རྒྱང་མིག
————སྐུའི་གྱ་སྟོན་ལ་ཕུལ།
སྟེང་ཕྱོགས་ལྷ་ལ་མཆོད་བཀུར་མི་བྱེད་ཅིང་།།
བར་འདུས་སྲུང་མར་བློ་བཅོལ་མི་བྱེད་ལ།།
འོག་གནས་ཀླུ་སོགས་གྲོགས་སུ་མི་རེ་ཡང་།།
སྐྱེས་ཆེན་ཁྱེད་གཅིག་ང་ཡི་ཕྱག་བྱའི་ཡུལ།།
མདོ་སྨད་སའི་ཆར་སྐུ་ཡི་མེ་ཏོག་འཁྲུངས།།
ལྷ་ལྡན་ཞིང་ནས་ཆོས་སྲིད་རྒྱལ་ཁྲིར་འཁོད།།
རྒྱ་གར་ཡུལ་ནས་བོད་དོན་རྒྱལ་སྤྱིར་བསྒྲགས།།
འཛམ་གླིང་ཁྱོན་དུ་ཞི་བདེའི་མཛད་བཟང་སྤེལ།།
བགྲང་ཡས་འགྲོ་ཀུན་ཁམས་མོས་སྣ་ཚོགས་ཀྱང་།།
ཚང་མའི་གཅིག་འདོད་གཏན་བདེ་སྐྲུན་ཐབས་གང་།།
བདེན་པའི་གནས་ལུགས་རེ་རེས་ལེགས་བཀྲལ་བས།།
རིས་མེད་སེམས་ཅན་མང་པོར་དབུགས་དབྱུང་ཐོབ།།
སྙིང་རྗེའི་གཞན་དབང་གྱུར་པས་སེམས་དཔའ་དངོས།།
འགྲོ་བའི་བདེ་སྡུག་གཟིགས་པས་དགེ་སྦྱོང་དངོས།།
ཆོས་ཀུན་དོན་གཅིག་དགོངས་པས་ཆོས་རྗེ་དངོས།།
ཡང་དག་ཐར་ལམ་སྟོན་པས་སྐྱབས་མགོན་དངོས།།
ཞི་དུལ་བག་ཡོད་གོས་ཀྱིས་འདུལ་ཁྲིམས་གཙང་།།
འཆད་རྩོད་རྩོམ་གསུམ་བྱ་བས་ཐུབ་བསྟན་བརྒྱན།།
མཁས་བཙུན་བཟང་གསུམ་སྤྱོད་པས་སྲིད་ན་མཛེས།།
འགྲོ་རྣམས་གཅིག་ཏུ་བརྩེ་བས་འཇིག་རྟེན་མགོན།།
ལང་ཤོར་ཆོས་དྲེད་ལས་དང་རྒྱབ་ཀྱིས་ཕྱོགས།།
བསླུ་བྲིད་ཚུལ་འཆོས་བྱ་སྤྱོད་རིང་དུ་དོར།།
ཟོག་རྫུན་གཅམ་ཚིག་དྲི་ངན་གཏན་མེད་ངང་།།
རྒྱལ་བསྟན་དག་ཐེར་མཛད་མཁན་ཁྱེད་གཅིག་གོ །
ཁྱེད་སྐུ་མཐོང་བ་དོན་ལྡན་བོད་མིའི་དཔལ།།
ཁྱེད་གསུང་ལེགས་བཤད་བདུད་རྩི་བོད་མིའི་ཟོང་།།
ཁྱེད་ཐུགས་བྱམས་བརྩེ་མངར་མོ་བོད་མིའི་དགེ །
ཁྱེད་གཅིག་ཁོ་ན་བོད་མིའི་ཡིད་བཞིན་ནོར།།
འོན་ཏང་བོད་ཀྱི་སྲིད་དོན་མཁའ་ཡངས་གཞིར།།
ནག་ནོག་སྨག་སྟུག་སྤྲིན་ཚོགས་ཆེར་འཁྲིགས་པ།།
ཞི་གཏོར་མེད་པར་སྔར་བཞིན་ལྷག་ལུས་ངང་།།
ཁྱེད་སྐུ་བགྲེས་པར་གྱུར་འདི་སེམས་ཁྲལ་གཞི།།
དོན་གྱི་བདག་པོ་གཞིས་བཞུགས་སྤུན་ཟླ་ཚོའི།།
རེ་སྒུག་འབུམ་ཕྲག་ཁྲོད་ཀྱི་སྐྱོ་དབྱངས་དང་།།
ལྷད་མེད་ཡིད་ཆེས་ཟབ་མོའི་དད་གདུང་དབུས།།
བོད་དུ་གདན་འདྲེན་མེད་དེའང་ཡིད་སྐྱོའི་གཞི།།
ས་ཡ་དྲུག་གི་བོད་རིགས་ཡོངས་རྫོགས་ཀྱི།།
དཔྲལ་བའི་མིག་དང་ཁོག་པའི་སྙིང་གཅིག་ཁྱེད།།
ཞབས་པད་བསྐལ་བ་རྒྱ་མཚོར་ཡུན་བརྟན་ངོས།།
རང་ཡུལ་གངས་རིའི་ལྗོངས་སུ་མྱུར་འབྱོན་ཤོག །