རླངས་ཚང་བསོད་ནམས་རྡོ་རྗེ།
ད་ལྟའི་བར་དུས་རབས་རང་བཞིན་གྱི་རིག་གནས་འཕེལ་འགྲོས་དང་བསྟུན་གཞན་སྐད་ནས་བོད་སྐད་དུ་བསྒྱུར་བའི་བསྟན་བཅོས་མང་པོ་བྱུང་། ཉེ་བའི་དུས་ནས་རྒྱ་སྐད་གཙོས་ཡིག་རིགས་འདྲ་མིན་དུ་ཡོད་པའི་རིག་ཚན་མི་འདྲ་བ་མང་པོ་ཞིག་རང་ཅག་གི་སྐད་དུ་བསྒྱུར་མཁན་གྱི་ཡིག་སྒྱུར་བ་ཡང་ཆར་རྗེས་ཀྱི་ཤ་མོ་བརྡོལ་བ་བཞིན་འཕེལ། འཛམ་གླིང་ཤར་ནུབ་ཀྱི་དཔེ་དེབ་མང་པོ་ཞིག་ཀྱང་རང་ཅག་གི་ཡི་གེར་སྒྱུར་བཞིན་པ་ནི་དགའ་བའི་གསོས་སུ་ཆེ། ཁོ་བོས་ཀྱང་ནུབ་ཏུ་
གྲགས་ཆེ་ཙམ་ཡོད་པའི་དཔེ་དེབ་ཁ་ཤས་བོད་ཡིག་ཏུ་བསྒྱུར་བ་ནས་བཟུང་ལས་འདི་གཉེར་བའི་དཀའ་ལས་མྱོང་བར་གྲུབ། སྔོན་བྱོན་ལོ་ཙཱ་ཡོངས་དང་དེང་གི་ཡིག་སྒྱུར་བ་ཁག་ཅིག་ལ་ཡིད་སྨོན་གཏིང་ནས་སྐྱེས། དོན་དམ་བཤད་ན་འུ་ཅག་གི་ལས་མང་པོ་ཞིག་དང་བླངས་རང་བཞིན་གྱིས་གཉེར་ཡང་སྤྱི་ཚོགས་ཀྱིས་ངོས་ལེན་གནང་རྒྱུ་ནི་དཀའ་ཙམ་ཡོད་པར་ཡུས་བཤད་ནས་འདུག་དགོས་པའི་སྐབས་ཙམ་ཞིག་ལ། དཔེ་དེབ་གྲགས་ཅན་སོ་ཧྥེ་ཡི་འཇིག་རྟེན་གྱིས་མཚོན་ལས་འདིར་འཇུག་མཁན་རེ་ཟུང་གིས་རིག་གནས་ནང་འདྲེན་ལ་ཁ་གཡར། དཔལ་འབྱོར་འདུ་འགོད་ལ་ཆེད་དུ་དམིགས་ནས་བོད་བསྒྱུར་བྱས་པའི་དཔེ་དེབ་མང་པོ་ཞིག་གི་གནས་བབ་དང་མཇུག་འབྲས་ཀྱིས་ང་ཚོའི་ཡིག་སྒྱུར་གྱི་ལས་ཀ་འདི་ཉོག་བཞིན་དཀྲུགས། སྟོང་ལབ་ཆེན་པོ་རྒྱག་པ་ལས་ཞིབ་ཚགས་ཀྱི་ལས་ཀ་བྱེད་མི་ཤེས། རྩ་བ་ཚུགས་པ་ཙམ་ནས་འབྲས་བུ་ཆེན་པོ་བླངས་ཡོད་སྙམ་པའི་ཧམ་པ་བཤད་རྒྱུར་བག་མི་ཚ། བོད་ཡིག་ཏུ་བསྒྱུར་བའི་དཔེ་ཆ་དེ་དག་ཀྱང་འཛམ་གླིང་ཅིག་ཅིག་མིག་མིག་གི་དཔེ་དེབ་གྲགས་ཅན་ཞེས་ཁྱབ་བསྒྲགས་སྙིང་རྗེ་མོ་རེ་བཟོས་ནས་འགྲེམ་རྐྱང་བྱེད། ཡིག་བསྒྱུར་གྱི་རྩ་དོན་གང་ཞིག་ལ་གཞི་བཅོལ་བ་ཤེས་དཀའ་ཞིང་། མིང་བརྡ་ཐ་སྙད་དང་བརྡ་སྤྲོད་ཚིག་སྦྱོར་སོགས་ཀྱི་འགྲོས་ཀྱང་རང་ཅག་གི་གཞུང་ལུགས་རྣལ་མར་བསྟུན་མི་ཤེས། ཁྱད་ཆོས་ངོམ་པ་ལྟ་བུའི་འདུ་ཤེས་ལོག་པས་རང་ལ་ཐ་སྙད་ཡོད་བཞིན་དུ་གཞན་སྐད་ཀྱི་ཐ་སྙད་དག་རྡོ་ཆག་བཙན་སྒྲིག་གིས་སྦྱར་དང་སྦྱོར་བཞིན་པའི་གནས་བབ་ནི་སེམས་ཀྱི་མི་བཟོད། སྒྱུར་རྩོམ་གྱི་དེབ་མང་པོ་མཐོང་ཡང་ཀློག་པ་ནི་ཆུ་ཚོད་ཟད་པའི་རྒྱུ་ཁོ་ནའོ་སྙམ་ནས་བསྡད་ཡོད་པའི་སྐབས་འདིར། འབྲུག་སྒྲ་སོགས་ཀྱིས་མཚོན་པའི་འགྱུར་རྨད་དུ་བྱུང་བ་ཡང་འགའ་རེ་མཐོང་རྒྱུ་བྱུང་བས་སྒྱུར་རྩོམ་བཀླག་པའི་བསོད་ནམས་ཟད་མི་འདུག་སྙམ་པའི་སྤྲོ་བ་ཡང་ཤུགས་ལ་བྱུང་།
