སྐྱོ་ངལ་ཆེ་བའི་སྟོན་ཟླ།

བསམ་གླིང་ཚེ་རིང་ལྷ་མོ།

སྐྱེ་བོ་མང་པོས་ཟེར་ན་སྟོན་གྱི་ནམ་ཟླ་དེ་དངོས་གྲུབ་ཟླ་བ་རེད་ཟེར་མོད། འོན་ཀྱང་རང་ཉིད་ཆུང་དུས་ནས་སྟོན་ཟླ་དེ་ཤར་རིམ་བཞིན་ཡིད་ལ་སྨྲ་མི་ཤེས་པའི་སྡུག་བསྔལ་གྱི་ཁུར་པོ་ཞིག་རང་བཞིན་གྱིས་སླེབས་འོང་།
ཁྱེད་རྣམ་པས་གཟིགས་མྱོང་ལོས་ཡོད། ཕྱོགས་བཞི་མཚམས་བརྒྱད་ཀྱི་སྔོ་ལྗང་གཡུ་ལོ་རྣམས་རང་ཡལ་དུ་གྱུར་ཞིང་། ཤུལ་དུ་ལུས་པ་ནི་སྐྱ་ཐུལ་ཐུལ་གྱི་ཁོར་ཡུག་ཅིག་རེད། སེང་གེའི་གཡུ་རལ་ངོམ་པ་འདྲ་བའི་ལྗོན་པའི་ལོ་མ་རྣམས་གསེར་གྱི་དོང་ཙེ་ལྟར་སེར་ཐིང་ཐིང་དུ་གྱུར་པས་ག་ལ་ཚད།
རེ་རེ་བཞིན་ས་ལ་ལྷུང་ནས་ཤུལ་དུ་ལུས་པ་ནི། སྡོང་རྒན་ཧྲུལ་པོ་ཧྲ་ཧྲ་ཧྲ་ཞེས་པའི་སྐད་ངན་རྒྱག་མཁན་གྱིས་ཁེངས། ད་དུང་འདི་ལོའི་སྟོན་གྱི་ནམ་ཟླ་དེ་བས་ཡི་གར་མི་འོང་བའི་སྐྱོ་ངལ་ཞིག་གིས་ཁེངས།
མ་གཞི་བྱས་ན་ད་ལོའི་དཔྱིད་ཀ་ནས་འགོ་ཚུགས་ཏེ་རྒྱལ་གཅེས་དཔའ་བོ་སྐུ་ཞབས་ཕུན་ཚོགས་ལགས་ནས་སྐུ་ལུས་མེ་རུ་བསྒྲོན་རྗེས། རིམ་བཞིན་སྐུ་ཞབས་ཚེ་དབང་ནོར་བུ་ལགས་དང་། ཉེ་ཆར་རང་སྐུ་ཞབས་བློ་བཟང་སྐལ་བཟང་ལགས། སྐུ་ཞབས་བློ་བཟང་དཀོན་མཆོག་ལགས་བཅས་ཀྱིས་བོད་མི་ས་ཡ་དྲུག་གི་སྡུག་གི་ཁུར་པོ་ཞིག་རང་ཉིད་གཅིག་པུས་འཁུར་འདོད་ཁོ་ནས་ཚེ་སྲོག་གི་ཉིང་ཁུས་མེ་དཔུང་གི་མཆོད་མེ་ཕུལ་སོང་།
ཤུལ་དུ་ལུས་པ་ནི་སྙིང་ཁོང་ལ་གྲང་ཤུར་ཤུར་གྱི་རེག་བྱ་ཞིག་དང་། ངོ་གདོང་ལ་ཚ་ལམ་ལམ་གྱི་ངོ་ཚ་ཞིག་བག་གཡེང་ངང་གནས་ཡོད་པའི་གངས་ཅན་པ་ཡོངས་ལ་བཞག
ཁུ་སིམ་པའི་མཚན་ལྗོངས་སུ་སྐར་ཚོགས་གྲངས་མེད་ཀྱིས་མི་ཡུལ་དུ་ཅི་ཞིག་གླེང་གིན་སྡོད་སྟངས་འདིས་ཀྱང་། གངས་ཅན་པ་ཚོའི་སྙིང་སྟོབས། ཆགས་སྡང་། སོས་དལ། བག་གཡེང་བཅས་ལ་ལབ་གླེང་སྣ་ཚོགས་བྱེད་ཀྱིན་པ་འདྲ།
ངོ་མ་ཁོང་ཚོས་དཔའ་བོའི་མི་རིགས་ཀྱི་མཚན་སྙན་སྲུང་སྐྱོབ་བྱེད་མཁན་ལ་བསྟོད་པ་བྱེད་ཀྱིན་པ་འདྲ་ལ། བོད་གངས་ཅན་གྱི་ལོ་རྒྱུས་རིང་མོ་ཡང་དམར་པོའི་མེ་ལྕེ་དང་མཉམ་དུ་འོད་འཚེར་འཚེར་དུ་འབར་བཞིན་ཡོད་པར་རྒྱང་བལྟ་བྱེད་ཀྱིན་པ་འདྲ།
