སྐད་ཡིག་རང་དབང་གི་ངོ་རྒོལ་དང་རྒྱ་ནག་གི་ཁྲིམས།

ནམ་མཁའ།༢༣/༣/༢༠༡༢ལ་ཡོ་རུབ་ནས་བྲིས།

སྤྱིར་འཛམ་གླིང་འདིའི་སྒང་མི་རིགས་ཀྱི་དབྱེ་འབྱེད་ནི་སྐད་དང་ཡི་གེ་རིགས་གཞུང་ལ་རྟེན་ནས་འབྱེད་དགོས་བ་དང་།མི་རིགས་ཞིག་འཛམ་གླིང་སྟེང་གསོན་པོར་འཚོ་ཡོད་མེད་ཀྱང་མི་རིགས་དེའི་སྐད་དང་རིགས་གཞུང་གནས་ཡོད་མེད་བལྟ་དགོས་སྙམ། མི་རིགས་ཞིག་འཆི་བ་ཡང་དེའི་སྐད་རིགས་སོགས་གསོན་པོར་གནས་མ་ཐུབ་ཚེ་འཆི་བ་ཞིག་ལ་ངོས་འཛིན་བྱེད་ཀྱི་ཡོད་པ་རེད་བསམ།

གནས་སྟངས་འདི་འདྲ་ཞིག་གི་དབང་གིས་དེང་སང་གི་རྒྱ་ནག་གི་ཆབ་སྲིད་དབང་འཛིན་པ་ཚོས། དུས་རབས་ཉི་ཤུའི་ལོ་རབས་བརྒྱད་བཅུའི་དབང་འཛིན་པ་ཚོས་བཟོས་བའི་གྲངས་ཉུང་མི་རིགས་ཀྱི་ཐོག་ལ་གཏན་འབེབ་བྱས་བའི་རྩ་ཁྲིམས་ལ་གཏོར་བཤིག་བཏང་སྟེ། གྲངས་ཉུང་མི་རིགས་ཀྱི་བོད་རིགས་གཙོ་བོར་དམིགས་ནས། གྲངས་ཉུང་མི་རིགས་ཆ་ཚང་རྨ་མེད་ཀྱིས་གསོད་འདོད་སྐྱེ་ཡོད།

ད་རུང་ཡང་འཛམ་གླིང་དང་བོད་མི་རིགས་ཀྱི་མདུན་ལ་བཤམས་པའི་རྒྱ་ནག་གི་བཅའ་ཁྲིམས་ཀྱི་དོན་ཚན་འགའ་ངས་འདིར་འགོད་རྒྱུ་ཡིན་པས་སྨྱུག་ཐོག་པ་ཚོས་བསམ་ཚུལ་ཕྲན་བུ་རེ་འབུལ་རྒྱུའི་རེ་བ་ཤིན་ཏུ་ནས་ཆེ།

༡༩༨༤ལོའི་༥/ཚེས༣༡ཉིན་རྒྱལ་ཡོངས་འཐུས་མི་ཚོགས་ཆེན་སྐབས་དྲུག་པའི་གྲོས་ཚོགས་ཐེངས་སོ་གཉིསཔའི་ཐོག་གྲོས་འཆམ་བྱུང་ཞིང་། ༢༠༠༡ལོའི་ཕྱི་ཟླ༢ཚེས༢༨ཉིན་རྒྱལ་ཡོངས་མི་དམངས་འཐུས་མི་ཚོགས་ཆེན་སྐབས་དགུ་བའི་རྒྱུན་ལས་གྲོས་ཚོགས་ཀྱི་ཐེངས་ཉི་ཤུ་བའི་ཐོག་བཞག་པའི་བཅའ་ཁྲིམས་ལ་བཟོ་བཅོས་རྒྱག་རྒྱུའི་ཆོད་དོན་ལྟར་བཟོ་བཅོས་བྱས་བའི་ཁྲིམས།

དོན་ཚན་བཅུ་བ། མི་རིགས་ས་གནས་ཀྱི་རང་སྐྱོང་ལས་ཁུངས་ཀྱིས་ས་གནས་དེ་གའི་མི་རིགས་ཁག་ཚང་མར་རང་ཉིད་ཀྱི་སྐད་ཡིག་བེད་སྤྱོད་དང་དར་རྒྱས་སུ་གཏོང་བའི་རང་དབང་ཡོད་པ་དང་།རང་ཉིད་ཀྱི་ཡུལ་སྲོལ་གོམས་གཤིས་སྔར་མུས་འཛིན་པའམ་བསྒྱུར་བཅོས་བྱེད་པའི་རང་དབང་ཡོད་པར་འགན་སྲུང་བྱ་རྒྱུ།

