སྐུ་ཚབ་ལྷག་པ་མཚོ་སྒོའི་ཕྱག་ལས་གནང་སྟངས་ཀྱིས་ས་གནས་བོད་རིགས་མཐུན་ཚོགས་དང་བོད་པའི་མཚན་སྙན། དགའ་ལྡན་ཕོ་བྲང་ཡིག་ཚང་བཅས་ལ་གནོད་སྐྱོན་ཚབས་ཆེན་པོ་ཞིག་གཏོང་གི་འདུག །

མགར་སྲས་ནས་བོད་བསྒྱུར་བྱས།

གསལ་བཤད། གཞི་འཛིན་ས་དབྱིན་ཇིའི་ཡིག་ཆ་རང་ལ་བྱེད་དགོས།

སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ཕུལ་བའི་ཡི་གེ །
བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧་གོང་ས་༧སྐྱབས་མགོན་ཆེན་པོ་མཆོག་ལ།

ཕྱི་ལོ་༢༠༡༥ ལོའི་ཟླ་༡༠ པའི་ཚེས་༢༥ ཉིན།

གུས་པ་ནས་སེམས་ངལ་ཆེན་པོ་དང་བཅས་ཡི་གེ་འདི་འབྲི་བཞིན་ཡོད། གནད་དོན་ཆུང་ཙག་འདི་ལྟ་བུ་ཞིག་གི་ཆེད་སྐུ་ཉིད་ཐུགས་སུན་བཟོ་འདོད་རྩ་བ་མེད་ཀྱང་། སྐུ་ཉིད་ནས་གལ་སྲིད་གཞུང་འཛིན་མི་སྣས་བོད་ཀྱི་རྩ་དོན་དང་བོད་མིའི་སྒྲིག་འཛུགས་ཀྱི་མཚན་སྙན་ལ་གནོད་པའི་ལས་དོན་སྒྲུབ་ཀྱི་ཡོད་ཚེ་ཕྱི་གསལ་ནང་གསལ་བྱེད་པའི་ལས་འགན་ཚང་མར་ཡོད་གསུང་གི་ཡོད་པ་ལྟར། གུས་པའི་བསམ་ཚུལ་ལྟར་ན། ད་ལྟའི་ཨོ་སི་ཊི་ལི་ཡའི་བོད་ཀྱི་དོན་གཅོད་ལས་ཁུངས་ཀྱི་སྐུ་ཚབ་ལྷག་པ་མཚོ་སྒོའི་ཕྱག་ལས་གནང་སྟངས་ཀྱིས་ས་གནས་བོད་རིགས་མཐུན་ཚོགས་དང་བོད་པའི་མཚན་སྙན། དགའ་ལྡན་ཕོ་བྲང་ཡིག་ཚང་བཅས་ལ་གནོད་སྐྱོན་ཚབས་ཆེན་པོ་ཞིག་གཏོང་གི་འདུག །

ང་རང་ནི་ད་ལྟའི་ཨོ་སི་ཊི་ལི་ཡའི་ནང་སྐུ་ཉིད་ཆིབས་བསྒྱུར་གོ་སྒྲིག་བྱེད་པའི་ཏཱ་ལའི་བླ་མ་ཆིབས་བསྒྱུར་ཚོགས་ཆུང་གི་ཚོགས་གཙོ་ཡིན། ཚོགས་པ་འདི་བཞིན་GEORGE FARLEY ཇོར་ཇེ་ཧྥེར་ལེ་མཆོག་དང་DR MOLLY མཁས་དབང་མོའོ་ལེ་གཉིས་ཀྱིས་ཕྱི་ལོ་༢༠༠༠ ལོར་གསར་འཛུགས་གནང་པ་ཞིག་ཡིན་ཞིང་། འདས་པའི་མི་ལོ་༡༥ རིང་སྐུ་ཉིད་ཀྱི་ཨོ་སི་ཊི་ལི་ཡའི་ཆིབས་བསྒྱུར་གོ་སྒྲིག་འཐུས་ཚང་ཞུས་ཡོད། གུས་པ་རང་ཉིད་ལ་མཚོན་ན་ཡང་འདས་པའི་མི་ལོ་༨་རིང་འགན་འཛིན་ལྷན་ཚོགས་ནང་ལས་ཀ་བྱས་པའི་རིང་སྐུ་ཉིད་ཀྱི་ཆིབས་བསྒྱུར་ཐེངས་ལྔར་གོ་སྒྲིག་བྱས་ཡོད།

