡང་བློས་གཏོང་མི་དགོས་པར་བོད་ནང་གི་བོད་མིའི་མངོན་འདོད་ལ་ཐད་ཀར་ཞབས་འདེགས་ཅང་ཟད་སྒྲུབ་ཐུབ་པ་རེད། སྒྲུབ་སའི་བརྒྱུད་ལམ་ཕྲ་མོ་ཙམ་ཞིག་ཡོད་པ་དེ་སྐད་འཕྲིན་རེད། དེ་འདྲ་བའི་འབྲེལ་ལམ་རྐུད་པ་ཙམ་ཞིག་ཡོད་པ་དེ་དགྲ་ཡིས་མ་བཅད་གོང་ནས་གཉེན་གྱིས་བཅད་བཞག་ན་ཅི་ལ་རུང་། དེ་ནི་བོད་དོན་ལ་ཕན་པ་དང་བོད་དོན་འཐབ་རྩོད་བྱེད་སྟངས་ཤིག་གཏན་ནས་མ་རེད།
སྤྱིར་བོད་ནང་གི་བོད་མི་མང་པོ་ཞིག་གིས་སེམས་ཁྲལ་བྱེད་ས་གཅིག་ནི་བོད་ཕྱི་ནང་བར་གྱི་བརྒྱུད་ལམ་དེ་ག་དུས་ཆད་འགྲོ་ན་བསམ་པ་དེ་རེད། དེའི་དབང་ཆ་རྒྱ་ནག་གཞུང་ལ་ཡོད་པ་ལས་གཞན་སུ་ལ་ཡང་མེད་པའི་ཉམས་མྱོང་དེ་ང་ཚོ་ལ་ཡོད་པ་རེད། ཉིན་ཞིག་བོད་ཕྱི་ནང་གི་འབྲེལ་ལམ་ཆུང་ཆུང་དེ་མེ་བསད་པ་དང་ཆུ་ཆད་པ་ལྟ་བུའི་གནས་ཚུལ་ཞིག་བྱུང་ན། ཕྱི་ལོག་གི་བོད་མི་ཚོས་རྒྱལ་སྤྱིའི་སྒང་ངུ་འབོད་ག་ཚོད་བྱས་ན་ཡང་སྐྱོབ་གསོ་ཙམ་རེ་རག་ན་མ་གཏོགས་གཞན་འབྲེལ་ལམ་བསྐྱར་མཐུད་བྱེད་ཐུབ་ཀྱི་མ་རེད།
གནད་དོན་གཞན་གཅིག་ནི། ཕྱི་ལོག་ཏུ་བོད་མི་མང་པོ་ཞིག་གི་རང་གི་ཕ་མ་དང་བུ་ཕྲུག གཉེན་ཉེ། གྲོགས་པོ་སོགས། ཡོད་ཚད་གཞིས་སུ་ལས་ཡོད། དེ་འདྲ་བའི་གྲངས་ཀ་ཉུང་ཉུང་མིན། ཁོང་ཚོའི་ནམ་རྒྱུན་འཚོ་བའི་ནང་གི་རང་གི་སྙིང་ཉེ་བའི་མི་རྣམ་ལ་འབྲེལ་ལམ་བྱེད་ས་ཞིག་ཡོད་པ་དང་སྟབས་བདེ་ཤོས་སྐད་འཕྲིན་རེད། ནང་མི་ཕན་ཚུན་གཞིས་བྱེས་གཉིས་སུ་གྱེས་པའི་བྲལ་གདུང་གི་ངལ་བ་ཅང་ཙམ་སེལ་ཐུབ་མཁན་གྱི་བརྒྱུད་ལམ་ཞིག་ཡོད་པའང་སྐད་འཕྲིན་རེད། དེ་འདྲ་བའི་བོད་མི་མང་ལ་བརྒྱུད་ལམ་གལ་ཆེན་ཆགས་ཡོད་པ་ཞིག་རང་ངོས་ནས་གཅོད་ཀྱི་ཡིན། མཚམས་འཇོག་དགོས་པ་རེད་ཅེས་དང་བླངས་ཐོན་པ་ནི་ནོར་འཁྲུལ་ཆེན་པོ་ཞིག་རེད། ལས་འགུལ་འདི་འདྲས་བོད་དོན་དང་བོད་མི་རིགས་ལ་གནོད་པ་ལས་ཕན་ཅི་ཡང་མི་ཐོག