རྨ་དུང་ཟླ།
ཕ་ཡུལ་ནས་ཕྱིར་ལོག་ཏེ་
སློབ་གྲྭ་རུ་ཕྱིར་ཐོན་དུས་
སེམས་ཀྱི་སྐུད་པ་དེ་སྒེའུ་ཁུང་ཞིག་ལ་ཐོགས་
སྒེའུ་ཁུང་དེ་སྒེའུ་ཁུང་མང་པོའི་བར་ན་ཡོད་
སྒེའུ་ཁུང་དེ་ཁང་རྩེགས་གསུམ་པའི་ཟུར་ན་ཡོད་
ལམ་ཁ་དེ་བརྒྱུད་ཐེངས་རེར་
མིག་ཟུང་གི་བར་ནས་སྒེའུ་ཁུང་ཆུང་ཆུང་དེ་
ནམ་ཡང་ཤོར་མྱོང་མེད་
ལམ་ཁ་དེ་རྒྱུད་མི་དགོས་ནའང་
ངས་གཟས་ནས་ལམ་ཁ་དེར་ཡང་ཡང་སོང་
སྒེའུ་ཁུང་ཆུང་ཆུང་དེ་
སྒེའུ་ཡོལ་ནར་ནར་གཉིས་ཀྱིས་གཡོགས་ཡོད་
མཚམས་ལན་རེ་མཚན་དུས་སུ་
སྒེའུ་ཁུང་དེ་ལས་གློག་སྒྲོན་རབ་རིབ་ཅིག་འཚེར་འོང་
སེམས་ཁམས་མ་སྙོམས་དུས་
ང་ཁུ་སིམ་མེར་སྒེའུ་ཁུང་ཆུང་ཆུང་དེར་བལྟ་བར་སོང་
སྒེའུ་ཁུང་ཆུང་ཆུང་དེའི་ནང་གི་བུ་མོ་ཆུང་ཆུང་དེར་
འབོད་མི་ཐུབ་ནའང་
སྒེའུ་ཁུང་ཆུང་ཆུང་དེར་ཡང་ཡང་བལྟས་རྗེས་
ཕྱིར་མི་ལོག་ཀ་མེད་རེད་
སྒེའུ་ཁུང་ཆུང་ཆུང་ནང་གི་བུ་མོ་ཆུང་ཆུང་
ང་གཉིས་ལ་སྔར་སོང་གི་གཏམ་རྒྱུད་ཅིག་ཡོད་
བརྩེ་དུང་དང་མིག་ཆུ་འདྲེས་མའི་གཏམ་རྒྱུད་ཅིག་ཡོད་
དགའ་སྐྱོ་འདྲེས་མའི་
སྐྱིད་སྡུག་འདྲེས་མའི་
སྟོན་འཇུག་གི་དུས་སྐབས་ཤིག་ལ་
སྡོང་མགོའི་ལོ་མ་དག་སེར་པོར་འགྱུར་བའི་ནམ་ཟླ་དེ་ལ་
ངས་རང་གི་སེམས་ལ་རྨ་ཁ་བཟོས་
སེམས་ནང་གི་བུ་མོ་ཆུང་ཆུང་དེར་ཕོག་ཐུག་བཟོས་
བརྗེད་མི་ཐུབ་པའི་མཛེས་སྡུག་གི་དྲན་ཞིང་ཡོད་པས་
ང་གཉིས་སུའང་ཕན་ཚུན་ལ་འཁང་ར་མེད་
སེམས་འདྲེས་ཀྱི་ལོ་ཟླ་མང་པོའི་དགོད་སྒྲ་ཡོད་པས་
ང་གཉིས་སུའང་ཕན་ཚུན་ལ་ལས་བདའ་མེད་
ཉི་མ་དང་ཟླ་བ་འདས་རྗེས་
ངས་སླར་ཡང་རང་གི་སེམས་པ་མཐོང་
སེམས་ནང་བུ་མོ་ཆུང་ཆུང་དེ་
སྒེའུ་ཁུང་ཆུང་ཆུང་ནང་གི་སེམས་པ་རྨས་མ་དེ་
ངས་ཐལ་མོ་སྦྱར་ཏེ་དགོངས་དག་ཞུ་
སྒེའུ་ཁུང་ཆུང་ཆུང་ནང་གི་བུ་མོ་ཆུང་ཆུང་
སེམས་པ་མི་སྐྱིད་ནའང་
སྟོན་འཇུག་གི་གཏམ་རྒྱུད་དེ་དྲན་པས་
ངར་སླར་ཡང་ཁྱེད་ཀྱི་འཛུམ་མདངས་ལ་རེ་བ་
འཛིན་པའི་སྤོབས་པ་མི་འདུག
བརྩེ་དུང་བརླགས་མེད་ནའང་
ངར་སླར་ཡང་ཁྱེད་ཀྱི་བྲང་གཞུང་ལ་གཟིམ་ས་འཚོལ་བའི་
སྙིང་སྟོབས་མི་འདུག་
སྒེའུ་ཁུང་ཆུང་ཆུང་ནང་གི་བུ་མོ་ཆུང་ཆུང་
ངས་ད་དུང་ཁྱེད་རང་སྒུག་ནས་ཡོད་
ཁ་མ་གསང་ནའང་སེམས་དྲོད་མོ་བསྟོན་གྱིན་
ངས་ཁྱེད་ཀྱི་ལོག་ཕེབས་ལ་མིག་ཟུང་གཟས་ནས་ཡོད་
སྒེའུ་ཁུང་ཆུང་ཆུང་
ང་སླར་ཡང་ཁྱེད་དང་ཕྲད་ན་འདོད་པས་
ངས་གོམ་ཁ་ལམ་ཕྲན་ཆུང་ཆུང་དེར་སྤོ་བར་འགྲོ
སྒེའུ་ཆུང་ཆུང་ནང་གི་བུ་མོ་ཆུང་ཆུང་
ཁྱེད་ཀྱིས་མི་ཤེས་ནའང་
ང་རང་སྒེའུ་ཁུང་ཆུང་ཆུང་དེའི་ཐད་ལ་སླེབས་ཡོད་