ལོ་གཅིག་ཙམ་གྱི་གོང་ནས་འགོ་ཁྲིད་ཀྱི་ཡོན་ཏན་ཆ་ཚང་ལྡན་ཞིང་ཕྱག་ལས་ཡག་པོ་གནང་བཞིན་པའི་སྐུ་ཚབ་དྭགས་པོ་བསོད་ནམས་ཀྱི་ཚབ་ཏུ་སྐུ་ཞབས་ལྷག་པ་མཚོ་སྒོ་སྐུ་ཚབ་དོན་གཅོད་ཁང་ལ་བསྐོ་བཞག་བྱས་སོང་པ་དང་། སྐུ་ཚབ་དྭགས་པོ་བསོད་ནམས་ལགས་ལ་མཚོན་ན་ཁོང་ཉིད་གོ་གནས་དེ་ལ་འོས་ཤིང་འཚམས་པར་བརྟེན་གུས་བཀུར་ཞུ་ཡུལ་དུ་གྱུར་ཡོད།

སྐུ་ཞབས་ལྷག་པ་མཚོ་སྒོ་ཡིས་ལོ་གཅིག་གི་ནང་འདས་པའི་མི་ལོ་༡༥ རིང་དཀའ་སྤྱད་འབད་བརྩོན་གྱིས་བསྒྲུབས་པའི་ལས་དོན་ཚང་མ་གཏོར་བཤིག་དང་། རྒྱུན་རིང་པོར་དུས་ཚོད་དང་ནུས་ཤུགས་ཡོད་རྒུ་འབུལ་མཁན་གྱི་བོད་དོན་རྒྱབ་སྐྱོར་པ་མང་པོ་ཞིག་གི་བློ་ཁ་བསྒྱུར་སོང་། ངའི་སེམས་ཁྲལ་ཆེ་ཤོས་ནི་གལ་སྲིད་ཁོ་རང་སྣང་མེད་དུ་བཞག་པ་ཡིན་ན་འབྱུང་འགྱུར་གྱི་ལོ་ཤས་རིང་ཁོས་སླར་གསོ་བྱེད་ཐབས་བྲལ་བའི་གཏོར་སྐྱོན་ཆེན་པོ་ཞིག་གཏོང་ངེས་རེད།
ང་རང་སྒེར་གྱི་བསམ་ཚུལ་ལྟར་ན་ཁོང་རང་སྐུ་ཚབ་དོན་གཅོད་གོ་གནས་འདི་འཚམས་པོ་མི་འདུག་ལ་དེའི་རྒྱུ་མཚན་ཁག་གཅིག་གཤམ་དུ་འབྲི་རྒྱུ་ཡིན།

