འགར་ཚེ་རྒྱལ།
ཤ་ཞེན་དང་། ལ་རྒྱ། ལྷག་བསམ་བཅས་སྤྱི་དོན་པྲ་སྐྱག་ཙམ་ཞིག་མེད་པར་ལས་འགུལ་ཞིག་སྤེལ་བའི་ཕུགས་རྒྱབ་ན་གོ་སྐབས་ཤིག་འཚོལ་བཞིན་ཡོད་མཁན་ཚོ་ནི་ནམ་ཡང་བརྫུས་མ་དང་གཡོ་ཟོལ་ཅན་གྱི་སྐབས་འཚོལ་པ་རེད་ཟེར་ཆོག
སྐབས་འཚོལ་བ་ནི་སྤྱིར་མི་རིགས་ཤིག་གི་དམའ་རིམ་སྤྱི་ཚོགས་ནང་རྐང་བཙུགས་ཏེ་དམའ་རིམ་སྤྱི་ཚོགས་ཁྲོད་ཐབས་དང་བྱུས་ཀྱིས་མི་སེམས་སྒུལ་ཏེ་ཞར་དང་ཞོར་དུ་རང་ཉིད་ཀྱིས་ཁེ་གྲགས་ཤིག་དོན་དུ་གཉེར་མཁན་ཚོར་ཟེར་གྱི་ཡོད། ལྷག་པར་སྐབས་འཚོལ་བ་ཚོས་ནི་ཆེ་ས་མི་རིགས་ཤིག་ལ་ཉམས་ཉེས་གོད་ཆག་བྱུང་བའི་སྐབས་མཚམས་ཁོ་ཚོས་རང་མི་རིགས་ལ་ཁ་གཡར་ནས་སྒེར་གྱི་གསང་བ་ཞིག་སེམས་ལ་ཉར་ཏེ་སྤྱི་ཚོགས་ཁྲོད་རིག་གཞུང་དང་དམངས་དོན་ལ་ཤ་ཞེན་ཡོད་མདོག་གིས་འཕག་འཚག་རྒྱག་གིན་ཡོད་ལ། ཆུང་ས་ཚོགས་པ་ཞིག་གམ་སྡེ་ཁག་ཞིག་གི་ནང་རང་ཉིད་ཀྱི་སྐྱོན་ཉེས་གསང་ཅི་ཐབས་ཀྱིས་ཕྱི་ཚུལ་ཁོ་ནའི་འཇོན་ཐང་སྟོན་ཁུལ་གྱིས་འཕག་འཚག་རྒྱག་གིན་ཡོད། འཕག་འཚག་རྒྱག་མཁན་གྱི་སྐབས་འཚོལ་བ་དེ་ཚོ་བླ་མ་དཔོན་པོ་དང་། ཆབ་སྲིད་པ། ཤེས་ཡོན་པ། མི་སེར་དཀྱུས་མ་སོགས་ཀྱི་ནང་དུ་ཡོད།
དེང་གི་དུས་འདིར་ང་ཚོ་བོད་མི་རིགས་འདི་རྒྱ་ནག་གི་དབང་ཤུགས་འོག་ཕྱི་ནང་གང་ཐད་ནས་གོད་ཆག་སྣ་དགུ་བྱུང་དང་འབྱུང་མུས་ཀྱིས་སྤྱི་ཚོགས་ཟང་ཟིང་གི་བབ་དང་བསྟུན་བོད་གཞིས་བྱེས་གཉིས་སུ་སྐབས་འཚོལ་བ་ཚོས་འཇབ་རྒོལ་བྱེད་ས་ཞིག་ཏུ་གྱུར་དང་འགྱུར་བཞིན་ཡོད། སྐབས་འཚོལ་བ་མང་པོ་ཡོད་པའི་སྤྱི་ཚོགས་ཤིག་ལ་མཚོན་ན་ཕྱི་ཚུལ་གྱིས་མི་རིགས་དེའི་མིང་དོན་གཉེར་མཁན་གཅིག་ལས་གཅིག་ལྷག་གི་ཚུལ་དུ་བསྟར་ནས་ཡོད་ནའང་། དོན་གྱི་འབབ་ས་དང་སེམས་ཀྱི་དམིགས་ས་ནི་རང་སྒེར་གྱི་ཁེ་གྲགས་དང་འབྲེལ་ནས་ཡོད་སྟབས། སྤྱི་ཚོགས་དེར་ཐོབ་འབྲས་ལས་འཐུས་ཤོར་གྱི་རྣམ་པས་འཕེལ་རྒྱས་ཀྱི་གོམ་ཁ་ཧ་ཅང་དམན་པའི་ཚུལ་དུ་ཡོད།