ལས་འགུལ་སྤེལ་མཁན་ཚོས་ལས་འགུལ་ག་འདྲ་ཞིག་སྤེལ་ནའང་འགོ་མ་བརྩམས་གོང་དུ་བོད་དོན་དང་བོད་ཕྱི་ནང་གཉིས་ཀྱི་མི་མང་ལ་དངོས་ཤུགས་བརྒྱུད་གསུམ་ནས་ཕན་གྱི་འདུག་གམ་གནོད་ཀྱི་འདུག་བསམ་བློ་གཏོང་དགོས་པ་གནད་འགག་ཡིན་པ་ལས། ཚོགས་སྒེར་གྱི་སྐྱོབ་གསོ་ཙམ་གྱི་ཆེད་དུ་གཞན་གྱི་རྐུབ་གཡོག་བརྒྱུགས་བསྡད་ན། ཐང་གི་རྡོ་ལེན་ས་ནས་རུམ་གྱི་བྲོ་ལྷུང་བའི་ཉེན་ཁ་ཏན་ཏན་འཕྲད་ཀྱི་རེད།
བོད་ཕྱི་ནང་གཉིས་ཀྱི་འབེལ་ལམ། ཞེས་པའི་འཆད་རྩོམ་གྱི་གནད་དོན་དངོས་དེ་ WhatsApp དང་ Instagram ལམ་ནས་བོད་དུ་འབྲེལ་མ་བྱེད་རོགས་ཞེས་དྲ་ལམ་ནང་འབོད་སྐུལ་ཞུས་པར་ལན་ཡིན་འདུག དྲ་ལམ་ནང་ཅི་གསལ་ཆ་ཚང་མ་ཤེས་ཀྱང་རོབ་ཙམ་ཁྱེད་ཀྱི་འཆད་རྩོམ་ནས་ཤེས་ཐུབ། WhatsApp དང་ Instagram གཉིས་བེད་སྤྱོད་ཀྱི་ཕན་རླབས་ཇི་བྱུང་ཁྱེད་ཀྱིས་རང་དབང་ལེན་ནས་བཀོད་པ་ལྟར་གཞན་གྱི་གནོད་ཇི་ཡོད་དུ་སྐྱོིན་བརྗོད་བྱ་བའི་ཐོབ་ཐང་ཡང་ལེན་རེད། ཡིན་ཀྱང་ཁྱེད་ནས་དགོས་མེད་ཀྱི་བསམ་ཚུལ་ལྷག་དོན་རང་སྐྱོན་ངོས་ལེན་ལས་གཞན་གྱི་བོད་དང་བོད་མིའི་རྩ་དོན་ཆེད་ལས་འགུལ་མིང་དོན་ལྡན་དང་མ་ལྡན་ལ་མ་བལྟོས་བ་སྤེལ་བ་དང་སྤེལ་མཁན་ལ་སྐྱོན་བརྗོད་བསམ་ཡུལ་ལས་འདས་པ་ཞུས་པར་ལན་ཞིག་མ་ཞུས་རང་ཞུས་ཡིན་འདུག ཨོ་གླིང་དེ་ཨོས་ཊོ་ལི་ཡ་ Australia ལ་ངོས་ལེན་ཞུས་ན་ཁྱེད་དེ་བར་ WhatsApp དང་ Instagram བེད་སྤྱོད་ལས་འབྱོར་རམ། དེ་མིན་ཕ་ཡུལ་གངས་ལྗོངས་ WhatsApp དང་ Instagram