ཆང་སྐྱེས།
འབྱོར་བས་ཕྱུག་ན་སྐྱི་པགས་ཀེར་ཏེ་བསུ།།
ནོར་གྱིས་དབུལ་ན་སྨིན་མ་འཁྱོག་སྟེ་བལྟ།།
བརྩེ་སེམས་འོ་མཚོ་རུལ་བའི་གྲོང་ཚོ་ན།།
ཉམ་ཆུང་མི་བུའི་སེམས་པ་གང་ལ་གླན།།
བདེན་ཁུངས་ཡོད་ཚད་རང་གི་ཁུངས་སུ་གཏུགས།།
རྫུན་གཞི་མ་ལུས་གཞན་གྱི་མགོ་ལ་བསྐོན།།
དྲང་བདེན་རྒྱ་མ་འཁྱོག་པའི་སྣེ་མོ་ན།།
བདེན་པའི་བུ་ཆུང་གཞན་གྱི་བརྙས་བཅོས་ཡུལ།།
གཡོ་སྒྱུ་བསླུ་བྲིད་རླུང་བུ་ཕྱོགས་སུ་ལྡང་།།
རང་བཞིན་གཤིས་ཀྱི་མེ་ཏོག་རྙིད་དེ་སྐམ།།
མི་གཙང་ཁ་དབུགས་སྟུག་པའི་ཁུགས་སོ་ན།།
ཁོ་བོའི་ནམ་ཟླ་སྐྱ་བོ་ཧ་ཅང་འཁྱག།
ཝ་གཤེད་མཛེས་མར་བརྫུས་ཏེ་བྲོ་ཞིག་འཁྲབ།།
མཇུག་མ་རུམ་ལ་བསྡུས་ཏེ་འཛུམ་ཞིག་བསྟན།།
ཆང་ཕོར་དགུང་ལ་བཏེགས་པའི་རྩེ་མོ་ན།།
ཁེར་རྐྱང་མི་ཡི་སྙིང་གཏམ་སུ་ལ་གླེང་།།
ཡ་ཆུང་གངས་དཀར་སྣ་ཚོགས་སྡུག་ལ་སྦྱར།།
འགྲམ་པ་ལག་པས་བསྐྱོར་ཏེ་གླུ་ཞིག་བླངས།།
སུན་སྣང་མུན་པ་བརྩེགས་པའི་ཀློང་རུམ་ན།།
སྐྱོ་གདུང་ཕར་ལ་གཡུག་ཀྱང་འཁོར་ནས་ཡོང་།།
སྙན་ངག་ཡག་པོ་ཞིག་བྲིས་འདུག བཀའ་དྲིན་ཆེ།