དེ་ལ་རྒྱ་ནག་གི་དབང་ཤུགས་འོག་བོད་མི་རིགས་ཀྱི་ད་ལྟའི་གནས་བབ་དང་བསྟུན་འཇོན་མི་འཇོན་གྱི་སྐྱ་སེར་ཆབ་སྲིད་པ་མང་པོ་ཞིག་གིས་ལྷག་བསམ་དང་། སྤྱི་སེམས། ཤ་ཞེན། ལ་རྒྱ་ཡོད་མདོག རྒྱལ་གཅེས་པ་ཡིན་མདོག་གི་ངོ་གདོང་དང་བྱ་སྤྱོད་ཀྱི་འཁྲབ་སྟོན་ལས། དོན་དངོས་རང་ཉིད་ཀྱི་གྲགས་པ་སྐམ་པོ་ཞིག་ཐོབ་རེ་དམིགས་ནས་ཁ་འཛུམ་འཛུམ་དང་། མགོ་སྒུར་སྒུར། ལག་བཀྱག་བཀྱག་གིས་རང་ཉིད་ལ་མིང་རྫིག་པོ་བྲིས་པའི་རྐུབ་སྟེགས་ཤིག་ཐོབ་རེ་ལ་དམིགས་ནས་ཡོད་པའི་སྐབས་འཚོལ་བའི་གྲས་ནི་བོད་གཞིས་བྱེས་གཉིས་ན་གང་མང་མང་ཞིག་ཡོད་པ་རེད།
བོད་གཞིས་ལུས་ཁ་རྒྱབ་ལྟོ་གོས་འཚོ་བ་ངན་ངོན་ཙམ་ལ་བརྟེན་པའི་ངལ་རྩོལ་མང་ཚོགས་ཉམ་ཐག་རྣམས་ལ་བསྐང་རྒྱུ་ཅི་ཡོད། དེ་བས་རྒྱལ་དབང་མཆོག་ལ་དམའ་ཕབ་ནས་ང་ཚོ་བཙན་བྱོལ་བ་ཚོ་ནི་ཁ་བྲལ་བ་ཡིན་པའི་ཁ་རྡུང་གིས་རྒྱ་ནག་ཏང་གི་དར་ཆ་འཕྱར་ན་མིག་བཙུམ་བཙུམ་དང་མགོ་བོ་སྒུར་སྒུར་བྱེད་མཁན་གྱི་ལས་བྱེད་དང་འགོ་ཁྲིད་པ་དེ་ཚོའི་གྲས་རེད། དེ་ཚོས་ནི་བོད་མི་རིགས་ཀྱི་གནས་བབ་ལ་དཔག་པའི་བླ་བཙག་ཕྱི་རྡུང་དང་། ཁ་དམོད་ལོག་སེམས་ཀྱིས་གཞན་གྱི་ངོ་གདོང་འཚོས་ཏེ་རང་ཉིད་ཀྱི་ཁེ་ཕན་རྐུབ་སྟེགས་གཉེར་བཞིན་རང་གི་མི་རིགས་ལ་དམའ་ཕབ་ནས་སྐབས་འཚོལ་གྱིན་ཡོད་པ་རེད། དེ་དག་གི་གྲས་ནི་གང་དང་སུ་ཡིན་པ་འདིར་གསལ་བཤད་མི་དགོས་པར་སུ་ལའང་རང་རང་གི་ས་ན་མཛུབ་མོ་བཙུགས་ནས་བགྲང་རྒྱུ་རེ་ཡོད་ངེས་ཡིན། ཁོ་ཚོའི་གྲས་ཀྱིས་སྐབས་འཚོལ་བའི་ངོ་གདོང་ལ་འགྱུར་བ་བཏང་སྟེ་བོད་མི་རིགས་བསམ་པའི་སྤྱི་སེམས་དང་། རིགས་ཞེན། ལ་རྒྱ་ཡོད་པའི་ཐོགས་ནས་འགུལ་བསྐྱོད་ཅིག་བྱེད་ཐུབ་པ་ཡིན་ན་བོད་མི་རིགས་འདི་རྒྱའི་དབང་འོག་ཏུ་ཉེས་གཡོགས་གཅར་རྡུང་གི་ཐུབ་ཚོད་རྐྱང་རྐྱང་གཟེད་དགོས་པའི་གནས་སྟངས་ཐབས་རྡུགས་འདི་འདྲ་ཞིག་གི་འོག་ལྷུང་མི་དགོས་པར་འདོད།
འདིར་ང་ཚོ་བཙན་བྱོལ་བ་ཚོར་ཆ་བཞག་ནའང་སྐྱ་སེར་གཉིས་ཀྱི་སྐབས་འཚོལ་བའི་གྲས་ཆབ་སྲིད་པ་རེ་འགས་འུ་ཚོ་ཡུལ་གྱར་པའི་གནས་སྟངས་འདི་ལ་བརྟེན་ནས་གང་ཞིག་ནས་ཤ་ཞེན་ཡོད་མདོག་དང་། ལ་རྒྱ་ཡོད་མདོག སྤྱི་སེམས་ཡོད་མདོག རིག་གཞུང་ལ་དགའ་ཞེན་ཡོད་མདོག་སོགས་ཀྱི་འཁྲབ་སྟོན་རེ་འཁྲབ་བཞིན་རང་ཉིད་ཀྱི་ཁེ་གྲགས་དང་རྐུབ་སྟེགས་ཤིག་དོན་དུ་གཉེར་མཁན་མང་པོ་ཡོད་པ་རེད། དེ་དག་གིས་རང་ཉིད་ཀྱིས་སྤྱི་ཚོགས་ཁྲོད་ཅི་སྟེ་དོན་དུ་གཉེར་བའི་རང་གི་དོན་བྱ་འགྲུབ་ཚར་རྗེས་གཞི་ནས་སྔར་གྱི་དམངས་སེམས་དང་། སྤྱི་དོན། རིགས་ཞེན། ལ་རྒྱ། རིག་གཞུང་ལ་དུང་ཞེན་སོགས་ཀྱི་ཀུན་སྤྱོད་ལ་དཔག་པའི་འཁྲབ་སྟོན་འཇའ་ལྟར་ཡལ་འགྲོ་བ་རེད།
