བསེ་རུ། ཨོ་གླིང་།
སྐད་ཡིག་ནི་སྤྱི་པའི་རྒྱུ་ནོར་རེད།
སུ་ལ་དགོས་ནའང་བེད་སྤྱོད་བཏང་ན་འགྲིགས་ཀྱི་རེད། རྒྱུ་ནོར་ལ་བདག་པོ་ཇི་ཛམ་མང་བ་དེ་ཙམ་གྱིས་རྒྱུ་ནོར་གྱི་རིན་ཐང་ཆེ་རུ་འགྲོ་ལ་ཕན་རླབས་ཀྱང་ཇེ་ཆེར་འགྲོ།
སྐད་ཡིག་ནི་སྤྱི་པའི་རྒྱུ་ནོར་རེད། སྒེར་བདག་བྱེད་འདོད་པ་ནི་སྐད་ཡིག་གི་འགྲོ་འདུག་སྤྱོད་གསུམ་ལ་བཀག་རྒྱ་བཟོས་པ་ཙམ་རེད། སྐད་ཡིག་ལ་གཅེས་པ་ནི་ཀུན་གྱིས་འོས་འགན་རེད། འོན་ཀྱང་གཅེས་སྟངས་གཅེས་ལུགས་མ་ཤེས་ན་སྐད་ཡིག་གི་གཤེད་མ་ཆགས་ཉེན་ཡོད།
སྐད་ཡིག་ནི་སྤྱི་པའི་རྒྱུ་ནོར་རེད། སྐད་ཡིག་གི་ལས་འགན་ནི་སྤྱི་ཚོགས་སྟེང་དོན་ཕན་ལྡན་པའི་ལས་དོན་སྒྲུབ་རྒྱུ་དེ་རེད། དེ་ལ་རྒྱལ་ཁབ་དང་མི་རིགས་ཀྱི་ས་མཚམས་མེད། སུ་ལའང་མཁོ་ནའང་དེས་བེད་སྤྱོད་བཏང་ན་ཆོག
སྐད་ཡིག་ནི་སྤྱི་པའི་རྒྱུ་ནོར་རེད། སྤྱི་པའི་རྒྱུ་ནོར་ལ་འདི་ངའི་དང་དེ་ཁོའི་རེད་ཟེར་རྩོད་དགོས་དོན་མེད། ཅི་སྟེ་དེ་ལྟར་རྩོད་ན་ཁྱིམ་ཚང་གཅིག་གི་རྒྱུ་ནོར་ལ་ནང་མི་བུ་ཕྲུག་འཁྲུག་རྩོད་ཤོར་བ་དང་འདྲ། ཉིན་དེ་ནས་ཁྱིམ་ཚང་གི་དམ་ཚིག་ཉམས་པ་ལྟར་སྐད་ཡིག་ཉམས་རྒུད་ཀྱི་ཐན་ལྟས་ཤར་བ་རེད།
སྐད་ཡིག་ནི་སྤྱི་པའི་རྒྱུ་ནོར་རེད། སྟེང་ལྷ་ཡུལ་དང་བར་མི་ཡུལ། འོག་ཀླུ་ཡུལ་གང་དུའང་སྐད་ཡིག་བེད་སྤྱོད་བཏང་ན་བསམ་འཆར་གང་ཡང་མེད།
སྐད་ཡིག་ནི་སྤྱི་པའི་རྒྱུ་ནོར་རེད། དེའི་ཆེད་དུ་ཁྱེད་ཀྱིས་ངུས་ཆོག་ལ་ངས་ཀྱང་བགད་ཆོག དེའི་ཆེད་དུ་ང་ཚང་མས་ཐབས་ཤེས་ཡོད་རྒུ་བཏོན་ནས་སྐད་ཡིག་གི་མངའ་ཐང་རྒྱས་ཐབས་ལ་འབད་དགོས། སྐད་ཡིག་ལ་གཅེས་པ་ནི་སྤྱི་པའི་རྒྱུ་ནོར་ལ་གཅེས་པ་རེད། སྤྱི་དོན་ལ་ལྷག་བསམ་རྣམ་དག་ངང་གཅེས་པ་རེད། སྐད་ཡིག་ལ་གཅེས་ནི་རང་ཉིད་ཀྱིས་ཀྱིས་རང་ཉིད་གཅེས་སྟངས་རབ་དང་ཕུལ་དུ་གྱུར་པ་དེ་རེད།
སྐད་ཡིག་ནི་སྤྱི་པའི་རྒྱུ་ནོར་རེད། སྐད་ཡིག་ནི་ངེད་ཀྱི་རེད་ལ་ཁྱེད་ཀྱི་ཀྱང་རེད། མདོར་ན་སྐད་ཡིག་ནི་ང་ཚོ་ཚང་མའི་རེད།