གཞུང་པ་ཚེ་དབང་བསོད་ནམས།
འཇིག་རྟེན་གྱི་ས་གཞི་འདི་ཆགས་པ་ནས་འགྲོ་བ་རིགས་དྲུག་འཕེལ་ནས་ང་ཚོ་མི་ཡི་འགྲོ་བ་ནི་ཁ་ནས་སྐད་ཆ་བཤད་ཤེས་པ་དང་། ལག་པས་ཡི་གེ་འབྲི་ཤེས་པ་དང་། སེམས་ཀྱི་བསམ་བློ་གཏོང་ཤེས་པ་དང་། ཀླད་པས་འགུལ་སྐྱོད་རྒྱབ་ཐུབ་པ་ནས་གདོད་མའི་སྤྱི་ཚོགས་ནས་སྔོན་འཐོན་ལ་ཁ་ཕྱོགས་པ་དང་། བཟའ་ཚང་མཉམ་དུ་འདུས་ནས་ཁྱིམ་འཚོ་ཟིན་ཏེ་བུ་ཕྲུག་གསོ་སྐྱོང་བྱ་རྒྱུ་སོགས་མི་མང་པོ་མཉམ་དུ་འཛོམས་ཤིང་། ས་ཆ་གཅིག་ཏུ་གནས་སྡོད་བྱས། ཁང་པ་རྒྱག་རྒྱུ་དང་འཚོ་བ་སྐྱེལ་རྒྱུའི་ས་ཞིང་འདེབས་ལས་བྱ་རྒྱུ་དང་ཚོང་ལས་གཉེར་རྒྱུ། དུད་འགྲོ་གསོ་སྐྱོང་བྱ་རྒྱུ་སོགས་རིམ་པས་ཡར་རྒྱས་ལ་ཁ་ཕྱོགས། གདོད་མའི་སྤྱི་ཚོགས་ནས་དུས་རབས་དང་མཐུན་པའི་གསར་བརྗེའི་ལམ་ལ་ཁ་ཕྱོགས་ཤིང་། རིམ་པས་ཆབ་སྲིད་དང་དཔལ་འབྱོར་གྱི་རྒྱབ་བརྟེན་འོག་མི་རིགས་སོ་སོའི་སྐད་ཡིག་དང་རིག་གཞུང་། གོམ་གཤིས་སོགས་རྩ་ཆེར་བཟུང་།
མི་རིགས་དབར་གྱི་ས་མཚམས་དེ་སྐད་ཡིག་དང་རིག་གཞུང་ལ་འགན་བསྐུར་ཞིང་། སྐད་ཡིག་དང་རིག་གཞུང་ནི་མི་རིགས་ཀྱི་ངོ་རྟགས་སམ་མི་རིགས་ཀྱི་འབྱུང་ཁུངས་ལ་སོང་། སྐད་ཡིག་དང་རིག་གཞུང་འོག་ཏུ་མི་རིགས་འཚོ་དགོས་པ་དེ་ད་ལྟའི་དུས་སྐབས་འདིར་གལ་ཆེའི་ནང་གི་གལ་ཆེན་ཞིག་ཡིན་པའི་ངོས་འཛིན་ཞུ་གི་ཡོད་ལ། མི་རིགས་གང་ཞིག་གི་སྐད་ཡིག་དང་རིག་གཞུང་ལ་ཉམས་ཆགས་ཕྱིན་པའི་ཉིན་མོ་དེ་ནས་མི་རིགས་དེའི་ངོ་རྟགས་སམ་མི་རིགས་དེའི་འབྱུང་ཁུངས་རླག་ནས། མི་རིགས་དེ་འཛམ་གླིང་གི་མི་ཡི་སྤྱི་ཚོགས་ཆེན་པོའི་ནང་བྱེ་སྟེང་དུ་ཆུ་བླུག་པ་ལྟར་སིམ་རྒྱུ་ཡིན་པ་ཚིག་ཐག་བཅད་ནས་བཤད་ཐུབ་པ་དང་མཐོང་ཐུབ་པ་ཞིག་ཡིན་ན། ང་ཚོ་བོད་མི་རིགས་ལ་ཆ་བཞག་ན་ཐོག་མ་ཉིད་ནས་མི་འབོར་གྲངས་ཉུང་ཡིན་པ་དང་། སྤྱི་ལོ་ ༡༩༥༩ ལོར་རྒྱ་ནག་གིས་བོད་ལ་དྲག་པོའི་བཙན་འཛུལ་བྱས་པའི་ཤུགས་རྐྱེན་འོག་བོད་མི་ས་ཡ་གཅིག་དང་ཕྱེད་ཀ་ལྷག་ཙམ་དོན་རྐྱེན་དེའི་འོག་ཏུ་རང་ཤི་རྒྱབ་པ་དང་ལྟོག་ཤི་ཐེབ་པ། དམག་སར་ཤོར་བ་དང་བཙོན་ཁང་ནང་མནར་གཅོད་འོག་ཤི་བ་སོགས་བོད་ཀྱི་མི་འབོར་ལ་ཉམས་ཆགས་ཆེན་པོ་ཕོག་ཡོད།