སྔོན་མའི་ཆིབས་བསྒྱུར་ཁག་གི་སྐབས་སུ་བོད་ཀྱི་དོན་གཅོད་ལས་ཁུངས་ཀྱི་འགྲོ་སོང་ཟུར་བཅད་དངུལ་ཨོ་སྒོར་༡༠་༠༠༠ ནས་༢༠་༠༠༠ ཡིན་པ་ནས། སྐུ་ཉིད་ཀྱི་ཆིབས་བསྒྱུར་སྐབས་སྐུ་ཞབས་ལྷག་པོ་མཚོ་སྒོ་ནས་འགྲོ་སོང་ཨོ་སྒོར་༡༧༠་༠༠༠ སོང་ཡོད་ཚུལ་བརྗོད་ཡོད་པ་དང་། འགྲོ་སོང་དེ་ཕུད་ནས་ད་དུང་ཆིབས་བསྒྱུར་གོ་སྒྲིག་ཚོགས་ཆུང་ལ་ཁོང་གིས་ཨུ་ཚུགས་ཆེན་པོས་སྐུ་ཉིད་དགུང་གྲངས་༨༠ ཕེབས་པའི་འཁྲུངས་སྐར་གོ་སྒྲིག་ཆེད་ཨོ་སྒོར་༨༠་༠༠༠ བཏང་བཅུག་པར་མ་ཟད། ད་དུང་བོད་ཀྱི་དོན་གཅོད་ལས་ཁུངས་ནང་ལས་བྱེད་འཕར་མ་ཞིག་གི་འགྲོ་སོང་ཨོ་སྒོར་༦༠་༠༠༠་དེ་ཡང་ཆིབས་བསྒྱུར་གོ་སྒྲིག་ཚོགས་ཆུང་ནས་སྤྲོད་དགོས་པ་མ་ཟད་གནས་ཚུལ་འདི་བོད་མི་སྒྲིག་འཛུགས་ལ་ཤོད་མི་དགོས་པའི་སྐོར་བཤད་སོང་།
ཁོང་གིས་ད་དུང་གསུང་ཆོས་དང་མི་མང་བཀའ་སློབ་ཀྱི་སྤ་སེ་སྔོན་མ་ལས་ལྡབ་ལྔ་ལས་མང་པ་རིན་མེད་དུ་ཁོའི་གྲོགས་པོ་དགའ་ཉེ་ཚོར་སྤྲད་པ་མ་ཟད། སྔོན་ཆད་གྱི་ཆིབས་བསྒྱུར་གང་དུ་བེད་སྤྱོད་བཏང་མ་དགོས་པའམ་བཏང་མྱོང་མེད་པའི་ཆིབས་ཞབས་གྲངས་མང་པོ་ཞིག་དགོས་པ་ཨུ་ཚུགས་མཐའ་སྐྱེལ་བྱས་སོང་། ཁོང་གི་བྱེད་སྟངས་འདི་དངུལ་རྩིས་འཛིན་སྐྱོང་ཚགས་ཚུད་པོ་མེད་པ་ཞིག་ལ་ངོས་འཛིན་ཞུ་བཞིན་ཡོད།
སྐུ་ཉིད་ཨོ་གླིང་དུ་མ་ཕེབས་གོང་ཁོང་གིས་ས་གནས་དང་དབུས་གཞུང་གི་ཉེན་རྟོག་པ་དང་སྐུ་སྲུང་བ་རྣམས་མགྲོན་ཁང་གི་ཁང་མིག་ཁག་གི་ནང་གོ་སྒྲིག་བྱེད་སྟངས་དང་། གནམ་ཐང་ནས་དང་མི་མང་གི་འདུ་འཛོམས་བྱེད་ས་སོགས་ཕེབས་ལམ་ཁག་གྲོས་བསྡུར་སྐབས་ཁོ་ཚོའི་མཉམ་དུ་ཁ་རྩོད་དང་བརྙས་སྨོད་ཀྱི་སྐད་ཆ་མང་པོ་བཤད་པ་མ་ཟད་། འདས་པའི་མི་ལོ་བཅུའི་སྐུ་སྲུང་གི་འགོ་བ་བྱས་མྱོང་པའི་སྐུ་སྲུང་པ་STEVEN BENTON ༧གོང་ས་མཆོག་གི་ཆིབས་བསྒྱུར་སྐབས་ཁོ་རང་སྒེར་གྱི་མིང་གྲགས་དང་ཁེ་ཕན་ཡོད་སྐོར་ཉེས་འདོགས་བྱས་པ་དང་། དོན་དངོས་ཐོག་ཁོང་དང་སྐུ་སྲུང་བ་གཞན་རྣམས་ཀྱིས་རིན་མེད་ཐོག་དང་བླངས་ཞབས་ཞུ་སྒྲུབ་ཡོད་པ་རེད།
ཁོང་ད་དུང་ས་ཕྱོགས་ཁག་གི་མགྲོན་ཁང་ནང་ཨོ་སི་ཊི་ལི་ཡའི་མགྲོན་ཁང་གི་སྒྲིག་གཞི་རྩིས་མེད་ཀྱིས་སྒེར་གྱི་མ་བྱན་དགོས་པའི་སྐོར་ལ་ཨུ་ཚུགས་རྒྱབ། ཁོང་ད་དུང་རང་ཉིད་ཀྱི་འདོད་པ་ལྟར་མ་བྱུང་བར་དུ་མགྲོན་ཁང་ནས་ལས་བྱེད་དང་འགན་འཛིན་ལ་བརྡབ་གསིག་གཏོང་རྐྱང་བྱས་པར་བརྟེན་ཁོང་ཚོ་བཙན་ཤུགས་ཀྱི་སྒྲིག་གཞི་དང་འགལ་བའི་ལས་ཀ་བྱེད་དགོས་བཅུག་ཡོད་པ་རེད། མི་སུ་ཞིག་གིས་ཁོང་གི་ལས་ཀ་བྱེད་སྟངས་ལ་དྲི་བ་བཏོན་པ་ཡིན་ན། ཁོས་རང་ཉིད་ཀྱི་ཨོ་སི་ཊི་ལི་ཡའི་ནང་སྤྱི་ནོར་༧གོང་ས་༧གོང་མགོན་ཆེན་པོ་མཆོག་གི་སྐུ་ཚབ་ཡིན་པས་ཁོང་གི་གོ་གནས་ལ་ངེས་པར་བརྩི་བཀུར་བྱེད་དགོས་ཟེར་བ། མི་སུ་ཞིག་གིས་ཁོང་ལས་ཀ་བྱེད་སྟངས་ལ་དྲི་བ་བཏོན་པ་ཡིན་ན་༧གོང་ས་༧གོང་མགོན་ཆེན་པོ་མཆོག་ལ་བརྩི་བཀུར་མ་བྱས་པའི་ཉེས་འཛུགས་བྱེད་ཀྱི་འདུག །
དོན་དངོས་ཐོག་གི་ཁོང་གི་གོ་གནས་དེ་བཞིན་ངེས་པར་དུ་བརྩི་བཀུར་བྱེད་དགོས་ངེས་ཡོད་པ་ལྟར་སྐུ་ཚབ་དོན་གཅོད་སྔོན་མ་རྣམས་ཀྱི་གོ་གནས་ལ་དཔག་པའི་ཕྱག་ལས་གནང་ཡོད་ལ་བརྩི་བཀུར་ཡང་ཆེན་པོ་ཐོབ་ཡོད།
སྐུ་ཞབས་ལྷག་པ་མཚོ་སྒོ་ཡི་ཨོ་སི་ཊི་ལི་ཡའི་ནང་ཡོད་པའི་བོད་དོན་རྒྱབ་སྐྱོར་ཚོགས་པ་ཆེ་ཤོས་ATC བོད་དོན་ལྷན་ཁང་གི་འགན་འཛིན་ལྷན་ཚོགས་ཞིག་གི་ཐོག་གཏམ་བཤད་དེས་འགན་འཛིན་ལྷན་ཚོགས་ལ་བློ་འཚབ་ཆེན་པོ་དང་ཕོག་ཐུག་འགྲོ་གཞིར་གྱུར་ཡོད་པ་དང་། ཁོང་གིས་བོད་དོན་རྒྱབ་སྐྱོར་པ་GEORGE FARLEY ཇོར་ཇེ་ཧྥེར་སོགས་གནད་ཡོད་མི་སྣ་མང་པོ་ཞིག་ནི་བོད་དོན་ལྷན་ཁང་ལ་རེ་བ་བརླག་ཡོད་པ་དང་རྒྱབ་སྐྱོར་བྱེད་མཚམས་བཞག་ཡོད་ཚུལ་ང་ལ་དངོས་སུ་བཤད་སོང་། ངས་GEORGE FARLEY ཇོར་ཇེ་ཧྥེར་ལེ་མཆོག་ལ་ཁ་བརྡ་བྱེད་དུས་སྐད་ཆ་དེ་དག་ཚང་མ་བདེན་པ་མིན་པ་ཤེས་རྟོགས་བྱུང་། ངས་ATC བོད་དོན་ལྷན་ཁང་གི་འགན་འཛིན་ལྷན་ཚོགས་ལ་སྐད་ཆ་བཤད་དུས་ཁོང་ཚོས་ང་ལ་བརྗོད་དོན། རྗེས་མ་ནས་སྲིད་དོན་མི་སྣ་ལ་འབྲེལ་བ་བྱེད་དུས་དོན་གཅོད་བརྒྱུད་ནས་མ་བྱས་པ་ཡིན་ན་ཁོ་ཚོའི་བརྒྱུད་ལམ་བཀག་འགོག་བྱེད་རྒྱུ་དང་། ད་དུང་ཁོས་བཤད་པ་ལྟར་མ་སྒྲུབ་པ་ཡིན་ན་དོན་གཅོད་ལས་ཁུངས་བརྒྱུད་བོད་དོན་རྒྱབ་སྐྱོར་ཚོགས་པ་ཞིག་ལོགས་སུ་འཛུགས་རྒྱུ་ཡིན་སྐོར་གྱི་ཉེན་བརྡ་ཡང་བཏང་ཡོད་འདུག །

