སྐྱེས་མའི་དུས་ཆེན།

ས་འཛིན་དཀར་པོ།

ཨ་མ་ཞེས་པའི་ཡིག་འབྲུ་རིག་མ་ཐག།
སྐྱེས་མས་བུ་ལོར་སྟེར་བའི་ཁ་ཏ་དྲན།།
བརྩེ་བའི་བྱམས་ལྡན་སྙིང་གི་མ་ལོ་མ།།
བུ་ཆུང་ཁྱོད་ལ་དྲན་པའི་དྲན་རྟེན་ཞིག།

ཤར་གྱི་ཉི་ཟེར་གདོང་ལ་འཕྲོས་མ་ཐག།
ང་ཡི་མ་ལོའི་འཛུམ་ཞལ་ཡིད་ལ་འཁོར།།
བུ་ཆུང་ལང་ཚོ་སྟེར་བའི་རུས་བཟང་མ།།
ཟླ་མེད་དྲིན་ཆེན་སྐྱེས་མ་ཁྱོད་རང་དྲན།།

བཅོ་ལྔའི་དུང་ཟླ་མཁའ་ལ་འཆར་མ་ཐག།
ཨ་མའི་གསུང་སྙན་རེ་རེ་དྲན་གདུང་སྟེར།།
བརྩེ་བའི་དྲོད་ཀྱིས་བསྐྱངས་པའི་མ་ལོ་མ།།
མ་བཅོས་དྲན་གདུང་ཤོར་བ་རེ་ཙམ་མིན།།

སྒང་གི་སྐར་ཚོགས་འོད་དེ་འཆར་མ་ཐག།
མ་ལོས་ཡིག་དྲུག་གྱེར་པའི་རྣ་བར་ཐོས།།
ཟས་བཅུད་བུ་ལ་སྟེར་བའི་དྲིན་ཆེན་མ།།
འདི་ནས་གྱེས་པའི་སྐྱོ་གདུང་རེ་རེ་མིན།།

སྦྲ་ནག་དུར་སྤྲིན་མཁའ་ལ་འཕྱོ་མ་ཐག།
མ་ལོས་འབྲི་མོ་འཇོ་བའི་སྣང་བ་འཁོར།།
དཀའ་སྡུག་བུ་ཡི་དོན་ལ་བརྩོན་པའི་མ།།
དེ་རིང་ཁྱོད་རང་དྲན་གསོའི་ཉིན་མོ་ཡིན།།

རྩྭ་ཐང་བེའུས་འབྲི་མ་འཚོལ་བའི་དུས།།
བུ་ཆུང་མ་ལོའི་དྲིན་དེ་ཡིད་ལ་འཁོར།།
ཨ་མའི་དྲིན་དེར་འཚོ་བའི་ཕུ་ནུ་ཚོས།།
དེ་རིང་སྐྱེས་མའི་དུས་ཆེན་བསུ་ལ་རན།།

མ་ཞེས་བྱམས་ལྡན་བརྩེ་བའི་རུས་བཟང་མ།།
མ་བཅོས་བུ་ཆུང་སྙིང་ནས་དྲན་གདུང་ཤོར།།
མ་ལུས་འཇིག་རྟེན་ཡོངས་ལ་བརྩེ་བ་བསྐྲུན།།
མ་ལས་ལྷག་པའི་འཇིག་རྟེན་ནོར་གཡང་མེད།།

11-05-2014