གལ་ཏེ་ང་རང་སྐར་མ་ཞིག་ཡིན་པའི་དབང་དུ་བཏང་ན། ངས་དགུང་སྔོན་དབྱིངས་ནས་ངུ་འབོད་བྱེད་ཀྱིན་ཚེ་སྲོག་དམར་པོ་མེ་ལྕེར་མ་སྒྲོན་རོགས་ཟེར་རྒྱུ་རང་ཡིན། མ་གཞི་བྱས་ན་མི་ཡུལ་གྱི་ཆབ་སྲིད་པ་འགས་ཁྱོད་ནི་ཇི་འདྲའི་བླ་འདར་བ་ཞིག་རེད་ཅེས་སྨོད་སྲིད། འོན་ཀྱང་ང་རང་ལ་ཚེར་མ་རྐང་གཅིག་ཟུག་ཀྱང་ན་ཟུག་གིས་བཟོད་ག་ལ་ཐུབ།
ཡང་ཕྱོགས་གཞན་ཞིག་ནས་བསམ་བློ་བཏང་ན་རྒྱལ་སྲས་བྱང་ཆུབ་སེམས་དཔའ་ཁྱེད་ཚོས་མར་གྱུར་སེམས་ཅན་ཐམས་ཅད་ཀྱི་དོན་དུ་ཚེ་སྲོག་དེ་ཕངས་མེད་དུ་གཏོང་བར་གདམ་ག་གནང་ཡོད་རྒྱུ་རེད་ལ། བྱང་ཆུབ་སེམས་དཔའ་རྟག་ཏུ་ངུས་སློབ་དཔོན་ཆོས་འཕགས་བསྟེན་པ་ལྟར། བོད་གངས་ཅན་གྱི་ལ་རྒྱ་དང་སྤུན་ཟླ་ས་ཡ་དྲུག་གི་རྩ་དོན་ཆེད་དུ་སྐུ་ལུས་ཕུལ་བ་ལོས་ཡིན། མདོར་ན་སངས་རྒྱས་ཀྱི་བསྟན་པ་རིན་པོ་ཆེའི་དོན་དུ་དང་། མར་གྱུར་སེམས་ཅན་ཐམས་ཅད་ཀྱི་དོན་དུ་སྐུ་ལུས་ཕུལ་ཡོད།
དེ་དང་དེ་དག་གི་རྒྱབ་ལྗོངས་སུ་ད་དུང་མེ་མདའི་རྩེ་གྲི་ངོམ་ཤིང་གང་འདོད་དུ་རྒྱུག་བཞིན་པའི་ལྗང་ཤིག་ཤིག་གི་དམག་མི་དེ་ཚོས། དམ་ཆོས་ཉམས་སུ་ལེན་བཞིན་པའི་དགེ་འདུན་པ་ཚོའི་གཉའ་ནས་གནོན་འདོད་བྱེད་ལ། སྡང་མིག་བགྲད་དེ་ཅི་ཞིག་འཕྲོག་འགྲོ་བའི་ཞེ་སྡང་ཡང་བྱེད་ཀྱིན། རྒྱལ་གཅེས་ཆོས་གཅེས་ཀྱི་སློབ་གསོས་ཚ་གཅུན་བྱེད་པ་དེའོ།།
ཁོ་པ་ཚོས་དཔའ་བོ་ཚོ་རེ་རེ་བཞིན་བཅོམ་ཐུབ་པའི་ཐབས་ལམ་ཡག་ཤོས་ནི། ༸གོང་ས་རྒྱལ་བའི་དབང་པོ་མཆོག་ལ་མཚན་སྨོད་ཞུ་རྒྱུ་དེ་ཡང་རེད། བོད་གངས་ཅན་པའི་ཁོག་པའི་སྙིང་དང་དཔྲལ་བའི་མིག རེ་ས། མགོན་སྐྱབས། སངས་རྒྱས་སྤྱན་རས་གཟིགས།༸གོང་ས་བསྟན་འཛིན་རྒྱ་མཚོ་མཆོག་ཡིན།
ཁོང་ཚོས་གང་ཐུབ་ཅི་ཐུབ་ཀྱིས་༸གོང་ས་མཆོག་ལ་མཚན་སྨོད་ཞུ་ཐབས་བྱས་ཀྱང་ནུས་པ་མ་ཐོན། ད་ཆ་ཏག་ཏག་དཔའ་བོ་ཚོ་རེ་རེ་བཞིན་ཚུར་ཐོན་ཡོང་ནས་ཚེ་སྲོག་གི་དམར་མཆོད་ཕུལ་དགོས་ཐུག་སོང་བ་རེད། དེ་ནི་ཁོང་ཚོའི་ངོས་ནས་བཤད་ན་ཆེས་བློ་ཡུལ་ལས་འདས་པ་ཞིག་རེད་ལ། གཉིས་སུ་ན་དཔའ་བོ་ཚོའི་ཚེ་སྲོག་འཕྲོག་རྒྱུ་དེ་ཁོང་ཚོའི་དམིགས་ཡུལ་ཡིན་སྲིད།
གྲང་ཤུར་ཤུར་གྱི་སྟོན་རླུང་དེས་སྐྱོ་བ་ཞིག་དབང་མེད་དུ་སྐྱེས་བཅུག་མོད། དེ་བས་དགུན་གྱི་བུ་ཡུག་ནི་སྤུ་གྲི་ངར་མ་ཞིག་ཡིན་པས་སྤུན་ཟླ་ཚོ་ཐུགས་བཅགས་གནང་རོགས།