དེ་ཚོས་རང་ཉིད་ཀྱི་དམིགས་རེ་སྒོམ་ཏེ་ཕྱི་ཚུལ་གྱི་འཁྲབ་སྟོན་དེས་བར་གསེང་ནས་རང་ཉིད་ལ་ཚོགས་པ་གང་ཞིག་གི་ཚོགས་གཙོ་ལྟ་བུའམ། ཡང་ན་སྤྱི་འཐུས་ཤིག་གི་ལས་འཁུར་གྱི་མིང་ཐོབ་ཅིག་མ་རེག་བར་དུ། བོད་དོན་ལ་རིགས་ཞེན་དང་ལ་རྒྱ་ཡོད་མདོག་གིས་འཇིགས་སྣང་མེད་སའི་བོད་དོན་སྐད་འབོད་དང་། ཟས་བཅད་ངོ་རྒོལ་སོགས་སུ་མི་འདོད་ཨུ་ཚུགས་ཀྱིས་སེམས་ཤུགས་ཡོད་མདོག་དང་། སྙིང་སྟོབས་ཡོད་མདོག ལ་རྒྱ་ཡོད་མདོག་སོགས་ཀྱི་ཉམས་གཤིས་འབུར་བཏོན་དུ་ཡོང་གིན་ཡོད་ལ། ཡང་འདུ་ཚོགས་ག་གེ་མོའི་ཐོག་ཏུ་བསྐྱོད་ནས་སེམས་ཤུགས་དང་། སྤྱི་སེམས། དམངས་དོན་ལ་གཞུང་དྲང་བློ་སེམས་དཀར་མདོག་གི་འཁྲབ་གཤིས་དེས་བློ་དམན་གྱི་མི་སེར་དཀྱུས་མ་ཚོའི་སེམས་ལ་སྒུལ་ཤུགས་ཐེབས་སུ་བཅུག་སྟེ། མི་མང་གི་རྒྱབ་སྐྱོར་འོག་རང་ཉིད་ལ་སྐབས་འཚོལ་དམིགས་གཟས་ཀྱི་རྐུབ་སྟེབས་དེ་རེག་པའི་གོ་སྐབས་བྱུང་བ་དང་རྫིག་ཉམས་དོད་པའི་ལྭ་བ་གྱ་དག་ཅིག་གྱོན་ནས་ཉམས་གྱིས་འདུག་པ་ལས། སྔར་གྱི་རིགས་ཞེན་དང་། ལ་རྒྱ། སྤྱི་དོན་གྱི་ཁ་ཕོ་ཆེ་རུ་བསྒྲགས་པ་སོགས་རྩ་ཡལ་དུ་གྱུར་ནས་བོད་དོན་སྐད་འབོད་དུ་མི་ཡོང་ལ། ཉིན་གཅིག་གི་ཟས་བཅད་ངོ་རྒོལ་དུའང་མི་ཡོང་། ཐ་ན་ཆུ་ཚོད་གཅིག་ཡུན་གྱི་མར་མེ་ཁྲོམ་སྐོར་ལའང་མི་ཡོང་བར་སྐབས་ཐོག་དེར་ལས་དོན་ཞིག་ཡོད་མདོག་གིས་གང་སར་ཡིབ་ནས་འདུག་པའི་རང་གཤིས་ཤིག་འཇགས་ཡོད་ལ། མ་ཟད་དབང་ཆ་ཆུང་ཆུང་དེ་བེད་སྤྱད་ནས་ཕྱོགས་གཏོགས་རིས་བཅད་དང་། རང་ཕྱོགས་སྒེར་དོན་གྱི་ལས་ལ་གཞོལ་བའི་སྤྱོད་ཉེས་ཤིག་ཀྱང་རྒྱུད་གཤིས་ལ་འཇགས་ཡོད། རང་ཉིད་ཀྱི་ཁེ་གྲགས་ཁོ་ན་གཉེར་མཁན་གྱི་གཤིས་རྒྱུད་ངན་པའི་སྐབས་འཚོལ་བ་དེ་དག་གི་གྲས་ལ་བརྟེན་ནས་བཙན་བྱོལ་སྤྱི་ཚོགས་འདི་ནམ་ཡང་སྔ་ན་མེད་པའི་ཡར་རྒྱས་ལ་འགྲོ་མི་སྲིད་པ་མ་ཟད། བོད་མི་རིགས་ཀྱི་བདེན་མཐའ་སེལ་པའི་དུས་བསྐལ་ནམ་ཡང་ཡོང་མི་ཐུབ་པའི་གནད་དོན་འདི་ངེས་པར་དུ་ཤེས་དགོས་པ་ཞིག་དང་གླེང་དགོས་པ་ཞིག་རེད་བསམ།
