ཆ་འགག་མེ་བསྟན།
ཨོ་སྟོབས། ཀླུ་བྱམས། བློ་གྲགས་སོགས་ཀྱིས་འཁྲབ་བཞིན་པའི་ཟློས་གར་འདི་ཧ་ཅང་གི་འཇིགས་སྣང་ཆེ་ལ། བོད་མིའི་སྲོག་གཅོད་ཀྱི་གཤེད་མ་ཞེད་སྣང་ཅན་ཞིག་ཀྱང་རེད་ཟེར་ཆོག
རྒྱུ་མཚན་ནི། དེའི་འཁྲབ་ཁྲིད་པ་ནི་གུང་ཏང་ཇག་ཚོགས་ཀྱི་གཡོ་ཐབས་ཀྱི་བྱེད་ལས་དང་འདྲ་བོ་ཡོད། ཁོང་ཚོས་བོད་མི་གཞོན་སྐྱེས་གཙོས་བོད་པ་སེམས་ཤུགས་ཅན་གང་མང་ལ་དབུ་སྐོར་བསླུ་ཁྲིད་ཡོང་སླད། ཁ་ནས་ནམ་རྒྱུན་བོད་རྒྱལ་ཁབ་དང་བོད་རང་བཙན་ཟེར་ནས་བཤད་སྡད་པ་ཙམ་ལས། སྐྱུག་བྲོ་བའི་སྐྱོ་གར་འཁྲབ་མཁན་གྱི་གཏེ་པོ་དེ་ཚོས་ད་ཕན་ཆད། རྒྱལ་ཁབ་དང་མི་མང་ལ་ཕན་པའི་ལས་སྣ་གཅིག་ཀྱང་སྒྲུབ་མེད་པ་ལེགས་ཉེས་འབྱེད་པའི་ཤེས་རབ་ཀྱི་བློ་མིག་ཡོད་པ་ཚོས་གསལ་རྟོགས་ཡོད་ངེས།
ད་དུང་ང་ཚོ་བོད་འབངས་ཡོངས་ཀྱི་སྐྱབས་གནས་༧གོང་ས་ལྷ་མིའི་རྣམ་འདྲེན་མཆོག་ལ་འཛེམ་བག་མེད་པར་མཚན་སྨོད་ཞུས་པ་དེ། འགྲོ་བ་མིའི་སྤྱི་ཚོགས་ཀྱི་བཟང་སྤྱོད་དང་བྲལ་བ། བཀའ་དྲིན་ལ་བསམ་ཤེས་མེད་པར་དྲིན་ལན་ལོག་འཇལ་གནང་བ་སོགས་འདིར་བརྗོད་མི་དགོས་པ་ཞུ།
དེ་ལས་དོ་སྣང་བྱེད་དགོས་པ་ཞིག་ནི་སྤྱི་ཚོགས་དྲ་ལམ་ཁག་ན་དཔྱད་བརྗོད་ཡིན་མདོག་དང་། བསམ་ཚུལ་སྡུས་རུབ་ཡིན་ཁུལ་གྱི་ཁོར་ཡུག་སྐྲུན་བཞིན་ཡོད་པས་མི་སྣ་དེ་དག་ལ་དམིགས་ཡུལ་ངེས་ཅན་ཞིག་ཡོད་པ་ཡང་གསལ་བོ་རེད་ལ། དེ་དག་གི་གཡོ་སྒྱུ་དང་སྐྱུག་བྲོ་བའི་སྐྱོ་གར་དེའི་རིགས་ཀྱི་འོག་ཏུ་ནམ་ཡང་མ་ཚུད་པར་བྱེད་རྒྱུ་བོད་མི་སྤྱི་བོ་གནམ་བསྟན་ཡོངས་ལ་གལ་ཆེའི་འབོད་སྐུལ་ཞུ་འདོད་བྱུང་།
དེང་སང་བོད་མི་རེ་ཟུང་གི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མཛད་པ་འཕྲིན་ལས་ལ་འགྲིག་མིན་སྐྱོན་བརྗོད་འདྲ་སླེབས་དགོས་ཡོད་པ་དེ། སྙིང་རྗེའི་ཡུལ་དུ་གྱུར་པ་མངོན་སུམ་དུ་གྲུབ་པས་ན། དེ་རྟགས་དང་གཏན་ཚིགས་ཀྱིས་སྒྲུབ་ག་ལ་དགོས། དཔེར་ན་ཁྱེད་རྣམ་པའི་རང་ཉིད་ལ་རྒྱུས་མངའ་མེད