ང་ཚོའི་ཡིག་སྒྱུར་བ་དག་གིས་དཔེ་དེབ་གྲགས་ཅན་མང་པོ་ཞིག་བོད་བསྒྱུར་བྱས་ཡོད་ན་ཡང་། ཡིག་སྒྱུར་བ་དང་ཀློག་པ་པོའི་གྲངས་འབོར་ལ་དཔག་ཡོང་དུས། ཡིག་སྒྱུར་བ་གྲགས་ཅན་འདི་ཚོས་གཞན་གྱིས་བསྒྱུར་ཟིན་པའི་དེབ་གང་ཞིག་གིས་ང་ཚོར་གོ་བ་སྤྲོད་ཐུབ་པ་ཡིན་ན་ཡང་བསྐྱར་བསྒྱུར་དགོས་པའི་ངེས་པ་མ་མཆིས་ཤིང་། འུ་ཅག་གི་ཡིག་བསྒྱུར་གྱི་ཐོན་ཁུངས་ནི་ཧ་ཅང་ཚད་ཡོད་ཡིན་པར་བསམ་བློ་ཞིག་གཏོང་མི་བྲ་བ་གང་ཡིན་ནམ་སྙམ་པའི་སེམས་ཁུར་ཞིག་རྒྱུན་དུ་ཡོང་གི་འདུག དེབ་གཅིག་ལ་འགྱུར་མི་འདྲ་བ་གཉིས་རེ་བྱུང་ཡོད་པ་འགའ་རེ་མཐོང་མྱོང་བ་མ་ཟད། དམིགས་བསལ་བྱོལ་སོང་གཞིས་ཀ་ཞེས་པའི་དེབ་གྲགས་ཅན་དེ་ལ་ཡང་སླེ་ལུང་ལྷ་འབུམ་ཚེ་བརྟན། ཡར་འབྲོག་པ་སྐལ་བཟང་ཡེ་ཤེས། ངམ་རིང་ཡོན་ཏན་རྒྱ་མཚོ། རྡོ་རྗེ་ཚེ་བརྟན། ཐེ་བྲག་བསྟན་པ་བཅས་འགྱུར་མི་འདྲ་བ་ལྔ་བྱུང་ཡོད། འགྱུར་ལྔ་བོ་ཡང་ལེགས་ཉེས་ཙམ་མིན་པར་གོ་བརྡ་སྤྲོད་ལུགས་ལ་ཡང་ཆབ་སྲིད་ཀྱི་བསམ་བློ་ཡོད་མེད་དང་བོད་ཡིག་གི་ཆུ་ཚད་དང་ཚིག་འགྲོས། ནང་དོན་གོ་ཁྱད་བཅས་ཀྱི་དབང་གིས་ཆུ་ལ་ཆུ་བཞག་བྱུང་ཡོད་མེད་གཉིས་ཀ་བྱུང་ཡོད་པ་ཡང་འགྱུར་འདི་དག་ལག་སོན་བྱུང་ཡོད་པའི་ཀློག་པ་པོ་དག་གིས་ཤེས་ནུས་པས་མང་པོ་མི་བཤད། དོན་དམ་བཤད་ན་འུ་ཅག་ལ་ཡང་ཆོས་རྒྱལ་ཁྲི་སྲོང་ལྡེ་བཙན་སྐབས་ནས་ཡིག་སྒྱུར་གྱི་རྩ་དོན་ཆེན་པོ་བཞི་དང་བསྒྱུར་བའི་ཐབས་དམ་པ་བཞི། ཡིད་འཇོག་བྱེད་དགོས་པ་བཞི་སོགས་ཚགས་དམ་པའི་སྒྲིག་གཞི་བྱུང་བ་ནས་ཡིག་བསྒྱུར་ལ་རྩ་དོན་ཡོད་པར་གྱུར་པས་སྔོན་བྱོན་དམ་པ་དག་གིས་བསྒྱུར་བའི་བསྟན་བཅོས་དག་གི་ཁྱད་ཆོས་བླ་ན་མེད་པ་ཞིག་ཡིན་པ་མཁྱེན་ཆུབ་བཞིན་རེད། དེང་ང་ཚོར་གཅིག་གྱུར་རང་བཞིན་གྱི་འགྱུར་ཞུས་དང་གཏན་འཁེལ་གྱི་སྒྲིག་གཞི་མེད་པར་བརྟེན་གནས་བབ་སྣ་ཚོགས་འབྱུང་བཞིན་པ་འདི་ཡང་ཁག་མེད་པར་མི་སྙམ་པར་རང་གཅུན་རང་སྡོམ་གྱི་ལམ་ནས་རིག་གཞུང་ལ་ཤ་ཚ་སྙིང་ཉེ་དང་བཅས་ཡིག་སྒྱུར་གྱི་བྱ་བ་འདིར་འབད་ཐུབ་པ་ཡིན་ན་གྲུབ་འབྲས་ལེགས་པོ་ཞིག་ལོས་ཡོང་སྙམ་པ་ཞིག་ནམ་རྒྱུན་སེམས་ལ་འཁོར་དགོས་ཀྱི་འདུག ཁོ་བོས་ཡི་གེ་བསྒྱུར་མཁན་ཡོང་ལ་ལོ་ཙཱ་བ་ཞེས་པའི་ཐ་སྙད་འདི་འདོག་མི་འདོད་པ་ལ་ཡང་གནད་ཅིག་ཡོད། ད་ནི་སྤྱི་བཤད་བཞག་ནས་གླེང་གཞི་གཙོ་བོར་ཞུགས་ན།
ཟླ་ཤས་སྔོན་ཙམ་ལ་དེབ་འདི་བོད་ཡིག་ནང་ཡོད་ནའང་སྙམ་པ་ཐེངས་མང་ཡིད་ལ་ཤར་མྱོང་བའི་ནུབ་ཀྱི་དཔེ་དེབ་གྲགས་ཅན་ཞར་ལའོ་ཁྲིའི་སྡོམ་ཐག་དང་དངོས་ཟིན་དཔེ་དེབ་ལམ་ཐག་རིང་བའི་ཕ་ཡུལ་ཞེས་པ་གཉིས་རོང་བོ་ཀླུ་རྒྱལ་ལགས་ཀྱིས་བསྒྱུར་ནས་འགྲེམས་སྤེལ་བྱས་སོང་། དཔེ་དེབ་གྲགས་ཅན་ཡིན་པའི་ཞེན་ཁོག་གིས་གཟའ་མཇུག་ལ་ཞིབ་ཏུ་བཀླགས། སྒྱུར་མཁན་གྱི་སྔོན་གླེང་དུ་བྲིས་ཡོད་པ་བཞིན་ཁོང་ནི་དབྱིན་ཡིག་གི་ཆུ་ཚད་ལ་གདེང་སྤོབས་ཡོད་པའི་མི་ཞིག་ཡིན་པ་ལས། བོད་ཡིག་སྦྱང་བའི་སྐལ་བ་ཆེས་ཆེར་ཤར་ཡོད་ས་མ་རེད། ཁོང་གིས་དཔེ་དེབ་འདི་བོད་སྒྱུར་བྱེད་པ་ནི་རང་ཉིད་ཀྱིས་ལོ་ཙྭ་བྱེད་ཕྱོགས་ལ་སློབ་གཉེར་དང་འབྲེལ་ནས་རང་གི་བོད་ཡིག་གི་ཆུ་ཚད་ཡར་རྒྱས་སུ་གཏོང་བའི་གོ་སྐབས་བླ་མེད་ཅིག་ལ་ངོས་འཛིན་བྱས་ཏེ་བསྒྱུར་མགོ་བརྩམས་པ་ཡིན་ཞེས་པ་འདི་ལས་ཀྱང་ཤེས་ནུས་པ་དང་ངོས་འཛིན་སྟངས་འདི་ཡང་སྤོབས་པ་ཞིག་ཡིན་པ་མ་ཟད་མགོ་སེར་གྱི་རྒྱ་མཚོ་ལྟ་བུའི་སྤྱི་ཚོགས་ཁྲོད་ནས་མགོ་ནག་མཐོང་དཀོན་པའི་ཁོར་ཡུག་དེར་བོད་ཡིག་ལ་འབད་འདོད་ཀྱི་ཀུན་སློང་དེ་ཉིད་ལ་ཧ་ལས་དགོས་པ་མ་ཟད། བོད་ཡིག་ཀྱང་གཞན་སྐད་ལས་སྦྱོང་དགོས་པར་འདོད་པ་དང་། དབྱིན་ཡིག་དང་རྒྱ་ཡིག་གི་འགྲོས་རིམ་བོད་ཡིག་ལ་ཅིས་ཀྱང་མཁོ་བར་འདོད་པའི་མཁས་རློམ་བོད་པ་ཡིག་རྨོངས་བརྡ་རྨོངས་པ་དག་གི་བྱེད་བབ་ལས་བརྒལ་ཏེ། དཔེ་དེབ་འདི་གཉིས་སྒྱུར་རྩལ་ལ་ཡང་ཧ་ལས་དགོས་པ་ཞིག་ཏུ་གྱུར་ཡོད་པ་ནི་ཀློག་པ་པོ་དག་གིས་མཁྱེན་གསལ་ལྟར་རེད།
ཨ་རི་སོགས་ཕྱི་རྒྱལ་ཡུལ་གྲུ་ཁག་ཅིག་ནས་སློབ་ཆེན་འགྲིམས། དབྱིན་སྐད་དང་འབྲེལ་བའི་ལས་ཀ་བྱས་ནས་མི་ལོ་མང་པོ་སོང་ཡོད། ད་རེབ་ཁོང་གི་བསྒྱུར་རྩོམ་འདི་གཉིས་བཀླགས་གྲུབ་རྗེས། སྒྱུར་བ་བོས་ས་མཐའ་ནས་ཕ་ཡུལ་དྲན་པའི་གདུང་ཡུས་དང་། ནུབ་ཀྱི་སྤྱི་ཚོགས་ནང་ཆུང་མ་དང་བུ་མོ་གཉིས་ལས་གདོང་ཐུག་ནས་བོད་སྐད་བཤད་ས་དཀོན་པའི་ན་ཟུག་འཇོག་ཐབས་སུ་བོད་ཡིག་གི་དེབ་མང་པོ་ཞིག་བཀླགས་པ་ནི་དེབ་འདི་གཉིས་ཀྱི་ཚིག་སྦྱོར་དང་བཤད་འགྲོས། མ་ཡིག་བུ་ཡིག་ཏུ་ཕབ་པའི་ཚིག་འགྲོས་དང་དོན་གྱི་གནད་འབྱིན་སྟངས་འདིས་ཀྱང་ཤེས་ཐུབ་པ་ལྟར། ངས་ཁོང་ལ་གདེང་འཇོག་གཞན་ཞིག་བྱེད་དགོས་ཐུག་སོང་། འགྱུར་རྩོམ་གང་ཞིག་ཡིན་ཡང་བཀླག་ཡོང་དུས་རང་གི་སྐད་ཆའི་ལུགས་དང་མཐུན་པར་གོ་བ་ཡོངས་སུ་ལེན་ཐུབ་པ་ཞིག་ཡིན་ཚེ་སྒྱུར་བ་བོས་མ་ཡིག་གི་གོ་བ་གཏིང་ཟབ་ཏུ་བླངས་ཡོད་པ་དང་། བུ་ཡིག་གི་བརྡ་སྤྲོད་འགྲོས་ལུགས་ལ་བྱང་ཆུབ་པ་ཞིག་ཡིན་པ་ནི་སྨྲོས་མ་དགོས།
ཚིག་སྦྱོར་གྱོང་ས་དང་ཡིག་སྐྱོན་ཉུང་ཟད་རེ་ཤོར་བ་ཡང་ཁག་མེད་སྙམ་པ་ཞིག་བསམ་བློའི་ཟུར་ནས་མ་དོར་བར་བཀླགས་དགོས་བྱུང་། མ་གཞི་ནས་དབྱིན་ཡིག་གི་གྲགས་རྩོམ་འདི་གཉིས་ལས་གཅིག་ནི་རྒྱ་གར་གྱི་གློག་བརྙན་སེང་གེ་ཞེས་པར་བལྟས་པའི་བག་ཆགས་ཟབ་པ་དང་། གཞན་དེ་ནི་དབྱིན་ཡིག་སྟེང་བཀླགས་མྱོང་བ་མ་ཟད། རྒྱ་ཡིག་གི་རྨང་གཞི་ཤིན་ཏུ་ཟབ་པའི་ཁོ་བོས་ཞེན་ཁོག་གི་དབང་གིས་རྒྱ་ཡིག་གི་དེབ་དེ་ཡང་ཉོས་ཀྱང་བཀླག་པའི་མིག་དབང་མེད་པས་དཔེ་སྒྲོམ་དུ་བཞག་ནས་ལོ་མང་འགོར། སྐབས་ཤིག་གྲོགས་པོ་ཞིག་གིས་དེབ་དེ་བོད་ཡིག་ཏུ་བསྒྱུར་རྒྱུ་ཡིན་ཚུལ་ཐོས་ཀྱང་རྗེས་སུ་གོ་ཐོས་ཅང་མ་བྱུང་། འདི་དང་འབྲེལ་ནས་ཕྱིར་འདང་ཞིག་བརྒྱབ་ཡོང་དུས་ཁ་ཆད་བྱས་པའི་དོན་དག་མང་པོ་ཞིག་ག་མིན་འདི་མིན་གྱིས་ལུས་སོང་བ་ཡང་དེ་རིང་དྲན་སོས་འཕྱི་སོང་བའི་ཚད་དུ་ཡོད།