ལྷག་པ་མཚོ་སྒོ་ལགས་ཀྱིས་གོ་སྒྲིག་ཚོགས་ཆུང་གི་འགན་འཛིན་ལ་སྒེར་ངོས་ནས་མ་དགའ་བ་བྱེད་ཀྱི་འདུག །ང་ཚོ་ཐོག་དང་པོར་ཐུག་ནས་སྐད་ཆ་བཤད་དུས་ Ms Lynn Bain ལེན་སྦེན་གྱིས་ཁོའི་རྒྱབ་ལོགས་ནས་ལྐོག་ཇུས་འཐེན་གྱི་འདུག་ཟེར་བའི་ཉེས་འཛུགས་འདི་ནི་གཞི་མེད་ཁུངས་མེད་རང་རེད། རང་ཉིད་ཆིབས་གོ་སྒྲིག་ཚོགས་ཆུང་གི་ཚོགས་གཙོ་ཡིན་པའི་ཆ་ནས་ལྷག་པ་མཚོ་སྒོ་དང་ Ms Lynn Bain ལེན་སྦེན་གཉིས་དང་མཉམ་ལས་བྱས་པའི་རིང་ལྷག་པ་མཚོ་སྒོ་ནས་གོ་སྐབས་ཡོད་ཚད་ལ་ལྕམ་ལེན་སྦིན་ལ་སུན་བཙུར་དང་དབང་ཡོད། སྣང་ཆུང་རང་བཏང་སོང་བ་མ་ཟད། ཆིབས་བསྒྱུར་འདི་གོ་སྒྲིག་ཚར་བ་དང་ཁོ་མོའི་ལས་ཀ་ཤོར་གྱི་རེད་ཟེར་ནས་ང་ལ་བཤད་སོང་། ཐེངས་འདིའི་ཆིབས་བསྒྱུར་ལེགས་གྲུབ་བྱུང་བའི་ལེགས་སྐྱེས་སུ་ Ms Lynn Bain ལེན་སྦེན་གྱི་དབང་ཆ་དོན་གཅོད་ཁོ་རང་གིས་བླངས་ནས་ཁོ་མོར་ལས་གནས་མེད་པ་བཟོས་སོང་། གནས་ཚུལ་དེ་དག་ལ་བརྟེན་ངས་རིམ་བཞིན་དགོངས་པ་ཞུ་དགོས་ཆགས་པ་རེད།