་པས་སྐད་ཡིག་གཞན་ནང་བོད་སྐོར་གྱི་རྩོམ་ཡིག་དང་དཔྱད་བརྗོད་འདྲ་ཡོད་པ་མཐོང་བ་དང་། ཧ་ལས་ཧང་སངས་མདོག་གི་ལུང་འདྲེན་བྱེད་རྒྱུར་ཡོད་པ། དེ་ན་༧གོང་ས་མཆོག་ནི་འཛམ་གླིང་ནང་གི་སྟོབས་ཆེན་རྒྱལ་ཁབ་ཨ་རི་གཙོས་ནུབ་ཕྱོགས་རྒྱལ་ཁབ་ཁག་དང་། ཡུ་རོབ་རྒྱལ་ཁབ་ཁག ཨེ་ཤ་ཡ་སོགས་རྒྱལ་ཁབ་གྲངས་ལས་འདས་པའི་ལམ་སྟོན་ཞུ་ཡུལ་དང་མིག་དཔེ་ལྟ་སའི་ཚད་མའི་སྐྱེས་པུ་མཐར་ཐུག་དེ་ཡིན་པ་ཁྱེད་ཅག་གི་མ་ཤེས་པ་ཡིན་ནམ། ཡང་ན་ཤེས་བཞིན་དུ་རྒྱ་གུང་ཁྲན་ལ་སྤྲེལ་ལད་འཁྲབ་པ་ཡིན་ནམ།
ཡང་གཅིག་བཤད་ན། ཨ་རིར་མི་རིགས་ནག་པོའི་དོན་རྐྱེན་བྱུང་རྗེས་བོད་མི་རེ་ཟུང་གི་བོད་མི་ཡོངས་ཀྱི་ངོ་ཚབ་ཀྱིས་སྐད་ཆ་བཤད་པ་དང་ཡི་གེ་བྲིས་པ། ད་དུང་ཁྱེད་ཀྱི་རྒྱབ་ལ་ང་ཚོ་བོད་ཡོད་ཟེར་བའི་བོད་སྤྱི་བའི་མིང་ཚིག་བེད་སྤྱོད་བྱས་པ་སོགས་དང་། དེ་བཞིན་ཀོ་ཝེན་ཀུའེ་་དང་འབྲེལ་བའི་གླེང་རྙོག་བྱུང་སྐབས་གོང་གི་ཁོ་པ་ཚོས་ཡང་གོ་སྐབས་དམ་འཛིན་བྱས་ཏེ་བོད་སྤྱི་བའི་མིང་ཁུར་ནས་དགག་ལན་དང་སྐྱོན་བརྗོད་བྱེད་པ་ནི་གུང་ཁྲན་ཏང་ལ་སྤྲེལ་ལད་འཁྲབ་པ་ལས་གཞན་གང་ཡང་མིན་སྟབས། མ་འོངས་དེ་རིགས་གནང་སྐབས་སོ་སོའི་སྒེར་གྱི་རང་དབང་དང་ཐོབ་ཐང་གང་ཡོད་བེད་སྤྱོད་བྱེད་ནའང་། བོད་སྤྱི་བའི་མཚན་མཐོང་ལ་གནོད་པའི་རིགས་དང་། བོད་ཟེར་བའི་སྤྱི་མིང་དེ་བེད་སྤྱོད་གང་བྱུང་མི་གནང་རོགས་ཞུའོ།།
ཧྥ་རན་སིའི་རྒྱལ་ས་ཕ་རེ་སི་ནས།
13/06/2020
ཆ་འགག་མེ་བསྟན་ལགས། ཁྱོད་ཆོལ་ཁ་གང་གི་མི་ཡིན། ཡག་ཤོས་བྱུང་ན་མཚན་ངོ་མ་གང་ཡིན་ལན་གཅིག་དྲང་པོ་གནང་རོགས་ཞུ། གང་ཡིན་ཞུ་ན་ངོས་ནས་དེང་སྐབས་བོད་པའི་སྤྱི་ཚོགས་ལ་ཉམས་ཞིབ་ཏོག་ཙམ་བྱེད་བཞིན་ཡོད་ལགས་། ཐུགས་རྗེ་ཆེ་་་
གངས་རིའི་སྲས་པོ་མིང་ཅན་འདི་ཨོ་རྒྱན་སྟུ་རྒྱལ་གྱི་དོན་རྐྱེན་བྱུང་ནས་བཟུང་དྲ་ཐོག་ནས་ཕར་དཀྲུག་ཚུར་དཀྲུགས་ཀྱི་ལས་བརྩམས་འགོ་ཚུགས་ནས་དྲ་ཐོག་ལ་གཏན་བཞུགས་རེད་འདུག