བེད་སྤྱོད་བྱ་ཆེད་དོར་རམ། རྩ་དོན་ནི་བོད་དང་བོད་མིའི་དང་བཙན་འཛུལ་བ་རྒྱ་དམར་པོ་གཉིས་ཀྱི་གནད་དོན་དེ་ཡིན། གནད་དོན་འདི་ WhatsApp དང་ Instagram ཡོད་མེད་ལས་ཆེར་ཁྱད་མེད། རྒྱ་མིས་བོད་དང་བོད་མི་ཅེས་མིང་ཙམ་ཡང་མེད་པ་བཟོ་འཆར་དེ་མཁྱེན་ནས་༡༩༥༩ ཟླ་ ༣ ནང་༸གོང་ས་མཆོག་དབུས་པས་བོད་མི་ཚོས་རང་ཡུལ་དོར་ནས་མི་ཡུལ་དུ་གྱར་དགོས་བྱུང་རེད། WhatsApp དང་ Instagram གཉིས་ཡོད་པས་བོད་མི་མང་པོས་རང་ལུས་མེ་མཆོད་ཕུལ་བ་མ་རེད་དོ། རང་རང་སོ་སོའི་ཆོས་དང་རིག་གཞུང་མི་ཉམས་བརྒྱུད་འཛིན་གྱི་ཐོབ་ཐང་དང་༸གོང་ས་མཆོག་བོད་རྒྱལ་ཁབ་ཏུ་གདན་འདྲེན་དགོས་པའི་ཆ་རྐྱེན་འོག་རྒྱ་ལ་ངོ་བརྒོལ་ཞུས་པས་ཁྱབ་བསྒྲགས་ཆེད་མིན། གནས་ཚུལ་ཕྲན་ཙམ་མགྱོིགས་པ་ཤེས་རྒྱུར་ཕན་ཐོག་ཕྲན་བུ་བྱུང་ཡོད་ཀྱང་དེ་མིན་དུས་ཉིན་གཅིག་ཤེས་རྒྱུ་ཡིན་ལ་རྒྱ་དམར་པོའི་ཤེས་དགོས་པ་དེ་གལ་ཆེ་བས་དེ་ནི་དེ་མ་ཉིད་དུ་ཤེས། དེ་མིན་ཁྱེད་ WhatsApp དང་ Instagram ནང་བོད་རྒྱལ་ཁབ་དང་མི་དམངས་ཆེད་སྐད་ཆ་ག་རེ་བཤད་ཀྱི་ཡོད། ཧ་གོ་གསལ་རེད། གཞན་ཕར་བཞག་བོད་ཀྱི་དར་ཆ་དང་༸རྒྱལ་བ་རིན་པོ་ཆེའི་སྐུ་དཔར་མེད་ས་ཞིག་ཏུའང་སྐད་ཆ་བཤོད་ཀྱི་མེད་པས། བོད་ཀྱི་ས་ཁུལ་འགའ་ཤས་ཤིག་ནང་དམིགས་གསལ་བྱུང་ཡོད་དེ་མིན་ས་མྱུར་བ་བརྒྱ་ཕྲག་སྟོང་ཕྲག་མང་པོས་སྐོར་ནས་མིན་འདུག་གམ། མཐོང་སོང་གོ་བྱུང་རང་དབང་ལུང་པར་བོད་དོན་ཆེད་སྐད་རྒྱབ་ན་བོད་ནང་གཉེན་སྤུན་ལ་རྒྱ་མིས་དཀའ་ངལ་སྤྲོད་ཀྱི་འདུག་ཅེས་ལས་དོན་དེ་ལྟར་སྐབས་མཐོང་རྒྱུ་འཚོར་རྒྱུ་མེད་བ་མི་ཉུང་ཡོད་འདུག་པ་ཁྱེད་ཀྱང་དེ་ནང་མཚུད་མཉམ། ངས་བྱས་ན་བོད་ནང་སྤུན་གཉེན་ཚོས་རང་དབང་ལུང་པར་བོད་དོན་ཆེད་སྐད་འབོད་ཞུས་ན་བཅོས་མིན་དགའ་བསུ་ཞུ་བ་ལས་མ་བྱ་རོགས་ཞེས་ནམ་ཡང་བསམ་པར་འཁོར་མི་སྲིད། གང་གིས་ན་བོད་ནང་བོད་མིས་ཚོས་ཤི་རྒྱུ་ཧ་གོ་བཞིན་དུ་རྒྱ་མི་ལ་གདོང་ལེན་ཇི་ལྟར་ཞུ་ཡི་མིན་འདུག་གས།