ལམ་ཐག་རིང་བའི་ཕ་ཡུལ་ཞེས་པའི་དེབ་འདི་ཉིད་ནི་རྒྱ་གར་གྱི་ཡུལ་ཆེན་པོ་ཀ་ལི་ཀ་ཏ་ནས་ཕ་ཡུལ་བོར་བའི་བྱིས་པ་ཞིག་གིས་མི་ལོ་ཉི་ཤུ་རྩ་ལྔའི་རིང་རང་ཡུལ་དྲན་པའི་གདུང་ཡུས་མ་བརླགས་པའི་མཐའ་མར་བསམ་དོན་གྱི་རི་མོ་འགྲུབ་པའི་བྱུང་བ་དངོས་ཡི་གེར་བཀོད་པ་ཞིག་ལ་རེད་ལ། སྐབས་དེར་མཚོན་ན་རྒྱ་གར་དུ་ཨ་མ་ཁྲི་རེ་ས་སོགས་ཀྱིས་མཚོན་པའི་བྱམས་བརྩེའི་ཐེབས་རྩ་ཚོགས་པ་མང་པོས་ཕ་མ་བོར་བ་དང་འདས་པའི་ད་ཕྲུག་དང་འཛེ་ནད་སོགས་ཀྱིས་མཚོན་པའི་ནད་པ་མང་པོར་གཉོར་སྐྱོང་དང་འབྲེལ། འགའ་རེ་ཁྲིམས་མཐུན་གྱིས་རྒྱལ་ཁབ་གཞན་དུ་བུ་སྐལ་དུ་སྤྲོད་པའི་སྲོལ་ཞིག་བྱུང་འདུག དེབ་འདིའི་ནང་གི་མི་སྣ་གཙོ་བོ་སའེ་རུབ་ལ་མཚོན་ན་ཡང་དེའི་ཁྲོད་ཀྱི་གཅིག་ཡིན་པ་མ་ཟད། བུ་སྐལ་དུ་ལེན་མཁན་གྱི་ཕྱི་གླིང་ཕ་མ་གཉིས་ཀྱིས་ཁོང་ཚོའི་རྒྱལ་ཁབ་ཏུ་ཤ་མདོག་དཀར་ནག་དབྱེ་འབྱེད་ཀྱི་བསམ་བློའི་དམག་འཁྲུག་དང་། དོག་མི་བདེ་བའི་མཐོང་སྣང་མང་པོ་ཞིག་ལ་གདོང་གཏད་ནས་རྨི་ལམ་ཚུན་ལ་བསམ་མ་མྱོང་བའི་ཨོ་སི་ཁྲི་ལ་ཡར་གཉོར་སྐྱོང་དང་སློབ་སྦྱོང་སྤྲད་དེ་ནར་སོན་དུ་བཅུག་པའི་ལོ་ཟླ་དང་། ཀ་ལི་ཀ་ཏ་ནས་ཐག་ཧ་ཅང་མི་རིང་བའི་ཕ་ཡུལ་བོར་ནས་ཤར་ནུབ་དང་ཉིན་མཚན་གྱི་དུས་ཚོད་མི་གཅིག་པའི་ཡུལ་ཁམས་ཤིག་ཏུ་ནམ་ཡང་ཕ་ཡུལ་དང་ནང་མི་དྲན་ངོགས་ནས་བརྗེད་མ་ཐུབ་པའི་གདུང་ཡུས་གསོང་བོར་བརྗོད་པའི་དེབ་ཅིག་རེད་ལ། ལོ་ལྔ་ལས་མ་སོན་པའི་བུ་ཆུང་ཞིག་གིས་ཕ་ཡུལ་བོར་ཟིན་པའི་འཇིགས་སྐྲག་དང་བཀྲེས་སྐོམ་གྱི་གདུང་བས་ཤི་ལ་ཁད་བྱས་པ། ཁོང་གཡོ་བཙོང་གི་སྦྱོར་བ་བསྟེན་མཁན་དང་ཆུ་ནང་ནས་སྲོག་ཐེངས་གཉིས་ལ་སྐྱོབ་མཁན་བྱུང་བ། ཨོ་སི་ཁྲུ་ལི་ཡར་བུ་སྐལ་དུ་སྤྲོད་མཁན་གྱི་རོགས་སྐྱོར་ཚོགས་པར་ཐུག་ནས་ཨོ་གླིང་གི་བྱམས་སེམས་ལྡན་པའི་ཕ་མ་གཉིས་ཀའི་བྱམས་བརྩེའི་འོག་ནས་སློབ་མཐར་ཕྱིན་པ་སོགས་མི་ཚེའི་ནང་ཡ་ཡུད་ཤིན་ཏུ་ཆེ་བའི་བྱུང་བ་དག་ཁ་གསལ་བོས་བྲིས་པའི་རྩལ་ནི་ཧ་ལས་པ་ཞིག་རེད་ལ། འབྲི་ཐབས་ཀྱི་ངོས་ནས་ཀྱང་མགོ་སྔ་དཀྲུག་པ་དང་། མི་སྣའི་སྣང་བརྙན་ཞིབ་འབྲི་སོགས་གཙོ་བོར་བཟུང་མེད་པར་དོན་གྱི་བྱུང་བ་དངོས་ལ་གཞོལ་ཤུགས་ཆེན་པོས་བྲིས་པ་ཞིག་ཡིན་པ་མ་ཟད། དཀར་ཆག་འགོད་ལུགས་ལྟར་ཚན་པ་རེ་རེ་བརྗོད་བྱ་རེ་རེ་གཏན་འཁེལ་གྱིས་བྲིས་ཡོད་ཀྱང་མི་སྣ་གཙོ་བོ་གནད་དུ་འཛིན་སྟངས་ལ་དམིགས་བསལ་ཁྱད་ཆོས་ཡོད་པ་ཞིག་རེད།
ཉེ་ཆར་ཨ་མདོ་བརྙན་འཕྲིན་གྱིས་ཕ་ཡུལ་ཞེས་པའི་ཆེད་སྒྲིག་ལེ་ཚན་དུ་ཕ་ཡུལ་དང་འབྲེལ་བའི་སྐད་ཆ་མང་པོ་ཞིག་འབྱུང་བཞིན་པ་ཡང་ཁོང་ཚོར་སའེ་རུབ་ལྟར་དྲན་ངོགས་ཙམ་ན་ཡོད་པའི་ཕ་ཡུལ་དྲན་པའི་གདུང་ཡུས་མེད་ཀྱང་། ནམ་རྒྱུན་སླེབས་མ་ཐུབ་པར་ལུས་པའི་ཕ་ཡུལ་དྲན་པའི་གདུང་བ་ཡོད་མཁན་དང་། ཕ་ཡུལ་ཞེས་པ་གཏན་ནས་མི་ཤེས་པའི་བུ་ཚ་དག་གི་རྣམ་པ་སེམས་ཀྱིས་མ་བཟོད