སྐབས་བཅུ་བཞི་པའི་བོད་མི་དམངས་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པ།2008-9-8—–16
བེ་རི་འཇིགས་མེད།
བློ་གཏོད་ལས་ལ་བཅོལ་བའི་རྨི་ལམ་རིང༌།།
ཡིད་ཆེས་ལྷ་ལ་རེ་བའི་དད་པ་ཟབ།།
རྣམ་རྟོག་འདྲེ་ལ་ཟ་བའི་བར་ཆད་མང༌།།
མགོ་ནག་བོད་པ་སྐྱབས་པའི་མགོན་དེར་མཆོད།།
ཀ་ར་ལས་ཀྱང་མངར་བའི་གསུང་བཤད་དང༌།།
ཁ་བ་ལས་ཀྱང་དཀར་བའི་ལྷག་བསམ་ཅན།།
ག་ས་ག་ནས་ཕེབས་པའི་སྤྱི་འཐུས་ཚོ།།
ང་ཚོ་དེ་རིང་སླར་ཡང་འཛོམས་པ་སྤྲོ།།
ཅ་ཅོ་རྩོད་ལ་དགའ་བའི་སྐུ་ངོ་ཚོ།
ཆ་རྒྱུས་ཡོད་མེད་ཁྱད་པར་མ་འཆིས་པར།།
ཇ་དང་ཆུ་ཙམ་མེད་པའི་ཚོགས་རའི་ནང༌།།
ཉ་དང་ཉུང་མ་བསྲེས་པའི་གཏམ་གླེང་སྤེལ།།
ཏཱ་ལའི་བླ་མའི་བཀའ་སློབ་ཁ་ལ་ཁུར།།
ཐ་སྙད་ནོར་བའི་ཡིག་ཆ་ལག་ཏུ་ཁུར།།
ད་ལོར་ཕེབས་པའི་སྤྱི་འཐུས་རྣམ་པ་ཚཽ།།
ན་ནིང་ལོ་དང་ཕལ་ཆེར་གཅིག་པ་རེད།།
པ་ཏྲའི་རིས་ལྟར་བཀྲ་བའི་རྣམ་དཔྱོད་ཅན།།
ཕ་མེས་རུས་ལ་ཞེན་པའི་ལ་རྒྱ་ཅན།།
བ་སོ་ལས་ཀྱང་དཀར་བའི་ལྷག་བསམ་ཅན།།
མ་རབ་མིན་པའི་སྐུ་ངོའང་མང་པོ་མཇལ།།
ཙ་གེ་གི་གེ་གནས་ལ་རྩོད་མཁན་དང༌།།
ཚ་གེ་ཚི་གེ་བྱས་ནས་ཉན་མཁན་དང༌།།
ཛ་དྲག་ཆབ་སྲིད་དོན་ལ་བགྲོ་གླེང་གིས།།
ཝ་ལེར་གྲོས་ཚོགས་འདིའི་ནང་འུར་ཟིང་ཆེ།།
ཞ་ལྟར་འཁྱོག་པའི་རང་དོན་བཤད་མཁན་དང༌།།
ཟ་རེ་ཟི་རེས་རྙོག་གྲ་སློང་མཁན་དང༌།།
འ་རེ་འི་རེས་གྲོས་ཆོད་ཁུར་མཁན་སོགས།།
ཡ་མཚན་ལྟད་མོ་མང་པོ་འདི་ནས་མཐོང༌།།
ར་བ་གངས་རིས་བསྐོར་བའི་ཞིང་ཁམས་ནས།།
ལ་ལུང་གཞན་དུ་སྐྱབས་བཅོལ་སླེབས་པའི་རྗེས།།
ཤ་ཁྲག་གཅིག་པའི་བོད་དོན་སྒྲུབ་པ་ལ།།
ས་གནས་འདི་ལས་ལྷག་ཅིག་མེད་པར་ཤེས།།
ཧ་ཅང་གལ་ཆེར་ལྡན་པའི་གྲོས་ཚོགས་འདི།།
ཧ་རེ་ཧོ་རེར་འཕྲོ་ལྷག་མི་གཏོང་བར།།
ཨ་ཡོད་ནང་གི་ད་ཡོད་སྤྱི་འཐུས་ཚོ།།
ཨ་རེ་བློ་རྩེ་གཅིག་ཏུ་སྒྲིམ་རོགས་གྱིས།།
ཧ་ལོན་དགོས་པའི་དགྲ་བོའི་གནོན་ཤུགས་འོག།
ཧ་ཅང་དཔའ་བའི་བོད་རིགས་མི་དམངས་ཚོ།།
ཨ་ལགས་བསྟན་འཛིན་རྒྱ་མཚོའི་དབུ་ཁྲིད་འོག།
ཨ་རེ་རང་དབང་བདེན་མཐའ་སེལ་བ་སྨོན།།
ཅེས་པ་འདི་ནི་སྤྱི་འཐུས་གྲོས་ཚོགས་སུ་སེམས་ལ་གང་ཤར་ཁ་ཐུག་གཤར་མ་བྱས་ནས་༢༠༠༨།༩།༡༠།ཉིན་གྲོས་ཚོགས་ཁང་དུ་བྲིས།