དོན་ཚན་ཉེར་གཅིག་པ།
མི་རིགས་རང་སྐྱོང་ས་གནས་ཀྱི་རང་སྐྱོང་ལས་ཁུངས་ཀྱིས་ལས་འགན་སྒྲུབ་སྐབས་མི་རིགས་རང་སྐྱོང་ས་གནས་དེ་གའི་རང་སྐྱོང་སྲོལ་ཡིག་ནང་གསལ་གཏན་འབེབས་ལྟར་ས་གནས་དེ་གར་ཐུན་མོང་དུ་སྤྱོད་པའི་སྐད་ཡིག་ཡིག་རིགས་གཅིག་གམ་ཁ་ཤས་སྤྱོད་རྒྱུ་དང་།ཐུན་མོང་དུ་སྤྱོད་པའི་སྐད་ཡིག་རིགས་ཁ་ཤས་ཀྱི་ཐོག་ནས་ལས་འགན་སྒྲུབ་སྐབས་ས་ཁོངས་རང་སྐྱོང་དངོས་སུ་བྱེད་པའི་མི་རིགས་དེའི་སྐད་ཡིག་གཙོ་བོར་བཟུང་ཆོག

དོན་ཚན་དོན་གཅིག་པ། ༼ཚན་བཤུས་གཅིག༽
གྲངས་ཉུང་མི་རིགས་ཀྱི་སློབ་གྲྭ་བ་བསྡུ་རྒྱུ་གཙོ་བོར་འཛིན་པའི་སློབ་གྲྭ་༼འཛིན་གྲྭའམ་སློབ་རིམ༽དང་སློབ་གསོའི་སྒྲིག་གཞི་གཞན་དག་ནང་ནས་ཆ་རྐྱེན་འཛོམས་པའི་རིགས་ཀྱི་གྲངས་ཉུང་མི་རིགས་ཡི་གེའི་སློབ་དེབ་སྤྱོད་དགོས་བ་མ་ཟད།གྲངས་ཉུང་མི་རིགས་ཀྱི་སྐད་ཡིག་ཐོག་ནས་སློབ་ཁྲིད་ཀྱང་བྱ་དགོས། གནས་ཚུལ་ལ་གཞིགས་ཏེ་སློབ་གྲྭ་ཆུང་བའི་སློབ་རིམ་དང་དམའ་རིམ་བའམ་སློབ་རིམ་མཐོ་བ་ནས་རྒྱ་ཡི་སྐད་ཡིག་གི་སློབ་ཚན་བཙུགས་ཏེ་རྒྱལ་ཡོངས་སྤྱི་ཁྱབ་རྒྱ་སྐད་དང་རྒྱ་ཡིག་ཚད་ལྡན་ཅན་ཁྱབ་སྤེལ་གཏོང་རྒྱུ་དང་། མི་དམངས་སྲིད་གཞུང་རིམ་པ་ཁག་གིས་ནོར་སྲིད་ཐོག་ནས་གྲངས་ཉུང་མི་རིགས་ཡི་གེ་སློབ་དེབ་དང་དཔེ་སྐྲུན་ཡིག་རིགས་རྩོམ་སྒྱུར་དང་དཔེ་སྐྲུན་ལས་ཀར་རོགས་སྐྱོར་བྱ་རྒྱུ། བཅའ་ཁྲིམས་དོན་ཚན་འགའ་འདི་ངས་བཀོད་དོན་སྨྱུག་ཐོག་པ་ཚོས་གཟིགས་ཞིབ་གནང་གལ་ཆེད་ཕབ་པ་ཡིན།