སྤྱི་ཡོངས་ཀྱི་ལས་འགོ་ཞིག་གམ་ཚོགས་གཙོ་ཞིག་གི་འགན་དབང་ཐོབ་རྗེས་མི་སེར་གྱི་སྒང་ནས་ཁ་ལ་ཡོང་ཚད་བཤད་དེ་རྫིག་ཉམས་བསྟན་ནས་འདུག་པ་དང་། བོད་དོན་གྱི་འཐབ་རྩོད་ལས་འགུལ་སོགས་ལ་མཉམ་ཞུགས་བྱེད་མི་དགོས་པར་སྐྱིད་ཉལ་བརྒྱབ་ནས་བསྡད་ན་འགྲིག་པ་ཨེ་རེད། དེ་ནི་གཏན་ནས་འགྲིག་གི་མ་རེད། སྔར་ལས་ལྷག་པའི་བློ་སྤོབས་ཤིག་བསྐྱེད་ནས་བསམ་པ་རྣམ་དག་གིས་སྤྱི་ཚོགས་ཀྱི་འགན་འཁུར་དུ་བླངས་ཏེ་མི་དམངས་དང་མཉམ་འགྲོགས་མཉམ་ལས་ཀྱིས་མི་དམངས་ཀྱི་སྣེ་ཁྲིད་དགོས་པ་རེད།
གཞན་ད་དུང་ང་ཚོའི་བཙན་བྱོལ་ཁྲོད་ལོ་ལྟར་ཆབ་སྲིད་བཙོན་མ་ཡིན་པའི་ངོས་ནས་ཕྱི་རྒྱལ་དུ་བསྐྱོད་པའི་ལས་དོན་དེའི་ཐད་ནས་ཀྱང་། བོད་མི་རིགས་ཀྱི་སླད་ཆབ་སྲིད་ལས་དོན་པྲ་སྐྱག་ཙམ་ཞིག་སྒྲུབ་མེད་ནའང་། མང་པོ་ཞིག་གིས་ཁེ་ཕན་དེ་བསམ་ནས་རང་ཉིད་བོད་དོན་ལ་དཀའ་སྡུག་མནར་གཅོད་མྱོང་མཁན་གྱི་ཆབ་སྲིད་བཙོན་མ་ཡིན་པར་རྫུ་བ་སོགས་ཀྱི་སྐྱུགས་བྲོ་བའི་མི་གཤིས་མང་པོ་ཡོད་པ་ཤེས་གསལ་རེད། དེ་དག་ཀྱང་རང་ཉིད་ཀྱི་ཁེ་ཕན་བསམ་ཏེ་བོད་དོན་ཁ་ལ་འཁྱེར་ནས་སྐབས་འཚོལ་བའི་གྲས་རེད།
དེ་འབྲེལ་ཤེས་ཡོན་པ་ཡིན་ཟེར་མཁན་ཚོའི་ངོས་ནས་བཤད་ནའང་། ཅི་སྟེ་སྐབས་འཚོལ་གྱི་བསམ་བློས་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་ཡིན་མདོག་གིས་རིག་གཞུང་དང་འབྲེལ་བའི་ལས་དོན་དང་། ལས་འགུལ་རེ་སྤེལ་མགོ་བཙུགས་དང་འཛུགས་བཞིན་ཡོད་ནའང་དམིགས་གཟས་ལྟར་མ་འགྲུབ་པ་དང་། རང་ཁེ་ཞིག་མེད་ན་མཐའ་མི་བསྐྱལ་བར་མཚམས་གཅོད་པའམ་མཚམས་འཇོག་པ་དང་། ཡང་ན། རང་ལ་རིག་གཞུང་དང་མ་འབྲེལ་བའི་ཁེ་ཕན་གཞན་ཞིག་རེག་པ་ཡིན་ན་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་ཀྱི་ལས་དོན་ཅི་མི་སྙམ་པར་ཤར་ལ་གཡུགས་ཏེ། གཞན་དེར་ཤི་འཐམ་རོ་འཐམ་ཏུ་འཇུས་ནས་རང་རེའི་རིག་གཞུང་གི་ཉམས་ཆག་ལ་མིག་ཟུར་ཙམ་གྱིས་མི་བལྟ་བའི་སྐབས་འཚོལ་བའི་གྲས་བྱུང་དང་འབྱུང་གིན་ཡོད།
