སྐྱེ་རྒུའི་ས་ཡོམ་གྱིས་གཡོ་བའི་སེམས་པ།

                                              སྐར་ཁྲི་བཙན།

༈ སྙིང་རྗེ་མེད་པ་དྲག་པོའི་དམག་སྒར་ལ་མ་གནོད།།
ངོ་ཚ་མེད་པ་རུལ་སོང་རྒྱུག་ཁྱི་ལ་མ་དགྲ།།
ཉམ་ཆུང་གྲངས་ལས་འདས་པའི་ཚེ་སྲོག་དེ་འཕྲོག་པའི།།
འབྱུང་བ་བཞི་བོར་ཉིན་རེར་དམོད་ན་ཞིག་འདོད་ཀྱི།།

དབང་ཆེན་གཉའ་གནོན་པ་ཡི་རྐུབ་སྟེགས་ལ་མ་དམིགས།།
གཡོ་ཅན་ཚོང་དཔོན་དག་གི་ཚེ་སྲོག་ལ་མ་བརྒོལ།།
ཅང་མེད་འགྲོ་བ་གང་གི་རིན་ཆེན་གྱི་སྲོག་ལ།།
སེམས་ལྡན་སེམས་མེད་གཉིས་ཀྱིས་བར་ཆད་ཅིག་མང་གི།།

བསྟན་ལ་གནོད་སེམས་འཆང་བའི་དབང་ཐང་ལ་མ་གཏད།།
འགྲོ་བར་གནོད་འཚེ་གཏོང་བའི་འབྱོར་ལྡན་ལ་མ་གནོད།།
ཉེས་མེད་ཉམ་ཐག་པ་ཡི་མི་ཚེ་ཡི་ནང་ལ།།
སྣ་ཚོགས་གྱོང་གུད་ཚོགས་ཀྱིས་སྐོར་གཡེང་ཞིག་མང་གི།།

དགྲ་མགོ་མཐོ་ན་དགྲ་ལ་ངོ་དགའ་ཞིག་བྱས་ཀྱང་།།
རང་མགོ་མཐོ་ན་རང་ལ་བསྟུན་ཐབས་ཤིག་བྱ་ཡང་།།
མི་ཚེར་གདོང་བ་གཉིས་པའི་ལས་ལ་ཞིག་བྲེལ་ཡང་།།
ལྷ་ཀླུ་གཉན་གསུམ་ཚང་མ་ཁྲོ་རྒྱུ་ཞིག་མི་འདུག།།

དབང་ཐང་མཐོ་ན་མི་ལས་དགུ་ལས་ཤིག་བྱས་ཡང་།།
འབྱོར་བ་ལྡན་ན་མི་དྲན་དགུ་དྲན་ཞིག་བྱ་ཡང་།།
རྟེན་འདིར་ངན་དགུ་ཚང་བའི་སྒྱུ་མ་མཁན་དག་ལ།
གཏེར་བདག་ས་བདག་རིགས་ལ་ཁོང་ཁྲོ་རང་མི་འདུག།

ཆོས་སྐྱོང་སྲུང་མ་ཐམས་ཅད་སྒོ་བཅད་ལ་བཞུགས་འདུག།
ཡུལ་ལྷ་གཞི་བདག་ཚང་མ་ཕྱོགས་གཞན་ལ་ཕེབས་སོང་།།
བོད་ཡུལ་སྡུག་ལ་སྦྱོར་བའི་ཉི་མ་དེར་མེད་ན།།
མཆོད་ཡུལ་སྟོད་ཡུལ་དེ་ཚོར་ཡིད་ཆེས་ཤིག་མི་འདུག།