རེ་བ་སྡུག་ས་ནས་རྒྱབ་སྟེ་བཤད་ན། གལ་སྲིད་རྒྱ་ནག་གཞུང་གིས་རྩ་ཁྲིམས་འདི་ལྟར་ལག་ལེན་དངོས་སུ་བྱས་ཚེ། དེ་རིང་གི་བོད་མི་རིགས་བྱིས་པ་ཡན་གྱི་སེམས་ཁུང་དུ་ན་ཟུག་འདི་འདྲ་བསྐྱེད་མི་སྲིད་ལ། ཁོང་ཚོས་ཀྱང་འཛམ་གླིང་སྟེང་བཤད་པ་བཞིན་ཆོས་དང་རིག་གཞུང་རང་དབང་ཡོད་ཚུལ་བསྐྱར་ཟློས་དང་ཡང་ཟློས་བྱེད་མི་དགོས་བ་མ་ཟད། ཁོང་ཚོས་ཉན་འདོད་མེད་པའི་བོད་མི་རིགས་ཀྱི་འབོད་སྒྲ་དེ་ཡང་རྣོ་ངར་ཅན་དུ་འགྲོ་མི་སྲིད།
ཡིན་ཡང་ཁ་ནས་བཤད་དེ་ཡིག་ཐོག་ཕབ་པའི་ཁྲིམས་དང་ལག་ལེན་བསྟར་བའི་ཁྲིམས་གཉིས་ནང་འགལ་དུ་གྱུར་བས་ནམ་ཡིན་ཡང་གྲངས་ཉུང་མི་རིགས་ཆ་ཚང་ཡིད་ཆེས་མེད་པ་མ་ཟད།
ཁོང་ཚོ་རྒྱ་ནག་མི་རིགས་མང་པོ་ཡང་གུང་ཁྲན་ཏང་གིས་གང་བཤད་པ་ལ་ཡིད་ཆེས་རྩ་བ་མེད།
ཡིད་ཆེས་མེད་པའི་བོད་མི་རིགས་དང་མི་དམངས་ཀྱི་རང་དབང་ལ་བསམ་གཞིགས་བྱེད་མཁན་ཚོས། གུང་ཁྲན་ཏང་ལ་རྒོལ་གཏམ་སྤེལ་དུས་ཁོང་ཚོས་ལམ་སེང་ཁྲིམས་འགལ་རེད་ཟེར་ནས་འཛིན་བཟུང་བྱས་ཏེ་བཙོན་འཇུག་བྱེད་བཞིན་པ་ཡོད།
ཡིན་ཡང་རྒྱ་གཞུང་ཆབ་སྲིད་ལས་ཐོག་པ་ཁོང་ཚོས་ཁྲིམས་འགལ་གྱིས་ལས་བྱས་ཚེ། དེ་ནི་ཡང་དག་པ་དང་རྒྱལ་ཁབ་དང་མི་དམངས་ལ་ཞབས་ཞུ་བྱེད་པའི་ངོ་བོར་བསྒྱུར་གང་ཐུབ་བྱེད་པ་འདི། སྲིད་དབང་སྒེར་གཅོད་པ་ཚོས་རང་གི་ཁེ་ཕན་ཁོ་ན་ལས་མ་འདས་མོད།
འོན་ཀྱང་མི་དམངས་ཀྱིས་ཁྱེད་ཚོས་ཁྲིམས་འགལ་གྱི་ལས་ཀ་བྱེད་ཀྱི་འདུག་ཅེས་བརྗོད་ཆོག་པའི་གཏམ་བརྗོད་ཀྱི་རང་དབང་ནམ་ཡང་མེད། ལོ་ངོ་དྲུག་བཅུ་ལྷག་གི་རིང་ལ་གུང་ཁྲན་ཏང་ཐོག་མཐའ་བར་གསུམ་དུ་ཡང་དག་པ་ཡིན་ཞེས་ཁྱབ་བསྒྲགས་བྱེད་ཀྱི་ཡོད་ལ། གུང་ཁྲན་ཏང་ལ་ནོར་འཁྲུལ་ཡོད་པ་ཞིག་སྲིད་དབང་སྒེར་གཅོད་པ་ཚོས་ཁས་ལེན་དུས་ནམ་ཡང་མི་བྱེད། དེས་ན་གུང་ཁྲན་ཏང་སུ་རེད་དམ། མི་དམངས་ཡིན་ནམ་ཆབ་སྲིད་ལས་ཐོག་ཁོང་ཚོ་རེད། ནོར་འཁྲུལ་ཞིག་བྱུང་བའི་ཉིན་མོར་མི་སུ་ཞིག་དབང་ཤུགས་དང་གཡོ་སྒྱུ་ལྡན་པ་དེས་ཁོ་རང་གི་མི་འདོད་པའི་མི་ཞིག་བཙལ་ནས་དེའི་མགོ་ལ་ཞྭ་མོ་ནག་པོ་ཞིག་གོན་གྱི་ཡོད་པ་འདི་སྲིད་དབང་སྒེར་གཅོད་པ་ཚོས་གཡོ་ཐབས་ཆེ་ཤོས་དེ་ཡིན། ཁ་སང་བཟོས་བའི་ཁྲིམས་དང་དེ་རིང་བཤད་པའི་གཏམ་གཉིས་འགལ་ཟླར་གྱུར་ན་ཡང་།
སྲིད་དབང་སྒེར་གཅོད་ཀྱི་དབང་ཤུགས་ཀྱིས་མི་དམངས་ལ་མགོ་བོ་བསྐོར་གང་ཐུབ་བྱེད་ཀྱི་ཡོད།
དེར་ངས་འདི་ལྟར་བརྗོད་འདོད་སྐྱེ། ཁྲིམས་བཟོ་མཁན་གྱིས་ཁྲིམས་འགལ་གྱི་ལས་ཀ་ཡང་བྱེད་ཀྱི་ཡོད་པ་རེད་ཞེས་ལབ་འདོད་བྱུང་།