་པའི་མི་སྐོར་ཞིག་གིས་ལེ་ཚན་དེ་བློས་བསླངས་ཀྱིས་བརྙན་ལ་ཕབ་བཞིན་ཡོད་པ་ལྟར། སའེ་རུབ་ཀྱིས་ཀྱང་དྲ་རྒྱར་བརྟེན་ནས་གྷོ་གྷལ་ས་ཁྲའི་སྟེང་ཕ་ཡུལ་འཚོལ་ཐེངས་རེ་རེ་དང་གྲོང་ཁྱེར་ཀ་ལི་ཀ་ཏའི་མེ་འཁོར་འབབ་ཚིགས་ཀྱི་ས་རྟགས། ཁོའི་དྲན་ངོགས་ན་གསལ་ལ་མི་གསལ་བ་ཞིག་ཡོད་པའི་ས་མིང་གི་དག་ཆ་གསལ་བོ་མ་ཤེས་པའི་དཀའ་ངལ་རེ་རེ་དང་། རང་གི་མིང་ཧྲིལ་བོ་ཡང་གཞན་ལ་བཤད་མི་ཤེས་པའི་བྱིས་པ་ཆུང་ཆུང་ཞིག་ཡུལ་གྱར་བྱ་དགོས་བྱུང་སྟེ། མི་ལོ་ཉི་ཤུའི་རིང་ཕྱི་གླིང་གི་སློབ་གསོ་མྱོང་བ་དང་འཚོ་བའི་ཆ་རྐྱེན་ཤིན་ཏུ་ལེགས་ན་ཡང་། རང་གི་ལྟེ་ཁྲག་འཕོ་སའི་ཕ་ཡུལ་དང་། གཉེན་ཉེ་སོགས་དྲན་པའི་གདུང་བའི་ཁྲོད་ནས་བརྩོན་པས་བཙལ་ནས་རྙེད་པའི་ཕ་ཡུལ་ལ་འབྱོར་དུས། རྩོམ་པ་པོས། དམིགས་བྱ་གང་ཡང་རུང་བ་ཞིག་ལ་བློ་རྩེ་གཅིག་སྒྲིམ་གྱིས་ཐབས་བཀོད་སྣ་ཚོགས་དང་གོ་སྐབས་ཡོད་ཚད་བཅས་དང་དུ་བླངས་ཏེ་ཆོད་སེམས་བརྟན་པོའི་སྒོ་ནས་ལྷུར་ལེན་བྱས་ན་མི་འགྲུབ་པའི་བྱ་བ་གང་ཡང་མེད། ཅེས་བཤད་པ་ལྟར། ཨ་མ་དང་སྤུན་སྲིང་ལྷག་ཡོད་པ་དག་ལ་མཇལ་བའི་ཚོར་སྣང་དང་ཀ་ལི་ཀ་ཏ་ནས་ཁོང་བོར་བའི་ཉིན་མོར་རྐྱེན་ལམ་དུ་ཤོར་བའི་ཕུ་བོའི་སྐོར་ཐོས་སྐབས་ཀྱི་ཚོར་བ་ནི་སྨྲ་བསམ་བརྗོད་འདས་ཤིག་རེད་ཨང་།
དཔེ་དེབ་འདིའི་རིགས་ནི་ནུབ་ཀྱི་རྩོམ་རིག་ཁྲོད་མང་ཙམ་ཡོད་པ་རེད་ལ། ད་སྔ་རང་ཅག་གི་སྐད་ཡིག་ནང་བསྒྱུར་ཟིན་པ་ལ་ཡང་རོ་བྷོན་སོན་ཁུ་རོ་སུ་༼འདི་ཁོ་བོས་བོད་ཡིག་ཏུ་བསྒྱུར་ཡོད།༽ཞེས་མི་ལོ་མང་པོར་མཚོ་གླིང་ནས་ལུས་པའི་དངོས་བྱུང་གཏམ་རྒྱུད་དེ་ཡོད་པ་རེད། ལམ་ཐག་རིང་བའི་ཕ་ཡུལ་ལ་མཚོན་ན་ཡང་རོ་བྷོན་སོན་ཁུ་རོ་སུས་མཚོ་གླིང་ནས་ནམ་ཞིག་ཕ་ཡུལ་ལ་འབྱོར་བར་སྙམ་པའི་ངང་སྒུག་དང་བརྩོན་སེམས། ཐབས་ཤེས་ཀྱིས་རང་ཉིད་ཀྱི་འཚོ་གནས་ཐག་གཅོད་བྱས་པ་ལྟ་བུའི་དཀའ་ངལ་མྱང་མེད་ན་ཡང་། ཕ་ཡུལ་ལ་འབྱོར་ན་སྙམ་པའི་ཕུགས་བསམ་དང་མཚོ་གླིང་ནས་ཐར་ན་སྙམ་པའི་སེམས་ཁྲལ་གྱི་ཆ་ཕལ་ཆེར་འདྲ་བོར་གྱུར་ཡོད། མདོར་ན་དཔེ་དེབ་གཉིས་ཀ་བཀླགས་རྗེས་སེམས་ལ་དྲན་ཡོང་བ་ནི་ཕུགས་བསམ་ལ་མངོན་པར་ཕྱོགས་ནས་བརྩོན་པ་བསྟེན་མཁན་དག་ལ་ཅིས་ཀྱང་རྒྱལ་ཁ་ཆེན་པོ་ཞིག་ཡོད་པར་བདེན་ཁ་སྟེར་དགོས་པ་འདི་གནད་དུ་གྱུར་ཡོད་དོ།།
རོང་བོ་ཀླུ་རྒྱལ་ལགས་ཀྱིས་དེབ་འདི་བློར་བབས་ནས་བསྒྱུར་དགོས་པ་ཡང་ས་མཐའི་ཡུལ་གདུང་ཡོད་པའི་ཚོར་བས་ཟིན་ཚད་མཐོ་བ་དང་། དབྱིན་བོད་གཉིས་ཀའི་ཆུ་ཚད་ལེགས་པ་བཅས་ལ་བརྟེན། དེབ་འདི་ནི་ཁྱེད་ལྟ་བུའི་བསྒྱུར་སྐལ་ལོས་ཡིན་བསམ་པ་མ་ཟད། སའེ་རུབ་ཀྱིས་ཕ་ཡུལ་གྱི་ས་མིང་ཆུ་མིང་གི་དག་ཆ་མ་ཤེས་པའི་དཀའ་ངལ་གྱིས་ཉིན་གྱི་ཟས་དང་མཚན་གྱི་གཉིད་བོར་ལོས་ཡོད་བསམ་པའི་སྐབས་ཀྱི་སྣང་བརྙན་དག་ནི་ས་མིང་ཆུ་མིང་དང་