རྔ་བ་ཀུན་བཟང་།
རྩོམ་འདི་འབྲི་དུས། ཁྱེད་ཚོ་ཚང་མ་ལས་ཁུངས་ནང་ཡིག་འབྲུ་རེ་འགའ་ཞིག་ལ་མགོ་འཁོར་བའི་དུས་ཏག་ཏག་ཡིན་སྲིད། ང་ནི་རི་འདབ་གྱི་ཐོག་ཁང་གསུམ་ཅན་གྱི་ཁང་མིག་ཆུང་ངུ་འདིའི་ནང་ནས་གཉིད་ལས་སད་མ་ཐག་ཡིན། ཧ་ལམ་གཉིད་མཐུག་པོར་ཤོར་སོང་ན་ཐང་། དེ་ལྟར་གཉིད་ལས་སད་ཡོང་དུས། ཐོག་མར་རྐང་པ་གཡས་ཕྱོགས་ལ་སྐྱ་རེངས་ཀྱི་དྲོད་རླབས་ཕོག་པ་འདྲ་རྐང་པ་གཡོན་པ་ལས་གཡས་པ་དྲོད་བ་སྣང་།
ང་འདི་ལྟར་མལ་ཁྲིའི་སྟེང་ནས་མིག་གཉིས་ཕུར་ཕུར་ཞིག་བྱས་ནས་ལྟ་དུས། ཆེས་ཐོག་མར་མིག་ལམ་དུ་ཤར་ཡོང་བ་ནི་སྒེའུ་ཁུང་གི་དྲ་མིག་དང་། དེ་ལས་འཕྲོ་བའི་ཉི་འོད་དྲོད་ལྷབ་ལྷབ་དེ་རེད། མིག་ཟུང་ག་ལེར་འབྱེད་དུས་ད་གཟོད་རི་ཕར་ཁའི་ཁྱིམ་ཚང་དག་མཁའ་དབྱིངས་སུ་རྒྱུ་སྐར་འབུམ་ཕྲག་ཁྲ་ལམ་ལམ་དུ་ཤར་བ་དང་འདྲ་ལ། ཁྲི་གདུགས་ཉི་མའི་འོད་ཟེར་ས་གཞི་ཆེན་པོར་འཕྲོ་སྐབས་ས་སྟེང་གི་འབའ་འབུ་དང་། ལྗོན་ཤིང་། ལོ་མ་དག་གི་མགོ་གཡུག་གཡུག་བྱེད།
ངས་དེ་ལྟར་སྒེའུ་ཁུང་གི་དྲ་མིག་ནང་ནས་ལྟ་ཤོར་ལ་མལ་ས་ནས་གྲག་འགུལ་ཅི་ཡང་མེད་པར་ཉལ་སྡད་དུས། རྒྱ་ལམ་སྟེང་དུ་འགྲོ་མཁན་འགྲུལ་པ་རྣམས་ཀྱི་རྐང་སྒྲ་དང་མཐོང་ས་མེད་པའི་ཆུ་སྒྲ་ཤག་ཤག་ཞིག་གི་རོལ་དབྱངས་དེ་ཉན་དུས། རྐང་སྒྲ་དང་ཆུ་སྒྲ་གཉིས་ཀྱིས་ངའི་སྒེའུ་ཁུང་གི་ཕྱི་རོལ་ལ་ཡོང་མཁན་མེད་པས་ངོ་རྒོད་བྱེད་བཞིན་ཡོད་པ་འདྲ། དོན་མེད་ལ་རྒྱ་ལམ་ན་འཚང་ཁ་བརྒྱབ་ནས་འགྲོ་བ་ལས་གྲགས་འགུལ་ཆུང་བའི་སྒེའུ་ཁུང་གི་དྲ་མིག་ནས་ལ་ལྟོས་དང་། ཟང་ཟིང་དང་འདུ་འཛི་ཆེ་བའི་ཡ་མ་བརླ་བའི་འཚོ་བ་ཉུང་།
2021/08/17