དེ་རིང་ང་ཚོ་བོད་མི་རིགས་ཀྱི་སློབ་ཕྲུག་ཚོའི་ལག་ཏུ་སློབ་དེབ་རྒྱ་ཡིག་གི་དེབ་བཞག་པ་འདི།
ངས་གོང་དུ་བྲིས་བའི་རྒྱ་གཞུང་གི་ཁྲིམས་དང་མཐུན་པ་ཞིག་ཡིན་ནམ།
འདི་ནི་འཛམ་གླིང་གི་ལག་དམར་གཉིས་པ་ཟི་ཏ་ལེན་གྱི་མི་རིགས་ཞིག་རྩ་མེད་དུ་གཏོང་བའི་ཐབས་བྱུས་ངན་པའི་ལམ་ཁ་དེར། བོད་མི་རིགས་ཀྱི་དུས་རབས་གཉིས་ཀྱི་ལག་དམར་ཧའོ་ཅིན་ཐའོ་ཤར་བསྐྱོད་བྱེད་ཀྱི་ཡོད།
སྐབས་འདིར་ང་ཚོ་བོད་མི་རིགས་ཀྱིས་བསམ་གཞིགས་ཞིབ་མོ་ཞིག་ངེས་བར་དུ་གཏོང་དགོས།
སྤྱིར་རྒྱ་གཞུང་དམར་ཕྱོགས་ཀྱི་ཚེ་སྲོག་དུས་ག་ཚོད་བར་དུ་གནས་ཐུབ་མིན་བཤད་དཀའ་ཚོད་རེད། ཡིན་ཡང་ཁ་སང་དེ་རིང་གནས་སྟངས་ལ་གཞིགས་ཏེ་བཤད་ན། དེ་རིང་བོད་རིགས་ཞིག་སྐྱེ་བའི་བྱིས་པ་དམར་འབྱར་དེ་ལོ་ལྔ་བཅུ་སླེབས་དུས་ཁོའི་ཚ་བོ་དང་ཚ་མོ་ཚོའི་བོད་སྐད་དང་བོད་ཡིག་ཤེས་རྒྱུ་རེད་དམ། དྲི་བ་འདི་ལ་མི་ཁ་ཤས་ཞིག་གད་མོ་ཤོར་སྲིད་མོད།
འོན་ཀྱང་ངས་མིག་གིས་དངོས་སུ་མཐོང་བའི་ཉམས་མྱོང་ཕྲན་བུ་ཞིག་བཤད་ན།
དེང་སང་བོད་ནང་དུ་ཕ་མ་གཉིས་རྒྱ་གཞུང་གི་ལས་བྱེད་ཡིན་མཁན་དང་།ཆ་རྐྱེན་འཛོམས་མཁན་གྱི་ཁྱིམ་ཚང་གིས་རང་གི་བུ་ཕྲུག་རྒྱ་ཡི་སློབ་གྲྭ་བཏང་སྟེ་རྒྱ་ཡི་སྐད་རིགས་སློབ་ཀྱི་ཡོད།
བུ་ཕྲུག་དེ་ཚོས་བོད་སྐད་ཡག་པོ་ཞིག་ཀྱང་ཤེས་ཀྱི་མེད་ལ།བོད་ཀྱི་རིག་གཞུང་དེ་བས་ཀྱང་ཤེས་ཀྱི་མེད། སྤྱིར་ཕ་མ་སུ་ཡིན་ཡང་རང་གི་བུ་ཕྲུག་ཚོའི་བདེ་སྡུག་ལ་སེམས་ཁུར་བྱེད་པ་མི་ཡི་ཆོས་ཉིད་ཡིན་ལ། བོད་ཡིག་གི་སློབ་མཐར་ཕྱིན་རྗེས་ལས་ཀ་རེག་རྒྱུ་ཁེག་པོ་ཡོད་པས་ཕ་མ་ཚོས་ཀྱང་རང་གི་བུ་ཕྲུག་གི་མདུན་ལམ་ལ་བསམ་བློ་མི་གཏོང་མཁན་སུ་ཡོད། ད་རུང་ཕ་མ་ཁ་ཤས་ཀྱིས་ཁོང་ཚོའི་བསམ་བློ་སྔོན་ཐོན་ཡིན་འདོད་མཁན་ཡོད། གང་ལྟར་རིམ་གྱིས་ཉམས་མས་སུ་འགྲོ་རྒྱུ་ལ་ཐག་རིང་པོ་ཞིག་མ་རེད་སྙམ།
འདི་ལྟར་བསམ་གཞིགས་ཀྱི་དབང་གིས་བོད་ནང་གི་སློབ་ཕྲུག་ཚོས་རང་སྲོག་འབེན་དུ་བཞག་སྟེ།
རྒྱ་གཞུང་གི་ལག་བསྟར་སྲིད་བྱུས་ལ་ངོ་རྒོལ་བྱས་ཀྱང་བཙན་བྱོལ་གཞུང་གི་སློབ་ཕྲུག་ཚོ་ད་རུང་ལུས་སེམས་ལྷོད་པའི་རྨི་ལམ་གྱི་ཞིང་དུ་མྱུལ་བཞིན་ཡོད། འདི་ནི་སློབ་ཕྲུག་ཚོས་ནོར་འཁྲུལ་མ་ཡིན་པར་གཞུང་གི་ཤེས་རིག་གི་སློབ་གསོ་ལ་རེག་ལས་ཡོད།