བཙན་བྱོལ་དུ་བོད་མི་འབུམ་གཅིག་ལྷག་ཙམ་ལས་འབྱོར་མེད་པ་ནས་དེ་ཡང་ཕྱི་རྒྱལ་ལུང་པ་མང་པོའི་ནང་བོད་མི་ཁྱིམ་ཚང་རེ་ཙམ་གཉིས་ཙམ་བྱས་ནས་སྒེར་གྱི་འཚོ་བ་སྐྱེལ་བཞིན་ཡོད་པས། བོད་མི་རིགས་ཀྱི་ཐུན་མོང་མ་ཡིན་པའི་སྐད་ཡིག་དང་རིག་གཞུང་ལ་བེད་སྤྱོད་དམ་བཀོལ་སྤྱོད་བྱ་རྒྱུའི་འཁོར་ཡུག་ག་ཚོད་ཡོད་དེ་ཡང་ཧ་ཅང་གསལ་བོ་རེད། རྒྱ་བལ་འབྲུག་གསུམ་ནང་ཡོད་པའི་བོད་མིའི་གཞིས་ཆགས་དང་། དགོན་པ་གྲྭ་ཚང་ཁག་གི་ནང་ཡོད་པའི་བོད་མི་ཚོ་ནི་ཕ་མེས་ནས་བརྒྱུད་པའི་སྐད་ཡིག་དང་རིག་གཞུང་གསོན་པོར་གནས་ཐུབ་པའི་རེ་བའི་མིག་འབུར་སྟོད་ས་ཡིན། གཞིས་ལ་ཡོད་པའི་བོད་མི་ཚོ་རྒྱ་མིའི་བཙན་གནོན་འོག་ཟས་ལ་བཅུད་མེད་པ་དང་ཉལ་ན་གཉིད་མེད་པ། ཉིན་མཚན་འཁྱོལ་དཀའ་བའི་གཞན་དབང་འོག་སོ་སོའི་སྐད་ཡིག་དང་། རིག་གཞུང་ལ་འགན་འཁུར་ཐུབ་པའི་འཁོར་ཡུག་ཕར་བཞག་རང་གི་སྲོག་མགོ་མ་འཐོན་པའི་དཀའ་ངལ་འོག་ཉིན་འཁྱོལ་ན་མཚན་མི་འཁྱོལ་བ་དང་། མཚན་འཁྱོལ་ན་ཉིན་མི་འཁྱོལ་བའི་དཀའ་ངལ་ངང་གནས་ཡོད།
ང་ཚོ་བཙན་བྱོལ་དུ་ཡོད་པའི་བོད་མི་རྒན་དར་གཞོན་གསུམ་ཚང་མས་རང་གི་ཕ་མེས་ནས་བརྒྱུད་པའི་སྐད་ཡིག་དང་། རིག་གཞུང་གོམ་གཤིས་སོགས་མ་ཉམས་གོང་འཕེལ་དང་། ཉམས་པ་སླར་གསོ་བྱ་རྒྱུའི་འགན་ཡིན་པ་ཤེས་པ་བྱས་ནས་སོ་སོའི་ཕ་མེས་ནས་བརྒྱུད་པའི་སྐད་ཡིག་དང་རིག་གཞུང་དེ་རང་ཉིད་ཀྱི་ངོ་རྟགས་སམ་འབྱུང་ཁུངས་ཡིན་པ་ཤེས་པའི་ཐོག་ནས་སོ་སོའི་སྐད་ཡིག་དང་རིག་གཞུང་ལ་བཀོལ་སྤྱོད་ཐུབ་པའི་འགན་འཁུར་ལེན་དགོས་པ་དེ། འཕྱི་སྐྱོན་མེད་ན་འང་སྔ་སྐྱོན་ག་ནས་ཡོད་ལ། ལྷག་པར་དུ་ནང་པ་སངས་རྒྱས་པའི་སྟོན་པ་བཀའ་དྲིན་ཅན་དེ་ཉིད་ཀྱི་གསུང་པའི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ད་ལྟའི་ཆ་ལ་བོད་ཀྱིས་སྐད་ཡིག་སྟེང་ཡོད་པ་ནས་དེ་དག་འཇིག་རྟེན་གྱི་ས་གཞི་འདི་མ་འཇིག་བར་གསོན་པོར་གནས་ཐུབ་པའི་འགན་དེ་ང་ཚོ་ནང་བསྟན་ཆོས་ལུགས་ཀྱི་རྗེས་འབྲང་ཚོར་ཡོད་པ་ནས་བོད་ཀྱི་སྐད་ཡིག་དེ་མུ་མཐུད་ནས་གནས་དགོས་པ་དེ་གལ་ཆེའི་ནང་གི་གལ་ཆེན་ངོ་མ་དེ་ཡིན་པའི་ངོ་སྤྲོད་ཡང་བྱ་འདོད་བྱུང་།
སླར་སྨྲས་པ།
སྐད་ཡིག་རིག་གཞུང་བརྒྱུད་ནས་མི་རིགས་ངོས་འཛིན་ཐུབ།།
སྐད་ཡིག་རིག་གཞུང་བརྒྱུད་ནས་མི་རིགས་འབྱུང་ཁུངས་ཤེས།།
སྐད་ཡིག་རིག་གཞུང་བརྒྱུད་ནས་མི་རིགས་ངོས་འཛིན་ཐུབ།།
སྐད་ཡིག་རིག་གཞུང་མི་རིགས་ས་མཚམས་ཡིན།།
རང་སྡེའི་རིགས་ལ་ཞེན་པ་དཀར་པོའི་མདངས།།
རང་བྱུང་སྙིང་གི་དབུས་ན་གནས་པ་འདི།།
རང་གི་ཕ་མེས་བརྒྱུད་པའི་སྐད་ཡིག་རིག་གཞུང་ལ།།
རང་གི་བཀོལ་སྤྱོད་བྱ་རྒྱུ་རང་དོན་རང་གིས་འགན།།
གཞུང་པས་། ༢༠༢༣/༠༤/༢༦