རླུང་དམར།
འཁོར་བ་སྔར་ནས་ཁྲག་དར་རུས་དར་གྱི་གོ་ལ་ཞིག
ཁྱོད་ཀྱི་བརྩེ་དུང་ཐུ་བྷོད་ཀྱི་ལུགས་སུ་མངོན་པའི་སྒྱུ་རྩལ་གྱི་དབང་བོ་རེད
ངས་ཁྱོད་དང་ཁྱེད་ཀྱི་སྒྱུ་རྩལ་གྱི་ང་རོ་ལ་རོལ་མྱོང་བྱེད་ཐེངས་རེར
བདག་སེམས་སུ་སྨྲ་དཀའ་བའི་དབྱངས་གསལ་གྱི་གསང་གཏམ་མང་པོ་ཞིག་ཡོད
ཁྱོད་ནི སྒྱུ་རྩལ་ཁོ་ན་སྒོམ་པའི་བྲག་རིའི་ཁྲོད་ཀྱི་སྐྱེས་བུ་རིག་ལོ་དེ་ཡིན་ལ
ནམ་ཡང་བསུབ་བཏུབ་མེད་པའི་གངས་སེང་གི་ཞབས་རྗེས་ཀྱི་རྡོའི་རི་མོ་དེའང་ཡིན
“བོད་གཅིག”ཁྱོད་ཀྱི་སྒྱུ་རྩལ་གྱི་སྨྱུག་ཁ་ན་འབར་བའི་ཐམས་ཅད་པོ་དེ
སུས་ཀྱང་འགྲན་མི་ནུས་པའི་ཁེར་ཚུགས་ཀྱི་དཔའ་དར་ལྕགས་ཚ་མ
དེ་ལྟར གླུ་གཞས་དཀྲོལ་ལེན ཁབ་གཙགས་རི་མོ གསར་གཏོད་ཇུས་འགོད
འདི་དག་ཁྱོད་ཀྱི་རིག་གསར་དེའི་མངལ་ནས་སྐྱེས་པའི་སོན་མྱུག་གི་གསེར་རྡུལ་རེ་རེ
པོ་ཏཱ་ལའི་བྲང་ཁོག་ནས་འཕྲོས་པའི་འོད་ཀྱི་སྒྱུ་རྩལ་པ
ནམ་ཡང་ནམ་མཁའི་རྩེ་ནས་ལྷ་བྱིན་གྱིས་གནང་བའི་བདུད་རྩིའི་རོ་མཆོག
ངས་ཁྱོད་ཀྱི་”སྒྱུ་རྩལ”ལྷ་སའི་ཇོ་ཁང་གི་ནུབ་པ་མེད་པའི་དར་ལྕོག་ལ་སྦྲེལ་སྨོན་བྱས་ཏེ་ཡོད
ཐུ་བྷོད ཆུ་གཙང་ས་མཐོའི་གསོན་ཉམས་དེ་ཆག་ཉིལ་མེད་པའི་ཁྱོད་ཀྱི་སྒྱུ་རྩལ་ཡིན
བུ་རིག་ལོ ཤེས་རབ་ཀྱི་རྒྱུ་འབྲས་བློ་མིག་ཆེ་བའི་དབྱངས་ཀྱི་ཁ་ལྕེ་རྒོད་པོ
བོད་ཞེན་དང་རིག་རྩལ་ལྡན་པའི་སྨྱུ་གུའི་སྟོབས་བཙན་པོ
ས་འཕག་གནམ་འཕག་ལྟ་བུའི་ཁྱུང་ཆེན་གྱི་རང་དབང་བ་ཁྱོད་རང་ཡིན
སྒྱུ་རྩལ་ནི་ཡ་ཁོག་གི་སྙིང་ལྟེ་ལ་བཞེངས་ཤིང་ཆོས་ཉིད་ཀྱི་སྒྱུ་རྩལ་དད་པ་བརྩིགས་ཏེ་འདུག
འོད་འཚེར་འཚེར་གྱི་སྐར་ཁྱིམ་དེ་ཁྱོད་ཀྱི་སྒྱུ་སྩལ་དང་དེའི་རང་མདངས་རྣམ་པར་བཞད་པར་ཤོག