གཉིས་པ། བཙན་བྱོལ་གཞུང་གི་བོད་ཡིག་གི་ཚེ་སྲོག
ངས་འདི་གར་དཔེ་མཚོན་སྟབས་བདེ་ཞིག་གིས་སྟེང་ནས་བཤད་ཆོག
དཔེར་ན། མི་ཞིག་འཇིག་རྟེན་འདི་ནས་ཚེ་སྲོག་ཆད་དེ་རྣམ་ཤེས་བར་དོ་རུ་འཁྱམས་ཏེ་འཇིག་རྟེན་འདིར་ལུས་ཕུང་མ་གཏོགས་ལུས་མེད་པ་བཞིན། བཙན་བྱོལ་གཞུང་ན་དུས་རབས་ཉི་ཤུའི་ལོ་བརྒྱད་བཅུའི་མཇུག་བར་དུ་བོད་ཡིག་གི་ཚེ་སྲོག་ཆད་དེ་ལུས་ཕུང་ཁོ་ན་ལྷག་ཡོད། ལོ་རབས་བརྒྱད་བཅུའི་མཇུག་ཏུ་བོད་ནས་གསར་འབྱོར་བ་ཚོ་སླེབས་ནས་བོད་ཡིག་གི་ལུས་ཕུང་ལ་ཚེ་སྲོག་སྦྱིན་སྟེ། ཡང་བསྐྱར་བོད་ཡིག་གི་ཚེ་སྲོག་གསོན་པོར་གནས་ཐུབ་ཙམ་བྱུང་། དཔེར་ན་དམངས་གཙོ་ཚགས་པར་དང་ལྗང་གཞོན་སོགས་དུས་དེབ་འདྲ་མིན་དང་ཚགས་པར་འདྲ་མིན་སོགས་བཏོན་ཏེ་བོད་ཡིག་ལ་དོན་སྣང་གསར་བ་སྟེར་ཐུབ་ཡོད། དེང་སང་དུས་བབ་དང་བང་ཆེན་སྤྱི་ཚོགས་མེ་ལོང་དང་། དེ་མིན་དུས་དེབ་ཡང་སྣ་ཚོགས་བཏོན་དང་བཏོན་བཞིན་ཡོད་པས་ཧ་ཅང་སྤྲོ་བ་འཕེལ་བ་ཞིག་ཡོད།
དཔལ་འབྱོར་གྱི་ཆ་རྐྱེན་མེད་ན་ཡང་རང་གི་ཁུག་མ་ནས་བཏོན་ཏེ་བོད་ཡིག་སླར་གསོ་བྱེད་ཐབས་ལ་འབད་པའི་མཐོ་སྒང་གི་རྒྱབ་མདུན་སོགས་མང་པོ་ཞིག་ཡོད་མོད། ཡིན་ཡང་དཔལ་འབྱོར་གྱི་ནུས་པ་ལ་རྟེན་དགོས་དུས།བཙན་བྱོལ་སྤྱི་ཚོགས་སུ་གསར་ཤོག་ཉོས་ཏེ་ཀློག་མཁན་ཧ་ཅང་ཉུང་བས་སེམས་ཤུགས་ཡོད་ཀྱང་བྱ་ཐབས་བྲལ་བའི་དབང་གིས་མཚམས་འཇོག་དགོས་བྱུང་བའི་གསར་ཤོག་དང་དུས་དེབ་མང་པོ་ཞིག་ཡོད།

