སྐུ་ངོ་།

ཆབ་མདོ་ངག་ཕུན་གྱིས།

༄༅། །ཕྱི་ལོ་ ༡༩༥༩ ལོར་བོད་ལ་དུས་འགྱུར་ཧ་ཅང་ཛ་དྲག་བྱུང་བའི་དབང་གིས་༸རྒྱལ་བ་རིན་པོ་ཆེས་གཙོས་པའི་སྐུ་འཁོར་ཧྲག་བསྡུས་ཤིག་ལ་ལུང་མང་པོ་ཞིག་བརྒལ་ནས་བཙན་བྱོལ་ལ་ཕེབས་དགོས་བྱུང་ཞིང་། དང་ཐོག་མི་ཡུལ་ལུང་ལ་བཙན་བྱོལ་བ་རྣམས་ངོ་ཤེས་པ་ནི་གནམ་དང་ས་ལས་མེད་ཀྱང་༸རྒྱལ་བ་རིན་པོ་ཆེའི་ཐུགས་རྗེས་བཀའ་དྲིན་དང་། དེ་བཞིན་བོད་མི་རྒན་རབས་ཀྱིས་ལྷག་བསམ་དང་སྙིང་སྟོབས་བཅས་ཀྱིས་བཙན་བྱོལ་བོད་གཞུང་གི་ལས་ཁུངས་མ་ལག་དང་བཅས་པ་ཆགས་གཞི་གོ་རིམ་ལྡན་པ་གསར་འཛུགས་གནང་ཐུབ་པ་བྱུང་ཡོད།

ལྷག་པར་དང་ཐོག་བོད་རིགས་ན་གཞོན་རྣམས་ལ་བོད་མི་རིགས་ཀྱི་སྐད་ཡིག་དང་གོམས་གཤིས་སོགས་སེམས་རྒྱུད་ལ་གནས་ཐབས་སུ་སློབ་གསོའི་ལས་དོན་གལ་ཆེའི་དོན་ཆེ་ཞིག་ལ་གཟིགས་ནས་བོད་མི་ཁེར་གཙང་སློབ་ཁག་གསར་འཛུགས་གནང་བ་དང་། དེ་ནས་རིམ་གྱིས་བོད་མི་གཞིས་ཆགས་ཁག་ཀྱང་གསར་འཛུགས་གནང་ཡོད་ཅིང་།

དེ་འདྲའི་གནས་སྟངས་ཤིག་གི་འོག་ནས་དབང་ཆེན་དང་སྒྲོལ་མ་མཚོ་གཉིས་རྒྱ་གར་ལྷོ་ཕྱོགས་གཞིས་སུ་ཕྱིན་ནས་གནས་དེར་གཞིས་ཆགས་པ་དང་། བུ་ཆུང་བཟང་པོ་སྐབས་དེར་དྷ་སྟེང་བོད་ཁྱིམ་སློབ་གྲྭར་ཚུད་དེ་སློབ་གྲྭ་བཞག །རིམ་གྱིས་བཟང་པོས་སློབ་སྦྱོང་ལ་འབད་བརྩོན་ལྷོད་མེད་གནང་བས་རིམ་གྱིས་མཐོ་རིམ་སློབ་གྲྭ་ནས་སློབ་ཐོན་བྱུང་ཞིང་། མཐོ་སློབ་ནས་ཐོན་ནས་ནང་ལ་ཕ་མ་གཉིས་ཀྱི་མཉམ་དུ་ལས་ཀ་ཙག་ཙིག་འདྲ་བྱས་ཏེ་ཟླ་ཤས་རིང་ལ་བསྡད་ཅིང་།