རྒྱ་ནག་གི་མཇིན་པ་ནས་བཙུར་གྱི་ཡིན། ཞེས་རྨི་ལམ་སྐྱིད་པོ་གཏོང་མཁན་དག་རེད། ཅེས་བོད་ཀྱི་བདེན་དོན་ཐབས་རྩོད་པར་སྙིང་འཚེམ་ཞུས་དགོས་མེད། ཁྱེད་ནས་འབྲེལ་བཤད་བྱས་པ་ལྟར་བོད་དོན་ཐབས་རྩོད་པས་ལས་འགུལ་སྣ་མང་སྤེལ་ཡོད་ལ་འབྲས་བུ་ཡང་ཐོན་པ་མི་མཐོང་ངམ། གང་གི་ཕྱིར་རྒྱ་རྒྱལ་ཁབ་ཆེན་པོའི་དཔོན་རྣམས་དགོས་མེད་ཀྱི་དངུལ་མང་པོ་ཞིག་བོད་པའི་རྒྱབ་བསྐྱོར་བ་བཀུག་ཐབས་ཆེད་འགྲོ་སོང་གཏོང་དགོས་ཆགས་སམ། ཁྱེད་ཀྱི་ཤེས་པའི་རྒྱལ་ཁབ་གསུམ་གྱི་མིང་བྲིས་ནས་བོད་དོན་ཐབས་ཤེས་ཚོས་བོད་ཟེར་དུས་རྒྱལ་ཁབ་གསུམ་དེར་ནོར་ནས་གོ་སྲིད། ཅེས་པ་ནི་ཁྱེད་ཡིན་སྲིད་ཞུས་ན་བསྟོད་མི་ཆེའམ། དེ་ཡང་ཨོ་ཙམ་རེད། ཁྱེད་ཀྱི་བོད་ཡུལ་ཟེར་བ་མེད་མ་ལབ་པ་རེད། དེ་བརྟེན་ངས་བསམ་པར་འཆད་རྩོམ་དེ་རིན་ཆེན་ ཨོ་གླིང་མིང་དུ་རྒྱ་མི་ཞིག་ནས་བྲིས་མིན་ནམ་བསམ། རྒྱ་མིས་བོད་ཟེར་བ་ཡོད་པ་ཧ་གོ། དེ་མིན་ཀརྨ་རྟགས་ཅན་གྱི་ཁ་བརྡ་ནང་བོད་མིང་རྫུན་ཅན་མི་འགའ་རེས་བོད་མིའི་མཐུན་ལམ་རྡོག་བསྒྲིལ་དེ་མེད་པར་བཟོ་ཐབས་སུ་བོད་ཡིག་ཤེས་པ་དེ་བེད་ལོགས་སུ་སྤྱོད་ཀྱིན། ཡང་ཞུས་ན་བོད་མི་ཐབས་རྩོད་པ་ཚོས་བོད་ཡུལ་ནང་ལམ་ག་བ་ཡོད། ཆུ་གང་དུ་རྒྱུགས། འབྲོག་ས་གང་དུ་ཡོད་ལ་སོགས་ཆང་ངས་ཆུང་ངས་ཧ་མ་གོ་ཀྱང་བོད་ཡོད་པ་མགོ་མཚོས་གོ་རྟོགས་ནས་རང་དབང་ལུང་པར་རང་དབང་ངང་རང་དོན་རང་གཅེས་ཀྱིས་ལས་དོན་ཞུས་རེད། ཁྲོམ་པ་གང་ནས་འོང། ལུང་པ་དེ་གསུམ་དང་བོད་དབར་འདྲན་ས་མེད་བོད་ཅེས་བོད་མི་ཙམ་མ་ཟད་འཛམ་གླིང་གང་སར་གོ་ཤེས་ཐུབ། དེ་ཡང་བོད་པར་སྙིང་རྗེ་ལས་མིན་པར་བོད་པར་ཡིད་འཕྲོག་པའི་ཡོན་ཏན་དུ་་ངོ་མཚར་ཏེ་བྱུང་། བོད་དེ་ཀླ་ཀློའི་ཡུལ་དུ་ངོས་འཛིན་མཁན་རྒྱ་དམར་ལས་གཞན་མེད་ཅེས་བསམ་པར་ཡོད་བཞིན་ཀྱང་ང་རང་ནོར་བས་ཁྱེད་ཀྱི་བསམ་ཞིབ་ནང་དུའང་འདུག་ག། ཁོ་ཚོར་བོད་ནི་ངའི་ཕ་ཡུལ་དང་བོད་མི་ཚོ་ངའི་ཤ་རུས་གཅིག་པ་གོ་ཤེས་ངང་བརྩད་པ་ལས་གཞན་གྱིོ་འཇིག་བསྐུལ་ལས་མིན་པ་ཁྱེད་ཀྱི་ཉམས་མྱོང་ལས་མ་གྲུབ་བམ།
ཁོང་ཚོའི་ལས་སྟེང་དུ་རང་གི་མི་རིགས་ལ་བློ་དཀར་ཞིང་ལ་རྒྱ་ཡོད་པའི་རྟགས་མཚན་ཅི་ཡང་མེད། ཐ་ན་རང་གི་མིང་ཙམ་ཡང་བོད་ཡིག་ནང་འབྲི་མི་ཤེས། ཞེས་པ་ནས་མི་རིགས་ལ་བློ་དཀར་ཞིང་ལ་རྒྱ་ཡོད་པའི་རྟགས་མཚན་དང་པོ་དེ་ཁྱེད་ཀྱི་མིག་གི་མཐོང་ཤེས་པས་འཚོར་བ་ཐབས་རྩོད་དེ་མ་རེད་དམ། ཁྱེད་ནི་ལ་རྒྱ་ཡོད་པས་བོད་མི་སྤྱི་མཚུངས་ལྟར་རང་དབང་ལྡན་པའི་འཛམ་གླིང་མི་མང་མདུན་མཐོན་མ་ཐུབ་པར་ནང་ཡིབ་ཏུ་སྤྲོ་གཤའ་ལགས། བོད་ཡིག་འབྲི་མི་ཤེས་ན་མི་རིགས་ལ་བློ་དཀར་མེད་པས་ཁྱབ་བམ། དེ་ན་བོད་ནང་དང་བཙན་བྱོལ་དུ་ཡོད་པའི་བོད་ཡིག་འབྲི་ཀློག་མི་ཤེས་བ་ཡོད་པ་དེ་ལྟར་ཡིན་པ་ཁྱེད་ཀྱི་ངོས་ལེན་འདུག་ཀྱང། དེ་ནི་ཡིན་མིན་འདུག གཞི་བྱེས་གཉིས་སུ་བོད་མི་བརྒྱ་ཆ་ ༩༩ ལྷག་ནས་བོད་ཀྱི་རྩ་དོན་ལ་འབད་བཞིན་པ་ཁྱེད་ཀྱི་མཐོང་ཆོས་སུ་འདུག་པ་དེ་དངོས་གནས་ཡིན། གཉིས་སུ་བོད་ཡིག་ཤེས་པས་བེད་ནང་འཁུལ་དཀྲུག་ཤིང་ལ་བརྩོན་མཁན་ལྟ་བུ་བྱུང་བ་ལས་མ་ཤེས་ནའང་དགའ། དགོས་དོན་རྒྱ་དམར་ལ་རྩོད་དགོས་པས་དེའི་ཐབས་ཤེས་བརྩོན་གསུམ་ཡོད་པ་ནི་དེ་བས་མཆོག་གོ།།