ཤ་ཉེ་ནང་མི་བཅས་པར་རྒྱུས་ཤིན་ཏུ་ཡོད་པའི་ཡིག་བསྒྱུར་བར་ཡང་གདུང་ཡུས་དམིགས་བསལ་བ་ཞིག་སྤྲད་ལོས་ཡོད་སྙམ་པ་སོགས་རྩོམ་པ་པོ་དང་ཡིག་བསྒྱུར་བའི་འཚོ་བ་རོལ་ལུགས་ལ་འདྲ་བའི་ཆ་ཡོད་པས་དོན་གྱི་གནད་འབྱིན་སྟངས་ལ་དམིགས་བསལ་ཁྱད་ཆོས་འདུག་ཟེར་དོན་ཡང་དེ་གཅིག་ཡིན། གཉིས་ནས་འགྱུར་རྩོམ་མང་པོ་ཞིག་ཏུ་མ་ཡིག་ཏུ་ཡོད་པའི་མི་མིང་དང་ས་མིང་སོགས་དེ་ལྟར་བཀོལ་ནས་བོད་ཡིག་གི་མཐུག་ཡིག་དང་ལོག་ཡིག་སོགས་བཀོལ་ལུགས་ཤིག་ཡོད་པ་དེས་ཀློག་པ་པོའི་ཡིད་སེམས་གཅིག་ལ་གཞོལ་ཤུགས་ཆུང་དུ་གཏོང་བ་དང་ཡི་གེ་བོད་ཡིག་ཡིན་པ་ལས་བརྡ་སྤྲོད་ལུགས་སྐད་རིགས་གཞན་ཞིག་ཡིན་པའི་ཚོར་བས་མནར་ཡོང་བ་སོགས་ཀྱི་སྐབས་ཀྱང་ཡོད་པས། དེབ་འདི་གཉིས་ཀ་དེ་དག་དང་ཡོངས་སུ་བྲལ་བའི་ཁྱད་ཆོས་འབུར་དུ་ཐོན་པ་ཞིག་འདུག རང་གིས་ཐག་གིས་མི་ཆོད་པའི་ཐ་སྙད་དག་ཀྱང་བོད་རྒྱ་ཚིག་མཛོད་ཆེན་མོ་དང་རྒྱ་བོད་དབྱིན་གསུམ་གསར་བྱུང་རྒྱུན་བཀོལ་མིང་མཛོད་ལ་གཞི་བཅོལ་འདུག་པ་ཡང་ཤིན་ཏུ་ལེགས་ཏེ། དེང་རང་གི་ལྟ་ཚུལ་ཁོ་ན་གཙོ་བོར་བཟུང་ནས་ཚིག་མཛོད་དུ་གཏན་ལ་ཕབ་པའི་མིང་བརྡ་ཐ་སྙད་རང་བློ་དང་མཐུན་མི་མཐུན་ཅི་རིགས་ཀྱི་ཁ་རྩོད་ཀྱིས་ཀུན་པོ་ལམ་གཅིག་ཏུ་ཞུགས་པའི་སེམས་ཚོར་ཡང་མེད་པའི་གོད་ཆག་གི་སེམས་ཁམས་ཤིག་གྲུབ་ཡོད་པ་དེས་དོན་དམ་ཕན་གནོད་ག་འདྲ་ཞིག་ཡོད་པ་ནི་ང་ཚོས་ཞོར་ནས་ཤེས་ཡོང་བ་འདི་རེད།
ཞར་ལོ་ཁྲིའི་སྡོམ་ཐག་ཅེེས་པའི་དཔེ་དེབ་འདི་ཉིད་ལ་མཚོན་ན་ཡང་བརྩམས་ནས་ད་ལྟའི་བར་དུ་སྐད་རིགས་སོ་ལྔའི་ནང་བསྒྱུར་ཡོད་པ་དང་། ཡིག་རིགས་གཞན་དུ་ཡོད་པའི་དཔེ་ཆ་གྲངས་ས་ཡ་ཞེ་ལྔ་བཙོངས་ཟིན་པ་ཞིག་རེད། ཧ་ལས་པའི་གྲངས་འབོར་འདི་དང་བསྡུར་ཡོང་ན་བོད་ཡིག་ནང་དེབ་ཆིག་སྟོང་བཀྲམས་ནས་ཟླ་ཤས་འགོར་བའི་རིང་འདིར་དྲ་སྟེང་ནས་གྲགས་འགུལ་ཆེ་ཙམ་ཞིག་བྱུང་ཡོད་ནའང་བོད་ཡུལ་གྱི་དཔེ་ཁང་སོ་སོའི་ནང་ད་རུང་བཙོང་ནས་ཚར་མེད་པའི་གནས་བབ་འདིར་བལྟས་ཡོང་ན་དེབ་འདིའི་འགྱུར་གྱི་ཁྱད་ཆོས་མ་ཤེས་པའམ། བོད་ཡིག་ལས་རྒྱ་ཡིག་ཏུ་བཀླག་བདེ་བ། དཔེ་དེབ་ཀློག་པའི་གོམས་གཤིས་ཡོད་མཁན་གྱི་མི་ཉུང་བ་སོགས་རྒྱུ་རྐྱེན་མང་པོ་ཞིག་ལ་འབྲེལ་བ་ཡོད་པ་རེད། གང་ལྟར་ཁ་སང་དེ་རིང་བོད་ཡིག་གི་དཔེ་ཆ་ཀློག་མཁན་མར་ཆགས་བཞིན་པའི་སྐབས་འདི་ཙམ་ལ་སློབ་འབྲིང་སློབ་མ་ཡན་གྱིས་བཀླག་ན་གོ་ནུས་པའི་དཔེ་དེབ་འདི་གཉིས་བོད་ཡིག་གི་ཞིང་ས་ནས་མེ་ཏོག་ལྟར་བཞད་པ་ཡང་ངོ་མཚར་ཆེའོ་ཞུ་རྒྱུ་ལས་མི་འདུག་མོད། དཔེ་ཀློག་ལ་མི་དགའ་བའི་དགེ་རྒན་དག་གིས་དཔེ་དེབ་འདི་འོས་སྦྱོར་ཡང་བྱེད་མི་ཤེས་སྙམ་ན་སེམས་ཁྲལ་ལྷག་མ་ཞིག་ཡོང་གི་འདུག