དཔེན་ན། འུ་ཚོ་བཙན་བྱོལ་བའི་སྤྱི་ཚོགས་འདིར་དུས་དེབ་དང་ཚགས་པར་སོགས་འདོན་སྤེལ་གྱི་ངོས་ནས་ཀྱང་ནད་ཡམས་དེ་ཏག་ཏག་ཡོད་པ་རེད། ཕྱིར་བལྟས་ཤིག་བྱས་ན་ད་ལྟའི་བར་མི་སྒེར་དང་ཚོགས་པ་བཅས་ཀྱིས་ཚགས་པར་དང་དུས་དེབ་སོགས་འདོན་སྤེལ་མགོ་བཙུགས་པ་ནས་ཡུན་རིང་མཐའ་མ་འཁྱོལ་རྒྱུན་མ་འཁྱོངས་པར་མཚམས་ཆད་སོང་བ་ག་ཚོད་ཅིག་དང་གང་དག་ཡོད་པ་ཤེས་གསལ་རེད། དེ་དག་ནི་དཔལ་འབྱོར་གྱིས་ལག་ཐོགས་ནས་མཚམས་ཆད་སོང་རེད་ཟེར་ན། ཁོ་བོས་རེ་ཟུང་གི་ངོས་ནས་ཡིན་སྲིད་ནའང་མང་མང་གི་ངོས་ནས་དེ་ལྟར་དུ་ངོས་འཛིན་མི་བྱེད། དུས་དེབ་དང་ཚགས་པར་འདོན་སྤེལ་གྱི་ཐོག་མའི་དམིགས་ཡུལ་རིག་གཞུང་སྲུང་སྐྱོབ་ཀྱི་ཀུན་གཤིས་དང་རང་ཁེ་རང་གྲགས་ཀྱི་ཀུན་སློང་གཉིས་ལས་སྔ་མ་ཕྱི་ཚུལ་གྱིས་ཤུགས་ཆུང་བ་དང་ཕྱི་མ་ནང་སེམས་རང་ཁེ་དང་འབྲེལ་ཤུགས་ཆེ་སྟབས། དམིགས་གཟས་སྒེར་དོན་ལྟར་ལམ་ལྷོངས་མ་བྱུང་བ་ཡིན་ན་མཚམས་བཞག་སྟེ་རང་ལ་ཁེ་ཕན་ཡོད་ས་གཞན་ཞིག་བཙལ་ནས་ཁུ་སིམ་སིམ་བུད་འགྲོ་བ་རེད། དེ་དག་ནི་སྤྱི་ཚོགས་སྟེང་གི་སྐབས་འཚོལ་བའི་ངོ་གདོང་རེད་ལ། སྐབས་འཚོལ་བ་དེ་ཚོའི་ཁ་སྟབས་ཡོད་ས་ན་སྒེར་ཟེར་འདི་ཁོ་ནའི་ཚོར་ཤེས་ལས་སྤྱི་ཟེར་བ་འདི་ནམ་ཡང་དྲན་འཛིན་དུ་མེད་སྟབས། ཁོ་ཚོའི་དབང་ཤུགས་དང་ལག་འོག་ན་སྤྱི་ཚོགས་ཀྱི་རྣམ་པ་དང་མི་མང་གི་འཚོ་བར་གོམ་གང་ཕྱི་ནུར་གྱི་འཐུས་ཤོར་ལས་མདུན་སྤོས་ཀྱི་ཡར་རྒྱས་གང་ཡང་མེད།
སྐབས་འཚོལ་བའི་བསམ་བློ་མེད་པར་ཐོག་མ་ནས་དམིགས་ཡུལ་བརྟན་པོ་དང་། ཀུན་སློང་ཡག་པོ། ལྷག་བསམ་ཟོལ་མེད་ཡོད་མཁན་ཞིག་ཡིན་ན་རང་གྲགས་རང་རྫིག་གི་ཁེ་ཕན་དང་འབྲེལ་མི་དམངས་ཀྱི་སྒང་ནས་སྐྱིད་ཉལ་བརྒྱབ་ནས་མི་འདུག་པར། སྤྱི་ཚོགས་གོང་འཕེལ་དང་མང་ཚོགས་ཀྱི་འཚོ་བ་ཡར་རྒྱས་ཀྱི་སླད་དོན་ཁ་སེམས་གཉིས་མེད་ཀྱིས་སྡུག་རུས་རྡོ་ཟད་དུ་གནང་ཞིང་། རིག་གཞུང་སྲུང་སྐྱོབ་ཡིན་པའི་ལས་དོན་དེ་ཡང་རང་ཉིད་ཀྱི་དམིགས་གཏད་ཉག་གཅིག་ཡིན་སྟབས་གནད་དོན་ཆེན་པོ་ཞིག་དང་མ་འཕྲད་ན་ནམ་ཡང་མཚམས་འཇོག་མི་སྲིད། ཡིན་ཡང་འུ་ཚོ་བཙན་བྱོལ་བའི་སྤྱི་ཚོགས་ཁྲོད་སྐབས་འཚོལ་ལ་དམིགས་ཏེ་ལས་འགུལ་སྣ་ཚོགས་སྤེལ་མཁན་མང་བ་དང་། སྐབས་འཚོལ་བའི་ངོ་གདོང་ནས་སྤྱི་དབང་འཛིན་མཁན་མང་ནའང་། དོན་དངོས་ལ་དམིགས་ཏེ་ཀུན་སློང་ཡག་པོ་ཅན་གྱི་མི་གཤིས་དཀོན་པོ་འདུག་ཅེས་བཤད་ཀྱང་མི་ཆོག་པ་ཆེར་མེད།