།ད་ལྟའི་ཆར་ལ་ཡང་གཟུངས་ཕྱུག་སྐྱིད་སོགས་ཀྱིས་སྙན་ངག་གྱེར་འདོན་དང་བགྲོ་གླེང་སོགས་ཀྱིས་བཙན་བྱོལ་གཞུང་གི་སློབ་ཕྲུག་ཚོ་བོད་ཡིག་ལ་དོན་སྣང་གསར་བ་དང་སེམས་ཤུགས་འཕར་ཐབས་ལ་འབད་བཞིན་པས་བོད་ཡིག་གི་ཚེ་སྲོག་སྦྱིན་པའི་སྨན་པ་ལྟ་བུ་ཞིག་གྱུར་ཡོད།
བཙན་བྱོལ་གཞུང་གི་ཤེས་རིག་སྲིད་ཇུས་ལ་སྐྱོན་ཆ་མང་པོ་ཡོད་པའི་རྒྱུ་མཚན་གཅིག་ཁོར་ཡུག་གི་དབང་གིས་ཀྱང་བྱུང་བ་དང་། དེ་མིན་ཤེས་རིག་བཀའ་བློན་ཡང་བོད་ཡིག་མི་ཤེས་མཁན་དང་བོད་ཀྱི་རིག་གཞུང་མི་ཤེས་མཁན་བསྡད་མྱོང་ཡོད། དཔེར་ན་བཀའ་ཟུར་རྗེ་བཙུན་པད་མ་དང་རིན་ཆེན་མཁའ་འགྲོ་ལྟ་བུ་སོགས་ཀྱིས་ཤེས་རིག་བཀའ་བློན་གྱི་འགན་ཁུར་བཞེས་བ་རེད། བཙན་བྱོལ་གཞུང་གི་གཞོན་སྐྱེ་མང་པོ་ཞིག་བོད་ཡིག་དང་དབྱིན་ཡིག་གི་བར་ན་ཕུང་གསུམ་པ་ལྟ་བུ་གྱུར་ཡོད། དཔེར་ན་དབྱིན་ཅིའི་ལྡིང་ཆའི་སྒང་ནས་ཀྱང་གཏམ་བཤད་ཁུང་དག་མོ་བརྗོད་མི་ཐུབ་ལ། བོད་་སྐད་ཡིག་གི་ལྡིང་ཆའི་སྒང་ནས་ཡང་ཁུང་དག་གནད་འཁེལ་བ་ཞིག་བཤད་མི་ནུས།
འདི་དག་གནས་བབ་ལ་གཞིགས་ཏེ་བཤད་ན།བཙན་བྱོལ་གཞུང་གིས་མི་རིགས་ཞིག་གི་ཚེ་སྲོག་ཟེར་བ་ད་རུང་ངོས་འཛིན་བྱེད་ཐུབ་མེད་པ་འདྲ། ཐ་ན་ལག་ཤེས་ཚན་རིག་སོགས་ཀྱི་ཡིག་བསྒྱུར་ལས་ཁུང་ཞིག་ཀྱང་ལོ་ངོ་ལྔ་བཅུའི་རིང་འཛུགས་ཐུབ་མེད། གང་ལྟར་འདི་དག་ནི་ང་རང་ཉིད་ཀྱི་བསམ་ཚུལ་ཕྲན་བུ་ཞིག་ཡིན་པས་གཞུང་མང་སུ་ལ་ཡང་ཕོག་ཐུག་མི་འགྲོ་བའི་རེ་བ་ཡོད།