མུ་ལ།
སྦྲ་ནག་སྨུག་པོའི་འདབས་ན། །
རྟ་ནོར་ལུག་གསུམ་སྲུང་བའི། །
སྒོ་ཁྱི་དོམ་བུ་སྙིང་དཀར། །
སྒོར་ཆེད་གཞན་ལ་མ་བཙོང་། །
བདག་པོའི་རྒྱུ་ནོར་ཁྲོད་ན། །
དགྲ་ཇག་རྐུན་གསུམ་སྲུང་མཁན། །
སྒོ་ཁྱི་རྒྱ་སྟག་དར་མ། །
སྒོར་ཆེད་གཞན་ལ་མ་བཙོང་། །
སྤྱང་མོའི་ངུ་ཟུག་ཁྲོད་ན། །
དཔའ་ངར་ལྡན་པའི་སོ་བ།།
སྒོ་ཁྱི་སེང་ཕྲུག་དཀར་མོ། །
སྒོར་ཆེད་གཞན་ལ་མ་བཙོང་། །
གཞན་གྱིས་ཁ་ཟས་བྱེད་པའི། །
སྦྲ་ནག་སྨུག་པོའི་སྒོ་ཁྱི། །
ང་ཚོ་བོད་པ་རྣམས་ཀྱིས། །
མྱུར་ཏུ་ཕྱིར་ལ་བསུ་དགོས། །
བོད་སྒང་པའི་སྒོ་ཁྱི་སྙིང་དཀར་འདི།
སྐེ་ལྕགས་ཐག་ཤ་རེ་རྒྱ་ཡུལ་ཁྲིད།
རྒྱ་ཕྱུག་པོས་གཅེས་ཕྲུག་གསོ་གསོ་བྱས།
ཟས་གང་ཞིམ་གང་ཡག་སྤྲད་ནས་གསོས།
བོད་སྒང་པའི་སྒོ་ཁྱི་སྙིང་དཀར་འདི།
རྒྱ་ནག་པོའི་རྒྱུགས་ཨེ་ཉན་བལྟས།
ཁྱི་བཙན་པོའི་རང་ཚུགས་མ་འགྱུར་དུས།
རྒྱ་ཕྱུག་པོས་གསོ་བའི་རེ་བ་བྲལ།
བོད་སྒང་པའི་སྒོ་ཁྱི་སྙིང་དཀར་འདིས།
རྒྱ་དམར་པོ་འཛུམ་གྱིས་མ་བསུས་ཐལ།
བོད་སྒང་པའི་སྐྱིད་སྡུག་མ་བརྗེད་ཐལ།
རྒྱ་དམར་པོའི་གཅེས་ཁྱི་མ་བྱས་ཐལ།
ཤི་བཤས་རའི་ནང་གི་སྒོ་ཁྱི་འདི།
ཤི་དགོས་ཀྱང་འགྱེད་པ་ག་ལ་ཡོད།
དགྲ་དམར་པོར་འཛུམ་གྱིས་བསུ་བ་ལས།
སྲོག་དམར་པོ་ཆད་ན་སྐྱིད་པོ་རེད།།