ད་ལྟའི་ཁ་སང་དེ་རིང་གི་བར་བཙན་བྱོལ་དུ་མི་ལོ་ང་བཅུ་འགོར་བའི་རིང་ང་ཚོས་གོང་ས་མཆོག་གི་དབུ་ཁྲིད་ཐུགས་ཁུར་འོག་གང་འཚམ་གྱིས་བོད་དོན་དངརིག་གཞུང་སྲུང་སྐྱོབ་ཀྱི་ངོས་ཐད་ལས་འགུལ་འདྲ་མིན་སྣ་ཚོགས་ཤིག་སྤེལ་མུས་ཀྱིས་ཡོང་ཡོད་ནའང་། མི་ལོ་ང་བཅུའི་བརྒྱུད་རིམ་ལ་ཕྱིར་བལྟས་ཀྱིས་མཇུག་སྡོམ་ཞིག་བརྒྱབ་པ་ཡིན་ན། ང་ཚོ་ལ་ཐོབ་འབྲས་དང་འཐུས་ཤོར་གཉིས་ལས་འཐུས་ཤོར་གྱི་ཕྱོགས་ནས་ཕམ་ཉེས་བྱུང་ཡོད། གོང་ས་མཆོག་གིས་ཀྱང་ཐུགས་གཞིགས་ཟབ་མོ་གནང་སྟེ་བཙན་བྱོལ་དུ་ཡོང་བའི་ལོ་ངོ་ལྔ་བཅུའི་ནང་ཐོབ་འབྲས་ལས་འཐུས་ཤོར་བྱུང་ཡོད་པའི་ངོས་ཤིག་གསལ་ཐང་དུ་གཟིགས་ཏེ་ཁོང་ཉིད་ཐུགས་ཕམ་བྱུང་སྟེ། ༼ད་ང་ཚོས་ཏན་ཏན་འགུལ་བསྐྱོད་ཅིག་རྒྱག་དགོས་ཀྱིན་འདུག འགུལ་བསྐྱོད་ཅིག་མ་བརྒྱབས་པར་འདི་ལྟར་བསྡད་ན་ཁྱོན་ནས་འགྲིག་གིན་མི་འདུག་༽ཅེས་དམིགས་བསལ་ཚོགས་ཆེན་གྱི་སྟེང་བཀའ་སློབ་ནན་ཅན་གནད་ཐུག་ཏུ་གསུངས་ཡོད་པ་འདི་འུ་ཚོས་ཤེས་དགོས་པ་ཞིག་དང་། འདི་ལ་བསམ་ནས་ངེས་པར་དུ་འགུལ་བསྐྱོད་ཅིག་རྒྱག་དགོས་ཀྱི་འདུག
ཡིན་ནའང་དོན་གྱི་འབབ་ས་ནས་བཤད་ན་འདས་པའི་མི་ངོ་ལྔ་བཅུའི་ནང་གང་ལ་གང་འཚམ་གྱིས་ཕྱོགས་གང་ཐད་ནས་འགུལ་བསྐྱོད་རྒྱག་ཁུལ་གྱིས་ཡོང་ཡོད་མོད། འོན་ཏང་འགུལ་བསྐྱོད་ཀྱི་གཞི་རྩ་སྐབས་འཚོལ་བ་མང་པོ་ཞིག་གི་རང་ཁེ་རང་གྲགས་ཀྱི་ཀུན་གཤིས་དང་སྐྱ་འཐབ་ནས་ཡོང་ཡོད་སྟབས། འགུལ་བསྐྱོད་ཀྱི་དམིགས་ཡུལ་གྲུབ་འབྲས་ལྡོག་ལམ་དུ་བསྐྱལ་ནས་འཐུས་ཤོར་གྱི་ངོ་གདོང་སྐྱ་ཐེང་ངེར་མངོན་ནས་ཡོང་བའི་གནད་དོན་དེ་བྱུང་བ་རེད། ད་ལྟ་འུ་ཚོས་འཐུས་ཤོར་གྱི་གནད་དོན་དེ་ཇི་ལྟར་བྱུང་བ་འཚོལ་སྔོགས་བྱས་པ་ཡིན་ན། དེ་ནི་གཞན་ཞིག་མ་ཡིན་ཏེ། སྐབས་འཚོལ་བའི་དབང་ཤུགས་འོག་ལས་འགུལ་གང་ཞིག་ལ་འགུལ་བསྐྱོད་བྱེད་པའི་ཀུན་སློང་རྣམ་དག་ཅིག་དང་། བསམ་པ་ཡར་སེམས་ཤིག་མེད་པའི་རྐྱེན་པས་ལས་འགུལ་གང་དང་ལས་དོན་གང་ཞིག་གི་གྲུབ་འབྲས་སྤྱི་ལ་སྨན་པའི་དོན་ཅན་དུ་སྨིན་མ་ཐུབ་པར་ལག་སྟོང་མཆན་སྟོང་ལྟ་བུའི་ཚུལ་དུ་འཐུས་ཤོར་གྱི་ཕམ་ཁ་འདི་བྱུང་བ་རེད། ང་ཚོ་མུ་མཐུད་དུ་འདི་ལྟར་རང་ཁེ་གཉེར་བའི་སྐབས་འཚོལ་བ་ཚོའི་དབང་ཤུགས་འོག་བསྐྱོད་ན་དོན་དངོས་གོང་ས་མཆོག་གི་གསུངས་པ་བཞིན་ང་ཚོར་གོད་ཆག་ཆེན་པོ་ཞིག་བྱུང་རྒྱུ་ཉག་གཅིག་རེད།