ཡི་གེ་འདི་བྲིས་ཏེ་སྐུ་ཞབས་བསྟན་པ་འབྲུག་གྲགས་ལ་རྒྱབ་སྐྱོར་བྱེད་ཀྱི་ཡོད། གང་ཡིན་ཟེར་ན། འདས་པའི་ལོ་གཅིག་རིང་གུས་པ་ནས་ཐབས་ཤེས་ཡོད་རྒུ་བཏོན་ནས་འགྲིག་འཇགས་ཡོང་ཐབས་བྱས་ཀྱང་སྐུ་ཞབས་ལྷག་པ་ལགས་ནས་རྒྱུ་མཚན་མེད་པར་ཁོང་(བསྟན་པ་འབྲུག་གྲགས)་ལ་དམའ་འབེབས་དང་མཚན་ཤས་བྱས་སོང་པ་དང་།
སྐུ་ཞབས་བསྟན་པ་འབྲུག་གྲགས་ལགས་ནས་༧གོང་ས་མཆོག་ལ་ཕུལ་པའི་ཡི་གེ་ཕྱོགས་བསྡུས་ཀྱི་དེབ་ཆུང་ཞིག་པར་སྐྲུན་བྱེད་གཏན་ཁེལ་ཡོད་པ་དེ། རྒྱུ་མཚན་ཁུངས་ལུང་གང་ཡང་སྟོན་རྒྱུ་མེད་བཞིན་དུ་(དོན་གཅོད་)་ཁོང་ལ་སྣང་ཆུང་བྱེད་པའི་ཇུས་ངན་ཞིག་ཡིན་པར་ངོས་འཛིན་བྱས་འདུག །
དེ་ལ་བརྟེན་ནས་སྐུ་ཞབས་འབྲུག་གྲགས་ཀྱིས་ཁོང་ལ་མིང་ཆད་ངན་པ་བཟོས་པར་ཁྲིམས་ཐོག་ནས་ཐག་གཅོད་ཡོང་ཐབས་གནང་སོང་པ་དང་། ཁོང་ལ་མིང་ཆད་ངན་པ་བཟོས་པ་དེས་བོད་པའི་སྤྱི་ཚོགས་ཁྲོད་ཁོང་གི་ནང་མི་དང་གྲོགས་པོ་རྣམས་ལ་དཀའ་ངན་ཆེན་པོ་ཞིག་སྤྲད་ཡོད་པ་ངས་གསལ་བོར་ཤེས་ཀྱི་ཡོད།

སྐུ་ཞབས་ལྷག་པ་མཚོ་སྒོ་ནས་མི་གཞན་ལ་མིང་ཆད་ངན་པ་བཟོ་བ་དང་ཞེ་འཁོན་ཆེན་པོ་བཅངས་ཀྱང་དགོངས་དག་མ་ཞུས་པར་བརྟེན་ཁྲིམས་གཏུགས་བྱས་པ་འདིས་བོད་ཀྱི་དོན་གཅོད་ལས་ཁུངས་ཁྲིམས་ཁང་ལ་སླེབས་པའི་ཉེན་ཁ་ཡང་མཐོང་གི་འདུག །
ངས་ཁོང་གཉིས་འགྲིག་མཐུན་ཡོང་པའི་ཐབས་ཤེས་མང་པོ་བྱས་པ་ཡིན་ཀྱང་། སྐུ་ཞབས་ལྷག་པ་མཚོ་སྒོ་ནས་རྒྱུ་མཚན་མི་ལྡན་པའི་བསམ་ཚུལ་དང་རྒྱབ་སྐྱོར་བྱེད་ཐབས་བྲལ་པའི་གནས་བབ་བཟུང་པ་མ་ཟད་མུ་མཐུད་ཁོ་རང་༧གོང་ས་ ༧སྐྱབས་མགོན་ཆེན་པོ་མཆོག་གི་སྐུ་ཚབ་ཡིན་པས་སྐུ་ཞབས་འབྲུག་གྲགས་ནས་ཁོང་ལ་དགོངས་དག་ཞུ་དགོས་སྐོར་བཤད་ཀྱི་འདུག །

