སྐྱབས་རྗེ་ཟམ་གདོང་རིན་པོ་ཆེའི་མཛད་པ་ལ་བསྟོད་པའི་གཏམ་མེ་ཏོག་ཕྲེང་བ།

འདབ་པ་ཚེ་དབང་མགོན་པོ།

དེ་རིང་ཆེས་ཤིན་ཏུ་ནས་ཡིད་ལ་ལྷིང་ལྷིང་གིས་དགའ་འོས་པ་ཞིག་ལ། དྲྭ་ཐོག་གི་བརྒྱུད་ནས་སྐྱབས་རྗེ་ཟམ་གདོང་རིན་པོ་ཆེའི་གསེར་ཞལ་མཇལ་བའི་སྐལ་བཟང་ཕྲན་བུ་འཆར་ཞིང་། ཁོང་ནི་བཙན་བྱོལ་སྤྱི་ཚོགས་ཀྱི་ཁྲོད་ནས་སྐྱ་བོ་མང་ཤས་ཀྱིས། ཆོལ་ཁ་དང་ཆོས་ལུགས་ཀྱི་ཕྱོགས་ལ་འཐེན་ཁྱེར་གྱི་བློ་གཡང་དུ་མི་ལྷུང་བར། དྲང་བདེན་གྱི་ཐེམ་སྐས་ལ་འཛེགས་པའི་སྐྱེས་བུ་དམ་པ་ཡིན་རབས་དང་། རབ་ཏུ་བྱུང་པའི་སྐྱེ་མཆོག་འགའ་ཞིག་གིས། སྟོན་པའི་བསྟན་པ་ལ་ཞུགས་པའི་ཤཱཀྱའི་དགེ་སློང་འདུལ་བ་འཛིན་པ་མ་ཟད། མདོ་ཕྱོགས་ནས་བཀའ་པོད་ལྔ་གཙོས་པའི་གཞུང་ལུགས་རྣམས་དང་། གསང་སྔགས་ཀྱི་རྒྱུད་སྡེ་མཐའ་དག་ཁོང་དུ་ཆུད་པའི་ཐེག་པ་ཆེན་པོའི་སྡེ་སྣོད་རྣམས་འཁུར་བར་བྱེད་པའི་གང་ཟག་ཡིན་རབས། རིག་པའི་གནས་ལ་བྲོ་བ་མྱོང་པའི་མཁས་པ་རྣམས་ཀྱིས། གནས་ལྔ་རིག་པའི་དོན་ལ་མཁས་པའི་དབང་པོ་པཎྜི་ཏ་ཡིན་རབས། བཙན་བྱོལ་སྤྱི་ཚོགས་ཀྱི་རྩོམ་པ་པོ་རྣམས་ཀྱིས།  སྤྱི་ཚོགས་ཀྱི་དཔྱད་བརྗོད་ལ། རྣམ་དཔྱོད་ཤིན་ཏུ་ཡངས་པའི་སྨྱུག་ཐོགས་པ་ཡིན་རབས། ཝ་ཎཱ་སི་དང་ས་རཱ་གཙོས་པའི་མཐོ་སློབ་ཁག་ཅིག་གིས། སྡེབ་སྦྱོར་གྱི་ཚིག་དང་། ཉམས་འགྱུར་གྱི་གསོན་ཤུགས། དབྱངས་རྟའི་འགྱུར་འགྲོས་ལ་རང་དབང་ཐོབ་པའི་སྙན་ངག་པ་ཡིན་རབས། གངས་ཅན་སྐྱིད་གཤོངས་སུ་མཆིས་པའི། དཔལ་འབྱོར་ལས་ཁུངས་ཀྱི་བཀའ་བློན་རྣམས་དང་། ལས་བྱེད་རྒན་གཞོན་མང་པོས། དཔལ་འབྱོར་རིག་པའི་ཆེད་སྦྱོང་འབུམ་རམས་པ་དང་གཅིག་མཚུངས་ཡིན་རབས། སྤྱི་འཐུས་གྲོས་ཚོགས་ཀྱི་ཚོགས་རྭ་ནང་གི་འཐུས་མི་རྣམས་པས། མིའི་ཐོབ་ཐང་སྟེ་སྨྲ་བརྗོད་ཀྱི་རང་དབང་། བསམ་བློའི་འདུ་ཤེས་ལ་ཇི་མི་སྙམ་པར། འཇིག་རྟེན་ཁྲིམས་ལུགས་ཀྱི་ཐོག་ནས། ཐོབ་ཐང་ཅི་ཡོད་པ་རྣམས་དབང་སྟེར་བའི། དམངས་ཚོགས་ཀྱི་དོན་གཉེར་བ་ཆེན་པོ་ཡིན་རབས། བཀའ་ཤག་གི་བཀའ་དྲུང་གཙོས་པའི་ལས་བྱེད་ཐུན་མོང་གིས། བཙན