ད་ལྟ་བཀའ་བློན་ཁྲི་པ་དང་བོད་མི་མང་སྤྱི་འཐུས་འོས་འདེམས་ཀྱི་སྐབས་ལ་འཁེལ་ཡོད་སྟབས་བཙན་བྱོལ་སྤྱི་ཚོགས་ཁྲོད་བོད་པའི་ཚོགས་སྡེ་ཁག་གང་དུ་ཡོད་ས་ན་བཀའ་བློན་ཁྲི་པའི་འོས་མིའི་ངོས་སྦྱོར་དང་། སྤྱི་འཐུས་འོས་མིའི་ངོས་སྦྱོར་བཅས་ཤོག་ལྷེ་སྣ་ཚོགས་ཀྱིས་ལམ་འགྲམ་གཡས་གཡོན་གྱི་རྩིག་ངོས་ཁེངས་འདུག་ལ། གང་སར་བོད་མི་འགའ་སྐོར་ཚོགས་ཀྱིས་བཀའ་བློན་ཁྲི་པའི་གོ་ཐོབ་དེའི་སྐོར་ནས་གླེང་མོལ་བྱེད་ཀྱིན་འདུག བཀའ་བློན་ཁྲི་པའི་འོས་མི་འོས་འདེམས་ཁྱབ་བསྒྲགས་བྱེད་ཕྱོགས་ཀྱི་ཞོར་ནས་སྐབས་འཚམས་ཕྱོགས་གཏོགས་འཐེན་འཁྱེར་གྱི་སྐད་ཆ་འགའ་རེ་གོ་རྒྱུ་འདུག་ལ། འོས་མིར་སྦྱར་འགྲེམས་བྱེད་སྟངས་ཀྱི་ཆ་ནས་ཀྱང་ཆོལ་ཁའི་ཕྱོགས་བཅད་ཀྱི་ཆ་ཞིག་ཀྱང་མངོན་གྱི་འདུག བྱེད་སྟངས་དེ་ནི་འོས་འདེམས་པའི་ངོས་ནས་རང་ཉིད་ཚུད་པའི་བོད་སྤྱི་བའི་དོན་དུ་བསམ་བློ་མ་འཁོར་བའི་སྒེར་གཤིས་ཤིག་ཡིན་སྟབས། གལ་སྲིད་ཕམ་ཁ་ཞིག་ཡོད་ན་རང་གིས་རང་གི་མགོར་བཞག་པ་རེད། དེ་བས་རང་ཉིད་ཀྱི་བསམ་ངོར་བོད་སྤྱི་ལ་ཕན་པའི་འོས་འཚམ་གྱི་བཀའ་བློན་ཁྲི་པ་ཞིག་རང་ཐག་རང་བཅད་ཀྱིས་འདེམས་བསྐོ་བྱ་རྒྱུ་དེ་གལ་ཆེན་རེད་མ་གཏོགས། གཞན་གྱིས་ཁོ་འདེམས་དང་དེ་འདེམས་སོགས་ཀྱི་ཟེར་སྒྲོས་སུ་འབྲངས་པ་ཡིན་ན་ཡང་དག་པའི་འོས་འདེམས་བྱེད་སྟངས་ཤིག་མ་རེད་བསམ།
མཁས་དབང་དང་མི་དྲག་སོགས་ཀྱི་མིང་ཐོབ་ཡོད་པའི་བཀའ་བློན་ཁྲི་པའི་འོས་མི་དེ་ཚོས་ནང་དམག་དོན་དང་འདྲ་བར་ངས་ཐུབ་ངས་འཇོན་གྱི་དཔའ་ཁས་ལེན་བྱེད་ཀྱིན་འདུག་ལ། ཁོ་ཚོར་མི་མང་གི་ངོས་ནས་ཀྱང་སྤྱི་ཚོགས་ལ་དཔག་སྟེ་འོས་འཚམས་སུ་མཐོང་ནས་རྒྱབ་སྐྱོར་ཀྱིས་འདེམས་ཐོན་འོས་གཞིར་བྱུང་བ་ཞིག་ཀྱང་རེད། ཡིན་ནའང་ཁོ་བོ་སྒེར་གྱི་ངོས་ནས་ཁོ་ཚོ་སུ་ལའང་དངོས་དོན་བོད་སྤྱི་མང་ལ་ཁ་སེམས་གཉིས་མེད་ཀྱིས་ཕན་ཐོགས་སྒྲུབ་ཕོད་མཁན་གྱི་བཀའ་བློན་ཁྲི་པ་ཞིག་ཡིན་དང་མིན་ཞེས་ཁ་ཚོན་བཅད་ནས་བཤད་མི་ཐུབ། རྒྱུ་མཚན་གོང་དུ་བཤད་པ་ལྟར་གནའ་ནས་ད་ལྟའི་བར་བོད་སྤྱི་ཚོགས་ཁྲོད་སྐབས་འཚོལ་བའི་གྲས་ཀྱིས་མི་མང་གི་མདུན་ནས་འཁྲབ་སྟོན་གྱིས་ཁོ་ཚོ་རྨོངས་འཐོམ་དང་སྤྱི་ཚོགས་འཐུས་ཤོར་དུ་བཅུག་ནས་ཁེ་དབང་གོ་ཐོབ་བླངས་པའི་སྒེར་གཤིས་དེས་རྐྱེན་པས་ཡིན།