སྤྱི་ནོར་ ༧གོང་ས་༧ སྐྱབས་མགོན་ཆེན་པོ་མཆོག་ལ་ཞུ་རྒྱུ།
ང་རང་ཨོ་སི་ཊི་ལི་ཡའི་ཚོང་ལས་སྡེ་ཁག་ནང་ལས་ཀ་བྱེད་མཁན་ཞིག་ཡིན་པས་འགན་འཛིན་ལྷན་ཚོགས་མང་པོའི་ནང་ལས་ཀ་བྱས་མྱོང་པ་མ་ཟད། དཀའ་རྙོག་ཧ་ཅང་ཆེ་བའི་མི་སྣ་མང་པོའི་གནད་དོན་ཐག་གཅོད་བྱས་མྱོང་། ངའི་བསམ་ཚུལ་ལྟར་ན། སྐུ་ཞབས་ལྷག་པ་ཁོང་འདི་འདྲའི་གལ་གནད་ཅན་གྱི་ཞབས་སྟེགས་ཐོག་བསྡད་ན་འོས་འཚམས་མི་འདུག་པ་མ་ཟད། ཁོས་བྱས་ཉེས་རྣམས་ད་དུང་མུ་མཐུད་བྱེད་ངེས་ཡིན་པ་འདིས་བོད་པའི་སྤྱི་ཚོགས་ལ་གནོད་སྐྱོན་ཆེན་པོ་ཕོག་གི་རེད།

ཁོང་ལ་དབྱེན་དཀྲུགས་དང་ཕྱོགས་རིས་ཅན་གྱི་མི་གཤིས་ཡོད་པར་བརྟེན། ག་དུས་ཡིན་ཀྱང་མི་གཞན་གྱིས་ཁོའི་རྒྱབ་ལོགས་ནས་ཇུས་ངན་བཤམས་ཀྱི་ཡོད་པའི་རྒྱུ་མཚན་འཚོལ་མཁན་ཞིག་རེད། འདས་པའི་ལོ་ངོ་༨ རིང་༧གོང་ས་༧སྐྱབས་མགོན་ཆེན་པོ་མཆོག་གི་ཆིབས་བསྒྱུར་གོ་སྒྲིག་ལ་ཕྱག་ལས་གནང་མཁན་མང་ཆེ་བ་ཚོགས་པ་ནས་ཐོན་ཚར་སོང་པ་དང་། ཁོང་གིས་ཚོགས་པའི་བང་མཛོད་སྟོང་པ་བཟོས་སོང་པའི་མ་འོངས་པའི་ཆིབས་བསྒྱུར་གོ་སྒྲིག་ཞུ་རྒྱུ་ལ་དཔལ་འབྱོར་གྱི་རྒྱབ་རྟེན་མེད་པ་ཆགས་ཡོད་པ་རེད། ངས་ཕྱི་ཟླ་༨ པའི་ཚེས་༣༠ ཉིན་གོང་ཞུས་དང་མཚུངས་པའི་རང་ཉིད་ཀྱི་བསམ་ཚུལ་ཞིག་སྐུ་སྒེར་དྲུང་ཆེ་སྐུ་ཞབས་འཆི་མེད་ཆོས་སྐྱབས་པ་ལགས་ཀྱི་མིང་ཐོག་བཏང་པར་ཁོང་གིས་ང་ལ་ཡིག་ལན་ཞིག་གནང་འདུག་པར་ཐུགས་རྗེ་ཆེ་ཞུ་འདོད་བྱུང་། ཡི་གེ་འདིའི་མཉམ་དུ་དྲུང་ཆེར་ཕུལ་བའི་ཡི་གེ་ཡང་མཉམ་སྦྱར་གྱིས་བཏང་ཡོད།

སྤྱི་ནོར་༧གོང་ས་ ༧སྐྱབས་མགོན་ཆེན་པོ་མཆོག
གནད་དོན་འདི་ལས་ཁུངས་ཀྱི་སྲིད་དོན་ལྟ་བུའི་དོན་དག་ཆུང་ཆུང་ཞིག་ཏུ་སྣང་མོད། སྤྱིར་བཏང་གི་གནད་དོན་ཞིག་ཡིན་ན་ངས་༧གོང་ས་མཆོག་ལ་སྙན་སུན་ཞུ་ག་ལ་ཕོད། བོད་ཀྱི་དོན་གཅོད་ཁང་གི་ཞབས་སྟེགས་འདིའི་དབང་ཤུགས་དང་གལ་འགངས་ཧ་ཅང་ཆེ་བའི་རྒྱུ་མཚན་ལ་བརྟེན། སྐུ་ཞབས་ལྷག་པ་མཚོ་སྒོ་ནས་ཕན་གནོད་ཧ་ཅང་ཆེ་བའི་སྐྱོན་ཆག་གཏོང་གི་འདུག །

