ཚེ་རིང་དོན་གྲུབ།
———-
སྐར་མ་གནམ་སྐྱོང་།
ངའི་སྙིང་ཁོངས་སུ་འོད་འཚེར་གྱིན་པའི་སྐར་མ།
ངའི་འཇིག་རྟེན་ལ་འོད་སྣང་སྒྲོན་པའི་སྐར་མ།
ངའི་ཚེ་སྲོག་དང་གཞི་གཅིག་ཏུ་སྣོལ་པའི་སྐར་མ།
ངའི་མི་ཚེ་དང་འཚོ་བ་ལ་ཁ་ཕྱོགས་སྟོན་མཁན་གྱི་སྐར་མ།
སྐར་མ་ཁྱེད་མཁའ་རུ་བདེ་བར་བྱོན་པ་ལེགས་ལ།
གནམ་མཁའ་འདི་ཁྱེད་ཀྱིས་སྐྱོང་ཞིང་དབང་བ་སྐལ་བ་བཟང་།
སྐར་མ་ཁྱེད་སྟོང་ཁམས་སུ་སླེབས་ནས་བཟུང་།
ངས་འཇིག་རྟེན་འདིའི་སྣང་བ་ཚོར་སོང་ལ།
ངས་མི་ཚེ་ཡི་ཁ་ཕྱོགས་རྙེད་སོང་།
ངས་འཚོ་བ་ཡི་དོན་སྙིང་རྟོགས་སོང་།
སྐར་མ་གནམ་སྐྱོང་།
སྟོང་ཁམས་ཀྱི་མ་ཡུམ་མངལ་དུ།
ཁྱེད་ཀྱི་ཚེ་སྲོག་རྙེད་པའི་དུས་རིམ་དང་།
ཁྱེད་ཀྱི་འགྱུར་གཟུགས་ཀྱི་ཕུང་བོ་གྲུབ་སྟངས།
དེ་ནི་མ་ཡུམ་གྱིས་རྟོགས་ཤིང་ཚོར་བའི་ལོ་རྒྱུས་དུམ་བུ་ཞིག་དང་།
དེ་ནི་མ་ཡུམ་གྱིས་མྱངས་ཤིང་བསྐྱངས་བའི་མངོན་འབྲས་ཤིག་རེད།
འདི་ནི་ཁྱེད་ཀྱིས་རྟེན་འབྱུང་དང་བྱམས་བརྕེའི་གོ་རྟོགས་རྙེད་ས་ཐོག་མ་དང་།
འདི་ནི་བྱམས་པའི་ནུས་སྟོབས་དང་ཤེས་རབ་ཀྱི་ཚད་མ་རྙེད་ས་ཡང་རེད།
སྐར་མ་གནམ་སྐྱོང་།
གནམ་མཁའ་འདི་ཁྱེད་ཀྱིས་སྐྱོང་ཞིང་ཁྱེད་ཀྱིས་གཞལ།
ས་གཞི་འདི་ཁྱེད་ལ་དབང་ཞིང་ཁྱེད་ལ་གནང་།
ཁྱེད་ཀྱི་སྟོང་ཁམས་ན་ཁྱེད་ལ་རྒྱུ་ལམ་ཡོད་ལ།
ཁྱེད་ཀྱི་འཇིག་རྟེན་ན་ཁྱེད་ལ་འོད་སྣང་ཡོད།
ཁྱེད་ཀྱི་རྨི་ལམ་དང་ཁྱེད་ཀྱི་རེ་བ།
སྐར་མས་སྐྱོང་བའི་ནམ་མཁའ་ཡོད་ཚད།
ཕྱོགས་རྣམས་ཀུན་ནས་རྣམ་པར་རྒྱལ་བར་ཤོག
ངའི་མི་ཚེ་དང་གཏན་དུ་འགྲོགས་པའི་སྐར་མ་གནམ་སྐྱོང་།
ངའི་སྙིང་གི་གཅེས་ལོ་གྱུར་བའི་སྐར་མ་གནམ་སྐྱོང་།
ཁྱེད་ཀྱི་མཁའ་དབྱིངས་ན་འཚེ་བ་མེད་ཅིང་།
ཁྱེད་ཀྱི་འཇིག་རྟེན་ན་རང་དབང་ལྡན་པ།
ཁྱེད་ཀྱི་མི་ཚེ་དེ་གཟི་བརྗིད་ཀྱིས་འཚོ་པར་ཤོག།
སྤྱི་ལོ་༢༠༡༠་ལོའི་ཟླ་བ་༩་ཚེས་༧་ཀྱི་སྐྱེས་སྐར་ལ།
ཨ་རོ་ཚེ་ཏེ། གནམ་སྐྱོང་བདེ་ལེགས་ངང་མི་ཡུལ་དུ་བྱོན་པར་བཀྲ་ཤིས་བདེ་ལེགས་ཞུ། ཁྱེད་ཅག་བཟའ་མི་ལྷན་རྒྱས་ཀྱི་པར་བསྐུར་བ་མཐོང་སོང་། མ་བུ་ཟུང་གི་སྐུ་གཟུགས་བདེ་བའི་སྨོན་འདུན་ཞུ།