གུང་ཐང་འབྲུག་བྷེ།
———ཁ་བ་སྙིང་ལྕགས་ལ་བསྔོ་ཡིག་གི་ཚབ་ཏུ།
དེ་རིང་ཞོགས་པར་ངའི་ཁང་སྟེང་དུ་ཁྭ་ཏ་ཞིག་བབས་འདུག
ཁོས་ང་ལ་སྐད་བསྐུར་ཞིག་ཡོད་ཟེར
སྐད་བསྐུར་དེ་ནི་ཁ་བ་སྙིང་ལྕགས་ལགས་ཀྱི་གནས་ཚུལ་རེད
གནས་ཚུལ་དེ་ལས་གངས་རི་ངུ་ལ་མཚོ་སྔོན་པོ་ཡང་ངུས་འདུག
དེ་རིང་གི་ནམ་མཁའ་མིག་ཆུ་ཡིན་དུས
དེ་རིང་གི་ཕ་ཡུལ་དུད་ཁྲོད་ཡིན་དུས
དེ་རིང་གི་མཚོ་མོ་ཟུངས་ཁྲག་ཡིན་དུས
ཁྱེད་རང་གློ་བུར་དུ་མཚོ་སྔོན་པོ་ལ་འཐམ་ནས
གསེར་ཉ་ཁྱུ་གཅིག་གི་མིག་འོད་ནས་ནུབ་པར
ཁྱེད་རང་སྐྱོ་ལ་མི་རྣམས་སྐྱོ
དོན་གྲུབ་རྒྱལ་ཟེར་བའི་སྐྱེས་མཆོག་ཅིག
1989.11.30ཉིན་ཆབ་ཆ་ནས་གློ་བུར་རང་སྲོག་བཅད
ཡི་དམ་ཚེ་རིང་ཟེར་བའི་སྙན་ངག་པ་ཞིག
2004.10.24.ཉིན་ལན་ཀྲུ་ནས་གློ་བུར་ངར་སྐད་ཀྱིས་གྲོངས
ཁ་བ་སྙིང་ལྕགས་ཟེར་བའི་མི་བུ་ཞིག
2015.6.26ཉིན་མཚོ་སྔོན་པོ་ནས་གློ་བུར་གསེར་ཉ་དང་འགྲོགས་ནས་ཤི
མཚོ་སྔོན་པོ་མ་བསྐམ་བར་དུ་ང་ཚོས་འདི་ལྟར་དྲན་ཆོག
2015.6.28ཉིན་ཨོ་སི་ཁྲུ་ལི་ཡ་ནས་བྲིས།