ནམ་རྒྱུན་ནས་བོད་དོན་ཆེད་མུ་མཐུད་རྒྱབ་སྐྱོར་བྱེད་མཁན་རྒྱུན་གནས་བྱེད་རྒྱུ་ཁག་པོ་ཡོད་པའི་ཁར་ལས་ཁུངས་རྩ་ཆེན་པོ་ཞིག་གི་ནང་ཕྱག་ལས་གནང་མཁན་གྱི་གང་ཟག་གལ་ཆེ་པོ་ཞིག་ནས་དབྱེན་དཀྲུག་གི་ལས་ཀ་བྱས་པ་ཡིན་ན། རྒྱབ་སྐྱོར་བྱེད་མཁན་གསར་པ་ཡོང་རྒྱུ་ཁག་པོ་དང་རྙིང་པ་རྣམས་རྒྱུན་འཛིན་བྱེད་རྒྱུ་དེ་བས་ཀྱང་ཁག་པོའི་གནས་སུ་གྱུར་ཡོད་པ་མ་ཟད། གྲོགས་པོ་རྙིང་པ་དེ་ཚོ་བརླག་པ་ཡིན་ན་ཚུར་ཡོང་མི་སྲིད་པ་ལྟ་བུ་རེད།
སྐུ་ཞབས་ལྷག་པ་མཚོ་སྒོ་ཡིས་བོད་ཀྱི་དོན་གཅོད་ལས་ཁུངས་ནང་ལས་ཀ་བྱེད་པའི་རིང་གནོད་སྐྱོན་ཆེན་པོ་ཞིག་གཏོང་གི་ཡོད་པར་ངས་བློ་ཚབས་ཆེན་པོས་ཡི་གེ་འདི་བྲིས་པ་ཡིན།
ང་རང་ཚོགས་གཙོའི་ལས་གནས་ནས་དགོངས་པ་ཞུས་ཟིན་པ་ཡིན་པས་ཡི་གེ་འདི་བྲིས་ནས་ང་ལ་ཐོབ་ཤོར་གང་ཡང་མེད། འོན་ཀྱང་། རང་ཉིད་ལ་བཟང་སྤྱོད་ཀྱི་ལས་འགན་ཞིག་ཡོད་པའི་ཆ་ནས་སྐུ་ཞབས་འབྲུག་གྲགས་དང་། ལྕམ་ལེན་སྦེན་ Ms Bain སོགས་ལ་ཐུབ་ཚོད་དང་མིང་ཆད་ངན་པ་བཟོས་པ་སོགས་མཐོང་བ་དང་། དབང་ཆ་དང་གོ་གནས་ཡོད་པའི་གང་ཟག་ནས་མི་གཞན་ལ་ཞེད་སྣང་སྐུལ་བའི་བྱེད་ཐབས་སྤྱད་པར་གདོང་ལེན་བྱེད་དགོས་ངེས་སུ་མཐོང་ནས་ཡི་གེ་འདི་བྲིས་པ་ཡིན།

གུས་པ་དང་བཅས།

ROB KELDOULIS
རོབ་ཁེལ་ཌོའོ་ལེ་སེ་ནས་ལྗགས་ལན་ཡོང་པའི་རེ་བ་དང་བཅས།

ཨོ་སི་ཊི་ལི་ཡའི་༧གོང་ས་མཆོག་གི་ཆིབས་བསྒྱུར་གོ་སྒྲིག་ཚོགས་ཆུང་གི་ཚོགས་གཙོ་ནས་ཕུལ།