ཕ་དབང་ཆེན་གྱི་ཤེས་བྱ་གསར་ཤོག་མངགས་ཉོ་གནང་གི་ཡོད་པ་ཟླ་དུས་ཆད་མེད་འབྱོར་གྱི་ཡོད། ཉིན་ཞིག་བཟང་པོ་དབྱར་དུས་བར་འཁྱམ་འོག་ལ་སྡོད་བཞིན་པའི་སྐབས་སུ་རྒྱ་གར་ཡིག་སྐྱེལ་ཞིག་གི་སླེབས་ནས་ཤེས་བྱ་གསར་ཤོག་འབྱོར་བ་དང་། བཟང་པོས་དེ་དག་ཁ་ཕྱེས་ནས་ཀློག་བཞིན་པའི་སྐབས་དྷ་སར་ལས་ཁུངས་ག་གེ་མོ་ཞིག་ལ་ལས་བྱེད་ཀྱི་ས་མིག་ཡོད་ཚུལ་གསལ་བསྒྲགས་མཐོང་བ་དང་། ལམ་སང་སྨྱུག་གུ་དང་ཤོག་གུ་གྲ་སྒྲིག་བྱས་ཏེ་སྙན་ཞུ་བྲིས། ཡིག་སྐོགས་ཁ་བྱང་སོགས་བྲིས་ནས་དེའི་ནང་དུ་སློབ་ཐོན་ལག་འཁྱེར་གྱི་འདྲ་བཤུས་དང་། སྙན་ཞུ་བཅས་བཅུག་སྟེ་སྦྲགས་ཁང་བརྒྱུད་ནས་ལས་ཁུངས་ག་གེ་མོ་ལ་བཏང་། སྙན་ཞུ་ཕུལ་ཟིན་ནས་བདུན་ཕྲག་གཉིས་ཙམ་གྱི་རྗེས་ལ་ལས་ཁུངས་ག་གེ་མོ་དེས་ཡིག་རྒྱུགས་བཏང་བར་དྷ་སར་ཡོང་དགོས་པའི་བརྡོ་ཐོ་འབྱོར། བརྡ་ཐོ་འབྱོར་དོན་ལྟར་དབང་པོས་ཕ་མ་གཉིས་ལ་ང་དྷ་སར་ཡིག་ཚད་གཏང་བར་ཡོང་དགོས་ཚུལ་བརྡ་ཐོ་འབྱོར་དོན་ལྟར་འགྲོ་རྒྱུ་ཡིན་རབས་སོགས་བཤད་པས། ཕ་དབང་ཆེན་གྱིས་ཡིན་དང་ཡིན་ཁྱོད་ནི་རང་གཞུང་གི་བཀའ་དྲིན་ཆེན་པོས་གསོ་སྐྱོང་གནང་བ་རེད། ད་ནི་རང་གཞུང་ལ་ཞབས་འདེབས་ཞུ་རྒྱུའི་དུས་ཚོད་སླེབས་པ་རེད། ལས་དོན་ཐོག་ཏུ་ངོ་ལྐོག་བརྒྱབ་མདུན་མེད་པ་བྱོས་ཤོག་ཨ་ཞེས་ཁ་ཏ་བསླབ་བྱས།

དེ་ནས་ལམ་སང་བཟང་པོས་འགྲོ་ཆས་སོགས་བྱས་ཏེ་དྷ་སར་ཐོན་ཡོང་ཞིང་། ཉིན་བཞི་ཙམ་གྱི་རྗེས་ལ་དྷ་སར་འབྱོར། མེག་གྷན་ལ་མགྲོན་ཁང་ཞིག་གླས་ཏེ་དེའི་ནང་ལ་བསྡད་ཅིང་། ཕྱིན་ཉིན་ཞོགས་པ་སྔར་པོ་ལངས་ཏེ་ངོ་གདོང་གཙང་མ་བཀྲུས། དེ་དག་ཚར་རྗེས་བོད་པའི་ཟ་ཁང་ཞིག་གི་ནང་དུ་ཞོགས་ཇ་འཐུང་ཞིང་། དེ་དག་ཚར་རྗེས་སློབ་ཐོན་ལག་འཁྱེར་དང་། ཡིག་ཚད་བཏང་བར་ཡོང་དགོས་པའི་བརྡ་ཐོ་བཅས་འཁྱེར་ནས་གངས་ཅན་སྐྱིད་གཤོངས་ལ་ཡོང་བ་དང་། ལས་ཁུངས་ཀྱི་སྒོ་བྱང་ལ་ལྟ་བཞིན་ལས་ཁུངས་ག་གེ་མོ་དེའི་སྒོ་ནས་ཡར་འཛུལ་བ་དང་། སྣེ་ལེན་པ་དེས་ཁྱོད་སུ་ཐུག་དགོས་ཡོད་དམ་ཟེར།

བཟང་པོས་གུས་ཞབས་དང་བཅས་ང་ནི་དེ་སྔོན་ལས་ཀའི་སྙན་ཞུ་འབུལ་མཁན་དེ་ཡིན་ན་དྲུང་ཆེ་མཇལ་དགོས་ཡོད་ཚུལ་བརྗོད། སྣེ་ལེན་པ་དེ་ལམ་སྟོན་ལྟར་དྲུང་ཆེ་མདུན་དུ་བཅར་ནས་ཚུལ་མཐུན་གྱིས་གུས་ཞབས་དང་བཅས། རྒན་ལགས་ངའི་ཕ་མ་ནི་ལྷོ་ཕྱོགས་གཞིས་ཆགས་ཡིན་པ་དང་། མཐོ་སློབ་ནས་ཐོན་རྗེས་ས་མིག་ཡོད་ཚུལ་གྱི་གསལ་བསྒྲགས་མཐོང་བ་དང་། གུས་པས་སྙན་ཞུ་ཕུལ་བས་དྷ་སར་ཡིག་རྒྱུགས་གཏང་བར་ཡོང་དགོས་ཚུལ་བརྡ་ཐོ་འབྱོར་དོན་ལྟར་འདི་གར་བཅར་བ་ཡིན་ཚུལ་སོགས་བརྗོད་པས། དྲུང་ཆེ་དེ་ཕྲན་བུ་མ་འདོད་པའི་རྣམ་འགྱུར་དང་བཅས། འདི་གར་རྒན་ལགས་ག་བར་འདུག །ང་དྲུང་ཆེ་རེད། སྐུ་ངོ་དྲུང་ཆེ་ཞེས་ལབ་དགོས་རེད་ཅེས་བཤད། བཟང་པོ་སེམས་ནང་ཡ་མཚན་དང་བཅས་ཏེ་ཕྲན་བུ་སེམས་ནང་མ་བདེ་པ་ཞིག་བྱུང་ནའང་། ཁོག་ཏུ་སྦས་ནས་ཞལ་རས་འཛུམ་ཙམ་ཞིག་བྱས་ཏེ་ལགས་སོ།

ང་ཚོ་སློབ་གྲྭ་ནང་ལ་སྡོད་སྐབས་ང་ཚོའི་རྒན་ལགས་ཀྱིས་བོད་ས་མ་ཤོར་བའི་གོང་དུ་བོད་གཞུང་གི་”གོ་གནས་རྒྱུད་འཛིན་གྱིས་མི་རབས་ནས་མི་རིགས་ལ་དབང་སྒྱུར་གནང་མཁན་གྱི་མི་དྲག་”དེ་དག་ལ་སྐུ་ངོ་ཞེས་ལབ་ཀྱི་ཡོད་ཚུལ་དང་། དེང་སྐབས་ང་ཚོ་བཙན་བྱོལ་ནང་ལ་སླེབས་ནས་བོད་གཞུང་གིས་དེང་དུས་དང་མཐུན་པའི་མང་གཙོ་ལམ་ལ་སྤྱོད་ནས་སྔོན་མ་ལམ་ལུགས་ལ་བཅོས་བསྒྱུར་བཏང་ཟིན་པས། ང་ཚོའི་འགོ་ཁྲིད་ལ་སྐུ་ངོ་ཞེས་ལབ་དགོས་ཀྱི་མ་རེད། ང་ཚོ་སྔོན་མའི་དཔོན་རྒྱུད་ཀྱི་ལམ་ལུགས་དེ་མ་ཡིན་པར་དེང་རབས་མང་གཙོའི་ལམ་ལུགས་ཐོག་ཏུ་མདུན་སྐྱོད་བྱེད་ཀྱི་ཡོད་ན། རྒྱུ་མཚན་དེ་དག་ལ་བརྟེན་ནས་སྐུ་ངོ་ཞེས་འབོད་དགོས་ཀྱི་མེད་ལུགས་གསུང་བར་བརྟེན་ངས་འབོད་ཀྱི་མེད། དེ་རིང་གཙོ་བོ་མཆོག་གི་མདུན་དུ་ཐེངས་མ་དང་པོ་བཅར་དུས་གུས་ཞབས་མེད་པ་གཏམ་འདི་དག་སྨྲ་དགོས་བྱུང་སོང་བས་དགོངས་འགལ་མེད་པ་ཞུ། ང་ནི་རྗེས་ལུས་ཀྱི་རྣམ་པ་དེ་དག་ཐོག་ཏུ་སྐྱོད་འདོད་གཏན་ནས་མེད་ལུགས་བརྗོད་པས། དྲུང་ཆེ་དེ་ནི་ཅི་ལབ་མེད་པར་ཁ་རོགས་སྡོད་དགོས་ཐུག་པ་རེད།