་བྱོལ་བོད་མི་འཛིན་སྐྱོང་གི་ཡར་རྒྱས་ཀྱི་བྱེད་པོ་སྟེ། ཁ་ཆེའི་དཀོན་མཆོག་ཨ་ལ་བཞིན་དུ་ཡར་རྒྱས་ཀྱི་གོ་འཕང་ལ་འགོད་པའི་བཀོད་པ་པོ་ཐོག་མ་དེ་ཡིན་རབས། གཞིས་ཆགས་ཁག་གིས་བགྲེས་སོང་དག་གིས། གོང་ས་མཆོག་གི་བཀའ་དགོངས་སྒྲུབ་པའི་གླང་པོ་ཆེ་ས་ལ་རབ་བརྟན་བཞིན་དུ་ལས་ཀ་བྱེད་པའི་རླབས་ཆེན་གྱི་མི་སྣ་ཡིན་རབས། གདན་ས་གསུམ་གྱི་སྦ་སར་བླ་རྒན་རྣམ་པས། རྒྱལ་བའི་སྐུ་ཡོན་ལ་མཁྱེན་པའི་འགན་ཡོངས་སུ་འཛིན་པའི་སྐྱབས་རྗེ་ཁྲི་འཆང་རྡོ་རྗེ་འཆང་གི་དམ་ཚིག་གསུམ་ལྡན་གྱི་འགྱུར་མེད་དངོས་སློབ་ཡིན་རབས། ཕྱི་ནང་གི་གནས་ཡོད་མི་སྣ་མང་པོ་ཞིག་གིས། རྒྱལ་བ་རིན་པོ་ཆེ་གཙོས་པའི་བླ་ཆེན་དང་མི་ཆེན་རྣམས་ཀྱི་ལམ་སྟོན་བྱེད་པོ་དེ་ཡིན་རབས་བཅས་ནི། སྐྱབས་རྗེ་ཟམ་གདོང་རིན་པོ་ཆེའི་ལུས་དང་གྲིབ་མ་བཞིན་དུ་འགྲོགས་པའི་ལྷན་ཅིག་གི་ཡོན་ཏན་ནམ། འགྱུར་མེད་གཡུང་དྲུང་གི་གཤིས་ཀ་ཞིག་ཡིན་པས། སུ་ཞིག་གིས་ཀྱང་ལྡོག་ཐབས་མེད་པའི་འཇིག་རྟེན་ཆོས་ཉིད་ཀྱི་གཏན་ཚིགས་ལྡན་ལ། འོན་ཀྱང་རྒྱུ་དང་རྟེན་འབྲེལ་ལས་བྱུང་བའི་ཆོས་ག་གེ་མ་ཞིག་ཡིན་ནའང་། རང་རྒྱུ་སྔོན་དུ་མ་སོང་བ་མེད་སྟབས།  སྐྱབས་རྗེ་ཟམ་གདོང་རིན་ཆེ་འདི་ཡང་རང་ཉིད་གཅིག་པུར་ཡེ་ཤུ་དཀོན་མཆོག་བཞིན་དུ་འོངས་པ་ཞིག་མ་ཡིན་པར། ཕྱི་ནང་གི་ཆོས་མང་པོ་ཞིག་ལ་བརྟེན་ནས་བྱུང་བའི་བཟང་པོའི་ཡོན་ཏན་གྱི་ཆ་དང་། ངན་པའི་སྐྱོན་རྐྱེན་གྱི་ཆ་མང་པོ་ཞིག་ཡོད་པ་ནི། བཤད་མི་དགོས་ལ། མེད་ཅེས་གླེང་རན་ཡང་མི་ཆོག་ཅིང་། དེ་ཡང་རིན་པོ་ཆེ་ལ་གང་ཟག་སོ་སོས་ལྟ་ཚུ་དང་མཐོང་ཚུལ་ཇི་སྙེད་ཅིག་མཆིས་པ་རྣམས་ལས། རྒྱུ་མཚན་དང་གནས་ལུགས་ཤེས་པའི་དད་ལྡན་རྣམས་དང་། རྨོངས་དད་དང་ལོང་རྒྱག་བྱེད་པའི་གཡམ་རྒྱུག་བ། འཐེན་ཁྱེར་དང་ཞེན་ཁོག་གིས་བཅིངས་པའི་ཕྱོགས་ལྷུང་བ། ཁ་བདེ་དང་ལྕེ་མཁས་ཀྱིས་རྐུབ་སྟེགས་ཀྲོང་པའི་སྤྱང་གྲུང་བ་བཅས་ཡོད་པའང་། འཇིག་རྟེན་གྱི་ལུགས་སུ་ངེས་པ་བཞིན་དུ། རིན་པོ་ཆེ་ལ་ལྟ་ཚུལ་ལེགས་པའི་ཕྱོགས་གཏོགས་ཀྱི་སྐྱེ་བོ་རྣམས་སོ།