ཞར་ལའོ་ཁྲིའི་སྡོམ་ཐག་ཅེས་པ་འདི་ནི་རྩོམ་པ་པོས་བྱིས་རྩོམ་ལྟར་བྲིས་པར་གྲགས་ཀྱང་ང་ཚོའི་ན་གཞོན་རྩོམ་རིག་གི་ཁོངས་སུ་འཇོག་དགོས་པ་འདྲ། བརྗོད་བྱ་རྗེད་བྱེད་དང་བྱུང་རིམ། སྒྱུ་རྩལ་གྱི་མཚོན་ཐབས་སོགས་གང་གི་ཆ་ནས་ཀྱང་མཚར་སྣང་གིས་མ་བཏང་བར། མི་དང་སྲོག་ཆགས་བར་གྱི་འབྲེལ་བའི་ཁྲོད་གོ་བརྡ་འཕྲོད་མ་འཕྲོད་དང་རླུང་རྟ་རྒྱུགས་མ་རྒྱུགས་ཀྱི་ཚད་གཞིའི་བར་ནས་གོད་ཆག་སྣ་ཚོགས་འབྱུང་གིན་པའི་སྣང་ཚུལ་གསལ་བརྗོད། མིའི་རིགས་ཀྱིས་སྲོག་ཆགས་གང་ཞིག་ལ་ལྟོ་ལྡུད་པ་དང་གཅེས་པར་སྐྱོང་དོན་ཡང་རང་ཅག་གི་གཏམ་དཔེར་གཡག་ལ་གཅེས་སམ་ཁྲག་ལ་གཅེས་ཞེས་པའི་གནས་ལུགས་ནས་མ་འདས་མོད། ལེའུ་ཉེར་གཉིས་ཀྱིས་གྲུབ་པའི་དཔེ་ཆ་འདི་ཉིད་དུ། བཙས་མ་ཐག་པའི་ཕག་ཕྲུག་ཚོའི་ཁྲོད་ཀྱི་ཕག་ཕྲུག་ཚང་ལུད་པ༼ཁྱི་ཕྲུག་དང་ཕག་ཕྲུག་ཁྲོད་ལུས་སྟོབས་ཆེས་ཞན་པ་དེར་བཀོལ་བའི་ཐ་སྙད་ཅིག༽དང་བུ་མོ་ཆུང་ཆུང་ཧྥིར་གྱི་བར་ལ་དང་པོར་ཞི་ལ་དང་ཁྱི་གུ་སོགས་ཁྱིམ་ནས་གསོས་པའི་སྲོག་ཆགས་ལྟར་བརྩེ་བ་ཅི་ཡང་མེད་ཀྱང་། བུ་མོ་ཆུང་ཆུང་དེས་ཨ་ཕའི་ལག་གི་སྟ་རེ་འཕྲོག་ནས། འདི་ནི་དྲང་བདེན་ཞིག་མ་རེད། གཟུགས་པོའི་ཆེ་ཆུང་ཇི་ལྟ་བུ་ཞིག་ཏུ་སྐྱེ་མིན་ཐད་ནས་ཕག་ཕྲུག་རང་ཉིད་ལ་རང་དབང་མེད་པར་སྙམ། གལ་སྲིད་ང་ཡང་གཟུགས་སྟོབས་ཆུང་ཆུང་ཅན་ཞིག་ཏུ་སྐྱེས་ཡོད་ཚེ། ཁྱེད་ཀྱིས་ང་རང་བསད་ཡོད་དམ། ཞེས་པའི་གནས་ལུགས་ཀྱིས་ཕྱུག་པའི་སྐད་ཆ་དེར་རྒྱལ་ཁ་ཆེན་པོ་ཐོབ་པ་ལྟར་ཕག་ཕྲུག་ཅིག་བུ་མོའི་གསོས་ཕྲུག་ཏུ་གྱུར་པའི་གོ་རིམ་ནས་བཟུང་། ཕྱུགས་རའི་ནང་གི་སྒོ་ཕྱུགས་ཚང་མར་བརྩེ་བ་ཆགས་པའི་གོ་རིམ་ཞིག་དང་། རྩོམ་པ་པོས་རབ་བཏགས་ཀྱིས་བཞེངས་པའི་སྐད་ཆ་བཤད་ཤེས་པའི་བྱི་བ་དང་ཕག ངང་བ་དང་ངུར་བ་སོགས་ཀྱིས་ཚེ་སྲོག་དང་འབྲེལ་བའི་ལབ་གླེང་དང་། གཟུགས་སྟོབས་ཆེ་བའི་ཕག་པ་ཡང་སྟོབས་ཆུང་བའི་སྡོམ་ཞིག་གིས་བརྐྱབས་པའི་གོ་རིམ་ཁྲོད། བརྩེ་བ་དང་སྐྱོ་སྣང་། མིའི་རིགས་ཀྱི་བྱེད་སྟངས་ཡ་མ་ཟུང་དག་གསལ་བརྗོད་བྱས་ཡོད་པ་མ་ཟད། སྲོག་ཆགས་རེ་རེའི་དྲན་ལུགས་དང་སྤྱོད་སྟངས་ཀྱིས་འཚོ་བའི་གནས་བབ་གསལ་བརྗོད་དང་། གྲོགས་བསྒྲིག་པ་དང་མཉམ་ལས་བྱེད་པ། གནད་འགག་གི་སྐབས་སུ་སུ་ཞིག་གི་རོགས་རམ་མཁོ་བ། ནམ་རྒྱུན་བསམ་བློ་བཏང་ནས་ཐབས་ཤེས་འཚོལ་མཁན་དང་། ལྟོ་འདུན་འབའ་ཞིག་གིས་མི་ཚེ་འཁྱོལ་བཞིན་པའི་སྲོག་ཆགས་ཀྱི་བྱེད་བབ་སོགས་ཀྱིས་ང་ཚོར་གོ་བསྐོན་བློ་འགུག་གི་ནུས་པ་ལྡན་པའི་བསླབ་བྱའམ་འཚོ་བའི་སྣང་བརྙན་གསལ་བརྗོད་བྱས་ཡོད། འབྲི་སྟངས་འདི་ནི་ཤིན་ཏུ་དམིགས་བསལ་གྱི་བྱུང་རིམ་ཁྲོད་ནས་མི་སྣའི་སྣང་བརྙན་དག་མཚོན་པར་བྱས་ཡོད་པ་ནི། དཔེ་དེབ་ཀྱི་རྒྱབ་ལྗོངས་ཅུང་མི་འདྲ་བ་ལས་འཇོར་ཇི་ཨོ་ཝལ་གྱི་དཔེ་དེབ་གྲགས་ཅན་བྱོལ་སོང་གཞིས་ཀའི་ཁྲོད་ཀྱི་མི་སྣའི་སྣང་བརྙན་དང་མཚུངས། མ་གཞི་ནས་དེང་རབས་རྩོམ་རིག་ཁྲོད་ཆེས་གལ་ཆེའི་གོ་ས་བཟུང་ཡོད་པ་ནི་བརྩམས་སྒྲུང་ཡིན་པ་དང་། བརྩམས་སྒྲུང་དེ་ཡང་སྤྱི་ཚོགས་འཚོ་བ་དང་ཐག་ཉེ་བ་སྐོར་ཞིག་དང་། མཚར་སྒྲུང་། དངོས་བྱུང་ལོ་རྒྱུས་སོགས་ཀྱིས་བཟུང་ཡོད་པ་དང་། དཔེ་དེབ་འདིར་མཚོན་ན་ཡང་ནེའུ་ཡོག་དུས་བབ་སྟེང་དཔྱད་བརྗོད་སྤེལ་བའི་དེབ་གྲགས་ཅན་ཡིན་པ་གང་ཞིག་ལ། དཔྱད་བརྗོད་པས། བརྩམས་སྒྲུང་འདི་ནི་འཇིག་རྟེན་སྟེང་གི་གྲོགས་པོའི་བརྩེ་སེམས་སྤྱི་དང་། ལྷག་པར་དུ་མཛའ་བརྩེ་དང་སྲུང་སྐྱོབ། ཉེན་མཆོངས་དང་ངོ་མཚར། གསོན་པ་དང་འཆི་བ། ཡིད་ཆེས་དང་བསླུ་བྲིད། སྤྲོ་སྐྱིད་དང་སྡུག་བསྔལ། ད་དུང་འཚོ་བའི་རང་བཞིན་དང་འཚོ་བ་རོལ་སྟངས་སོགས་ཀྱི་སྐོར་ཡིན་ལ། བརྩམས་སྒྲུང་ཞིག་ཡིན་པའི་ཆ་ནས་བརྩམས་སྒྲུང་ཡང་དག་ཅིག་དང་། བརྩམས་སྒྲུང་འབྲི་སྟངས་ནི་ངོ་མཚར་ཆེ་ཞིང་ཁྱད་དུ་འཕགས་པའི་བརྩམས་སྒྲུང་ཞིག་གོ།། ཞེས་གདེང་འཇོག་གནང་འདུག་པ་གཅིག་པུས་ཀྱང་ཤེས་ནུས་སོ།།
ནུབ་གླིང་ལ་མཚོན་ན་བརྩམས་སྒྲུང་གྲགས་ཅན་མང་ཆེ་ཤོས་གློག་བརྙན་ཡོད་པ་དང་། གློག་བརྙན་དེ་ཡང་དར་མ་དང་བྱིས་པ་གཉིས་ཀའི་བལྟ་རྒྱུར་དབྱེ་ནས་ཕབ་བསྐྲུན་བྱས་པ་ཅུང་མང་བ་མ་ཟད། དཔེ་དེབ་དེ་ཡང་རྩོམ་པ་པོའི་ཆོག་མཆན་ལྟར་རྒྱས་འབྲིང་བསྡུས་གསུམ་དུ་བྱས་ཏེ་དཔར་སྐྲུན་བྱས་ཡོད་པ་རེད། ལམ་ཐག་རིང་བའི་ཕ་ཡུལ་ལ་མཚོན་ན། སའེ་རུབ་ཅེས་པའི་རྒྱ་གར་སྐད་ཀྱི་ནང་དོན་ལྟར་མིང་ལ་སེང་གེ་ཞེས་བཏགས་ཏེ་༢༠༡༦ལོར་གློག་བརྙན་དུ་བསྒྱུར་ཡོད་པ་དང་། གློག་བརྙན་ལ་སྐད་གྲགས་གང་མཚམས་ཆགས་ཡོད་པ་མ་ཟད། དཔེ་ཆར་མཚོན་ན་ཡང་དཔེ་དེབ་གྲགས་ཅན་དུ་གྱུར་ཡོད་པ་རེད་མོད། ལན་རེར་དཔེ་དེབ་ལས་གློག་བརྙན་ལ་བལྟས་ནས་ཡིད་ལ་འཛིན་བདེ་བ་དང་མི་སྣའི་སྣང་བརྙན་དང་དོན་གྱི་བྱུང་བ་སོགས་ལ་དམིགས་བསལ་གྱི་ཁྱད་ཆོས་ཡོད་ན་ཡང་། གློག་བརྙན་གྱི་འཁྲབ་སྟོན་པ་ཁོང་གི་གློག་བརྙན་འགའ་རེར་བལྟས་པས་ཡིན་ནམ་གང་ལྟར་གློག་བརྙན་ལས་ཀྱང་དཔེ་དེབ་ལ་བལྟས་ན་བྲོ་བ་ཤིན་ཏུ་ཆེ་བའི་ཚོར་སྣང་ཞིག་སྤྲད་སོང་། ཞར་ལའོ་ཁྲིའི་སྡོམ་ཐག་ཅེས་པ་འདིར་མཚོན་ན་ཡང་ན་གཞོན་ཀློག་དེབ་དང་བྱིས་པའི་ཀློག་དེབ། གློག་བརྙན་ལ་ཡང་འགུལ་རིས་སོགས་བཟོས་ཡོད་ཚོད་འདུག་མོད། དེ་དག་ལ་དངོས་སུ་བལྟ་བའི་སྐལ་བ་མ་བྱུང་བས་གང་ཡང་གླེང་རྒྱུ་མེད་ན་ཡང་། དེབ་འདིའི་འབྲི་སྟངས་དང་མི་སྣའི་སྣང་བརྙན། དོན་གྱི་བྱུང་བ་དང་སྒྱུ་རྩལ་མཚོན་ཐབས་སོགས་གང་ཅིའི་ཐད་ལ་ང་ཚོས་སློབ་སྦྱོང་བྱེད་དགོས་པ་མང་དུ་འདུག་པ་མ་ཟད། ང་ཚོའི་བརྩམས་སྒྲུང་དག་ལ་ཡང་ཐོལ་བརྒལ་གྱི་འགྱུར་བ་ཞིག་ཡོད་ན་ཅི་མ་རུང་སྙམ་པ་ནི་ནུབ་ཀྱི་དེབ་རེ་རེ་བཀླགས་ཚར་དུས་ཀྱི་ཚོར་བ་ཞིག་གཅིག་མཚུངས་དེའོ།།
༢༠༢༡ལོའི་ཟླ་༤པའི་ཚེས་༡༥ཉིན་མ་ཟིན་བཏབ་ཅིང་ཟླ་༨པའི་ཚེས་༣ ཉིན་བཅོས།