འདི་ནི་སྤྱིར་སྐབས་འཚོལ་བའི་གྲས་ལ་དམིགས་ཏེ་ཁོ་བོ་སྒེར་སེམས་ཀྱི་རྟོག་ངོའི་བསམ་བྱའམ་ཐག་གཅོད་མི་ཐུབ་པའི་སྐད་ཆ་ཞིག་ལས་བཀའ་བློན་ཁྲི་པའི་འོས་གཞི་ཚོ་ནི་སྐབས་འཚོལ་བ་རེད་ཟེར་ནས་གཏན་ནས་གླེང་གིན་མེད། ཁོ་བོར་མཚོན་ན་སྐབས་འཚོལ་བ་ནི་སྤྱི་ཚོགས་ཁྲོད་གཤེ་གཏེ་ཞིག་ལ་ངོས་འཛིན་བྱེད་ཀྱིན་ཡོད་ལ། བོད་མི་མང་གི་བཀའ་བློན་ཁྲི་པའི་གོ་ཐོབ་དེ་སྐབས་འཚོལ་བ་ཞིག་གི་ལག་ཏུ་མི་ཤོར་རྒྱུ་དེ་བསམ་བྱ་ཉག་གཅིག་དང་། སྐབས་བཅུ་གཅིག་པའི་བཀའ་བློན་ཁྲི་པ་སུ་ཡིན་པ་དེ་ནས་བཟུང་གོང་ས་མཆོག་གིས་གསུངས་པ་བཞིན་བཙན་བྱོལ་སྤྱི་ཚོགས་འདིར་སྔར་ལས་འགུལ་བསྐྱོད་ཅིག་རྒྱག་ཐུབ་པའི་རེ་བ་ཆེན་པོ་ཞིག་བཟུང་ནས་ཡོད།
གོང་གི་བསམ་ཚུལ་འདི་ལ་ངས་རྒྱབ་སྐྱོར་ཡོད། བློ་ཕམ་པ་ཞིག་ལ་མི་དེ་ཚོ་༸གོང་ས་མཆོག་གི་མཐའ་སྐོར་དུ་སླེབས་ཐུབ་པ་ཙམ་དུ་མ་ཟད་ཁོང་གིས་ཀྱང་དེ་ཚོར་མཉེས་པོ་གནང་གི་འདུག དེའི་རྒྱུ་མཚན་གྱིས་མེ་དེ་འདྲ་ཇེ་མང་དུ་འགྲོ་བཞིན་ཡོད། དངོས་ཡོད་གནས་ཚུལ་ལ་མེ་སོར་སྦེལ་ཀོབ་ཀྱི་ཝཀ་ཤོབ་བམ་བཟོ་གྲྭའི་གནས་སྟངས་ལ་ཡར་རྒྱས་མེད་པའི་སྐོར་༸གོང་ས་མཆོག་ནས་བློ་ཕམ་ཡོད་ཚུལ་གསུངས་ཀྱང་དེ་ལྟར་ཡོང་རྐྱེན་མེ་དེ་འདྲ་བ་མང་པོ་ཞིག་གིས་དབང་འཛིན་བྱས་པ་ལ་རྟེན་ནས་ཡིན་པ་མཁྱེན་མི་ཐུབ་པ་ཡིན་ནམ། དེ་ཙམ་དུ་མ་ཟད་ང་ཚོ་བོད་མིའི་སྤྱི་ཚོགས་ནང་སྤྱི་དོན་ཐོག་ལྟག་བསམ་རྣམ་དག་གིས་འགན་འཁུར་ཞུས་ན་དེ་ལ་དོགས་ཟོན་ཆེན་པོས། རྐྱོན་ཁུངས་མེད་མང་པོ་ཞིག་རྒྱབ་བཤད་བརྗོད་ནས་རང་བཞིན་གྱི་སེམས་ཤུགས་ཆག་བཅུག་པ་ཡོང་གི་ཡོད། བོད་གཞུང་གི་བཀའ་ཁྲི་ཟུར་པ་ཞིག་གིས་ངར་ གལ་ཏེ་ཁྱོད་ལ་དྲང་བདེན་གྱི་ཁྲིམས་ཆོད་ཅིག་དགོས་ན་༸གོང་ས་མཆོག་སར་བཅར་ནའང་དྲང་བདེན་གྱི་ཁྲིམས་ཆོད་ཐོབ་མི་ཐུབ། ངས་༸གོང་ས་མཆོག་གིས་དྲང་བདེན་གནང་གི་མ་རེད་ཟེར་བ་མིན། འོན་ཀྱང་ཁོང་གིས་གྲོས་བསྡུར་བྱ་ས་ཉེ་སྐོར་གྱི་མི་མང་ཆེ་བ་མགོ་བདེ་ཡིན་པས་དེ་ཚོས་དྲང་བདེན་བྱེད་མི་ཐུབ་ཅེས་བརྗོད་མྱོང་ཡོད། འདིར་ངས་མང་པོ་བཤད་ན་རྩོམ་སྒྲིག་པས་ཀྱང་ངའི་གནས་ཚུལ་འདི་དྲ་ཐོག་སླེབ་ཏུ་མི་འཇུག་པ་སྲིད་ན་ངས་འདིར་མཚམས་འཇོག་ཞུ་རྒྱུ་ཡིན།